يادمعه بخدود حسين _ خلاج أمانه بعيني"
يا بابا من أتصيحين _ أتكسريني وتبجيني"
عطشانه للنده _ ياوردة الصبح
بعيوني أشاهدج _ عباره عن جرح
يارقيه يارقيه يارقيه
............................
بجروحج ينام الملح _ ومتونج يصبن دمه
طبع السياط أبركبتج _ وجفوف أديج الناعمه
ودعتي أمج بالمهد _ ومن الأبو متيتمه
أي والله يبنيتي تره _ أتشبهين أمج فاطمه

تبجين وحسين إيموت _ ما جانت اعله بالج"
إيباريج يبنيتي السوط _ وغير رسم جمالج"

اتفزين لو غفه _ بجروحج الملح
بعيوني أشاهدج _ عباره عن جرح
..................................
من هجمت أخيول العده _ والنار لينه أتكربت
اطلعتي وركضتي امن الخيم _ يبنيتي رديلي صحت
أركض وراج أبلا وعي _ وكبال العيون أعثرت
وكثر بعد شفت الشمر _ إبذاناتج يجر ويعت

إيجر بيج ونتي أتشوقين _ حد ماسلب عافيتج"
وصله إمن إذانج بيديه _ سلبهه وي ترجيتج"

وبدمج أنصبغ _ كل وجهج السمح
بعيوني أشاهدج _ عباره عن جرح
...............................
أتدنيت يمج من غصب _ بيج أنه أجر وهوه يجر
حد ما إديج أتملخن _ ومن عدهن الدم ضل يخر
من شافني ضليت الح _ إيرفسج تعمد عالصدر
أتكليلي عمه أستعجلي _ فلتي أديه أمن الشمر

ياعمه خشنات إيديه _ أمن السطر خدي أتكطع"
أتركني كتله أترجاك _ يا عمه بس ما يقنع"

أتركني من كلت _ أعله خدودي ضل يلح
بعيوني أشاهدج _ عباره عن جرح
.............................
عافج بدي لمن شفه _ كلبه وطلعتي أبلا ذهن
رجليج حاركهه الجمر _ ومشرمه أطراف الإذن
بالشوك تمشين أشعجب _ خدرانه رجلينج أضن
يالوعة السوط أشكثر _ ياخذ لحم من المتن

أتركضين وين اتريدين _ عمه المعاره أبعيده"
والدج منه أشتلكين _ كطعو يعمه أوريده"

ذاك زجر رفع _ راسه عله الرمح
بعيوني أشاهدج عباره عن جرح
..............................
وتبعتج وكلي جرح _ أعثر وكوم أمن القهر
مرميه شفتج عالجسد _ أتعديله طكات الضهر
صحتيلي عمه أتكربي _ شو والدي بليه نحر
يسمعني لو ما يستمع _ ما مره من عندي أعتذر

يا عمه أبوي بلا راس _ مشتاكه أبوس اخدوده"
جيبيه يعمه أترجاج _ لو اموت فوك ازنوده"

كليلي والدي _ لا ماهو منذبح
بعيوني أشاهدج عباره عن جرح
............................
دوريلي راسه أبيا كتر _ ميخالف إنشده إله
وتوسله أبكد السمه _ يكعدلي من أتوسله
بس هذا كلبه أويه السهم _ من عنده وصله أمهدله
بدموعي ودموعج سوه _ خلينه كلبه أنبلله

شو من سمع طاري الماي _ كلبه نبض حسيته"
مدري نبض جي مشتاك _ لمن سمع حاجيته"

مو عادة اليحب _ عن الوصل يشح
بعيوني أشاهدج عباره عن جرح
...................................

