#قصص_وروايات ✏

#قصص_الصباح 🌞

@novels_stories
سمع أحد السلاطين بأن في السوق جارية سعرها يتجاوز سعر 100 جارية!
فأرسل السلطان يستقدمها ليرى ما يميزها عن سواها؟!
فوقفت أمامه وشموخها لم يعهده من الجواري الاخريات ..فسألها لماذا سعرك غالي يا فتاة؟!
اجابت لأني اتميز بالذكاء.!
أثار كلامها فضوله وقال سأسألك لو أجبتي أعتقتك ولو لم تجيبي قتلتك؟!
ما هو أجمل ثوب وأطيب ريح وأشهى طعام وأنعم فراش وأجمل بلد؟!
التفتت الجارية إلى الموجودين وقالت حضروا لي متاع وفرس فإني مغادرةٌ هذا القصر وأنا حُرة .!
أما أجمل ثوب فهو قميص الفقير الوحيد الذي لايملك غيره فأنه يراه مناسباً للشتاء والصيف.
أما أطيب ريح هي رائحة الأم حتى لو كانت نافخة النار في حمام السوق.
أما أشهى طعام ما كان على جوع فالجائع يرى الخبز اليابس لذيذ.
أما أنعم فراش ما نمت عليه وبالك مرتاح فلو كنت ظالم لرأيت فراش الذهب شوك من تحتك.
سارت نحو الباب فناداها السلطان لم تجيبي سؤالي الاخير؟!
إلتفتت وقالت :أجمل بلد هو الوطن الحر الذي لا يحكمه الجهلة.
أجادت الجواب فنالت حريتها.


نعم صدقتِ أجمل بلد الوطن الذي لا يحكمه الجهلة...!!


#صباح_الخير

#قصص_وروايات ✏

#اللغز_المجهول🔍

الحلقة السادسة
@novels_stories

تركت عمتي بالغرفة وسكرت الباب غرفة بابا عليها وحكيتلها مابتطلعي من هون الا لما تطلع روحك .. ورحت أشوف ياسمين .. اتصلت معها وانا بالسيارة وحكيتلي نلتقي بكوفي شوب بنعرفه سوا .. رحت عالكوفي شوب وقعدنا وانبسطت فيها وقبل ما اشوفها رحت جبتلها ورد وواستني بوفاة امي وضلت ماسكه إيدي وجابتلي هديه ساعه فخمة .. انبسطت بس شفتها بس لما قعدت معها ضليتني أسمع أفكار الناس والشباب والبنات اللي بالمكان ماقدرت اتحمل ولا قدرت اركز معها شوي .. كل شوي تحكيلي شو مالك .. كان هدف من أهدافي كمان اني اسمع شو بدور جوا راسها بس ماقدرت اركز بسبب اللي حوالنا .. واحد بضحك عحبيبته ووحدة بتكذب عاللي بتعرفه وواحد بده يستغل طيبة بنت ويعزمها على بيته .. أفكار وشغلات سيئة كانت فبالهم والشغلات المنيحه كانت قليلة .. صرخت بوجهها وحكيتلها خلينا نطلع من المكان بسرعه .. حكتلي دايماً بنيجي هون شو اللي صار هسه .. حكيتلها هيك بدي مكان فاضي.. حكتلي ليه يعني ؟؟ حكيتلها خلص ردي عليه .. قعدنا بالسيارة وسكرت كل الشبابيك حتى ابعد اي حدا بيجي بوجهي واركز معها بس .. بلشت تطلع عليه وتحكي براسها (( اشتقتلك كتير )) .. حكيتلها وأنا كمان .. انصدمت واتطلعت فيه حكتلي شو وانا كمان!؟ .. حكيتلها حسيت بعيونك انك بتحكي اشتقلك .. حكتلي اه والله حكيت براسي اشتقتلك .. شو متغير عليك لحتى صاير عم تفهمني بسرعه بهالفترة اللي غبتها ؟؟ .. حكيتلها ولا شي بس زاد حبي لألك .. حكتلي عن ايطاليا وشو اللي صار معها .. كانت مركزة بالحكي وماكنت بسمع شي براسها.. بس فجأة سكتت وحكت (( كيف بدي أحكيله اللي صار معي !! )) حكيت براسي شو اللي ممكن يكون صاير معها ومخبيته .. سألتها مالك حبيبتي صاير معك اشي ؟ حكتلي لأ أبداً بس تعبانة كتير وحبيت اشوفك قبل ما اروح ارتاح ومش نايمة أبداً ياريت توصلني على البيت .. بالطريق ضلت تحكي انه بس نخطب بنروح نعيش بإيطاليا والحياة هناك غير ورومانس كتير وخصوصاً فينيسيا.. حكيتلها بنروح .. وبس كنا نسكت ونوقف عإشارة تحكي براسها (( برغم اني مشتاقيتلك ومشتاقة لكل يوم عشناه سوا بس مش قادرة أحكيلك اني مش طايقتيك )) أنا سمعت هيك ونصدمت وشوي وكنت رح اعمل حادث .. معقول ياسمين بتحكي هيك ؟؟؟ ليش مش طايقيتني .. ما أنا ياما وقفت معها وحبيتها وعشنا أحلى أيام بالجامعه لحد ما اجا اليوم اللي حكت فيه حابة تنتقل بدون سابق إنذار وكانت حجتها انها مش حاسه انها عم تستفيد من تخصصها وفي جامعات افضل .. !! معقول في سبب تاني لحتى خلاها تطلع من الجامعه ؟؟ بس ليش ؟؟ أنا بعرف انها بتحبني ليه مش طايقيتني ؟ تغيرت تعابير وجهي تجاهها وماقدرت اتطلع فيها وحكيتلها هاي وصلتي بيتك أنا مستعجل وراسي بوجعني.. حكتلي ليه تغير مزاجك فجأة شو في ؟ حكيتلها ولا شي بس مشاكل بالبيت وما لحقت احكيلك كل شي خليها ليوم تاني.. حكتلي اوكي باي ودخلت على البيت .. وأنا مشيت بالسيارة وضليتني أفكر ليه بتكون حكت هيك .. لحد ما نمت بالسيارة وأنا أفكر .. وفجأة صرت أحس في حدا قبالي عالكرسي الأمامي قاعد جنبي وبهمس بداني .. بحكيلي في شغلات لسه كتير رح تعرفها ورح تكتشفها بكل حدا بتعرفه .. اصحى منيح وركز منيح .. وياسمين بتضحك عليك يا ذكي.. كان الصوت همس وصحيت مرعوب وما لقيت حدا جنبي برغم اني حسيت بنفس الشخص اللي بحكي بأذني متل ما كنت احسه جنبي وعم بحكي معي بتختي ..
@novels_stories
ماكنت قادر انزل عالشارع لأنه كل ما اقرب من حدا بصير اسمع أفكاره .. مشاكل وهموم والفرح جوا الناس قليل .. وانا الهم راكبني ومش تاركني .. مش قادر اسمع هموم غيري والشي اللي عم بحسه بحكي معي عم بخليني أخاف أكتر وأفكر أكتر .. ضلت عمتي بالغرفة وصارت تطبل على الباب وبابا بسابع نومه وهيه ماسكتت وبدها ميرال تفتحلها الباب .. كل شوي تطبل وتصرخ افتحيلي افتحيلي .. بالآخر فتحتلها ميرال الباب اختصار للشر والمشاكل .. طلعت من الغرفة وصارت تسب وتحكي هيك اخوكي بعمل فيه وبسكر عليه الباب طيب والله لأفرجيه .. سالتها ميرال ليه هيك عمل ؟ حكت بدي أروح .. وقبل ماتروح رن الجرس.. وراحت فتحت ميرال .. ولا هوه سامر زوجها .. شافته عمتي وحكت لميرال ايوا ايوا مين هاد ؟ سكتت ميرال وسامر سكت .. صرخت مين هاد ؟ اجا حكالها سامر أنا زوجها ! .. انصدمت عمتي وحكت شو ؟؟ متزوجه وماحدا بعرف من العيلة ؟؟ وانا بقول هالضربات اللي بوجهك من شو .. حكيتيلي واقعه عن الدرج مش هيك .. هههههه عاملة عملة حبيبتي صح ؟؟ وطلعت من البيت .. صارت ميرال تبهدل بسامر وتحكيله ليه حكيتلها هيك هلأ رح تفضحنا عمتي حكالها لازم الكل يعرف احنا متزوجين رسمي ومش لازم نخاف من حدا .. حكتله بس الناس مابتعرف انه احنا متزوجين والشغلة اجت فجأة الكل رح يحكي انها ميرال عاملة عمله .. وأجيت انا عالبيت وخبروني بكل شي صار ..
@novels_stories
حملت حالي ورحت على بيت عمتي وزوجها بهدلني وحكالي شو عامل مع عمتك

