بالرغم أنني أعمل في هذا العمل منذ فتره كبيره ورأيت الكثير واكتسبت خبره منه ، واعلم الحكم الشرعي في وجوب حضور ولي للزوجه وموافقته عند "جمهور أهل العلم " ، درست هذا الحكم جيدا في دراستي الازهريه ،الا أنني لم أشعر بأهميته "نفسيا" الا في ذلك اليوم ، بعد أن جلس والد العروس وتهيأ ليكون وكيلها أراه يمسك بطاقته الشخصيه ويلوح بها من بعيد كي اطلع عليها ، ويضع يده في يد العريس ويبدأ العقد .. لكن ما حدث كان خلاف ذلك فإنه قد بدا للجميع " بحسن نيه وقصد " أن يجعلو العم هو الوكيل لأن الاب يجهل الكتابه ولا " يسمع " بحكم مشاكل السن والنطق

راقبت عينه جيدا وهم يفهمونه أن اخوك هو من سيحل محلك في وكاله العروس ابنتك ، رأيت عينه لمعت ثم انطفئت ونظر الي ابنته وكأنه لا يصدق ، كأن جزء من روحه سيخرج وكاد أن يبكي وهو يهز رأسه بأنه موافق علي قرارهم

لكنني لم احتمل فتدخلت واوجدت حلا حفظ له فرحته ولم يحرمه من وكاله ابنته والحمد لله

حينها شعرت أن الله ما حكم حكما ولا شرع أمرا الا وهو يراعي الجانب النفسي للعباد .. لانه يعلم جيدا قلوب من خلق

سبحان الله حين شرع الله وكالة الاب لابنته في الزواج ليس تعنتا ولا تسلطا من رحل ع ابنته وليس لأمر مادي فقط وهو حفظ حقوقها والإختيار لها بل لصيانه قلب اول رجل احبها قبل أن يحبها أحد حفاظا علي قلبه أن يكسر في مثل هذا اليوم أويشعر أنه بلا قيمه ، بعد أن كان صدره وعمره لبنته فداءا

#يوميات_مأذون
Ahmed badr

س: عاوزين نكتب كتابنا ولسه فاضل علي جوازنا سنه بس يا شيخنا مش قادرين نصبر .

ج : يكنش فاكر انك لما تكتب كتابك هتقضيها سيكي ميكي ، انت غلطان يا حبيبي كتب الكتاب لا يبيح لك الدخول ابدا بها إلا بأذن وليها ،
وانا احذر اي عاقدين من الدخول في فتره العقد بتحصل كوارث اسمعوا كلام عمو المأذون ، وايضا احذر من عقد العقد قبل موعد الزواج باكثر من شهر ،

يكفي اعرض عليكم مشكله واحده من عشرات ما وصلني ، وهو بعد أن دخل بها في فتره العقد اختلفا فطلقها فلما قالت بس انت دخلتي بيا قالها ااثبتي !!
شوفي مين اللي ضحك عليكي

#يوميات_مأذون
احمد بدر الدين
#استشارات_زوجية

اشر النساء من منعت اولادها عن طليقها وسممت أفكارهم وحرضتهم ضد أبيهم ..

وافجر الرجال من ترك أولاده ولم ينفق عليهم نكاية في طليقته وخاض في عرضها بالباطل ليخدر ضميره واستخدم الاولاد سلاح يكدر به صفو حياتها

اتقوا الله في عيالكم وفي أنفسكم

#يوميات_مأذون

لو مكتوب كتابك واتخانقتي انتي وهو وقالك انتي طالق ، وانتي علشان بتحبيه مقلتيش لأهلك يمكن يعقل ويرجعك ، وفعلا حنتوسه العسل قالك حقك علي قلبي يبنت قلبي انا رجعتك لعصمتي ، وانتي بقي فرحتي اوي خالص جدا

احب اقولك فوقي المطلقة قبل الدخول اللي هي يعني مكتوب كتابها زي سيادتك ملهاش الا طلقه واحده بس لو خدتها بتاخدها ف دماغها تنهي العلاقه فورا وملهاش رجعه لنفس الزوج الا بعقد جديد ومهر جديد

