حُبَّك جِذَبّنِيْ..ذَنّبِي مِنَعّنِي..مولاي اِخذني..رافعلك ايدي!



١
مغمّض وحبك متاهه واني ماعندي كلُب
مدري بيش اقسم وتقبل وتنتهي هاي الحرُب
مدري يمتى انعَم بحبك وچرحك بگلبي يطُب
ومدري يمتى اوصل لشاطي حبك الكلش صعُب
صوتك سِمعته..حُبّي هِجرته..حبّك طلبته!..رافعلك ايدي!



٢
مااريد الّه انته رايد واني ماعندي وفاء
جربت ماجاي احصل فدوه علمني الوفاء
عمري لا يخلص واضلّن بيدي بس وحشه وجَفاء
كون هاي الحُجُب تبقى يعني كل عمري هباء
غيرك مَعندي..علمني ابدي..ماترفض ادري..رافعلك ايدي!



٣
يبوالسجاد انه نادم وانته بالظلمه ضياء
وانه مرضان بذنوبي وتربتك بيها الشفاء
غيّر اسمي سمني خادم وادعوا گلّبي لكل عزاء
يوسف ابّير ابغربته ورحمتك جانت دعاء
امسك يمنتي..امسح دمعتي..بيدك رجعتي..رافعلك ايدي!

٤
لايذه الدنيه بحضرتك وبيك تتبرك التربه
سجدت اِعيوني اعلى بابك وانت بابك باب توبه
لفني بالرايه الشريفه بدمعتك كِلّي تِوضّه
واني اعلمك واني اقِبلك واني عنّك راح ارضه
ريّح دليلي..والله انته حيلي..اقبل قليلي..رافعلك ايدي!


٥
من بعد هاي المشاعر والدموع البين اديّه
ارجوا منك تعفو عنّي وتشطب خطوط العليّه
يابوالاكبر هاك جفّي وانتظر منك هديه
ماكو غير ابجي اعلى جرحك لحد لحظات المنيّه
(ترضى عنّي وتلزم ايدي وابقى انوحاً للمنيّه)
يابورقيه..بهاي المسيّه..اطلب هديّه..رافعلك ايدي!

مرتضى كريم العبادي

رافعلك إيدي

مايرهم الجرحه دوه.. اليبچي حمر دمعاته
والمثلك انت سيدي.. ماينسبن عماته

نار الخيام بگلبه..يشوف السبايه بدربه
~
وشحاله هسه العمته.. وحده يواسي بروحه
المغرب يتعبه من البچي ..مسويله طف لجروحه


مفجوع وحدك باقي مفجوع
حتئ منامك كسرة اضلوع
موجوع يبچيله عله موجوع
گلبك الزينب حيل  مشلوع

وبگلبه و يفت الجرح.. ويرجع براسه العاشر
لولحضه سد عينه تره.. يعرض بعينه الحافر
من يسجد اعله التربه.. يشوف السبايه بدربه
~~
سالفتك متعبه الحچي..وبالجفن شيبك خضر
محد يسدلك وحشتك.. يل جاي حزنك يكثر

گلبك يلچمك ماركد يوم
چنه يدك من فوك الهدوم
بس الحزن باقيله مقسوم
ملچوم سولفله عله ملچوم

علينا يعز دمعك يصب..كل يوم روحك
تنعه
شنهو اليألمك سيدي.. من حسين كسرو ضلعه
هاي المواقف صعبه... يشوف السبايه بدربه
~

يتناوب اعليك الوجع...كلساع ماخذ صفحه
الشايفه عيونه حرگ.. ركضت اعياله اذبحه

  ايد عله گلبه وأيد عالعين
متعبته زينب عمر خمسين
    الحيله بعد يراد حيلين
  چم طيحه طاح بطيحة احسين


شگد پأدي طايح دمع..وعبدالله ماخذ باله
يوميه مشهد حرمه.. للمهدي يتراوله

يسولف سهم بالرگبه .. يشوف السبايه بدربه
~~

حزنك اعليك امفصله.. خافن تكتلك حرگه
ليلك تخلصه بصف خيم.. وتشاهد المحترگه

وحده الحنين و شايل اجروح
   بياهيمه گاعد المن  اتروح
  مايصفه راسه وصوته مبحوح
  تثكل اجدامه العنده مذبوح


