Ўзбек халқи яна бир асл фарзандидан, миллатпарвар, ватанпарвар ўғлонидан айрилиб қолибди. Nosir Zokir ака мени жуда ҳурмат қилар, мақолаларимни ФБдошлар орасида тез-тез ўртоқлашиб, мен ҳақимда жуда кўп илиқ сўзлар айтар ва бу билан ижодимга ижобий туртки бериб борар эди. Минг афсуски, акам билан ҳаётда кўриша олмадик, дийдор кўришиш энди Қиёматга қолди. Оллоҳ ушбу бандасига ҳам Ўз жаннатидан жой берсин. Инна лиллаҳи ва инна илайҳи рожиъун.


Шокир Долимов

Биз учун жуда оғир хабар — “Бирлик” партиясининг салоҳиятли фаоли, фидокор ва жасур инсон, яқин дўстимиз ва ҳам сафдошимиз Носир Зокир оламдан ўтди.

У киши бутун умри давомида халқ манфаати, адолат ва озодлик учун курашди. Носир ака ўзининг ҳақсўйлиги, меҳрибонлиги ва ватанпарварлиги билан кўплаб инсонлар қалбидан жой олган эдилар.

Унинг хотираси доимо дилларимизда яшайди. Биз уни миннатдорлик ва ҳурмат билан эслаймиз.

Носир аканинг оиласи ва яқинларига чин дилдан ҳамдардлик билдирамиз. Аллоҳ таоло сабр ва таскин берсин.

Аллоҳ раҳматига олсин. Носир аканинг жойи жаннатдан бўлсин.

Пўлат Охунов

#Таъзия

Наманганлик Носир Зокир акамиз оламдан ўтибдилар. Оллоҳ раҳматига олсин. Инна лиллаҳи ва инна илайҳи рожиъун.
Носир аканинг халқимизга, ватанимизга, мустақиллигимизга кўп хизматлари сингган.
Ўз вақтида "Бирлик" халқ ҳаракатининг фаолларидан бири бўлганлар. Бир фахрий ўлароқ, бугунгача ҳам ижтимоий ҳаётда фаол бўлиб келдилар.
Оила аъзоларига, яқинларига, дўстларига чуқур таъзия билдираман.
Оллоҳ таоло Носир Зокир акамизни ҳузурига чиройли қабул этсин. Марҳамати, мағфирати, жаннати ила сийласин.

https://t.me/nurulloh_muhammad_raufxon/1539

Кеча, Наманган шаҳрига йўлим тушиб, таниқли сиёсий фаол, инсон ҳуқуқлари фаоли Носир Зокир акани зиёратларига кирган эдим. Роса мириқиб суҳбат қилдик. Ўтган даврдаги кўп воқеаларни эсладик, ош қилиб турган экан, бирга ош едик. Лекин, бугун эрталаб эшитдим, ўтиб қолибдилар. Аллоҳ рахматига олсин, жойларини жаннатда қилсин! Носир ака жуда яхши одам эди. Инна лиллаҳ ва инна илайҳи рожиъун.

Камолиддин Раббимов

2025 йил 14 октябрда вафот этган Nosir Zokir Озодликнинг хур саси эди.

1997 йилнинг мартидан Озодликнинг Ўзбекистондаги мухбирлари сафига қўшилган наманганлик журналист ва “Бирлик” халк ҳаракати аъзоси Носир Зокир Озодлик радиосининг энг узоқ ишлаган маҳаллий мухбирлардан.

Ўзбекистоннинг Наманган, Фарғона вилоятларини пойи-пиёда кезган бу мухбир Тошкент бюроси иш бошлаганидан икки йил ўтиб, Озодлик радиоси ва унинг Носир Зокир каби мухбирларига нисбатан шаклланган муносабатни шундай таърифлаган эди.

- Мен янги ишга кирган вақтларда Озодликни ҳали кўпчилик эшитмас эди. Лекин, бюро очилгандан кейин аста-секин эшитувчилар кўпайди. Бора-бора ҳокимиятдагилар ҳам танийдиган бўлиб қолишди. Президентнинг Озодлик мухбирларига айтган гапи бор эди: "Бу раҳбарлар интервю беришга қўрқади. Агар улар бу эшикдан қувса, сиз анави дарчадан киринглар", деган гапи бор эди. Мен раҳбарларга ўша гапларни эслатар эдим, дея хотирлаган эди Носир Зокир тириклигида.