حتى جايه عم تسب عليك ؟؟ حكيت يارب ماتكون حكت اشي .. اخدتها على الغرفة وسكرت عليها .. حكتلي اسمع عليه .. في حال حدا عرف اني سرقت من بيت اخوي المصاري اللي بخزانته وذهب امك .. كل العيلة رح تعرف انه اختك متزوجه بالسر واكيد الكل رح يحكي عليها .. حكيتلها كيف الك قلب تحكي على بنت اخوكي .. مابتخافي على بنتك .. قالت بنتي مربية احسن ترباية وانا نبهتك في حال حدا عرف عن السرقة الكل رح يعرف شو عاملة اختك وهاي انا نبهتك .. نصدمت بكلامها وقبلت طلبها وطلعت من البيت .. رحت عالبيت وضربت ميرال وسامر صار يدافع عنها واخدها من البيت وحكالي شكلك ناوي تخلص عليها متل ماخلصت على امك ؟؟ حكيتله شو ياواطي ؟ انا اللي خلصت على امي ؟؟ حكالي الطب الشرعي ما لقى دليل للشي اللي صار مع امك وحكوا بس صدمة عصبية .. انت بتكره الكل وحقدك عالجميع ماشي فمش بعيد تكون انت اللي قتلتها .. ضربته وطردته هوه واختي وكسرت نص اثاث البيت .. ودخلت عند بابا .. كان عامل حاله طبيعي والزهايمر مش جاييه .. عصبت عليه وصار يحكيلي شو في يا ابني ليش معصب .. كنت بدي اصرخ بوجهه واحكيله ما مليت من لعبتك ؟ بس ماكان عندي دليل كان بدي امسك عليه شي بس لحتى اخليه يعترف ليه هيك عمل ولعب علينا انه مريض .. ولأني ما بدي اكشف اني بقرأ افكاره .. استنيت يصير شي .. فكرني اني طلعت من البيت وأنا ضليتني موجود وفجأة شفته عم ببكي بغرفته وصار يطلع شغلات من الخزانه صور لإلنا وصورة لماما .. مسك صورة ماما وسمعته شو عم بحكي إلها .. ما كان بحكي براسه لأنه فكرني اني طلعت كان عم بحكي بصوت عالي وبقول .. اختي طمعانه فيه وبدها ياني أموت وبنتي فضحتني وتزوجت وابني بكرهني .. وانتي متتي .. بس تعرفي أنا عمري ماحبيتك لأنك ضحكتي عليه وكنتي طول الوقت عم تضحكي عليه وتستغفليني .. حكيت شو عم بحكي ؟؟ امي بشو استغفلته ؟ فجأة صار يمزع الصور.. زاد شكي انه هوه اللي قتلها .. اتصلت عمتي بهاللحظة على تلفوني .. ولحسن الحظ كنت عاملة رجاج .. رحت عالغرفة رديت عليها وحكتلي.. زوجي سمع شو كنا نحكي وعرف انه اختك تزوجت عرفي وقرر يفضحها .. حبيت اخبرك عشان ما تحكي انه انا اللي فضحت الموضوع .. صرت اصرخ وسمعت صوت بأذني بحكيلي .. (( داني الكل رح ينهوك قبل ماتعرف الحقيقة عشان هيك انهيهم ! )) .. صرخت وحكيت اطللللللللللع من رااااااااااااااسي.. وطلعت برا البيت .. صرت اسمع صوات الناس المزعجة براسي وحملت حالي ورحت لزوج عمتي .. اتصلت عليه ياسمين وحكتلي أنا رجعت نقلت عالجامعه مرة تانية وجاية بكرا خليني اشوفك .. فهمتها اني بمر بظروف وبكرا بشوفها .. ووصلت لبيت عمتي ورنيت الجرس.. طلعتلي بنت عمتي الكبيرة حكيتلها وين اهلك ؟ حكتلي طلعوا على ناس ومارح يطولوا تعال ادخل استناهم انا لحالي.. حكيتلها مارح اصبر ليجوا احكيلي مين الناس.. حكتلي مابعرف ماحكولي مين اذا بدك ادخل استناهم اذا موضوعك ضروري .. حكيتلها طيب رح استناهم لأني مارح أقدر أصبر ودخلت جوا....
@novels_stories
#يـتـبـع

