مملكة الغرام
ما بين چفينك نهر وبراگك الخيام
مملكة الغرام
شگد شايل بعينك وفه لو ينّكر حرام
صورة حُسين بعينه راسم
ماكو بحلاته گمر هاشم
،،،،،،،،،،،،،،،،
انت بظلام الدنيا بصيص
وكثر علي من روحي حريص
شنو اغلى منك مامو اكيد
اعكال ابوي كبالك رخيص
ياشيخ الزلم
ادنك اركاب الزلم لو اسمه ينذكر
ياشيخ الزلم
اتأمن عشيره برايتك لو طلبت الستر
راية وفى بجفوفه لازم
ماكو بحلاته كمر هاشم
————-
يامن على الطف غيرة استوى
دمعة وعشك مختلطة سوى
الما يقره اسمك بالطف يموت
تركيبت اسمك ماي وهوى
يالبيده الهوى
رادو يخنگون الحرم وعالخيمة ما يفوت
يالبيده الهوى
خليني اشمن غيرتك لو ماكو كون اموت
بس ظهر اخيّك كونه سالم
ماكو بحلاته گمر هاشم
————-
ماريد اعيشن دنية الملوك
ويكفيني احظر مجلس لخوك
الموت بحضرتك يعني حياة
وبروحي عالم ثاني لكوك
يا كشخت علي
من كثر ماطولك حلو وعيونك الملاك
يا كشخت علي
مر هيجي من عنده السهم من شافك اشتراك
حتى السهم بعيونه هايم
ماكو بحلاته كمر هاشم
—————
عايش حياتي لخاطر هواك
كون الله لا يحرمني رضاك
كلبي وحياتي وروحي بديك
يل مالي عين الدنيه ضواك
يا اول كمر
غافي اعله جودك يانهر وبعينك اندثر
يا اول كمر
وبشوكك ايتعبه العشگ ذوبته بالسهر
جم نهر بيدك شفته نايم
ماكو بحلاته كمر هاشم
————-
ابابك التل واگف جريح
وشعرة بلحيتك لو هزها ريح
لو كالو. اختك طبت مظيف
تهتز عبايت امي وتطيح
وربات الخدر
يم العقيلة يستحن. لو رفرف اللواء
وربات الخدر
چان بوكت يوم العطش يرويهن الحياء
ترچية من اذن الفواطم
ماكو بحلاته كمر هاشم
...............
كريم الدراجي

مملكة الغرام
الحبيب والقريب من القلب
كريم الدراجي

طــــاح الــقــصر بـيهم بـــــس طــبت علـــيهم
خاطب يزيده أتهدمت أركاني
هاي السبيه لو حسيـن الثاني
******************
1= ياحـيره هسه الشـام ويـن نضمه زينب أذا داســـت بضهره تـفـصمه
أكتب كتاب أنغـير أبسرعه أسمه حته الهوى لو جتــنه كوه أنشمه
---------------------------------------------------------------------
بس تبدي صولتها تـــنهـــــينه خطبــــتها
قم يايزيد أمن العرش شمتاني
هاي السبـيه لو حسين الثاني
**********************************************
2= صار أرتجاج بروسهم حـيرهم مشــــراد رادو محــــد أيـسيــرهم
ماكال جلمه خــورست خيرهم خفوا وزينب بالـــــــــهوى أطيرهم
--------------------------------------------------------------------
ماطلـــعــت حجايه محــد طـــرح رايه
واحد الواحد صاح وين الساني
هاي السبيه لو حسـيـن الثاني