صارت حياتك بس بچي.. الله يساعد عينك
بكل ماي يتراوه الك.. عالرمح راس احسينك
اليرفض الماي يشربه.. يشوف السبايه بدربه
~~~~
شحالك بضلمه وحدك.. سالفتك امخلصه بموت
براسك اثر طفله وطفل .. يوميه سامعلك صوت

من تمشي وحدك تذكر السوگ
واتشوف تعثر هزل النوگ
چف اعله چف بحبال مشبوگ
ابعينك تباوع  كلشي  مبيوگ

ياصوره العليك التمر.. وشضال بيك لهسه
كل عام واتشب الخيم..والجرح ضلك نفسه

الله يذيچ الغربه   .. يشوف السبايه بدربه
~~
سيد محمد الهاشمي

ماينسبن عماته

راح أبونـه وبعـد كلشـي ميفيد
ندعي من هالمسه لايجي العيد
مانريد العمر والابو بالقبر
بينه ماظل صبر من هل المصيبة

1
علي راح الليلة وأصبحنا يتامه
بعد عينه نقـرا عالدنيا السلامة
الموت اخذ روحه وصعد وأعلن ختامه
منهو غَيرة أعله اليتم يبدي اهتمامه

اليتامه تنوح أعله بابه
تنادي يصعب علينا غيابه
راح أبونه وفجعنا مصابة

ياعلي ارجـع أتنادي الأطفال
وأنت بيد الحسن نعشك أنشال
جم قلب منكسر والنواظر حمر
بينه ماظل صبر من هل المصيبة



2
الدنيا ظلمة والبشر كلها حزينة
ندور بكل بيت وينه الابو وينه
جان كل رمضان يجمعنه بحنينه
وليلة العيد بشغف يفتر علينه

هسه ياعيد بعد عينه يحله
فكده يكتل يناس شيحمله
هذا حيدر فلا نلكه مثله

طيحته وفركته هدت الحيل
الهُدى أتهدمت ناده جبريل
وي أذان الفجر رأسه طبروه طبر
بينه ماظل صبر من هل المصيبة


3
نشال قلب حسين يوم النعش شالوه
والحسن يركض ينادي لا تدفنوه
أبو فاضل واخوته وأصحابه ينعوه
شلون بالمغتسل ذيج الساعة غسلوه

وجه أصفر علي ودمه سايل
ياوسف للعظم جرحه واصل
يعينك الله عليه يابو فاضل

كل أبو خيمة معروفه ياناس
حكه عالوالي من يبجي عباس
اليحس بالهجر قلبه يصبح جمر
بينه ماظل صبر من هل المصيبة


4
لاتلوم العين وتنشف دمعها
هاي زينب المن تسولف وضعها
أمس أمها فاطمة كسروا ضلعها
وهالمسيه موت أبوها هم فجعها

من يتيمة اليتيمة عجيبة
من عزيزة الوحيدة الغريبة
والله هضمه يناس ومصيبة

باجر بكربله تسجب العين
لا أبو الغيرة يمها ولا حسين
من يجيها زجر تذكر المنطبر
بينه ماظل صبر من هل مصيبة


5
من بعد موت الابو الحالة خطره
الحسن جعده بهذاك السم تغدره
والحسين بكربله محد ينصره
الشمر بيده يطبره اثنعش طبره

ضامي والدم يسيل بجبهته
وطفله سهم المنية بركبته
عالرمح رأسه ويصد لَخَيتَه

زينب أعله النجف تربي وتنوح
تنادي وينك علي عضيدي مذبوح
ويلي ذاك الظهر بي سبي وبي يسر
بينه ماظل صبر من هل مصيبة


6
مصاب أبو الحسنين تارك بينه تذكار
كل شهر رمضان نبجي بسيل الاعبار
هل الحزن والنوح يبقه لحامي الجار
نسوي بي فاطمة الزهرة وصاحب الثار

الليلة ليلة مصيبة ونوايح
عظم الله أجرك الغالي رايح
مات أبوك بغدر يابو صالح

مانظن يرجع النه بسلامه
من بعد عينه صرنه يتامة
من الله هذا الأمر عظم الله الأجر
بينه ماظل صبر من هل مصيبة

شطره
امجد صاحب الشطري

راح ابونه

رايح لچن گلبي بدية
بوية الحزن غيم علية
يا نبض زينب گلبي يهواك
روحة علي ما الها جية