#قصص_وروايات ✏

#اللغز_المجهول🔍


الحلقة السابعة

@novels_stories
دخلت عند بنت عمتي ورديت عليها .. ماكنت بعرف لشو بتخطط وليه مُصرة ادخل استناهم ولأني كنت لازم أستناهم .. خفت تروح هيه وزوجها عند ناس ويفضحوا ميرال .. كان لازم احكي من أول انها تزوجت بس ماقدرت .. اضطريت اخبي لوقت ما نعمللها عرس ونحكي انها تزوجت .. باللحظة اللي دخلت فيها عالبيت لحتى استناهم سكرت بنت عمتي باب البيت علينا وماكنت حاسس أنا .. قعدت قبالي وصارت تحكيلي شو اللي بدك ياه منهم احكيلي لحتى مش قادر تستنى ؟ حكيتلها موضوع ضروري ومش ضروري تعرفيه .. صرت أقرأ افكارها واحنا ساكتين كانت تحكي براسها (( لازم يعرف هلأ يامرام .. احكيله شو اللي فبالك لأنك مارح تقدري تلقطيه بمكان تاني غير هلأ احكي وقوي قلبك )) حكيت ابصر شو اللي بدها تحكيه !!؟ .. بلشت تتطلع فيها أكتر وأكتر وتحكي براسها (( مش عارفة احكي ولا لأ .. بس اذا ماحكيت هلأ رح تروح هالفرصة ومارح اقدر احكيله ورح يختفي لأني مابشوفه كتير.. فرصتك هاي احكي يامرام احكي)) .. وفجأة حكتلي .. داني بدي احكيلك شي.. حكيت تفضلي احكي .. حكتلي خلينا نتسلى شوي ليجوا أهلي بما انك كتير حابب تشوفهم ومش قادر تروح .. حكيتلها احكي تفضلي هيني بسمعك .. حكتلي خلص خلص مابدي .. قلتلها متل مابدك .. ورجعت تحكي براسها (( ولك ياهبله احكي واخلصي من متى انتي بتخجلي ولا بتخافي )) .. حكيت براسي أنا طبعاً من متى مهيه ترباية امها القوية .. وفجأة حكتلي.. داني .. أنا من زمان معجبة فيك .. حكيت شو ؟؟؟ حكتلي أه وبحبك كمان .. حكيتلها شو بتحكي انتي أنا بشو وانتي بشو .. مش وقت حكي المراهقة والهبل هسه .. حكتلي هسه هيك ؟! هسه صارت مشاعري حكي مراهقة وهبل .. انا من زمان ومن سنين مخبية هالشي وهسه جاي تحكي هيك .. حكيتلها كل اللي عمرك ياهم 17 سنة يعني من متى من سنين مخبية هالأشي من لما كنتي صف خامس حبيبتي ؟؟ حكتلي شو حكيت عيد ؟ حكيت حبيبتي ؟؟ حكيتلها حلي عني عاااد .. وقمت لأطلع من البيت لقيت الباب مسكر .. حكيتلها ليه مسكره الباب ؟؟ حكتلي بالأول احكيلي ليه هيك حكيتلي وكسرت مشاعري .. ليه هيك عاملتني .. مافي طلعه لتحكيلي ليه هيك حكيت .. حكيتلها لأنك صغيرة ومش عارفة شو بتحكي وافتحي الباب وخليني اطلع .. وفجأة صارت تحكي حكيتلك مافي طلعه يعني مافي طلعه .. حكيتلها انا راسي بوجعني ومش نايم وممكن هسه اضربك ستين كف اذا ما اعطيتيني مفتاح البيت .. حكتلي مافيك تعمل اشي .. وصارت تهرب مني وانا احكيلها وين المفتاح .. وفجأة مسكتها وصرت اطلع من المفتاج من جيبتها وصارت تصرخ .. بهالوقت أجت عمتي وزوجها ولقيو باب البيت مسكر .. صارو يحكو شو بصير مع البنت ليش بتصرخ .. يا مرااام مرااااااام افتحي الباب بسرعه .. وانا احكيلها عجبك شفتي هاي اجوا اهلك .. هاتي المفتاح وهيه تصرخ وتصرخ .. احكيلها مالك انجنيتي .. وبعد دقايق هربت عغرفتها ووقع منها المفتاح .. فتحت الباب وطلعلي ابوها صار يصرخ عليه ويحكيلي شو كنت تعمل لبنتي يا واطي ياحقير.. اعتديت عليها وعمتي صارت تصرخ وزوجها سكتها وضربها وسكروا الباب وحكولي شو عملت بالبنت بنحكيلك .. شو ساويت قول .. دخلوا عليها عالغرفة كانت ممزعه اواعيها وبتبكي وبتحكي اعتدى عليه الحقير الواطي الله لا يسامحه هالكلب.. @novels_stories
وانا نصدمت من كلامها .. صارت عمتي تحكي طبعاً مهمه بلا شرف اللي بطلع من اخته بطلع منه هالحقير الواطي .. بهالوقت ضربت عمتي وزوجها حكالي شو بتعمل ياحقير شو عملت!!!؟ بتضرب مرتي واعتديت على بنتي .. والله لأخلي كل الدنيا تعرف بشرفكم الواطي واذا بكرا ما بتكتب كتابك على مرام لأكون فاضحك وفاضح الدنيا كلها فيكم وبعيلتكم .. حكيتلهم بنتكم كذابة وواطية واذا مش مصدقين خدوها عطبيب واعرفوا انها كذابة .. بس عرفت ماحدا رح يصدقني .. حملت حالي وطلعت من البيت وهمه يصرخوا عليه وبدهم يرجعوني عشان اتزوجها .. هربت من البيت ونزلت وحكيت هالحقيرة شو عملت الله يلعنها شو واطية .. رحت عالبيت وصرت احكي لبابا كل شي حكيتله هيك عملوا شو بدي اعمل .. كان وقتها عامل حاله طبيعي .. حكيتله قلي شو اعمل .. قلي ماتخاف رح يعرفوا الحقيقة .. دير بالك من عمتك يا ابني لأنها متل ماسرقتني بتزوجك غصب لبنتها .. انا استغليت الكلمة اللي حكاها وقلتله انت كيف عرفت انها سرقتك ؟؟ ما انت كنت بحالة الزهايمر .. صفن فيه وصار يحكي شو يا ابني ؟؟ قلتله جاوب يا بابا ؟؟ قلته شو بتعرف كمان احكي ؟؟ ماقدر يهرب من سؤالي برغم انه كان رح يهرب للحمام .. قلتله انت بتعمل هيك عشان تضحك علينا ليش عملت هيك يا بابا شو بدك تعرف ؟؟ فهمني ؟؟ قلي بنحكي بعدين انا تعبان حكيتله على راحتك أنا بدي اطلع على الجامعه وبس ارجع رح تحكيلي كل اشي ياريت ماتخبي عني .. بدي اعرف ليش هيك عملت.. وانا طالع شفت صورنا ممزعه بسلة الزبالة .. اخدتهم لبابا وحكيتله .. ممزع صورنا كمان وصور أمي ؟؟ ليش هيك ؟؟ صار يبكي .. قلتله خلص مابدي اسمع ولا اشي ..