Носир Зокир Озодлик радиоси мухбири сифатидаги фаолияти давомида ҳам мухбирлиги ва ҳам мухолифатдаги фаолияти учун икки бора қамоққа ташланган.

Биринчи бор 1992 йилда 1 ярим йиллик қамоқ жазосини ўтаган мухбир, иккинчи бор 2005 йилнинг 25 августида Ўзбекистон миллий хавфсизлик хизмати ходимини ҳақорат қилганлик айби билан 6 ой қамоққа ҳукм этилган эди ва муддатини “қўнғироқдан қўнғироққача” ўтаган.

Носир Зокир 2005 йил 13 майдаги Андижон воқеаси ҳақида биринчилардан хабар берган мухбир.

Андижон фожеаси ва ундан кейинги воқеаларни ёритгани учун Носир Зокир Ўзбекистон ички ишлар ходимлари ва миллий хавфсизлик томонидан таъқиб қилинган.

Нью Йоркдаги журналистларни ҳимоя қилиш қўмитаси, Чегара билмас мухбирлар ташкилоти, Хюман Райтс Уотч ва бошқа халқаро ташкилотлар Носир Зокирнинг ноҳақ қамлганини таъкидлаб баёнот берган эди.

Носир Зокир Озодликдан кетиб умри охирида Наманган вилоятида, оиласи бағрида яшади.

Айрилгандай осмон қуёшдан,
Наманган, ҳам айрилди бошдан.
Фиғон чиқар Ахсида тошдан,
Носир учун йиғлар Намангон.

Чин мард эди у, мардон эди у,
Миллатига ҳамдард эди у,
Номард учун бир гард эди у,
Марди учун йиғлар Намангон.

Ҳурлик туғин кўтарган баланд,
Ва Ҳақ учун этилганди банд,
Бугун номи элда сарбаланд,
Ўғли учун йиғлар Намангон.

Сирот узра қойим айласин,
Маконини жаннат айласин,
Сизу биздан рози айласин,
Дуо қилар аҳли Намангон.


Орифхожи Мелиев

Носир Зокир билан "Озодлик" радиосида талатўп замонда, қирғин-репрессия росп авжига чиққан пайтлар бирга ишлаганмиз. У пайтлар қамалиб қолмасликнинг ўзи катта ютуқ эди.
Инсоннинг одати шу экан: репрессия пайти ҳамма чақув хатлари ёзишга ишқибоз бўлиб қоларкан. Бу истак ҳамма нарсадан кусли экан, ҳатто отангиз, дўстингизни "донос" ёзиб қаматгингиз келаркан. Худо инсонни биз билгандан мукаммалроқ, тубанроқ яратган экан. Диний ва дунёвий груҳлар орасида ҳам яширин агентлар керагича топиларди.

Репрессия, бу ҳамма бир-бирини сотиш байрамидир. Сиёсатга алоқаси йўқ одамлар ҳам чақув хати ёзишни яхши кўрарди.
Шунақа талатўп замонларда ишлаганмиз. Менга қарши компраматлар ҳам керагича йиғилган. Менинг энг нозик жойим ўша пайтда 4-5 яшар қизимни яхши кўришим экан. Кимдир шунақа деб ёзиб берибди. Ростдан қизимни яхши кўрардим, дунёларга ишонмасдим.

Худога шукр дейман, "донос" ёзмадим, бировнинг қамалишига сабабчи бўлмадим. Юзим ёруғ.

Инсон ҳуқуқлари фаоллари орасида бир-бирини қаматиш авж олганди.

Уффф, ёзишдан чарчадим. Бош оғриб қолди.

Шундай даврда Носир ака билан виждонимизни булғамай ишлаганмиз


Рахимжон Рахмат

Mardlarning sardori - Nosir Zokir ketdi ! Bu millatning haqiqiy fidoiy ogli ketdi ! Tirik tarih ketdi orangizdan ! Namongon emas - butun Turon yiglamoqda ! Rabbim ohiratlarini obod aylasin InshaAllah ! Bu dunyoda kormagan yahshiliklarini ohiratda korsin ! Inna lillahi va inna ilayhi rojiuun !!!


