Баъзида ўйлаб қоламан, била туриб қонунга зид, адолатсиз қарор чиқарган судьялар, фуқаролар бурнини қонатган ҳокимлик ходимлари барибир уйига бориб, чой-пойини ичиб, сўнгра ярим кечаси ўзи билан ўзи қолганда виждони берган саволларга жавоб бера олмай оғриниб ўтиришса керак а? Қилган иши ноҳақлик эканини ич-ичидан сезиб ойнага қандай қараркин?

Аъзо бўлинг:
👉@bahodirahmedoff👈

Қамчиқ довонига бургут қурган тадбиркор...

Анча вақтдан буён жамоатчиликнинг эътиборида бўлган иш кеча Олий судда кўриб чиқилди. Қамчиқ довонидаги бургутни биласизми? Ўшани қурган, йўллардаги энг оғриқли муаммолардан бири бўлган хожатхона ва бир зумда кафесини бунёд қилган тадбиркор (барча хужжатлари бўлишига қарамай) мулки чиқитга чиқиши мумкин бўлган иш.

Тадбиркорга Поп тумани ҳокимлиги қарори билан ер ажратилган. Ҳамма иш битказилгандан кейин муаммо чиқиб турибди. "Қамчиқавтойўл" тадбиркор устидан арз қилиб қолган. Ваҳоланки, ташкилотнинг ўзи вақтида хужжатларга имзо чекиб розилик берган. Арз натижасида ҳоким қарори бекор қилинган.

Тадбиркор учун Довонда қурилиш қилиш осон бўлмаган. Техника жалб қилиб, жарликларни тўлдирган. 1,5 км масофадан электр энергиясини тортиб келиш учун Поп туман электр тармоқлари корхонасидан рухсатнома олиб, бетон симёғочлар ўрнатган. Йўловчилар фойдаланиши, ҳожатхона ва дарахтларни кўкартириш ва ободонлаштириш учун 3 км масофадан тоза ичимлик суви тортиб келган. Машиналар бемалол тўхташи ва кириши учун тўхташ жойи барпо қилган. Қурилиш ишларини амалга ошириш учун 400 млн. сўм миқдорида пул сарфлаган.

Суд хужжатларига кўра, тадбиркор учун санитария-гигиена пункти (хожатхона) ва бир зумда кафесини қуриш учун Поп тумани ҳокимлиги томонидан 2016 йил ва 2018 йилларда қарор чиқариб берилган. 2019 йилда тадбиркорга қўшимча ҳудуд ажратилган. "Қамчиқавтойўл" ва бошқа ташкилотларнинг хатига асосан 2019 йил тадбиркор учун чиқарилган қарорлар бекор қилинган. Бироқ кейинчалик тадбиркорга суд ерини қайтариб берган.

"Қамчиқавтойўл" ўзи бу ишлар қоидага зид дегани билан, ўзи томонидан 2019 йил августда техник шарт берилган. Ўша йили июл ойида қурилиш кўздан кечирилиб "Қамчиқавтойўл" раҳбарияти томонидан далолатномага имзо чекилган (хужжатлар билан танишиб, шу ерига ҳайрон қолдим).

Бу худдики ҳамма хужжатлари берилиб, қурилишлар қилиб, карантинларни соғ ўтказиб олган тадбиркорни энди кўкрагига шамол текканда, шап этиб мулкини олиб қўяётганга ўхшайди.

Суд мажлиси жуда қизиқ бўлди. Ташкилот ўз важларини келтирди. Тадбиркор манфаатдор шахс сифатида судда қатнашди. Жавобгар эса Поп туман ҳокимлиги эди. Ҳокимлик юристи судга келиб жудаям шубҳали тарзда барча қилинган ишлар нотўғри қилганмиз, ҳокимликдан айб ўтган деб турибди-ю! "Қамчиқавтойўл" эса қурилиш мухофаза зонасида (25 метр) бўлган деган фикрни илгари сурди (ваҳоланки "Қамчиқавтойўл"ни ўзининг биноси 10-15 метр яқинликда турибди экан). Аслида судда даъвогар "Қамчиқавтойўл" ҳам, жавобгар ҳокимлик ҳам, прокурор ҳам тадбиркор зиддига фикр билдирди. Лекин судда адвокатлар яхшигина аргументлар берди. Бир қарасангиз суд мажлиси процессуал тарафдан ҳаммаси жойида кетди. Бироқ якунда Олий суд кутилмаган қарор қабул қилди. Тадбиркор мулки ноқонуний ажратилган деган тўхтамга келинди. Тадбиркор куйди.

Менда савол: демак тадбиркор ҳоким қарори асосида жой олса, "Қамчиқавтойўл" ҳам хужжатларга имзо чекиб берса ва тадбиркор чўнтагидан қурилишлар қилинса. Маълум вақт ўтиб, ҳокимлик қарори нотўғри бўлиб чиқиб, "Қамчиқавтойўл" ўзи имзо чеккан хужжатларга қарши бориб, суд уларни қўллаб қувватлаб, "еб қолган" тадбиркор бўлиб қолаверарканда? Ҳокимлик вакили келиб нотўғри қилганмиз деб турса, давлат иши ўйинчоқ экан-да. Шунақалар ишлаяптими ҳали давлат ишида?

Масалаҳатим: сизга Поп туман ҳокими қарор чиқарса, Қамчиқавтойўл хужжатга имзо чекса, ишонманг. Бургут қурган тадбиркор ҳолига тушиб юрманг. Беайб "айбдор" бўлиб қолманг.

Ташқарига чиқиб, совуқ ноябр ҳавосида баттар тушкунлик қуршади. Ўзимга келиб олиш учун озроқ сайр қилиш лозим. Мен ҳали бу давлатда яшашим керак!

Аъзо бўлинг:
👉@bahodirahmedoff👈