@novels_stories
خليها بس ارجع من الجامعه وبتحكيلي كل شي عندك .. رحت عالجامعه واستنيت ياسمين لتيجي بس تأخرت حكيت وين ممكن تكون .. صرت ارنلها تفصل عليه .. حكيت الكلام اللي سمعته براسها خوفني وأكيد احساسي بقلي انها عم تعمل اشي من وراي .. شو اللي عم تعمله وليه حكت انها مش طايقيتني برغم انها مشتاقيتلي ؟؟ شو عم تخطط ووينها .. كل ما ارنلها تفصل .. بهالوقت قعدت لحالي وصرت افكر شو ممكن اعمل بالعلقة اللي علقتها مع بنت عمتي الحقيرة .. وليه هيك عملت .. ممكن يفضحوني انا واختي ولا شو رح يصير .. صرت احس بوجود الشخص التاني جنبي مرة تانية لأني لحالي واسمع صوت خافت متل كل مرة عم بحكيلي (( دير بالك من اللي حواليك )) .. صرت اصرخ خلص خلص خلصصصصص بهاللحظة اجا عندي صديق بعرفه بالجامعه اسمه مجد .. حكالي مالك بتصرخ شو في ؟؟ حكيتله ولا شي بس تعبان شوي .. قلي طيب اشكيلي حكيتله مافي شي مجد بس حبيت اقعد لوحدي .. قعد جنبي غصب عني .. وصار يتطلع عليه وصرت اسمع شو بحكي براسه كان يحكي (( ياريت يا داني لو تحس فيه )) حكيت شو ماله هاد ؟؟ ليه هيك بحكي وشو احس فيه ؟ حكيتله شو مالك بتتطلع فيه هيك مالك ؟ حكالي ولا شي بس عازز عليه انك زعلان وحابب تفضفضلي .. بلشت احكيله عن موت امي وحزني عليها وبدون ذكر تفاصيل اختي او شي متل هيك لأنه صحابي مابعرفوا اللي صار بين سامر واختي وانا نبهته مايحكي لحتى ننشر موضوع ارتباطهم بس عمتي فضحت القصة .. ضليت اشكيله وسامعه بحكي براسه (( من زمان كان نفسي اعترفلك بشي بس مش قادر .. اعترفله يا مجد اعترفله )) حكيت شو ممكن يكون بده يعترف هاد التاني .. علاقتي فيه عادية ومش قوية كتير بس شو ممكن يكون مخبي عني .. !!؟؟ بعد ماخلصت كلامي وقبل مايحكي شي سمعته براسه عم بتغزل فيه وبعيوني (( عيونك بجننوا يا داني ..يسعد روحك )) .. فهمت وقتها شو بفكر مجد .. كنت مفكره شخص عاقل وكان مبين عليه جد هيك .. بس للحظة عرفت انه مريض .. معجب فيه ومش قادر يحكي هالشي .. اكتشفت من خلال قراءة افكاره انه ممكن اي شخص حوالينا يكون هيك ومايكون مبين عليه .. اكتشفت هالشي براسه وماقدرت احكي معاه عشان ما ابهدله وازعله لأني سمعته بحكي براسه (( لو حكيتلك رح تكرهني ورح تسبني ياريتني متت قبل ما احبك وياريتك تعرف اني مريض نفسي ومافيه اعمل شي )) بعد ماسمعت هالشي حملت حالي ومشيت واتطلعت عليه نظرة غريبة وحكيتله ياريت ماتقعد معي لأني بدال ما افضفضلك زدت همي .. حكالي ليش انا شو عملت ؟ حكيتله ولا شي مع السلامة .. كانت صدمة بالنسبة الي الشي اللي سمعته .. وماكنت متوقع اكتشف شيء يصدمني بزيادة ويكون متل هيك اشي.. مجد الشخص العاقل الأول على دفعته يفكر هيك أفكار ؟ ليه ؟ .. حاول يلحقني بس ركبت سيارتي وطلعت وفجأة لقيت ياسمين .. ركبتها وحكيتلها وين كنتي رنيتلك الف مرة مارديتي .. حكتلي كنت طالعه مع صاحبتي عنود ودبقتني وماقدرت افتك منها .. احكيلي شو مالك شو مزعلك ؟؟ حكيتلها تعالي نبعد عن هون .. حكتلي ومحاضراتك حكيتلها مابدي احضر اشي .. ياسمين بتدرس صناعة أفلام وسألتها ليه نقلتي ورجعتي وليه خبيتي عليه .. حكتلي أنه ماكانت حاسه انه هون عم تستفيد بدراسة الدراما والأفلام بس لما نقلت عجامعه تانية اكتشفت انه هون أحسن.. فجأة حكتلي بدي اطلع شوي برجعلك حكيتلها وين رايحه حكتلي عالحمام وين يعني ! .. طلعت وتركت غراضها بالسيارة .. وفجأة رن تلفونها .. حاولت اتغاضى عن رنينه المزعج بس لأنه كان راسي يوجعني طلعت التلفون من الشنته وكان مكتوب مسج .. " ياسمين كيفك وينك انتي من لما شفتك أول مبارح اختفيتي ومابيتني ؟ بس تشوفي المسج ردي عليه " .. كان رقم ومش مسجل .. حكيت مين ممكن يكون ؟؟ المسج بحكي اول مبارح ومبارح عأساس اجت ياسمين من ايطاليا معناته هيه ماكانت بإيطالياً .. اخدت الرقم وبس حاولت ارجع التلفون على الشنته لقيت مغلف .. حكيت شو هاد المغلف وليه هيك مسكر .. فتحته .. كانت الصدمة اني شفت صور امي وهيه متوفيه بشنتتة ياسمين وكان مكتوب على المغلف .. صور جريمة أم داني!
@novels_stories
#يـتـبـع

