Ўзбекистон Республикаси Ҳуқуқни муҳофаза қилиш академияси бошлиғининг ўринбосари, юридик фанлар доктори, профессор А.С.Одинаев, юридик фанлар номзоди, доцент Ш.Б.Мустафаев ҳамда С.Ғ.Гайбуллаев Қарши шаҳар алоҳида таълим эҳтиёжи бўлган болалар учун 17-сонли ихтисослаштирилган мактаб-интернатида бўлишди.

Ташриф доирасида меҳмонлар мактаб-интернат ўқувчиларининг яшаш ва таълим олиш шароитлари, ўқув жараёнлари ҳамда ташкил этилган спорт ва касб-ҳунар тўгараклари фаолияти билан яқиндан танишишди. Ўқувчилар томонидан тайёрланган ижодий чиқишлар ва амалий ишланмалар меҳмонларда катта таассурот қолдирди.
Учрашув давомида ўқувчиларни спорт ва касб-ҳунар тўгаракларига кенг жалб этиш орқали уларнинг бўш вақтини мазмунли ташкил этиш, бандлигини таъминлаш ҳамда олий таълим муассасаларига киришлари учун мустаҳкам замин яратиш муҳимлиги алоҳида таъкидланди.
Шунингдек, бугунги шиддат билан ривожланаётган жамиятда алоҳида таълим эҳтиёжи бўлган ёшларга янада кенг имконият ва шароитлар яратиш, уларни ҳар томонлама қўллаб-қувватлаш долзарб вазифа экани қайд этилди.

Меҳмонлар ёш авлодни ватанпарварлик руҳида тарбиялаш, уларнинг қалбида она Ватанга садоқат, миллий қадриятларга ҳурмат туйғуларини мустаҳкамлаш, шунингдек, турли салбий иллатлар ва жиноятчилик таъсиридан асрашда таълим муассасалари, ота-оналар ва жамоатчиликнинг ҳамкорлиги муҳим ўрин тутишини таъкидлашди.

Ташриф якунида мактаб-интернат жамоасига яратилаётган шароитларни янада яхшилаш, ўқувчиларнинг замонавий билим ва касб-ҳунарларни эгаллашлари учун қўшимча имкониятларни кенгайтириш борасида таклиф ва тавсиялар билдирилди.

🇺🇿@Otabek