حسين باهض الحلفي

وردة الصبح
الحبيب حسين باهض الحلفي

الدافن هله بجفينه
لحد يلوم اونينه
حگه العمر يگضيه حزن
وبكل وكت تلگاه يون
ــــــــــــــــــــ
هوّه اليغيب امن اهله واحد يحني مگفاه
ليل ونهار اتمر عليه وي دمعه تلگاه
هذا الدفن كل اهله بيده من يصيح اه
يطلع جمر وي حسرته ودم تجري عيناه
كلما يغمّض عينه
ايفز اعله صوت اسكينه
خويه علي لحسين احِن
وبكل وكت تلگاه يون
ــــــــــــــــــــ ــــــــــــــــــــ
يسمع ابوه وحده الا من ناصر ايصيح
لبيك صاح ويجر سيفه ايگوم وايطيح
گد مانحيل ايميل ظل كلما تهب ريح
للخيمه ردّه حسين گال ومدمعه يسيح
عمّتك ظل باريها
عينك يبويه اعليها
وبعيونه اثار المتن
وبكل وكت تلگاه يون
ــــــــــــــــــــ ــــــــــــــــــــ
بالخيمه گال اسمع جنت تتكسر اضلوع
وبالنار كل اخيمنه ذابت مثل الاشموع
ماظل متن مافوگه سوط الشمر مطبوع
مايدري بيّه الگال حدمن تبقه مفجوع
اليتسلّبن عمّاته
ماالهه حد لوعاته
يبجي اعله صدر المنطحن
وبكل وكت تلگاه يون
ــــــــــــــــــــ ــــــــــــــــــــ
كل فاگد وسجل الجروح ايفتحه بالليل
واجروح ابوالباقر تراويه كل وكت ويل
بعينه الصبح هزّل واذا صار العصر خيل
الله يعينه اجروحه ذني ايهدن الحيل
روحه بحزن مسبيه
ونار وركض علويه
يتلاهبن حدر الجِفن
وبكل وكت تلگاه يون
ــــــــــــــــــــ ــــــــــــــــــــ
كل عمره لازم ظهره يمشي الفاگد اخوان
وايدنگ الراس التطب عماته ديوان
لحد يگله امن البجي بسك والاحزان
خلوه يون ويبجي تسري بگلبه نيران
سم الغدر منتظره
وينهدم باجر گبره
راد اويه ابوه لو مندفن
وبكل وكت تلگاه يون
ــــــــــــــــــــ ــــــــــــــــــــ

علي محسن الزيادي

الدافن هله بجفينه

ضاعت احلام السنين
وكَلبي ذاب امن الونين
انه زين العابدين
يا زماني يا زماني
****************
رايد اعتب والعتب مسموح اليه
اهوايه غيرني مصاب الغاضريه
وكت يا دنيه بحبل مشدوده اديه
بضهري مطبوعه بعدهي اصياط اميه

كبرت وياي الجروح
وروحي ترتاح امن انوح
انه وين وهمه وين
يا زماني يا زماني
******************
عادت المخنوكَ ما يترك دمعته
ونايم بحضن التراب الغالي عفته
شفت ريج الماي يابس فوكَ شفته
وانه حته الماي من بعده كرهته

انه ابوي المنذبح
الراسه رتل عالرمح
ليش عطشت الحسين
يا زماني يا زماني
*************


موقفي ويه الخيم يحتاج توضيح
شفت بعيوني رقيه اتكَوم واطيح
بهدمي طفيت الخيم وانه اسبكَ الريح
وعمه لا تحتركَ زينب كَامت اتصيح

حته دخان الخيم
بعيني احسنه سهم
يا رقيه لا تجين
يا زماني يا زماني
****************
انه جانت عمتي تدرون اميره
ويزعل العباس اذا كالوا سيره
صدكَ هاي الناس ابد ما عدها غيره
تنضرب بالصوط بت حيدر جبيره

ولو ابو فاضل عدل
محد ايجرها بحبل
لجن مكَطوع الادين
يا زماني يا زماني
*****************







انه ويه النوكَ سالفتي طويله
اشلون عمتي صعدت الناكَه الهزيله
آه يا درب السبي ما بيه حيله
الروس تهتز من يشتمون العقيله

اهوايه تعبت عمتي
اتكَلي نوخ ناكَتي
اتعذبينه احنه الثنين
يا زماني يا زماني
*************
الزاد بللته بدمعتي بفكَد الاحباب
وكامت اتمر السنين وعيني عالباب
كمت كل اغروب احن وركض للثياب
لا تلوموني اعله راسي امن ارمي التراب

الياوكت ابقه انتضر
راحتي بس بالكَبر
عشت كل عمري حزين
يا زماني يا زماني
*********
تمت
تحسين الخفاجي

أحلام السنين
الحبيب تحسين الخفاجي

يبن امي اليسر // غيرني اشكثر
هد حيلي الغياب // يالهجرك عذاب
*************
خويه تدري الماله والي اتغورج اعيونه
وبحبل هاي التكتلك من يجرونه
الماله اخو بالدنيه يسكت من يشتمونه
خلها سكته ولا تكَلي متنج اشلونه