#قصص_وروايات ✏


#اللغز_المجهول🔍


الحلقة الثامنة
@novels_stories

من بعد ما شفت المغلف اللي فيه صور امي وهيه متوفيه بشنتة ياسمين .. انتقلت شكوكي كلها من الصدمة لإلها .. وصرت افكر انها الها ايد بقتل امي.. لييش تخبي صورها بشنتتها وشو اللي بدها ياه بالزبط ؟؟ .. وصلتها بعد مارجعت من الحمام على بيتها ومشيت بالسيارة وطلعت تلفوني ورنيت على الرقم اللي اخدته منها .. طلعلي صوت زلمة كبير شوي .. حكيتله معلش مين معي.. ؟ حكالي انت اللي طالبني انت مين ؟ حكيتله معلش مش تلفون أحمد رامي هاد ؟ حكالي لأ هاد تلفون الدكتور رفعت نادر .. حكيتله رفعت نادر معلش انا سامع بإسمك انت بتشتغل بعيادة ؟ حكالي لأ يازلمة شو عيادة ما عيادة أنا دكتور جامعه ! .. حكيتله دكتور جامعه بأي جامعه .. طبعاً حكالي نفس الجامعه اللي كانت ناقلة عليها ياسمين ومش نفس جامعتي.. حكيتله تشرفت فيك وشكراً إلك .. بنفس هاللحظة رحت على الجامعه نفسها وسألت عنه عرفت انه دكتور بقسم السينما وكان يدرس ياسمين .. حكيت ليه بعتلها مسج وشو بده منها بالزبط .. كان لازم أعرف تفاصيل أكتر .. رحت على البيت واتصلت مع ميرال حكيتلها لازم نعلن للكل أنك تزوجتي عشان عمتي رح تفضح القصة وفهمتها شو عملت بنتها حتى تكون بالصورة .. جهزنا كل شي وعملنا كروت لحلفة ونشرنا الخبر أنه في واحد خطبها وبده يتزوج بسرعه لأنه بده يسافر برا البلد ومستعجل وهوه بعرفني لهيك مافي داعي نسأل عنه .. وزعنا الكروت على الناس وماخبرنا عمتي بالشي اللي عملناه عشان ماتفكر انها تفضح القصة .. صفيت أفكر لحالي بالبيت بالصور اللي بشنتة ياسمين وانه ليه هيك عملت وكذبت عليه انها رايحة لإيطاليا والمسج بحكي انها كانت موجودة بالبلد من يومين .. صرت استرجع بذاكرتي الكلمة اللي حكتلي فيها براسها انها مش طايقيتني ومع هيك مشتاقيتلي كان بدي اعرف شو اللي بتعمله وليه هيك بتعمل واذا الها ايد بقتل امي أو لأ .. بس حكيت اني اصبر شوي .. سمعت بابا بنادي عليه .. وحكالي خلينا نحكي .. حكيتله لازم أعرف شو اللي صار وليه عملت هيك وكذبت علينا .. وليه مزعت صورنا وصور أمي شو اللي صاير .. بلش يحكيلي انه امي بالزمانات كانت تحب ابن عمها وهوه خطبها وفسخوا الخطبة وبعدين تعرفت عليه وصار النصيب ومن يومها فهمته انها بعمرها ماحبت غيره وحكتله انه الشخص اللي خطبته وكانت تحبه هوه ابن خالها مش ابن عمها .. وابن عمها كان يجي عنا على طول ويقعد معنا وهيه كانت عطول تنبسط بس يجي عنا لحد ماصارت علاقتنا فيه قوية وبابا ما كان مفكر انها بتحب ابن خالها لهيك كان مأمن انه ابن عمها بطلع وبفوت عنا عالبيت .. وعرف هالشي عن طريق ستي ..@novels_stories
غلطت بالحكي فراح واجهها واعترفلته بكل شي .. واتهمها بالخيانة وانها ضحكت عليه ودخلت ابن عمها اللي كانت تحبه على البيت برغم انه متزوج وعنده ولاد وكذبت عليه بقصة ابن خالها .. بس بابا نسي الموضوع وصالحها بس تغيرت معاملته لإلها وبطل يحبها متل الأول .. لهيك بس توفت فجأة مازعل عليها كتير واختلق قصة الزهايمر لأنه بطّل يوثق بحدا وتوقع انه نحنا نطلع لماما ونكذب عليه بشغلات ونخدعه متل ماخدعته ماما .. بس ماتوقع انه اخته كمان تخدعه وتحاول تسرقه .. حكالي انت جبت شباب ضربوني وهانوني بالبيت وفوق هاد حكيتلي بكرهك وكنت مفكرني مابعرف مين انت ومابعرف شو اللي بصير ؟ ليه عملت هيك ؟ كيف اجالك قلب تعمل هيك ؟ كان معي حق وقت ما عملت معي زهايمر لأكشف كل الناس على حقيقتها ومنهم انت اللي كان بدك تقتلني حتى تورثني ماتوقعت تربايتي فيك تطلع غلط لهالدرجة .. صرت ابوس بأديه واجريه واحكيله يسامحني وابكي وابكي وابكي .. بلشت اعترفله متل ما اعترفلي وحكيتله انا استغليت قصة الزهايمر اللي انت عملتها معنا بس ماكنت بعرف انك بتلعب علينا الا بعد ما عملت الشيء اللي كنت بدي اعمله .. حكيتله اشتريت كتاب عن قراءة الأفكار وبلشت اطبق الشغلات السيئة اللي فيه حتى اقدر اقرأ افكار الناس والكتاب هاد طلب مني اني اخدع شخص بحبني كتير واكون عارف انه بحبني من قلبه .. ولأني بعرف انك بتحبي من قلبك عملت هالشي.. استغليت وضعك وضحيت فيك حتى يتحقق مرادي ويصير اللي بدي ياه .. وانت كنت شايف وعارف بس لما قرأت افكارك وعرفت انك صاحي وبتلعب عليه وعلى اختي عشت بعذاب الضمير وماقدرت ارتاح ابداً .. بتمنى انك تسامحني .. وبرغم كل شي عملته فيه سامحني وحكيتله انت الوحيد اللي بتعرف اني بقرأ افكار الناس وبهاللحظة أنا بعرف بشو بتفكر .. صرت اضحك واحكيله عم تفكر بأكلة بامية ورز .. اشتقت لطبخ امي شكلك جوعان .. حكالي اه والله عم بفكر فيها .. تاريك بتعرف تقرأ الأفكار كتير منيح .. حكيتله بس لاتحكي بابا لحدا .. انا عملت هيك بس لحتى اكشف مين اللي قتل امي ووعدت نفسي اعمل كل شي بقدر عليه حتى اعرف مين اللي قتلها وتأكد اني مارح ارحمه أبداً مين ما كان يكون ..
@novels_stories
حكالي بابا لا تشك فيه يا ابني انا قد ماعملت فيه امك وقد ماكذبت عليه واستغفل