اصحي لتبني عيشتك علي حرام

#يوميات_مأذون
احمد بدر الدين

لو مكتوب كتابك واتخانقتي انتي وهو وقالك انتي طالق ، وانتي علشان بتحبيه مقلتيش لأهلك يمكن يعقل ويرجعك ، وفعلا حنتوسه العسل قالك حقك علي قلبي يا بنت قلبي انا رجعتك لعصمتي ، وانتي بقي فرحتي اوي خالص جدا

احب اقولك فوقي المطلقة قبل الدخول اللي هي يعني مكتوب كتابها زي سيادتك ملهاش الا طلقه واحده بس لو خدتها بتاخدها ف دماغها تنهي العلاقه فورا وملهاش رجعه لنفس الزوج الا بعقد جديد ومهر جديد

اصحي لتبني عيشتك علي حرام

#يوميات_مأذون

راكب جمب واحد صاحبي محترم جدا سامعني برد علي اتصال فيه استشاره زوجيه ..
فبيقولي يا شيخنا عاوز احكيلك موقف غريب جدا

قلتله قول ولاول مره احس اني مهما اكتسبت خبره لسه هتعلم

قالي مره رجعت البيت بعد يوم مرهق وكل أملي اكل وانام لقيت مراتي محضره شنطه هدومها وبتقولي انا هسافر دلوقت العين السخنه لوحدي لا انت ولا العيال ولا عاوزه حد !! ( طبعا هي لا هتسافر ولا هو هيسمح هو مجرد اعتراض مجنون علي زهقها )
قالي لو انت مكاني هتعمل ايه ؟!
الصراحه لسه بقول في نفسي ده انا هعمل واسوي &&؟/+

لقيته بيقولي قلتلها طيب يلا اوصلك وخدت العيال ودتهم عند جدهم وقعدت اتكلم معاها هتاكلي إيه هناك مفيش اكل تعالي نروح الماركت اشتريلك شويه حاجات للسفر وفعلا دخلنا الماركت اشتريت اتنين بيبسي وخرجنا نتكلم في العربيه وفضفضت شويه من زهقها من العيال ودوشتهم و.... وفكت وضحكت
وروحنا واتعشيت ونمت .. قالي لو كنت قفشت وخدت الموضوع علي كرامتي كنت هطلقها ملهاش حل تاني

زوجاتنا غلابه يا شيخ بكلمه بيتراضوا وبالحب بيرضو ، بتغلبهم العاطفه ولو الراجل مكنش حكيم ومحب البيت مش هيستمر

قلت في نفسي انت عبقري يبني الله يديم عليك حكمتك ،

#يوميات_مأذون
احمد بدر الدين

ركبت تاكس لقيت السواق بيقولي انتااااا اوعي تكووون مأذون 😂
قلتله ليه طيب قالي علشان مش بتحذر الناس قبل الجواز
بعدها قالي بهزر انا اسعد واحد في الدنيا ، تعرف يا شيخ انا فضلت خمس سنين أتقدم لزوجتي دي واترفض ، تعرف اترفضت كام مره ؟!
قلتله كام ؟ قالي 42 مره .. انا والله معدتش هي اللي عدت وقالتلي
سالته وياتري بعد الجواز كانت تستاهل الحرب والتعب ده ؟!
قال شيلاني من ع الارض شيل ، انا بعشق الهوا اللي بتتنفسه
سألته من وجه نظرك ازاي الواحد يسعد زوجته ؟!
قالي .. يحبها بجد

#يوميات_مأذون
احمد بدر الدين
#تاكس_المأذون

في مرة رحت طلاق ، ناس محترمه وتفكير راقي بكل هدوء اختلفوا وبكل ود قررا ميكملوش سوا ، وقبل الطلاق حلفوا عليا واصروا اني لازم اتغدي معاهم وحطوا الاكل
يا جماعه الخير ازاي اكل في موقف زي كده ده انا مبرضاش اشرب شي في كتب الكتاب .. اروح اكل في الطلاق طب ازاااي يا جدع

المهم بعد إصرارهم اكلت والله الاكل كان تحفه ، وتمر الايام وربنا يصلح حالهم وارجعهم لبعضهم واكتب كتابهم من تاني

افتكرت ساعتها ايه ربنا قالها في سوره الطلاق " ومن يتق الله يجعل له مخرجا "
قال المفسرون من يتق الله حين طلاق زوجته يجعل الله له مخرجا وسبيلا لاراجعها ويوفق الله بينهما ..

#يوميات_مأذون