💙💙💙

ПСИХОГЕНЕТИКА АСЛО ТАСАВВУФ ЭМАС!

«Психогенетика деб ном олган янги фан аслида биздаги тасаввуфдир» дея, минглаб ёшларнинг, қиз-аёлларнинг миясига нотўғри ва зарарли маълумотларни юклаётган «секрет сотар шайх»га мутахассисдан тўлиқ илмий асосланган раддия!


➡️ Ислом олими «секрет» сотадими?

➡️ Тасаввуф дея тарғиб қилинаётган модерн психогенетика ниқоби остида қандай ғоялар яширин?

➡️ «Ҳиммат»чи админка»ларга кийдирилаётган тож аслида ниманинг рамзи?

➡️ Сохта илм эгалари кимларга хизмат қилади? Уларнинг манипуляция тузоғига кимлар осон илинади?

➡️ Асл илмни сохта илмдан, асл олимни сохта олимдан қандай фарқлаш мумкин?..

Шу ва шунга ўхшаш ўнлаб саволларга
29 июн якшанба куни Тошкент вақти билан соат 20:30да бошланадиган раддия-суҳбатда жавоб олишингиз мумкин.

✅ Суҳбат мавзуси журналистик текширув ва тўлиқ илмий негиздаги далилларга асосланган ҳолда очиб берилади.

Суҳбатни илмий журналист,
Нейро илмлар ва Хулқ-атвор фанлари оммалаштирувчиси,
Халқаро Пренатал таълим уюшмаси аъзоси,
Истанбулдаги Ускудар университети илмий тадқиқотчиси,
«Ўзимиз билан юзма-юз» илмий лойиҳаси муаллифи Дилфуза Комил олиб боради.

📌 Dilfuza Komil

❤️‍🔥❤️‍🔥❤️‍🔥

Ассалому алайкум, каналимизнинг муҳтарам ва муҳтарама аъзолари!
Юқоридаги эълондан кейин, ушбу билдиришни ёзишга эҳтиёж сезилди.

Кузатганлар бўлса, гувоҳ бўлганингиздек, юқоридаги эълоннинг изоҳлар қисмида «Ҳиммат 700+» лойиҳаси иштирокчиларидан бир тўда аёллар келиб, ҳеч мулоҳазасиз, бемаъни гапларни ёзишни бошлашди (ташланиб қолишди деймиз буни оддий тилда 😊).
Тўғриси, мен учун бу янгилик ёки кутилмаган ҳолат эмас, чунки у лойиҳадаги «админ-муридка»лар шундай ҳолатларга пухта тайёрлан(тирил)ади (бу жараёнларга шахсан гувоҳман ва етарлича далилларим ҳам бор).
Мен ҳар қанча ёқимсиз бўлса-да, бу жараёнга сизлар ҳам гувоҳ бўлишларингизни истадим. Сабаби, асл илм инсонларни жоҳиллаштирмайди, аксинча сокинлаштиради, оқиллаштиради. Сохта илмлар ичидагина одам ана шундай – оғзига келганини қайтармайдиган, ақлини ишлатиб гапиролмайдиган аҳволга тушади; жазавага берилади, жоҳиллашади; масаланинг моҳиятини англамай туриб, аййуҳаннос солади.
«Ҳиммат 700+» лойиҳасидаги гуруҳ бошқарувчиларининг ана шундай аҳволини ўз кўзларингиз билан кўришларингиз керак эди, улгурганлар кўрди ҳам. Каналимиз админларининг асаби бардош беролмай қолгани учун, изоҳлар қисми сал эртароқ ўчирилди.

Хўш, бу билдириш орқали нима демоқчиман?
Биз режа қилган раддия-суҳбат (эълонда ёзилганидек), аниқ далилларга, журналистик текширув ва суриштирувларга асослангандир. Яъни, айтмоқчи бўлаётган ҳар бир маълумотимиз учун қўлимизда бир эмас, бир нечталаб аниқ далилларимиз, асосларимиз бор. Зотан, журналистик суриштирувнинг талаби ва қоидаси шундай – аниқ далил-исботсиз ҳеч бир маълумот очиқланмайди.
Бу суриштирув ва таҳлилни мен ҳам журналист сифатида, ҳам нейро илмлар ва хулқ-атвор фанлари бўйича халқаро тоифадаги мутахассис сифатида олиб бордим ва хулосаларимни жамладим. Бу ерда ҳеч қандай шахсий ғараз ёки шунга ўхшаш нарса йўқ, бўлиши ҳам мумкин эмас.