بچيتي الايتام. ياطبرة الهام



شمحلاتة من راح الفجر چنة مشة لعزازة
متبسم وشفتة لغز الفرح شنهي الغازة
يمشي الفرض لجل الفرض اصل الصلا تعتازة
يمشي ويسبح بالدرب عن شي يتعبة وفازة

ويكول اجيتج ي ام الونين
يازهرة ايامي والسنين
رايح علي هو لمماته
اول بشر يتمشى للبين
گصرتي الايام. ياطبرة الهام

…………..

ايتام عندك ياعلي لميتهم بالدنية
تزيد اليتامة بطبرتك منك فلا مرجية
امنيتي اعرف يا علي و الحسرة تاكل بية
لمن نويت لسجدتك شنهي يبوية النية

تعرفها انت الطبرة تدناك
النية جانت تعب دنياك
هي النوايا اختلفت اهنا
يابوية نيتي ابقة وياك
فززتي الاحلام. ياطبرة الهام

………….

طر زيج ثوبك يالحسن مطرور راس الوالي
كسر الضلع بينة يصل يومية رايح غالي
يحسين شيل اعمامتك ركن السنن ضل خالي
گال الوصية حيدرة يمة الاگمار اتلالي

كلها قلق شنهي الوصية
جيبو الكفل عباس الية
عباس اختك تمشي وياك
مو ؏ الهزل تمشي سبية
ابجيها كل عام. ياطبرة الهام

……….

ترتيل من رب السما. نازل علينة اليلة
ليلة قدر صارت ترة ليلة لطم للعيلة
بترتيل مشكوك الگمر باسمك علي توميلة
اقتربت الساعة علي بعدك الحزن انشيلة

الدمعة ما فاركت عيني
من ليلتك يبدي ونيني
هل مرة اصيحن ياعلي گوم
والمرة لخرة يا حسيني
اخذتنة للشام. ياطبرة الهام


أحمد رعد الغالي

يا طبرة الهام

الدنيا حزنانه المصايك يا ولينه
هاي اخر ليله  ونفارك علينه

الزهره محنيت ضهر
اليوم حيدرنا انطبر
ـ,,,,,,,,,,,,,,,,,,,,,,,,,,,,,,,,,,,,،

هاذ اول يوم تبقه الدنيا بي حيرانه
والورد وشكاله صَبحت ياعلي ذبلانه
الدمع مختاض نازف مابقه بمجانه
راح ابونه خلافه المن  لليتم خلانه

ياعلي انته الامل ونته الولاليه
ولرواي بدون ذكرك مو روايه

بطيحته الدين نتصر
بس كسرتلنه ضهر
ـ،،،،،،،،،،،،،،،،،،،،،،،،،،،،،،،،،،،،،،ـ

نطبر روح الله ورسوله ونزفه الدنيا دمه
كل موالي بكلبه حيدر حزنه هوه يترجمه
اليوم كسرتنه جبيره نطبر حماي الحمه
برسول الله لتحاقه وهاي افضل مكرمه

بلكتاب اليوم نزفه شكو ايه
وبل جنان ام الحسن ملايه

شبعت الدنيا قهر
بطبرته نشق القمر
ـ،،،،،،،،،،،،،،،،،،،،،،،،،،،،،،،،،،،،،،،،،،

كسره بل تاريخ صاره وجرحه ابد ماينلضم 
كل يتيم اخلاف حيدر تلكه كلبه منهضم
ولسبب بيام حيدر الناس ماتعرف ضلم
السمه مولاي حزنت والكواكب تبجي دم

شتمعو الاشرار كلهم بل سقيفه
وجانته النيه ابد لا مو نضيفه

باجر الوين المفر
حتما تمر بسقر
ــــــــــــــــــــــــــــــــــــــــــــــــــ
جار بينه فرك ابونه وطفو نوره الصاطع
كل موالي لال حيدر كلبه تلكاه فاجع
مايهمن الكال حيدر نعده لازم رابع
يبقه اول لا تحاول لو تعد لتاسع

بس محمد وال عترتهم نضيفه
وغير حيدر ابد ماتلكه خليفه

يضل كلبك بي قهر
همه اشراف البشر

خادم امير المؤمنين
زيد الفريجي
قناة الرجوع الى الله   

آخر ليله

#مولاي_امير_المؤمنين روحي فداه
#حوار_بينه_وبين_حيله


يا حيلي . يم ولدي وصلني بعجل
ياحيلي . ما ارده من يلفي الاجل