تسأل يالحنين // زينب جنتي وين
امغطيني التراب // يالهجرك عذاب
***********
جيتك وتدري بضعنه عايز ابنيه
وانه ما داعي اكلك خويه يا هيه
عالمغيسل شفت بنتك بجفها مجويه
وشفت ياخويه بذنها نقص ترجيه

شيبني الحبل // ما يرحم طفل
كل ساعه بمصاب // يالهجرك عذاب
***************








حسين كَلي اشلون صدرك والرمل جاسك
بعده اظن يمكن يألمك حافر الداسك
وين ما التفت الكَه اعله الرمح راسك
وانته جم مره محمد بالنحر باسك

بدموعي ارد اجيك // عطشان ادري بيك
جرحك كَلي طاب // يالهجرك عذاب
***********
امشي للعباس اريدن وينه دليني
خاف اروحله يخويه وما يحاجيني
ارد اكَله اهواي متني ضل يأذيني
خويه مو طبعه اجيله وما يلاكَيني

ادري براسه حار // وجان ايكَلي صار
ما جرحه بعتاب // يالهجرك عذاب
********











اهنانه جم مره يخويه عثرن اجدامي
اهنانه بعيوني شفتهم حركَوا خيامي
اهنانه عبد الله يناغي جان كدامي
وحته دخان المخيم خانكَ ايتامي

مره الذكريات // واحنه مجتفات
وتنوح الرباب // يالهجرك عذاب
**********
اهواي مشتاكَه ارد اضمك خويه بحضاني
نشفت ريج المصايب دمعة احزاني
والوكت يحسين عنك وين وداني
جيت اشوفنك وروحن موش تنساني

بيوم الاربعين // اتلاكَينه بونين
وبالطف كَلبي ذاب // يالهجرك عذاب
**************
تمت
تحسين الخفاجي

هجرك عذاب
الحبيب تحسين الخفاجي

لوعتي بدرب اليسر // عذبت حالي اشكثر
المن ادير العين // ما ضل صبر يحسين
*****************
انه زينب والمصايب شيبت راسي تره
والمره العالو عليها هاي اختكم هالمره

وبيا وكت فوك الهزل زينب يصعدوها
اشكد باليسر فوك المتن يحسين ضربوها

اسمع الوادم وراي // هايه لا تنطوها ماي
صار الجرح جرحين // ما ضل صبر يحسين
***********************
بخمسه وثمانيه طفله وطفل تدري اتحيرت
ومن يجيني الليل خويه افتر اعليهم كمت

امسه بحزن وبحركه اون وتفكد اطفالك
وكبل الجدم يم الرمح كلبي تعنالك

ابالي ضلت صورتك // فاركتني ضحكتك
امضيعتك امن اسنين // ما ضل صبر يحسين
**********************






بيا وكت يبن امي كلي الشمر يحدي بمحملي
صاحوا هل الكوفه اطلعو شوفو زينب بت علي

كلبي انكسر ليش بحجر كامو يراموني
وبعمامتك من هوسو يبن امي اذوني

اشكثر بيه اتشمتو // وبالشتايم ما كفو
حاجيني اروحن وين // ما ضل صبر يحسين
**************
دارت العباس عيني ودمعتي اعله الخد جرت
كتله خويه اجفوف اديه امن الحبال اتجرحت

كل ما اون راسه يون ويغمض عيونه
ايدخن وفه ويمطر خيم عباس يدرونه

عالوجه كل ما اطيح // خويه يا عباس اصيح
يمكطع الجفين // ما ضل صبر يحسين
******************









انه بت الجاه والعز وبخرابه اشلون ابات
صعبه وبنات الرساله امشردات اميسرات

شام الهظم زاد الالم ما ينحمل عذابه
يا حيرتي اشلون انسبي وكعد عله الترابه

امن الزمن ذاب الكلب // بيا وكت ديوان اطب
والحيل اجيبه امنين // ما ضل صبر يحسين
*****************
تمت
تحسين الخفاجي

درب اليسر
الحبيب تحسين الخفاجي

المهدي يفرح بيكم هله بالمشايه
وزينب اتحييكم هله بالمشايه
************
اتحزم المهدي ودمعته فوك خده سايله
ناشر الرايه وينادي هله بالزاير هله
ايوزع الماي وجربته ببو الغيره امهيله
صاح ما ضل شي يزاير راح توصل كربله