تني مستحيل اني افكر اقتلها وانت كنت شايفني كنت جنبك وجنب اختك وقت ماصارت القصة ووقت ما امك راحت تفتح الباب ولقيناها مرميه عنده مصدومه ومتوفيه والدم نازل من عيونها من الصدمة .. قلتله لازم اعرف شو اللي شافته حتى خوفها وصدمها وخلاها تتوفى .. لازم .. دق الباب وقمت أفتح طلعت عمتي اجت تصرخ وتضرب فيه على صدري ومعها جوزها .. سكرت الباب لا تفضحنا قدام الجيران وصارت تحكي لبابا شوف ابنك شو عمل مع بنتي واذا ما بتزوجها ما رح ارحمك لا انت ولا ياه .. بهالوقت بابا طلع عن طوره وصار يحكيلها بدك تسرقيني ! بتخونيني يا اختي يا بنت امي وابوي .. استغليتي وضعي ومرضي وسرقتيني .. ابني مابعمل هيك اشي واعلى مابخيلك اركبيه .. روحوا شوفوا بنتكم وودوها عطبيب ووقتها بتعرفوا انها كذابة .. ومافيكي تزوجي الولد بالغصب لبنتك المراهقة الغبية .. صارت تسب علينا وتحكي والله والله لأفضحكم واحكي انها بنتكم تزوجت .. حكينالها مارح تلحقي لأنه عرسها بكرا وكل الناس صار معهم كروت العرس ورح يحضروا العرس ومارح يصدقوكي شو ماحكيتي .. صار زوجها يصرخ وطردناهم من البيت .. حسيت اني لازم اعرف شو قصة الصور اللي كانو بشنتتة ياسمين ولازم بهاللحظة أروح أشوفها وأواجهها حتى اسمعها وأسمع أفكارها وفي حال كذبت رح اعرف انها بتكذب لأنه الحقيقة رح اسمعها بأذني عم تحكيها ومافي مجال للكذب أو الهرب .. اتصلت معها وحكيتلها لازم اشوفك بس بدي مكان مافي حدا كتير .. حكتلي شو قصتك بالأماكن اللي مافيها حدا ؟؟ .. حكيتلها لأنه راسي بوجعني ومابدي اسمع ازعاج وفي موضوع ضروري بدي احكي معاكي فيه .. حددنا مكان برا بحديقة هادية وما بيجي عليها حدا كتير .. وقررنا نحكي تحت الشجر واكشف لعبتها وليش عملت هيك .. دخلت على غرفتي وسكرت الباب وغيرت أواعيه بهاللحظة صرت احس بوجود الشخص التاني اللي حواليه وخطواته وصوت جريه عم بلحقني بالغرفة .. صبرت شوي لأني كنت حاسس انه رح يحكيلي اشي.. وقبل ما اطلع سمعت صوت بحكيلي " انت اعترفت لأبوك بحقيقة الكتاب وهاد الشيء مخالف .. معك يومين بس لتقرأ افكار الناس وبعد هاليومين رح تختفي نهائياً منك هالخاصية " نصدمت بالكلام اللي سمعته وماقدرت استوعب الحكي اللي نحكالي .. صرخت مستحيل ما اقدر اعرف مين قتل امي .. رنيت على ياسمين وأكدت عليها تيجي حتى أواجهها

@novels_stories
#يـتـبـع

#قصص_وروايات ✏

#اللغز_المجهول🔍

الحلقة التاسعة

@novels_stories
بطلت أعرف أفكر ولا حتى أركز من بعد ما سمعت الصوت اللي بحكيلي انه ضايلك كم يوم وبتختفي خاصية قراءة الأفكار من راسك والسبب أني اعترفت لبابا بهالشي !! .. شو ممكن أعمل ؟؟ .. بدون تفكير رحت عند صاحب المكتبة اللي اشتريت منه الكتاب وصرت اترجاه واحكيله شو ممكن اعمل حتى ازيد من المدة اللي بقدر أقرأ الأفكار فيها .. صار يحكيلي مافيك تعمل اشي وانا نسيت احكيلك انه في حال حكيت لحدا عن هاد الشي الخاصية رح تختفي من راسك نهائياً خلال مدة معينة !.. ماقدرت اعمل شي وحملت حالي وطلعت بالسيارة وما فكرت الا بإني اروح على الموعد اللي اتفقت فيه مع ياسمين حتى اكتشف انه هيه اللي ورا قتل امي او لا .. شفتها بالحديقة وقعدنا وضليتني طول الوقت ساكت حتى اسمع شو بدها تحكي وبلشت تحكي براسها وتقول (( شو ياترى بده مني ؟؟ ليه هيك عم يتطلع فيه ؟؟ شو عارف اكيد في موضوع مهم )) حكيتلها بدي اعرف شو الصور اللي كانو بشنتتك مبارح .. صور امي وهيه متوفية ؟؟ ليش شو بهموكي ومن وين جبتيهم مافي مجال للكذب احكي الحقيقة بسرعه .. بلشت تحكيلي خلص رح احكيلك كل شي لأني كنت مترددة اعترف وبعدين خفت كتير .. لازم تعرف هلأ .. وحتى ضميري يرتاح لأنه مش مرتاح ابداً.. وحكت فبالها (( خلص يا ياسمين اعترفيله وريحي ضميري خلص )) .. حكتلي داني أنا ضحكت عليك .. حكيتلها بشو ؟؟ حكتلي أنا مابحبك .. انا كنت مفكره حالي بحبك وبفكر فيك بس اكتشفت اني مابحبك .. حكيتلها شو اللي بخليكي تحكي هيك اشي ؟؟ ليه ؟؟ انا شو عملتلك ؟؟ حكتلي الصور تبعون وفاة امك هدول اخدتهم من تلفونك وطبعتهم عشان موضوع معين انا بدي ياه وضليتني مستمرة بالعلاقة معك بس عشان هالموضوع .. حكيتلها اعترفي بسرعه وصرت اصرخ حكيتلها انتي قتلتي امي ؟؟ حكتلي طول طول بالك شو مش لهالدرجة انا ماقتلتها .. انا من بعد ما نقلت على الجامعه التانية في دكتور ساعدني كتير بموضوع السينما وحكا اللي بعمل فيلم عن شيء مختلف وحقيقي وواقعي رح اساعده حتى يوصل بسرعه .. وماكان قدامي الا موضوع وفاة امك الغريب .. اخدت الصور من عندك وفرجيتهم للدكتور وحكالي هاد موضوع حقيقي ومجهول حكيتله اه لأنهم مش عارفين سبب وفاتها للآن .. وبحكوا بس صدمة عصبية ممكن نستغل هالموضوع بفيلم سينمائي قوي.. اتمالكت اعصابي وكنت رح اضربها بس للحظة حكيتلها كملي.. حكتلي انا استغليت علاقتي فيك برغم اني كنت مفكرة حالي بحبك .. بس حكيتلك رايحه على ايطاليا عشان ابحث بقضية امك أكتر واعرف مين اللي قتلها وابلش بكتابة الفيلم واخراجه .. واختفيت عشان ماتعرف وينني وسكرت تلفوني عشان اراقبك لأني بصراحه كنت شاكه فيك انه انت اللي قتلها حكيتلها شو مجنونة أنا اقتل امي !!؟ انا بدي اعرف مين اللي قتلها اكتر من اي واحد .. جاي تتهميني واستغليتيني كمان !! .. حكتلي انت انسان حقود وبتتغير مع الناس بسرعه .. طول فترة العلاقة ماكنت مرتاحه ومفكرة حالي بحبك .. بس جمودك معي فبعض المواقف بحسك عم تتخلى عني لأتفه الأشياء واذا صار معي شي وحكيتلك بتحقد عليه ..@novels_stories
خفت تكون امك عاملة شي هيك ولا هيك وتحقد عليها وتكون انت السبب .. بهاللحظة ضربتها كف وحكيتلها انتي اوطى انسانة شفتها بحياتي مابدي اشوف وجهك مرة تانية .. ضحكتي عليه واستغليتي موضوع امي عشان افلامك السينمائية بدون شعور ولا شفقة وانا كنت عطول اشكيلك اني بحاجتها ومقهور على فراقها وانتي مابتفكري الا بمصلحتك .. سحبت حالها وهيه عم تبكي وراحت وانا تدمرت نهائياً لأني ماكنت عارف شو اللي عم بصير .. ومين الي قتل امي .. كل الشكوك بس تتجمع بشخص بتختفي بنفس الدقيقة ومابعرف بمين ضل أشك .. روحت على البيت وكان اليوم عرس اختي ولازم اجهز نفسي وانسى كل شي .. ضل معي بكرا بس لحتى اقدر اقرأ افكار الناس.. هربت من الشارع قبل ما اسمع صوت اي حدا لأنه صابني حالة هستيرية من الأصوات اللي عم بسمعها كل مابشوف بني آدمين عم بمشو من حدي .. مافي حدا باله مرتاح والكل بفكر بهمومه ومشاكله وحياته الإجتماعية .. جهزت حالي ولبست ورحنا على الصالة .. حطيت حدا على باب الصالة من معارفي وفرجيته صورة عمتي وحكيتله في حال حاولت تدخل الباب طلعها بالقوة وماتسمحلها تفوت .. وعصالة الرجال نفس الشي حطيت شب من معارفي وفرجيته صورة زوج عمتي وحكيتله بتمنعه في حال دخل.. ماقدرت اتمالك اعصابي بالحفلة كل الناس عم بحكوا عبعض .. بكرهوا بعض .. بنقدو بعض .. مستغربين من الفترة السريعه اللي صار فيها العرس.. ماصدقت شو عم بسمع والكل عم بحكي شغلات غلط .. راسي كان رح ينفجر ومع صوت الأغاني تعبت لدرجة مش ممكن انسان يتصورها .. وبهاللحظة كانت جايه عمتي وحاولت تدخل .. منعتها وحكيتلها مستحيل تدخلي لو شو ما صار .. حكتلي عشان ما احكي لحدا رحت بسرعه عملت حفلة لأختك وخبيت فضيحتها حكيتلها احفظي لسانك واختي ماعملت شي وبنتكم كذابة لو شو ماحكت .. وطردتها من الصالة ..
@novels_stories
وخلص