Фазлиддин Ёқуб

Сўнгги видеолардан бири

Журналист Носир Зокир вафот этди

14 октябр куни машҳур ўзбекистонлик журналист ва собиқ мухолифат фаоли Носир Зокир 73 ёшда вафот этди. Бу ҳақда унинг ўғли Зоҳиджон Зокиров ўзининг Facebook саҳифасида хабар қилди.

1997 йилнинг мартидан Озодликнинг Ўзбекистондаги мухбирлари сафига қўшилган наманганлик журналист радионинг энг узоқ ишлаган маҳаллий мухбирлардан бири бўлди.

У мухбирлик фаолияти давомида Фарғона водийси ҳамда умумиятла Ўзбекистондаги жиддий сиёсий, иқтисодий, ижтимоий муаммоларни кўтарган. Мунтазам равишда халқ ичида юрган ва воқеаларни жойидан ёритган жасур журналистлардан биридир.

Хусусан, Носир Зокир 2005 йил 13 майдаги Андижон воқеаси ҳақида биринчилардан бўлиб хабар берган мухбир сифатида хотирланади.

Айнан, Андижон фожеаси ва ундан кейин мамлакат бўйлаб воқеа иштирокчилари ҳамда бу ҳақда гапирган фаоллар ортидан ҳукумат бошлаган аёвсиз тақиб-тазйиқларни очиқ ёритгани учун Носир Зокирнинг ўзи ҳам Ўзбекистон ички ишлар ходимлари ва миллий хавфсизлик томонидан мунтазам таъқиб қилинди.

Носир Зокир фаолияти давомида икки бора қамоққа ташланди. Биринчи бор, 1992 йилда 1 ярим йиллик қамоқ жазосини ўтади. Иккинчи бор 2005 йилнинг 25 августида Ўзбекистон миллий хавфсизлик хизмати ходимини ҳақорат қилганлик айби билан 6 ой қамоққа ҳукм этилди. Журналист жазо муддатини “қўнғироқдан қўнғироққача” ўтади.

Нью Йоркдаги журналистларни ҳимоя қилиш қўмитаси, Чегара билмас мухбирлар ташкилоти, Хюман Райтс Уотч ва бошқа халқаро ташкилотлар ҳозирга қадар Носир Зокир ноҳақ равишда - журналистик фаолияти учун қамалган, деб ҳисоблайди.

Озодликда иш бошлагунга қадар Носир Зокир "Бирлик" мухолиф партиясининг аъзоси бўлган. У 1991 йилнинг 9 декабрида юз берган Наманган воқеаларида - Ўзбекистонда ҳокимиятга янги келган президент Ислом Каримовнинг водийда шаклланган радикал диний гуруҳлар етакчисига айланган Тоҳир Йўлдош билан зиддиятли музокараларига гувоҳ бўлганди.

Носир Зокир Наманган воқеаларининг 30 йиллигига бағишланган махсус дастурда ўз фаолияти ҳақида ҳам ҳикоя қилган эди. Қуйида ушбу филмни томоша қилишингиз мумкин:

https://youtu.be/jy-mj8mtAdk?t=670

#Таъзия

Кечагина биз билан эдилар.

Аллоҳни иродаси, кунимиз битдими хоҳиш, истак ва ризқ бизни тарк этади. Охирги манзилга ,,умрбод путёвка йўлланма,,си берилдими тамом алвидо…

Устоз Nosir Zokir билан тез-тез ёзишиб турар эдик.
Анча суҳбатларидан баҳраманд бўлиш учун вақт етмас эди. Иш, уй —рўзғор битганини ҳеч ким кўрмаган, қачоники кўзимиз юмилгач бари мунчоқдек тизилиб сизу- бизни ўрнимиз билинмай ҳам кетар экан.
Ҳурматли устоз !
Жойингиз жаннатдан бўлсин илоҳим.