واكف ايناديكم هله بالمشايه
وزينب اتحييكم هله بالمشايه
************
هذا يخدم ذاك يطبخ كلها اشوف امحزمه
ورحبت بهل المواكب هالمسيه فاطمه
صاح كواك الله زاير علي حماي الحمه
وكام كل مشاي بيده ايسجل اسمه ويختمه

كل سنه امتانيكم هله بالمشايه
وزينب اتحييكم هله بالمشايه
************
يلله هم رجلك يزاير والله ما ضاع التعب
ذيج من ابعيد تلصف كبة حسين الذهب
حسين من كد ما يحبكم صاح كوم الهم وهب
وفوك شباجه يعالم هله بزواري كتب

كلبه حن اعليكم هله بالمشايه
وزينب اتحييكم هله بالمشايه
**************
اليوم ابو فاضل يزاير واكف اباب الضريح
يطبخ وفاتح مضيفه وهله بالزاير يصيح
انه فاتح باب كلبي وموكبي اسمه الذبيح
حته لو زعلان منك زعلي بس توصل يطيح

امراد اريد انطيكم هله بالمشايه
وزينب اتحييكم هله بالمشايه
************
زينب اتأشر عليكم وبعزمكم كيفت
اتنومست واهواي منكم هالمسيه اتشكرت
سجلت كل زينبيه وبمشيها اتفاخرت
وبالدرب نصبت خيمها وبالهله اشكد عزبت

وهالفخر يكفيكم هله بالمشايه
وزينب اتحييكم هله بالمشايه
*************
حسين يالمشايه عطره ايفوح من ابعيد اشم
وانه بس شفت المناير جدم ضل يسبك جدم
معتني وراضي بمصيري وبالمنيه ما اهم
كعبه العشاك كبره وكبره بيكم مزدحم

حسين ما ناسيكم هله بالمشايه
وزينب اتحييكم هله بالمشايه
****************
تمت
تحسين الخفاجي

هله بالمشايه
الحبيب تحسين الخفاجي

صحت اشلون ينكضن آهاتي
صحت اشلون ينسبن عماتي
حنيني اونيني عليهن // الشمر وسفه يحدي بسبيهن
***************
انه زين العابدين وهذا حالي
ونسه جرحي صعبه يا حمزه الثمالي
تعبتني وشيبت راسي الليالي
راس الحسين انه شفته برمح عالي

شفت الخيل بكل صلافه ادوسه
شفت الخيل يمه صارت هوسه
شجاهن ولا رحمه بيهن // الشمر وسفه يحدي بسبيهن
*****************
والله حيره والاميره اتصير اسيره
عذبوها وبيها طبو ديره ديره
عليها نضرات الشماته اشكد جبيره
ماكو واحد والله منهم عنده غيره

لا تعرجين بالمشي يا ناكه
لا تعرجين وهلله بالمشتاكه
والعيون تكاثر بجيهن // الشمر وسفه يحدي بسبيهن
****************





يابو حمزه بالحبال امكيديني
امشي سكته والرقيه تربي عيني
اتكلي ذاكه الراس شو ون الونيني
ومن اطيحن يعت شياله ويجيني

جنه هالراس اهواي حن الحالي
جنه هالراس راس ابوي الغالي
الشفاها اصد وبجي ليهن // الشمر وسفه يحدي بسبيهن
***************
راس عمي اعله الرماح السمهريه
وفوك هودج زينب اخته كسر فيه
غيمه سوه وسمه اسمها الزينبيه
جان يزعل لو سمع كلمة سبيه

والعباس يمشي وي ناكتها
والعباس ايعدل بشيلتها
حنين وخواته يجيهن // الشمر وسفه يحدي بسبيهن
******************










يابو حمزه طبت الشام ألمتني
والخرايب ذيج اشكد عذبتني
رمله صاحت هالخرايب شيبتني
والرباب اتكلي يمه داوي متني

اشمالها الشام امعيده وفرحانه
اشمالها الشام هيجي تقسي ويانه
الفواطم يصفكن بديهن // الشمر وسفه يحدي بسبيهن
*****************
عمري نكبه وكمت احسن موتي راحه
كبر سني وعمري جبته بس نياحه
يابو حمزه ارد اكلك بالصراحه
جرحي ماظن يشفه ويهيد بصباحه