3= صار أجتماع بنص قصرهم عاجل نشـــرد أذا طبت علينه أنــقـاتـــــل
ماكال جلمه الجـــان هــوه القائل من الله ويــــــن يروح مجرم قاتل
----------------------------------------------------------------------
بس ترجف جفوفه سيطر علـــيه خــوفه
خلصوني كلهم مــــا أريده أمجاني
هاي السبيه لـــــو حسين الـثاني
*****************************************************
4= طبت أم راس المايطخ معـــدوله كـــرسيك شخـــــيره أيرجف كـــلوله
غير أنته أبن هـند البطل معقوله ربعه يوكـــفـــونه ويكع من طوله
----------------------------------------------------------------------
كـلهم علــي شجابه وأبتــــلـــــت أثـــــيابه
ذكروني بسمي تيهت عنواني
هاي السبيه لو حسيـــن الثاني
***************************************************
5= صاحت يزيد ومــا يجاوب سكته هالراس عــندك بالطـــشت أنه أخته
أكلب عليك الشام لــــو حركته أرفـــع أعـــــوادك لا تلامس شفته
---------------------------------------------------------------------
يسوه القـصر دمه لا تـقـــتــــرب يــــمه
ناداها صار وذني ألج عـيداني
هاي السبيه لو حسين الثاني
******* الخادم عبد الجليل المالكي *********

طاح القصر
عبد الجليل المالكي

ماشين....ماشين**
وكل سلف ندخلّه يزرع بيّه لچمه*
ماشين*
يهوّس ابراسك اشوفه اگبالي زلمه*
واحنه بين اولايه واولايه مشينه*
شگد مشينه......شگد بچينه*
وسوگ الولايات زحمه*
شما گعدنه اتصير لمه*
وحايرين*
ألخدر يلحگ عليمن*
وكلهه تسأل هايه بت من*
راح كلشي....وصاحو امشي*
وين ما عند الله گاع*
أمشي هسه بلا وداع*
وانچفه اعله التربه شوفي*
خويه من شدو چفوفي*
اي مشينه*
واليتامه اتنادي عمه*
اليعثر اينادي يعمه*
اليعطش اينادي يعمه*
الينضرب يصرخ يعمه*
آخ يا چلمة يعمه*
واليطيح اشلون الزمه*
اليحدي بينه امعاند وبس عنده چلمه*
ماشين.....ماشين**
............................
امشينه والحدايه غربه*
والمره عثرتهه صعبه*
ودنيه هيمه*
هيچ تاليتي ادور افياي غيمه*
والعبي كلهه متربه*
اوين ما شافو خرابه*
هنا يگلولي تنامن*
عالترب لازم تباتن*
والشمر يا خويه يضحك*
اعليه وايهز بيده رمحك*
ها يزينب*
گلي وادري ابأسمي من يحچيه يجرحك*
ولازم المتعوب بغفى*
وانه جفني ما غمض ايام طرفه*
اصفن واسمعلي همسه*
ارتاحي هسه*
راحو وجسمي بعد محد يرفسه*
وانتبه مرعوبه واسمع*
يالله گومن هسه نطلع*
ماكو راحه ابهالدرب واسمع ينادي*
ماشين....ماشين**
...........................
شما دخلنه الديره اسمع*
ازغيره من اضعوني توگع*
خويه وارجع*
والگه عالتربه رقيه*
حيرتي وحبل ابأيديه*
بكل سلف نوصله تسأل هذا شام؟؟؟*
جيبو راس الغالي ما اريدن انام*
وين ابوي الما شبع من عنده حضني*
هوه من سافر وعدني*
وبيده ضل يمسحلي متني*
وهوه يطلع*
بس احضنه ايطيب كل سوط ابگفاي*
وارتوي من اعيونه ماي*
خويه بنتك عذبتني*
بالدرب تحچي ويراسك*
ياهو جاسك*
وانته خدك چم نبي وچم مولى باسك*
هيچي صاير..داسه حافر*
وسكت كلشي..وصاحو امشي*
وما حبس دمعاتي رمشي*
واسمعت صوت الحده ابضعنك يگلي*
ماشين....ماشين**




علاء المياحي
الفاتحه لروح والدي

ماشين...... رحله سفر

يا ايه من الله انت منزله
وبعيونك جن سوره زلزله .. دخيلك ياقمر بني هاشم

احساسك عالخيمه بس نده
من شخصك اتعلم الوفه .. دخيلك ياقمر بني هاشم

يالبسمك  ذليت العطش
عالشاطي اسمك انقش
ياحيل الله وبيك العرش

الدوره البعيونك احله من الكمر
والريشه لبراسك من عدها الفخر
الليل على جفونك وتبده السهر
  اجفوفك لزمنه وتروه النهر