يا حيلي
ولبيتي لو حيلي اوصلت
گلهم علي دار الوكت ياحيلي

………………………………………….
تگوه بعلي وردني يمهم
بكل حيلي خليني اشمهم
من عگبي لو تدري شلهم
ركضة مشيب وضحايه

ياحيلي زينب خطيه
تبچي اعله هاي الرزيه
ماتدري بالغاضريه
تتراكض وي السبايه

من احجيلك يوم العاشر يعني الدمعه الصعبه
يضحي حسين بكل عايلته بالقربه وبالغربه

تتعثر بمشيك كمت
كلهم علي دار الوكت . ياحيلي

………………………………………….
ع الگومه جا ماعنتني
ضل يمي من وصلتني
يم ولدي لمن عفتني
تجايه صارو اليه

هلمره گربت منيتي
وايام باقي الرزيتي
ياحزن يمغطي بيتي
بالگوه اشيلن اديه

زينب بويه شكد مهضومه وعيونچ تعبانه
بعدچ ماشفتي من العاشر ورياگج عطشااانه


عيشي انتي لو انه متت
كلهم علي دار الوكت . ياحيلي

………………………………………….
بلكي الله حيلي يتگوه
افزعله من يتلوه
البالعاشر ابلايه تجوه
يحسبني كون ويربعه

بويه الوصيه الجبيره
جيبو لخيكم حصيره
باچر وراكم دهيررره
من محبسه لحد اصبعه

حسين مفرهد يوم العاشر تنشدله العصابه
وزينب يبنيتي اعله الهزله وبصفج سلابه

ياظهر زينب لو ملت
كلهم علي دار الوكت . ياحيلي

………………………………………….
عگب الدلال الحبيبه
زينب سبيه وغريبه
بويه وراچ المصيبه
كسرة ظهر ياقصرهم

تروح الزلم والشوارب
مكسوره كسرة حواجب
الموت ابد ماله صاحب
شيرده طشوه شملهم

الماخله ام عون اعله اخوتهه تنزل وتودعهه
بس عاد الترچيه الراحت لرقيه يرجعهه

ميت علي لمن كلت
كلهم علي دار الوكت . ياحيلي

………………………………………….
عباس القـــلعـاوي

يا حيلي

عندي حچي هواي ..يوليدي يحسين
تحمل عطش ماي..وغربة النساوين
خلي ايدك بإيدي
يحسين يوليدي
@@@@@
تعلم عالعطش يبني وعود گلبك يحمله
شكد ما بيك لا تشرب ماي وتعرف العله
خلها شفافك اتفطر ولو يابويه مو سهله
گلبك بويه جمره يصير وما مش ماي يوصله

يوليدي عطشان..ما تشرب الماي
أمن العطش ذبلان ...وجروحك هواي
خلي ايدك بإيدي
يحسين يوليدي
@@@@@
تعود خويه خليها تمشي زينب أكبالك
لأن تكلع ابين الگوم وحدها أكبال چتالك
وحاول خلي فوگ الشوك حفايه تركض اطفالك
بالطف اهلك مشردين وأنت محد بحالك

يحرگون الخيام...بالبر يطلعون
يودوها للشام...وغربه ليضعنون
خلي ايدك بإيدي
يحسين يوليدي
@@@@@@
ييني شما شفت حافر خلي ايدك على صدرك
وحاول تبتعد عنه وخلي الحافر يعبرك
تنام ابكربلا اعله الگاع وحوافرهم يكسرنك
على ظهرك على وجهك يوليدي يگلبنك

الخيل فوگاك...بذاك الظهر ذاك
ومتونسه اعداك....يالمحد وياك
@@@@@@
تخيل دوم چن توگع فوگ الگاع من مهرك
اسهام اتخيل بجسمك من جدمك لحد صدرك
تتلگاها بيش الكاع ورمح عابر على ظهرك
وانت بطيحتك محتار منو ظل يفزع لخدرك

من هسه يحسين...فكّر بالخيام
تنطي الوجه وين...والنيه للشام
خلي ايدك بإيدي
يحسين يوليدي
@@@@@@
حاول يبني من تنام اتخيل عالرمل نومك
اتخيل انته فوک الكاع وناس أتسلب اهدومك
ابد ماكو مثل جرحك أبد ماكو مثل يومك
عيونك ما تشوف شصار اعليها يابسه دمومك

ما تدري بالصار...وتگوم وتطيح
من شبت النار...وزينبكم تصيح