انه ارتاح من اصير بكبري
انه ارتاح لمن يخلص عمري
النوايب بعد شرتجيهن // الشمر وسفه يحدي بسبيهن
*********************
تمت
تحسين الخفاجي

صحت شلون
الحبيب تحسين الخفاجي

استشهاد الامام السجاد عليه السلام
@@@@@@@@@
راح اموت وتخلص ابروحي المحن
راح اموت ونعمه احصلي جفن
احسد بروحي اعله موتي
بكربلا خلصو تجوتي
راح اموت
@@@@@
معروفه لو مات البشر يغسلونه ويجفنونه
وتجمع اعليه الخلك وللمكبره يشيعونه

ماريد الجفن لا تلفوني اصيح
وانه ابوي ابلا جفن ميت ذبيح
طاح كلبي بكربله كل ما يطيح
حسين ابوي مترب ونحره جريح

بخيمه اريد. دفنتي بطف كربلاء
بخيمه اريد. من تسوون العزاء
متون ماعدهم اخوتي
بكربلا خلصو تجوتي
راح اموت
@@@@@@@@
لا منذبح نحري وون لا بايكين اهدومي
ولا شالو براسي الرمح ولا زيدوها اهمومي

لا شلت ابني ووذر من عندي طاح
ولا احط ايدي كمت فوك الصفاح
زين هسه بموتتي نوح وصياح
ماكو لا عطشان لا سوط ورماح

لا رضيع شايله وجاله السهم
لا رضيع. كماطه راح وي الخيم
حسين شاله وراح صوتي
بكربلا خلصو تجوتي
@@@@@@@@
لا ودعت كافل ضعن لا شفت سهمه بعينه
ولا شفته كاتب عالرمل عذريني عمي سكينه

ما اكض ضهري واخوي بحضني مات
الكافل اخر نفس يسال ع البنات
حسين خلص عمره يم خيه يبات
وهسه شافه اكباله طايح عالفرات

لا سهام. بيدي اجر من الكفل
لا سهام. طايحه بعين البطل
حسين صاح انته بلوتي
بكربلا خلصو تجوتي
@@@@@@@@@
لا ودعت اختي وبجت وكالتلي كونك ترجع
ولا بيه يكللها ارد يفيض الجفن بالمدمع

لا اختي جابتلي الفرس وتكلي روح
حسين بس وداعه يلجم بالجروح
ودع اخته ويدري بوداع اليروح
وينذبح عطر الذبح منه يفوح

لا تلال. صعدت اعليهن عبي
لا تلال. متربه وراحن سبي
هسه زين ونعمه موتي
بكربلاء خلصو تجوتي
@@@@@@@@@@@
لا بيه يطعن كل رمح لا كل سهم ياذيني
لا شمرو اعليه الحجر وصاب الحجر نص عيني

لا شالو الراس برمح والكل يشوف
حسين ابوي المنذبح يوم الطفوف
هدو الخيل اعله جسمه بلايه خوف
والاصابع تسعه ضلن بالجفوف

عالرمال. لا متت عاري وسليب
عالرمال. حسين ميت بس تريب
لا حصيره انه تابوتي
بكربلا خلصو تجوتي
@@@@@@@

الشاعر
يوسف عيد

ماكو اليشبهونك محال _
يا خالق الحب والجمال
يا حبيبي فد سؤال _ شمسوي بكلوب البشر" غرامك
...........................
ما أسألك يا ورد _ أترجفني حد البرد _ عشكك نقاوة كلب _ عشكك جروح اليحب _ حنين- أبترافه"
يمبلل الخد دمع _ نسمه وتريح الضلع _ يالعلمتني الوفه _ أبحبك دليلي أكتفه _ سبيل- اللطافه"

تاركني وين _ ها يالحنين _ جمال العافيه"
شبكة خليل _ وتحضني حيل _ الضلوع الدافيه"

يا عله بفراكك تطيب _
أكثر أعاني من تغيب
يا أول وأخر حبيب _ تذبل أعيوني أمن السهر" غرامك
...............................
يا سر وجود الصدك _ أمشبع رقيه شبك _ يا أترف أمن النسم _ أبدلالي تارك سهم _ أريد- وجودك"
صدرك وقف للعشك_مو مال دوس وسحك _ موطن صرت للعطر_أتحسدك ورود الحمر _ تغار- من خدودك"