'***************************


الغيره البراسك دخنت
بالخيمه من الحره هلهلت  .. دخيلك ياقمر بني هاشم

شمحلاها تتمايل مهرتك
وبمتنك من رفت رايتك .. دخيلك ياقمر بني هاشم

ياحنيتك هاك الكلب
يارعيها الغيره انت رب
ياسلطان الحب والحرب

اليبرزلك بالعركه حيله ينهدم
ياراعيها الشيمه وياشيخ الشيم
برموشك  للحره سويت الخيم
مترهدن بالعليه يمرجف الزلم
*******************

ياطولك ومتونك بالسمه
من حكها بيك اختك هايمه.. دخيلك ياقمر بني هاشم

معروفه صولاتك حيدره
من صغرك ولزمت الكنطره  .. دخيلك ياقمر بني هاشم

يالبلعرش هو استوئ
والرايه غطت نينوى
وبكيفك غيرت الجرئ

ياسيفك بالحومه ميجهبه احد
الله الواحد بس انت الصمد
يطشرها صمامك لو زاد العدد
تتونس بالعركه لو صاحو مدد

*****************

جفينك لخيامك مشرعه
وبغيضيك جن سوره واقعه .. دخيلك ياقمر بني هاشم

ارسومك تحجيلي ملحمه
تتنومس بيك انت فاطمه  .. دخيلك ياقمر بني هاشم

يالطولك ماشاله المهر
اكتبلك ويخلص الشعر
ياواضح جن شمس الضهر

نقلولي وحبيتك راداك الكلب
الحره من صعدت نوخت الركب
كلولي من عيونك طيرت الرگب
انطيني من الغيره ودليني الدرب

***********************

علي غسان المياحي

هويتك .. خل احترگ
قريتك .. آية عشگ
لگيتك .. أنته الصدگ ... والباقي اوهام

جذبني .. فَيّ رايتك
أخذني .. يَمّ حضرتك
كأني .. أبنص خيمتك ... يارب الايتام

حسين .. مالوگ الحبك
حسين .. خاف اكسر گلبك
حسين .. مشيني ابدربك ... ابا عبد الله

حسين .. حطني بأي مجلس
حسين .. اطبخ لو اكنس
حسين .. من دونك هِندِس ... ابا عبد الله

من صرت اتصورت
أبعالمك ياسيدي عشت
ابحضرتك ابگبتك
صافن وما لحضه التفت

حسين .. يادخيل اعيونك
حسين .. الدنيه ضلمه بدونك
ــــــــــــــــــــــــــــــــــــــ
بخيالي .. شفتك سمه
اعله بالي .. خيل ودمه
يغالي .. والفاطمه ... جايب مواساة

ونيني .. ماينفطم
حنيني .. يچوي العظم
سنيني .. كلهن لطم ... عالزينبيات

حسين .. تاجك شيوگعه
حسين .. ماريد السُمعه
حسين .. اسألك الدمعه ... ابا عبد الله

حسين .. حزمني ابرايه
حسين .. وي المشايه
حسين .. كل عمري اقرايه ... ابا عبد الله

آمنت واتيقنت
انه لو ما رحمتك ضعت
أمن العدم وي الخدم
من احلى ايامي عشت

حسين .. يادخيل اعيونك
حسين .. الدنيه ضلمه بدونك
ــــــــــــــــــــــــــــــــــــــ
نعيتك .. راس ابطشت
شريتك .. بس مابعت
بچيتك .. بس ما متت .. موتت رقيه