Алвидо, алвидо шоирлар,
Алвидо, алвидо устозим.
Қабрингизга гуллар ёғилар,
Фидокор инсонга этгумдир таъзим….

Sabrina Gayibova

Ustoz jurnalist Nosir Zokirnin olamdan oʻtganlari men uchun oʻta koʻngilsiz tasodif boʻldi. Nosir akaning biz uchun namunali jihatlari talay edi. Birgina Islom Karimovdek xudbin diktatorga tik boqib haqiqatni ayta olishdek shijoat avlodlarga saboqdir. Soʻnggi vaqtlarda men bilan hol ahvol soʻrashganlarida ovozlari boʻgʻilib, qiynalib gapirardilar, ammo, dard jiddiyligini bildirmaslikka harakat qilardilar. Bu u kishining irodali sifatlaridan darak edi . Nosir aka hayotlarining soʻnggi kunlargacha ham xalqparvar, vatanparvar, adolatparvar hurfikr inson oʻlaroq jamoatchilik diqqat markazida faol boʻldilar. Nosir aka chinakam shaxs edi. Oxiratingiz obod boʻlsin ustoz! Nosir akaning oilala-aʼzolari va yoru doʻstlariga chuqur taʼziya bildiraman. Olloh ustozni oxiratlarini obod qilsin, omin!

Yusuf Ro‘zimurod

БУГУН МЕНИНГ САНОҚЛИ УСТОЗЛАРИМДАН БИРИ НОСИР ЗОКИР ОЛАМДАН ЎТГАН КУН!

НОСИР АКАНИНГ ВАФОТИ МУНОСАБАТИ БИЛАН ОИЛА АЪЗОЛАРИГА, ФАРЗАНДЛАРИ, НАБИРАЛАРИ ВА САФДОШЛАРИГА ТАЪЗИЯ ИЗҲОР ҚИЛАМАН. НОСИР АКАНИНГ ЖОЙЛАРИ ЖАННАТДА, ОХИРАТЛАРИ ОБОД БЎЛСИН.

ОЗОДЛИК РАДИОСИНИНГ ФАРҒОНА ВОДИЙСИ МУХБИРИ НОСИР АКА БИЛАН 2001 ЙИЛДА ТАНИШГАН БЎЛСАМ ТОКИ 2005 ЙИЛДА ҚАМОҚҚА ОЛИНГУНИМГАЧА НОСИР АКА ВА ЎША ПАЙТДАГИ ББС МУХБИРИ БЎЛГАН МАТЛУБА АЗАМАТОВА,
ФАРҒОНАЛИК ҲУҚУҚ ҲИМОЯЧИЛАРИ АБДУСАЛОМ ЭРГАШЕВ, ҒАНИХОН МАМАТХОНОВ ВА АҲМАДЖОН МАДУМАРОВ, ҚЎҚОНЛИК ИСМОИЛ АКА ДАДАЖОНОВЛАР БИЛАН БИРГАЛИКДА, ЭНГ ХАТАРЛИ ВА ҚЎРҚИНЧЛИ ЗАМОНДА ЕЛКАМА ЕЛКА ТУРИБ БИРГАЛИКДА КЎПЛАБ ИШЛАРНИ АМАЛГА ОШИРГАНМИЗ.

МЕН ИЛК БОРА ТЎЛҚИН ҚОРАЕВНИНГ ТАВСИЯСИГА КЎРА НОСИР АКА БИЛАН ТАНИШИБ, УЛАРНИНГ ХОНАДОНИГА БОРГАНИМДА ҚЎЛИМДА НАШРДАН ЧИҚҚАН "ОГОҲ БЎЛАЙЛИК!" НОМЛИ РИСОЛАМ БОР ЭДИ ВА МЕНИ ҲУКУМАТНИ, ИСЛОМ КАРИМОВНИ СИЁСАТИГА БЎЛГАН ИШОНЧИМНИ КЎРИБ НОСИР АКА СОДДАЛИГИМДАН КУЛГАНДИЛАР.