خلي ايدك بإيدي
يحسين يوليدي


مرتضى الربيعي

يوليدي يحسين

رجع نفس الألم

🚩استشهاد الصادق ع🚩

بويه بويه وسفه جبدك سمموه
بويه بويه  وسفه كلبك لوعوه
بويه بويه
ــــــــــــــــــ
بويه لجلك انه كل حيلي انهدم
من شفت جبدك نزل جدامي دم
بويه ما يحملني من اوكف جدم
بويه منظر فاجعه اكبالي انرسم
بويه بويه الهادي جدك مارعوه
بويه بويه  وسفه كلبك لوعوه
بويه بويه
ــــــــــــــــــ
بويه ياهو المثلي ينظر والده
يلوج والسم حيل كلش مظهده
صحت صوت الوالي الله يساعده
حمل ضيم اوه من هاي العده
بويه بويه شلون شخصك حاربوه
بويه بويه  وسفه كلبك لوعوه
بويه بويه
ــــــــــــــــــ
تلوج حيل اتلوج يا بن حيدره
وجهك اتغيّر بضيم الي جره
شرد اسويلك او روحي حايره
جبدك السم كصه وكلش وذره
بويه بويه فضلك اعدانه انكروه
بويه بويه  وسفه كلبك لوعوه
بويه بويه
ــــــــــــــــــ
مثل جدي الباقر مصابك حصل
ومثل جبده جبدك اتكطع وصل
اه يوم السم لعد جبدك وصل
من اهروشه وبالالم ويلي انفصل
بويه بويه بيك كلبي الّموه
بويه بويه  وسفه كلبك لوعوه
بويه بويه
ــــــــــــــــــ


شفت بيك الفاجعه وكلبي انفجع
ذاب كلبي الونّتك حين السمع
سمّتك يا بويه اتباع البدع
وانت نور ونور عل عالم سطع
بويه بويه شلون ابن يشوف ابوه
بويه بويه  وسفه كلبك لوعوه
بويه بويه
ــــــــــــــــــ

الشاعر  محمد حسن ضيغم

جبدك سمموه

🚩استشهاد الامام الصادق ع
لسان حال زينب ع🚩


ها يجده ... انه من الشام اعتنيتك
ها  يجده ... كالوا مسمم واجيتك
يبو الكاظم لاتون
هاي آنه ام الحزن
ــــــــــــــــــ
صوت من الكاظم ينادي بهظيمه
سمموا والدي يا عظم الجريمه
محنة الصادق صفت كلش اليمه
تيتمت اولادك وآنه يتيمه
ها يجده ... من سمعت آنه ونينه
ها يجده ... من الكبر جيتك حزينه
صحت يبني لا تعن
هاي آنه ام الحزن
ـــــــــــــــــ
عفت كبري وأعتنيتك للمدينه
وعفت بت حسين مهمومه وحزينه
تصيح يا عمه الكلب زايد حنينه
وعن ابو الكاظم ارجعي وخبرينه
ها يجده ... والدك يصعب مصابه
ها يجده ... اتسمم وزايد عذابه
ذابل بشكل الغصن
هاي آنه ام الحزن
ـــــــــــــــــ
جيتك وجرح المتن للساعه دامي
وجبدي وي جبدة رقيه ال هسه ضامي
اسمع العالم ينادي يا امامي
وآنه وياهم صرت لطمي اعله هامي
ها يجده ...الشيعه ما يبرد جمرهه
ها يجده .... وجدتك فكدت صبرهه
الشوفته صرت انه احن
هاي آنه ام الحزن
ـــــــــــــــــ
حين شفتك والمدامع تجري عل خد
ها يجده وانت لابس ثوب الاسود
صحت صوت بحسرتي الله ولحّد
جبد ابو الكاظم وسف بالسم تمرد
ها يجده ....شعدهه ويانه المنايه
ها يجده .... وتشهد الحزني العبايه
شكثر كلبي ممتحن
هاي آنه ام الحزن
ـــــــــــــــــ
يم ابوك وروحي صاحت ها يجده
من كبر جرحه صحت مكدر انشده
جده ادري السم صبح كلش مضهده
خله يكعد لحضه وبجفك اسنده
ها يجده ... يا امام الجعفريه
ها يجده .... صوبك سهم المنيه
هاي اخر لحضه اضن
هاي آنه ام الحزن
ـــــــــــــــــ

الشاعر  محمد حسن ضيغم

ها يجده