ابولائك .. انجن شرط
ابسمائك .. آيات اخط
ابعزائك .. انكت بُسُط .. وعينك عليه

حسين .. يارب النعمه
حسين .. اسألك الرحمه
حسين .. ازرقني الخدمه ... ابا عبد الله

حسين .. كل ليلة جمعه
حسين .. يم بابك انعه
حسين .. وتصيح الدمعه ... ابا عبد الله

قربتن وطاعتن
اسجد الك من اوصل الصحن
وللخدم اسمك علم
ومجلسك يابو علي وطن

حسين .. يادخيل اعيونك
حسين .. الدنيه ضلمه بدونك
ــــــــــــــــــــــــــــــــــــــ
عشگتك .. منذ القديم
عرفتك .. راعي النعم
ذكرتك .. بأول سهم ... وسط الچبد نام

وخواتك .. بالبر صُفن
بناتك .. يتراكضن
بعباتك .. يتحجبن ... ماعدهن اخيام

حسين .. يادمعي ونوحي
حسين .. أيا مذبوحي
حسين .. وتصيح اجروحي ... ابا عبد الله

حسين .. بروح امك نضره
حسين .. يالچفك سُفره
حسين .. يارب الفقره ... ابا عبد الله

يالسمح واعله الرمح
من جبينك يطلع الصبح
دمعتي وكل فرحتي
وي رگبتك عاشن الذبح

حسين .. يادخيل اعيونك
حسين .. الدنيه ضلمه بدونك
ــــــــــــــــــــــــــــــــــــــ
عباده .. لطم الصدر
سعاده .. اليوم الحشر
أراده .. ماتنكسر ... طف بيهه واحساس

مواعض .. منك خذت
يرافض .. ظلم الوكت
أحافض .. عن الاخت .. علمني عباس

حسين .. غيرك ما اهوه
حسين .. يالدمكم ضوه
حسين .. زينبكم قُدوه ... ابا عبد الله

حسين .. يأول ضامي
حسين .. يشعر بآلآمي
حسين .. افديك ايامي ... ابا عبد الله

ما أمل مثل الطفل
ابقه اناشغ والدمع يهل
اتأملك واتخيلك
شابع ذبح والحره عالهزل

حسين .. يادخيل اعيونك
حسين .. الدنيه ضلمه بدونك



#العبدالحسيني_محمدالجماسي

هويتك
الأستاذ الحبيب محمد الجماسي

للمشاية

ومن يُعظّم شعائر الله
فإنها فإنها من حُبِ الحُسين
ــــــــــــــــــــــــــــــــــــــ
عباده خطوتك هاي .. يهنيالك يمشاي
ترعاك الزچيه
اتعبنله يرجلين .. إشحلاته درب الحسين
ماشيته السبيه
هزل ماكو واحبال .. مضايف هايه وادلال
وسفره زينبيه

شايب اجه ايميل بس بي الف حيل
فإنها فإنها من حُبِ الحُسين
ــــــــــــــــــــــــــــــــــــــ
من كل طائفه اولون .. مشي راحو يأدون
برنامج عبادي
صفنت شابحه العين .. كلهه اباب الحسين
مرفوعه الايادي
واتصيح السموات .. اوياك اهديلي خطوات
يالزاير تنادي

أشما تكثر أعداد مايخلص الزاد
فإنها فإنها من حُبِ الحُسين
ــــــــــــــــــــــــــــــــــــــ
يالله امشونه ياناس .. وابحضرة العباس
خل نسجل اسمنه
من جربة الوفاي .. غيره نشرب وماي
وانقوي عزمنه
خل نجعل الخطوات .. تسبيح وصلاوات
مشايه اسمنه

رايتنه متطيح والدمعه تسبيح
فإنها فإنها من حُبِ الحُسين
ــــــــــــــــــــــــــــــــــــــ
شوف اشگد جماهير .. يم صحن السكرتير
حبيب ابن مضاهر
كلهه ازغار واكبار .. اتخاطب شيخ الانصار
سجل اسمي زاير
وحبيب ايگول ممنون .. احطكم بين الاعيون
يحباب الشعائر

والصله فرضين بين الضريحين
فإنها فإنها من حُبِ الحُسين
ــــــــــــــــــــــــــــــــــــــ
يامشاي الحسين .. انفاسك قرابين
وخطواتك عباده
اخذ ادموعك إمتاع .. ابرجلك شرف الگاع
هاي أكبر سعاده
لوشفت المنارات .. نادري يا لثارات
عمتكم يساده

