Уйимга қуввати 5 кВт бўлган қуёш электрстанциясини ўрнатганимга бир йил бўлди. Ўтган 12 ой давомида қуёш электрстанциям жами 6500 кВт/с электрэнергиясини ишлаб чиқарди. Март ойидан октябрь ойигача бир ойда ўртача 800-900 кВт/с, ноябрь ойидан февраль ойигача бир ойда ўртача 200-300 кВт/с электрэнергия ишлаб чиқарилди. Қуёш панеллари қор билан қопланган қиш қунлари ишлаб чиқарилган электрэнергия миқдори 0 кВт/с га, қуёшли баҳор-ёз ойлари эса (қуёш панеллари чанг билан қопланмаган кунлари) 35 кВт/с гача етди.

Бугун 2024-йил 28-февраль санасида (осмон булут) бир кунда 5.6 кВт/с, бир ойда 260 кВт/с, жами бир йилда эса 6537 кВт/с электрэнергия ишлаб чиқарилди.

Махус мобил иловада кўрсатилган маълумотга асосан бир йил давомида қуёш электрстанциям ишлаб чиқарган 6500 кВт/с электрэнергия натижасида табиатимизга салбий таъсир этаётган зарар миқдори камайди, яъни 2615 кг кўмир ёки 360 дарахт кесилиб ёқиб юборилишининг олди олинди!

Бизнинг ҳудудларда чанг кўп. Шу сабабли қуёш панеллари тез чанг бўлиб қолади ва бу омил кунлик электрэнергияни ишлаб чиқариш миқдорига салбий таъсир этади, яъни камаяди. Шахсий кузатувларим натижасида шу нарса аниқ бўлдики, агар қуёш панеллари чанг бўлса қуёшли баҳор-ёз кунлари бир кунда 5 кВт/с гача кам электрэнергия ишлаб чиқарилади. Масалан, қуёш панеллари тоза бўлса бир кунда 35 кВт/с, агар уларнинг устини чанг қопласа бир кунда 30 кВт/с электрэнергия ишлаб чиқарилади. Демак, қуёш панеллари сув билан ювилиб улар доим тоза бўлиб турса бир ойда қўшимча 5 кВт/с Х 30 кун = 150 кВт/с электрэнергия ишлаб чиқарилишига эришса бўлади!

Доно ҳалқимиз "Тозалик бор жойда, барака бўлади!", деб бежизга айтмаган!

©Блогим кузатувчиси Жаҳонгир Раимджановдан

🇺🇿@Otabek