ВАҚТЛАР КЕЛДИ, ИШОНЧ ЎРНИНИ АФСУС, НАДОМАТ ЭГАЛЛАДИ. 2005 ЙИЛНИНГ 15 АПРЕЛЬ КУНИ ИЧКИ ИШЛАР ВАЗИРИ ЎРИНБОСАРИ АЛИШЕР ШАРОФИДДИНОВ ЎТКАЗАДИГАН МАТБУОТ АНЖУМАНИГА КЕТАЁТГАН ПАЛЛАМДА ИЧКИ ИШЛАР ВАЗИРЛИГИ МУЛОЗИМИ ТОМОНИДАН ЎҒИРЛАБ КЕТИБ, ҒАЙРИИНСОНИЙ ҚИЛМИШЛАР СОДИР ҚИЛИНГАНИДАН БИР НЕЧА КУНДАН КЕЙИН НОСИР АКА МЕНГА ҚЎНҒИРОҚ ҚИЛГАНДИЛАР.

"МЎЪТАБАР СИЗНИ МУХЛИСЛАРИНГИЗ СИЗДАН ЖУДА ҲАМ ХАВОТИРДАЛАР ВА ТЕЛЕФОНЛАРИМИЗ ТИНМАЯПТИ СИЗНИ СЎРАШЯПТИ. МЎЪТАБАР ТОЖИБОЕВА ЭНДИ НИМА ҚИЛАДИ?" ДЕБ СЎРАШЯПТИ ДЕГАНЛАРИДА МЕНИ БУ КУРАШ МАЙДОНИДАН ЎЛИМДАН БОШҚА ҲЕЧ НАРСА ЧЕТЛАТА ОЛМАЙДИ ДЕБ ИНТЕРВЬЮ БЕРГАНДИМ.

МЕН ОЛИС ФРАНЦИЯДА, МЕН БИЛАН ЕЛКАМА ЕЛКА ТУРИБ КУРАШГАН САФДОШЛАРИМ ЎЗБЕКИСТОНДА, ИМКОН БЎЛМАЙ ҚОЛАРКАНКИ БИР БИРИМИЗГА ҒАНИМАТ ЭКАНЛИГИМИЗНИ УНУТАРКАНМИЗ, ҲАЁТ ТАШВИШЛАРИДАН БОШИМИЗ ЧИҚМАЙ ҚОЛАРКАН. ҚАДРДОНЛАРИМИЗНИ ЙЎҚОТГАНИМИЗДА ЭСА ҚАЛБИМИЗ БЎШАБ ҚОЛГАНИНИ ХИС ҚИЛИБ ОҒРИҒИМИЗ КУЧАЯР ЭКАН.

ҚАДРДОНИМИЗ КАМОЛИДДИН РАББИМОВ КУНИ КЕЧАГИНА НАМАНГАНГА САФАР ҚИЛГАН ПАЛЛАСИДА СИЗНИ ЙЎҚЛАБ БОРГАНИ, УЗОҚ ГУРУНГ ҚИЛГАНЛАРИНГ, ТОЛИБ АКА, МЕН ВА БОШҚА ҚАДРДОНЛАРНИ ЭСЛАШГАНЛАРИНГНИ АЙТИБ, БИЗЛАРНИ САЛОМИМИЗНИ СИЗГА ЕТКАЗГАНИДАН ҚУВОНГАН БЎЛСАМ, БЕВАҚТ ВАФОТИНГИЗНИ ЭШИТИБ ЭЗИЛДИМ.

НОСИР АКА, ТОЛИБ АКА ВА СИЗ КАБИ УСТОЗЛАР САБАБ МЕН БУГУНГИ КУНДАГИ МЎЪТАБАР ТОЖИБОЕВА БЎЛИБ ЮРИБМАН.

МЕН ҲИМОЯ ҚИЛАЁТГАНИМ ҲАР БИР МАЗЛУМ МАЗЛУМАНИНГ ДУОСИ СИЗГА ҲАМ САВОБ БЎЛИБ ЁЗИЛИШИГА ИШОНАМАН.

#юбилей #80 #улуғ_ҳофиз
«Камолиддин Раҳимов мактаб яратган камсонли санъаткорлардан биридир. Устознинг ижоди бир қисмида менинг ҳам номим борлиги билан фахрланаман», - Носиржон Зокиров, созанда, шогирд