هاي المواساة وهاي الشعارات
فإنها فإنها من حُبِ الحُسين
ــــــــــــــــــــــــــــــــــــــ
للمؤمن علامات .. خمسه بالروايات
گايل عسكرينه
منهه ازيارة احسين .. هنيئا للموالين
الراحو باربعينه
وعدنه اهناكه محبوب .. انشوفه بعين الگلوب
اشگد غالي علينه

كلنه نتانيه ولمن نواسيه
فإنها فإنها من حُبِ الحُسين



#العبدالحسيني_محمدالجماسي

شعائر الله
الأستاذ الحبيب محمد الجماسي

.
گُومو لينه اليوم اجينه
نشفوا مدامعنه التهل نزلونه من ظهر الهزل
ــــــــــــــــــــــــــــــــــــــ
يـاريـحـــة أمـنـه والابـو .. الشوفتكم اشتاگينه
خلصت مسافــات السفر .. وامـن اليـسـر ردينه
سومر دمعنه امن البچي .. وأتـورمــت رجـلينه
هـاي الـربـاب وام عـلـي .. ورمله اجت واسكينه

بس رقيه أشگد خطيه
سافرت من هذا الشمل نزلونه من ظهر الهزل
ــــــــــــــــــــــــــــــــــــــ
جيناكم ابجـرح اليسر .. وانصيح أمِت يامنصور
وشفنه مگابركم ضوه .. وجــابــر لگــيناه ايـزور
واحنه عله ظهور الهزل .. نــقــره زيارة عاشـــور
نقره السلامُ اعله الگمر .. واعلى الإمـام المنحور

السلامو عالخيامو
انحلفكم ابدم الطفل نزلونه من ظهر الهزل
ــــــــــــــــــــــــــــــــــــــ
هاذي حرمكم عودن .. وگلب المفارگ محروگ
شافنكم ابهيمه وبگن .. يتساگطـن من الــنـوگ
بس ماكو شيله مايله .. ولاثوب منهن مشگوگ
كـضـن الرايه العالنهر .. وضلن يسونهه أعلـوگ

يالنحبكم وابدربكم
ظلينه بس سوط وحبل نزلونه من ظهر الهزل
ــــــــــــــــــــــــــــــــــــــ
اهنا يالفـواطم بالسره .. يم الحـسـيـن امشنه
للجنه كل مؤمن يطب .. واحسين هوه الجنه
خنسوي مجلـس للطم .. يمه ونكـثــر الـونــه
ويالـهـاشمـيـات النعي .. وصوت البچي علنه

اليبچي يمه ايفرح امه
يالمطرت اعليكم نبل نزلونه من ظهر الهزل
ــــــــــــــــــــــــــــــــــــــ
وانروح يـم الــمـشـرعـه .. عدنه اخــو نمشيله
وانصف عبينه امن الشمس .. يستاهل انفييله
وانگع أچــفــوفـه ابدمع .. والفــاتــحـه نهديله
ويم گبره كل احنه سوه .. خل نگعد ونشكيله

خل نگله الفرگه ذله
بس الهواشم ماتذل نزلونه من ظهر الهزل
ــــــــــــــــــــــــــــــــــــــ
ويم جاسم انوج الشمع .. وللاكبر انسوي فياي
وعبـد الله ناخــذله لبن .. وانبلل اشفافه ابماي
السجــــاد هـــو اليعُتبر .. اول الــوادم مـــشاي
وانتن وراه بالقـافـلـه .. والمهدي هم باچر جاي

وبظهوره ايلالي نوره
وانصاره لمن تكتمل نزلونه من ظهر الهزل


#العبدالحسيني_محمدالجماسي

كومو لينه
الأستاذ الحبيب محمد الجماسي

يادمعي صب عليهم
ياروحي فارگيهم
لا مـا يردون آه آه
خل تعمه الاعيون آه آه
ــــــــــــــــــــــــــــــــــــــ
عله ألخوّان من دم يادمع إجري
تره افراگ الاحبّنهم كــسر ظهري
ليش الدنيه هيچ اوياي ما أدري
تستنگي العزيز اليسوه كل عمري