أجمل حبيب _ كلش قريب _ الدليلي ومهجتي"
سيد الغرام _ تذبل حرام _ يوردة دنيتي"

تعطش صدك لو بالخيال_
أعله أشفافك أتصلي الرمال
طايح عله أجروح الزلال_ ويغازلك جرف النهر" غرامك
................................
أتخيلك كل صبح _ شمس وتغازل رمح _ وعيونك أعله الضعن _ أبنيات يتمايلن _ عذاب- سبيهن"
يا خاطري المنكسر _ أمأذيك سوط الشمر _ يضرب رقيه وتون _ ونته أعله رمحك تحن _ تشوف- بجيهن"

أنته الغيور _ ضعنك يدور _ أعله نوك وينسبي "
جرحك جبير _ كلبك كسير _ حمر لون العبي"

لو عطشت أرقيه تصيح _
ماي أعله شفتهه تطيح
فوك الرمح ونته ذبيح _ تتبده جن ماي المطر" غرامك
..............................
أنطيت الكلب والنحر _ ونطيت تجوة ضهر _ ونطيت خيمه وعبي _ وبنات جدهن نبي _ جروح- مصايب"
ياهو اللي مثلك شهم _ ترتاح من تنلجم _ وتشهك الربك وفه _ وتفيض بالعاطفه _ نطيت- حبايب"

كلبك حنين _ أعله أسمك حسين _ يمهجة فاطمه"
كلك عطاء _ رب الوفاء كريم الخاتمه

من عثرت الناكه بجيت _
وي زينبك مدري شحجيت
دنكت جن إلهه شكيت _ أشما عاينتلك تنكسر" غرامك
.............................
مو راس ويه الضعن _ روحك وكلبك مشن _ للكمر مره تصد _ ويطيح دمعك ورد _ عجيب- مقامك"
عالرمح بس تلتفت _ أتدور بنت لو أخت _ محتاج كلي شنو _ مشتاك صرت المنو _ كسير- علامك"

جاسم تريد _ الأكبر بعيد _ رمح يسبك رمح"
سكنه ورباب _ أحبال وتراب _ جرح شابك جرح"

يالمنكسر يم البنات _
أمن السوط إي متلوهات
أبشتمه وحبل متكبعات _ أتشوف العبي صارن سمر"
غرامك
............................

حسين باهض الحلفي

غرامك
الحبيب حسين باهض الحلفي

يملح أجروحي اليلجمني أبلذه
الك كل كلبي وكل العشك أخذه
رادود وقرالك نواعي الفاكده
وألطملك أضلوعي أعله فطرة والده
...........................
أشتاكلك حد التعب والعشك ينبض بيه
والحسره تتعثر تجي تشبه مره مسبيه
اليشوف حالي امن التعب أيحن ويكول خطيه
شوك العليله أبضامري منه خذيت أشويه

كسير الخاطر وجروحي أتعاني
يماخذ روحي يالمالك ثأني

من دون عطفك عمري مابي فايده
وألطملك أضلوعي أعله فطرة والده
..............................
أتدور أمنياتي أبحضرتك نورس يدور أميه
أشتم عطورك بالهوه وتملي الكلب حنيه
نتفارك وأرجع أحن وأشتاك ألك يوميه
أسأل مواقيت الزمن وين الحبيب وضيه

رطب ياجرحك صاحي العمر كله
يندي أمروه وبس حبك أيشغله

ويوميه دمعات المفارك زايده
وألطملك أضلوعي أعله فطرة والده
...................................
عايشتك أبريتي نفس أتنفسك كل لحضه
تتوزع أبنبض الكلب نبضه تسند نبضه
يحسين يافرض العشك بدموعي الك أتوضه
أنساك جربت وشفت فرض العشك ما يرضه

يلي أنطيت من أجل العشك كلبك
أحبك كلب ذايب ميت أبحبك

أجروح أشتياكك بالكلب ما هايده
وألطملك أضلوعي أعله فطرة والده
................................
شاغلني حد كطع النفس تتكاسر أويه ضنوني
من أصفن ابجيلك عشك يجري أويه دمع عيوني
من زينب اخذيتك عزم أتحديت اليمنعوني
الماعرفو شيعني العشك شكد كامو أيلوموني

أمل السالفه المابيهه طاري أسمك
المدامع فاهيه الماتبدع أبرسمك

باب الكلب بس اعله عشكك ساده
وألطملك أضلوعي أعله فطرة والده
...............................
يابو الشفاه الذابله الفطرهه ذاري الصحره
يالعلمتني أمحبتك بالكلب مو بالنضره
أتخيلك محني الضهر يم الكمر عالغبره
منهه اعرفت لا مو سهل جرح الأحساس وكسره

رسمتك ورده اعله الشاطي عطشانه
حنين وروحك تعبانه ذبلانه

شو مايردلك كل حبيب أتواعده
وألطملك أضلوعي أعله فطرة والده
................................