العرس على خير بس صبرت لحتى انتهى وحتى مايصير شيء هيك ولا هيك .. روحت بسرعه على البيت وحكيت لبابا عمتي بتحاول تزوجني لبنتها وخايف تكون الها ايد بقتل امي وناوية تخلص عليه أنا كمان بطريقة أو بأخرى .. خايف يكون حدا وراها وحاقدة على العيلة بدليل حطتلك دوا بكاسة الشاي عشان تنام وحاولت تسرقنا شو بتفسر كل هاد .. حكالي انا بعرف عمتك ممكن تحقد وتعمل كتير شغلات بس مستحيل تقتل .. انا بعرفها بتصلي وبتعرف الله مستحيل تقتل .. حكيتله مابعرف ليش قلبي بحكيلي غير هيك .. يمكن أنا كمان كان بدي أريح نفسي قبل ما تختفي خاصية قراءة الأفكار من راسي واحطها بعمتي وارتاح حتى اخلص منها نهائياً .. اجا اليوم الأخير اللي رح اقرأ فيه افكار الناس وبس تيجي الساعه 12 رح تنتهي خلص .. نزويت بحالي بالغرفة وصرت اسمع للخيال اللي ملاحقني واللي بحسه معي .. ماكنت خايف وقتها لأنه كان بدي احكي معاه متل مابحكي معي .. بس للأسف بهاللحظة ما اجا .. دخلت عالحمام وضليتني لحالي عشان يجي وما اجا !! .. رحت عالسطح ورميت حالي عالأرض وما اجا !! .. مر الليل وانا عم بتنقل من مكان...
@novels_stories
#يـتـبـع