وجهي ابقهر لطمته
اليوم الحسن دفنته
مايرجــع اشلون آه آه
خل تعمه الاعيون آه اه
ــــــــــــــــــــــــــــــــــــــ
الدنيه الما امخليتلي ولا غالي
بعد ماريدهه ولا عيش يهنالي
راحت بالي راحت كلهه من بالي
وظل البيت من عطر الحسن خالي

وافراشه ما المّه
ليليه اجي واشمّه
وبگبــــره مدفون آه آه
خل تعمه الاعيون آه آه
ــــــــــــــــــــــــــــــــــــــ
عجيب الهسه آشم الهوه و ماميّته
واخوي البي محنه ابگبره دافنته
كريم آل النبي هالليله فارگته
وهذا اول طشت بعيوني شايفته

والثاني بي حكايه
من ننوخذ سبايه
ياجـــرح الامتون آه آه
خل تعمه الاعيون آه آه
ــــــــــــــــــــــــــــــــــــــ
راح الچان مرّه بعمره يتهنّه
والقاسم يگلي اشوكت ازفنّه
يزينب انتي حَضري اشموعه والحنّه
وآنه اوّل أبو ايضحي ابحياة ابنه

يوم العرس اريده
من ينگـطع وريده
وي عابس وجون آه آه
خل تعمه الاعيون آه آه
ــــــــــــــــــــــــــــــــــــــ
الحسن شيخ الهله وراعي المضايف چان
شسع نعله يعـادل كل بني سفيان
ابتابوته اخذ حنيّة الخوّان
وآنه بكل فجيـعه امسويه بيت أحزان
گلولي ها يختهم
الدنيه ضيعتهم
وإعله اليحنــــون آه آه
خل تعمه الاعيون آه آه
ــــــــــــــــــــــــــــــــــــــ
حط احسين راسه ابحضنه وايشمّه
وگَله اتركني خويه وداعتك زحمه
راسك عالرمح باچر يصب دمّه
ولايوماً كيومك ياابو اليمّه

تبكيكَ صاح عَيني
يعني العزاء حسيني
يللي تسمعــون آه آه
خل تعمه الاعيون آه آه

#العبدالحسيني_محمدالجماسي

لا مايردون
الأستاذ الحبيب محمد الجماسي

من لونج اخذ حتى الحزن لونه . زينب
قد قامت صلاة ادموع العيون . زينب
ايسي من الحبايب مايردون . زينب
شذكر يا مصيبة شذكر يا مصيبة
.............................................
ممنوع السكوت من البجي ماكو استراحه
من گاروكج لحد السبي ما شفتي راحه
من الخيمة للتل ركضتج هاي الصراحه
هيه البجّت ابن العسكري ليله وصباحه
عينج على الستر لمن تركضين. زينب
گدام الشمر بس لا تعثرين . زينب
واشمال السياط انطك بالمتون .زينب
زينب يا غريبة. شذكر يا مصيبة
.............................................
عصابه الزهره براسج وبيرغ لزمتي
وامريه جبيره ابيوم عاشوراء صرتي
وي نحر الحسين اسبعطش ذبحه انذبحتي
يالجابولج الماي وگلبتيه ما شربتي
بالطف وحدج من صار الغروب . زينب
شميتي القميص وصرتي يعگوب . زينب
ذبحوا يوسفج ناس اليخونون . زينب .
والجثة السلبية . شذكر يا مصيبة
..................................
يالمخلوقة من عطر الورد يالهاشمية
يالكلج ترافه وخشنه كاع الغاضرية
سجادج رسول القافلة وانتي نبيه
واثمانين دمعه ابعينج ورحتي سبيه
علوية علي ومجتوفه عالنوك . زينب
ودمعج ما نشف من طبت السوك . زينب
يالكل الائمة عليج يبجون . زينب
وعباس شيجيبه . شذكر يا مصيبة
................................
يالجان اليدك بابج نبي واسمج اميره
شو هسه القضية اتبدلت صرتي اسيره
خليتي الحسين بعازه الفي والحصيره
ازغار المجالس وانتي احزانج جبيره
المفروض وعلي تركعلج الشام . زينب
كل عمرج لطم مو عشره ايام . زينب
وحزنج مو مثل كل اليحزنون . زينب
يا جرحي وطبيبه . شذكر يا مصيبه
.....................................
ضعنج شعب وعي وانتي يا زينب رئيسه
نص حيدر ونص من فاطمة صبرج نقيسه
مريم بالقداسة وبالمعاجز صرتي عيسى
والجامع نصبلج ماتم ابنص الكنيسه
لو عابس معلم للعشك صار . زينب
احنه بصف الاول كلش ازغار . زينب
وفقينه نكون بمنزلة جون . زينب
ودرسج ما نغيبه . شذكر يا مصيبة
........
وفقينه وانظرينه ابلطف نظره عناية
لو ماكو مجالس نختنك مثل السبايا
كونيه اياتج وانتي ام هاالولاية
بس رفعي عباتج تنزل ارزاق وعطاية
الما يطلم عليج الذمه مشكول . زينب
المهدي لو ظهر للمهدي شيكول . زينب
منعوف اللطم رغم اليلومون . زينب
تمت بعونه تعالى .
الشاعر محمد الجماسي