حسين باهض الحلفي

ملح اجروحي
الحبيب حسين باهض الحلفي

راسك جبته وياي _ ملفوف أبعباتي"
أعله طول الدرب أحاجيه _ ياروحي وحياتي"
حاجيني ميحاجيني
بس عينه فكهه أبعيني حاجيني
............................
مشه إوياي ابرمح عالي _ وي كل خطوه يبرالي
يعاينلي وأعاينله _ مشينه غاليه وغالي"

بس نضرات مانحجي _ يبجي وأنه هم أبجي
يشجيلي الرمح ياذيه _ ومن السوط آنه اشجي"

كتله حار السوط يابو أسكينه
من سمعني شفته غمض عينه

إذا أذكر عذابي _ أكول أشلون عدله"
ذبح حسين أخيي _ رمح بفادي خله"

ريت الأجل يلفيني
بس عينه فكهه أبعيني
............................
أوكضينه أيام مو حلوه _ سبي وسوط ومشي كوه
الهزله أعليهه خدر الله _ ورمحهم شايل الخوه"

ورجعنه أمن الأسر أسره _ بلا والي وعبي حمره
رجعنه أمن الأسر موته _ نفس ووجوه مصفره"

بس هياكل والعبي أمغطياتنه
نكعت ضهر الهزل دمعاتنه

غرايب والغريبه _ هيبتهه قليله"
والمهضومه تبقا _ حيلتهه جليله"

حته الهوه إيبجيني
بس عينه فكهه أبعيني
...............................
أجيت وجايبه أجروحي _ وجر جدمي وأعت روحي
الله إعيني وأمشي _ شلت بيديه مذبوحي"

مصيبه وشايله أمصيبه _ وجروح المالهن طيبه
لسه أمعفره أخدوده _ والدم يابس أبشيبه"

أغسلته بدموعي ومسحت أخدوده
ما لمسته جبهته ممروده

شميته وحضنته _ وردت أبثغره أبوسه"
كسر كلبي نضرته _ متكسره أضروسه"

وصار أكثر إيبجيني
بس عينه فكهه أبعيني
............................
اليسر مني أخذ حكه _ وأجيت أبريه مختنكه
تدري وما أذكرنك _ أبخد أرقيه جم طكه"

جانت تطلب الشبكه _ تصيح أبحسره وبشهكه
يطكهه أبسوطه كل حيله _ سوه أمتونهه زركه"

عدهه صارت من ضربهم حدبه
ويبست أعله الراس مثل الخشبه

أمن الخرايب جيتك _ فاكدتلي أبنيه"
ماتت ومسلوبه _ الذان والترجيه"

أعله أرقيه لتانيني
بس عينه فكهه أبعيني
...........................
أحجي وأبجي مجبوره _ اليدري يكلي معذوره
أمتوني مو فقط زركه _ من السوط مكسوره"

أفتح كبرك أحضني _ الشام أهواي عذبني
أوياك أبهالحد يحسين _ أنه أوراسك أدفني"

وين أروح الدنيه ضاجت بيه
ميته أجيتك مو فقط مسبيه

تسأل لو أسألك _ ياهو اليسأل أول"
أبحالك شنهو صاير _ لو حالي التبهذل"

أمأذيتك وتاذيني
بس عينه فكهه أبعيني
...........................
بدياتي أحفرت كبره _ حفره ونايمه أبحفره
لوما نحر عبدالله _ جا ما ميزت نحره"

راسه أبجسمه نزلته _ الماجنت أنته صرت أنته
المثلك شايل أمروه _ يطك عركه ويفز لخته

حسين صح الخيل داست فوكك
بس نواعي أختك تحرك أعروكك

جلد عبدالله كزبر _ ودم من نحره نبع"
بس أنته عذرتك _ لأن جسمك تكطع"

بس ماكلت عذريني
بس عينه فكهه أبعيني
..........................

حسين باهض الحلفي