#قصص_وروايات ✏

#اللغز_المجهول🔍

الحلقة الأخيرة

@novels_stories
اليوم الأخير .. يأست .. وتعبت .. وبطلت عارف شو ممكن أعمل .. كل شي عملته وتعبت عشانه ماجاب نتيجة وما قدرت أعرف الشخص اللي كان سبب بوفاة أمي والسبب انه ما عندي دليل .. ضليتني بالغرفة لحالي على أمل أسمع هداك الصوت والخيال اللي كان يجيني بس اكون منفرد مع نفسي.. بس ماكان ييجي .. حكيت أنا خربت كل شي على حالي !! .. مزعت الكتاب وحرقته وصرت أبكي على أمي متل الولادالصغار .. بهاللحظة بعتتلي ياسمين مسج عم تعتذر وبدها تشوفني .. اتصلت عليها وانا عم ببكي بحكيلها أوعك ترني عليه مرة تانية واذا بشوفك رح اقتلك فاهمه واعتبريه تهديد .. وسكرت الخط بوجهها .. بسبب هالتهديد اكيد زاد تفكيرها تجاهي اني اكون سبب بقتل امي.. بس أنا بس اعصب مابعرف شو بحكي .. ضليتني على أعصابي وكسرت تلفوني حتى ماحدا يفكر يرنلي.. رن الجرس فجاة .. صار يحكيلي بابا شوف ياداني مين عالباب .. قمت فتحت طلعت عمتي .. كانت عم تبكي وتحكيلي أنا اسفه داني.. حكيتلها عشو !؟ شو عملتي ؟؟ حكتلي سامحني يا ابني .. دخلت عند بابا وصارت تبوس عإديه وتحكيله سامحني على كل شي عملته .. حكيتلها احكي شو عملتي عشو نسامحك .. بهاللحظة ماكنت عارف عشو ممكن نسامحها لأنه غلطت بحقنا كتير بس كنت بستنى منها تحكي أنا كنت السبب بوفاة أمك ياداني.. وبلشت تحكي.. قالت انه ضلينا نحكي عليك ونسب عليك أنت وأبوك واختك .. بالآخر بنتي صارت تسكت فينا وتحكيلنا انا اللي عملت هيك وخليته يدخل عالبيت عشان اسكر عليه واتهمه هالإتهام .. أرجوكم ماتحكوا عليه خليتوني حقودة متلكم وأنا كل اللي كان جواتي أني حبيته وماقدرت اعترفله من وأنا صغيرة ولما اعترفتله اعتبر كلامي كله طيش مراهقة وحكي فاضي وجرحني .. وعشان هيك قررت اجرحه واخرب بيته متل ماخرب بيتي .. بس أنا حبيته .. فعلتي كان كلها حقد وكراهيه منكم انتوا .. وصارت تحكيلي أنا وبابا.. بهاللحظة خفت أخسر بنتي وصرت أبكي على حقدي لإلكم واتهاماتي وسرقتي لبيتكم .. انتوا عملتوا المستحيل حتى ما تفضحوني وأنا كنت جاية عالعرس حتى افضح اختك .. بس توضحلي انها بالفعل كانت متزوجه .. ميرال قبل حفلتها بيوم أجت عنا وفرجتنا عقد الزواج والتاريخ وفهمتنا اللي صار وانها ماعملت اشي غلط بس احنا قررنا نفضحها انا وزوجي ونيجي عالعرس.. بس بنتي اعترفت بغلطها وانا اسفه سامحوني.. بابا سامحها وانا حكيتلها برغم كل شي بتضلي عمتي واحنا سامحناكي..
@novels_stories
طلعت من البيت مكسورة وكانت الساعه 4 العصر .. كان ضايل 8 ساعات وبتروح خاصية قراءة الأفكار نهائياً من راسي.. طلعت متل المجنون بس بدي اسمع الناس وراضي بالإزعاج اللي جوا دماغي .. بس بدي اعرف قاتل امي .. مين ممكن يكون مييين !!! .. رجعت على بيتي مرة تانية وقعدت على الرصيف ابكي .. شفت الولاد بلعبوا وابن ام موسى معهم .. حاولت اقرب منه حتى اسمع شيء لأنه الكلام اللي حكاه براسه ماغاب عن بالي .. من شو خايف وليه بحكي انه مابده يدخل عنا حتى ما ينقتل اكيد في سر !.. ماقدرت اقرب كتير لأنه رح يهرب مني .. وكل مايشوفني بهرب مني.. طلّع من تحت بلوزته قناع بخوف وعشكل شيطان ولبسه وصار يلحق بصحابه بالشارع وبهاللحظة صرخ ولد من الخوف وركض بسرعه .. وهوه رح يقطع الشارع صدمته سيارة واندعس.. صار ابن امو موسى يصرخ واجت امه اخدته وجارتنا ام الولد اللي ندعس صارت تصرخ ونقلوا ابنها للمستشفى .. جمعت افكاري كلها مع الكلام اللي حكاه براسه وربطتها مع بعض .. وحكيت ممكن يكون هيك صار !! ..رحت معهم عالمستشفى وحكوا انه الولد اللي ندعس توفى وام موسى صارت تصرخ وتبكي وام الولد اغمى عليها.. اخدت ام موسى على جنب وحكيتلها كل اللي جواتي وخوف ابنها منا ومن بيتنا ما اله غير مبرر واحد انه بالوقت اللي كنا قاعدين نحضر فيه المسلسل وندق الباب قامت امي تفتحه كان ابنها جاي يلعب ويخوف ميرال ولابس القناع .. طلعت بوجهه امي وشافته ..صابها صدمة عصبية لدرجة انها ماقدرت تصرخ واغمى عليها وتوفت ..كذبتي أم موسى بس انا ماسكتت ورحت للشرطي حكيت كل شي وجابوا الولد وبعد ماسكتوه من البكى وهدوه .. اعترف .. وقتها غمضت عيوني وماعرفت شو ممكن اقول ! ماكنت متوقع انه يكون السبب بوفاة امي حدا مش بالحسبة اللي حطيتها بشكوكي.. استوحشت فجأة وهجمت عالولد لأضربه ووقعت عم ببكي بعد ماشالوني الشرطة وطلعوني..@novels_stories
روّحت عالبيت وحكيت لبابا كل اشي .. كانت ميرال جايه هيه وسامر يحكولنا انهم بدهم يسافروا على دبي عند أهله.. عرفوا الحقيقة وميرال ماقدرت تمنع حالها من البكا.. ابو الولد تحاكم لأنه ابنه تحت السن القانوني وتكفل بالعقاب.. ابن ام موسى قتل أمي بقناع بشع ومزيف كان لابسه للتسلية وعن طريق الغلط .. بس اللي اكتشفته من خلال التجربة اللي عشتها .. أنه الناس بتلبس أقنعه حقيقة وغير ظاهرة بنكتشف من خلال الأيام انها بتقتلنا من جوا وبتخدعنا أكتر من الأقنعة المزيفة والظاهرة !
هدف القصة
@novel

s_stories
شيء مؤكد مستحيل يصير هالشيء من خلال هالقصة الخيالية .. ومستحيل إنه إنسان يقدر يسمع أفكار اللي حواليه .. بس ممكن من خلال عشرتك لناس تكتشف إنهم
أشخاص مزيفين ولابسين أقنعه .. بخدعوك وبعيشوا الدور منيح بقصة حياتك ..
هاد الإنسان اللي أمامك واللي بتحكي معاه مستحيل يكون من جوا بالزبط متل ما هوه من برا ! .. وإنت بذات نفسك هيك .. عم تعيش أكتر من دور بحياتك .. الشخصية اللي مع نفسك بتختلف عن الشخصية اللي بتعيشها مع غيرك وأكيد هالشخصيتين مابشبهوا بعض .. وفي شغلات كتير مابتحكيها لحدا واللي بعرفها بس إنت ..
دائماً الحقائق اللي بنسمعها من الناس ناقصه وفي شيء غير مكتمل .. لأنه إحنا إلنا الظاهر ومابنشوف الباطن .. ولو دورت حواليك منيح رح تلاقي ناس كتير بأكتر من وجه ولابسه أكتر من قناع .. بس جرب أدخل فيهم من جوا ورح تعرف أنه هالكلام صحيح..
* وحتى ماتنخدع بحدا خلي ثقتك بالناس غير كاملة وماتعطيها كلها لأي إنسان لو كان أقرب الناس لإلك.
* سؤال مش شرط تجاوب عليه هون وجاوب عليه بداخلك فقط..
- لو كنت مكان داني للحظة مين الناس اللي ممكن تقرأ أفكارهم ؟
- ولو القدر خلاك تكون غير مرئي بهالعالم قديش ممكن تكتشف حقائق مزيفه من حواليك؟

@novels_stories
النهاية

انتهت قصتنا....

#اللغز_المجهول 🔍


شاركونا هنا.....
@NovelsStoriesBot

..

اعلان القصة

....