من لونج
الأستاذ الحبيب محمد الجماسي

مولاي اجيتك طالب العذر
آنه اعترف اذّيتك اشكثر
جيت بعزاء العسكري
اتمنه اكحّل ناظري
ــــــــــــــــــــ
المهدي ياماي الحياة ورحمة الله الواسعه
راسي مااگدر ارفعه جفي صوبك رافعه
آنه من طينتكم ادري وذنبي گلبك موجعه
باب عفوك جيت ادگه بالعيون الدامعه
جم مره گتلك سيدي العجل
وآنه السبب بس عندي بيك امل
يا عيني اگلها اتنطّري
اتمنه اكحّل ناظري
ــــــــــــــــــــ ــــــــــــــــــــ
العنده ماتم مايرد اليعتني ايواسيه طبع
وانا اجيت بهالمصيبه ويحجي بخدودي الدمع
بياذنب مسموم ابوك وتبدي عمرك منفجع
جيت اواسيك ادري وحدك لا اخوان ولا ربع
لوگتلي مااعذرك اظل الح
مجروح اجيتك يادوه الجرح
بس نظره تجبر خاطري
اتمنه اكحل ناظري
ــــــــــــــــــــ ــــــــــــــــــــ
ما ادورك وين اعرفك ماتفارگ كربله
لاكن اليمنعني اشوفك ادري ذنبي
الشايله
ماي للعطشان وجهك عيني ماتستاهله
جيت اعرفك ترضه عني ذنبي موگد حرمله
يطردني بابك وارجع وادگ
مايمل محبوبه اليحب صدگ
جيتك حسيني حيدري
اتمنه اكحل ناظري
ــــــــــــــــــــ ــــــــــــــــــــ
بعين عمك جيت احلفك عني حدمن منحجب
نظْرِتك هيّه الحصانه لوتبت عن الذنب
امن اليمهدون الظهورك سيدي ارد انحسب
اتحالفينه آنه ودليلي انحب صدگ لو مانحب
مني اعله گلبك مايمر سهم
غير انتظارك ماشفت الم
يعيوني ابجي وساهري
اتمنه اكحّــل ناظري
ــــــــــــــــــــ
والله لو ادري دليلي بگد دليلك يحتمل
جان گتلك دير نارك كلها بي خل يشتعل
اكبر وبالدنيه انغر وانه بعيونك طفل
بس بعدني اتصب دمعتي وين ابوك امن انسإل
مااريد اموت بظلمه ياشمس
وين التفت يمي انت خل احس
وبدل السواد بدفتري
اتمنه اكحّل ناظري
ــــــــــــــــــــ

علي محسن الزيادي

(العذر )
الحبيب علي محسن الزيادي