Бу орада «Ҳиммат 700+» лойиҳаси ҳақида «Зикр аҳлидан сўранг» жамоасининг огоҳлантириши ҳам эълон қилинди. «Зуфаржон Шосалимовнинг диний масалаларга ёндашувлари соф Ислом таълимотларига зиддир», деган хулосани берди улар.

Бундан «Ҳиммат»чиларнинг ақли бошига келдими? Йўқ.
Чунки ўртада жуда катта маблағ айланади, моддий манфаатдор кўп лойиҳа ичида. Ва бошқа сабаблари ҳам бор, улар ҳақида суҳбатда батафсил тўхталаман, насиб бўлса.

Хуллас, лойиҳанинг биридан бирига кириладиган ёпиқ каналлари ичида антиқа ишлар авжида.
Масалан, энг оддийлари:
- психология бўйича умуман маълумоти бўлмаган хотинлар «психолог» сифатида мижозлар билан ишлайди;
- ўзи пул топадиган иштирокчилар «шайх»ига фоиз тўлайди;
- «шайх» хотинлардан байъат олади, «мени оилангиздан устун қўясизлар» деб, улардан ваъдалар олади; «бошингизга ғам-ташвиш тушса, дарҳол мени эсланглар» дея ўзини илоҳлаштиради;
- «Биз Қуръонни кофирларнинг тадқиқотларидан кейин тушунишни бошладик» деб, псевдо фанлардан дарслар ўтади; нейробиология, мия фаолияти ҳақида сафсата маълумотлар беради;
- хотинларга расмини юбориб, «шайхни томоша қилиб ўтириш ҳам, унга муҳаббатли бўлиш ҳам тасаввуф одобларидандир» дейди;
- «Ҳимматдагилар нажот топувчилардир» деб, ўзига эргашмаганларни айблаб, жамиятни иккига ажратиб кўрсатади;
- ҳақиқатни айтганларни, қарши фикр билдирганларни блоклашади, ортидан лаънатлашади, баддуо қилишади.

Бу "зоти олийлари" тасаввуфнинг алифбосини ҳам билмайдиган хотинларга муридлик ва муршидликдан «тушунча»лар бериб, «Муршид ўз муридига шариатга зид амалларни ҳам буюриши мумкин. Сабабини муршид билади, мурид билмайди... Оловга кир деса ҳам кириши керак», дея муридлик «одоби»дан «тарбиявий соат» ўтади...
Шу охиргиси сизларга ҳам шубҳали, хавфли туюлдими?!

Шу кунларда саккиз минг одам бор бунга «шайхим, ҳазратим»лаб эргашиб юрган (аввал ўн мингдан ортиқ эди). Аксарияти хотин-қизлар! Аёллар эридан яшириб ўқийди бунинг курсларида. Тиллаларини сотиб, бундан куфрона «секрет»лар сотиб олишади. Минг-минглаб хотинлар шунга ишонади!
Мен ҳаммасини очиқлайман десам, кунлаб очиқлашим керак. Сизга мингдан бирини ҳам билдира олмадим ҳозир.
Биз шунда ҳам индамайликми?

Давоми 👇

Қачон кўзимизни очамиз, хотинлар «муршидим айтди, шайхим айтди, мен ўйлаб ўтирмай унинг айтганини қилишим керак, чунки ақлим етмайди» деб, оловга кирганидами?! Ўзини ҳам, бошқаларни ҳам ёндирганидами?!
Ёки жамиятимизда сохтакорликни – илм; ахлоқсизликни – тасаввуф деб биладиган ўнг минглаб аёллар шаклланганидами?!
Саккиз минг, ўн минг аёлнинг онги бузилди дегани – шунча оиланинг маънавий атмосфераси бузилди, дегани; шунча оилада болаларнинг маънавияти хавф остида қолди дегани. Индамайликми шунда ҳам?!

Туркларда «Мени чақмаган илон минг яшасин» деган гап бор. «Хоин тушунчали одамлар гапи» дейилади. Биз ҳам шундай тушунчали одам бўлишни танлайликми?!

Мен шу ёшимгача ҳар доим адолат тарафида бўлдим, бу йўлда қанча жабрлар тортдик – буни биладиганлар кўп орангизда. Мен бундай сохтакорларни фош қилиш учун ҳар доим зиммамга тушганини бажаришга ҳаракат қиляпман. Сизлар ҳам қўлингиздан келганича сохтакорларга қарши курашасиз деб умид қиламан.

Каналимизнинг азиз ўқувчилари,
барчангизга эътибор учун раҳмат!
Асабларингизни бузадиган маълумотлар берганим учун мени маъзур тутасизлар.


P. S. Бизга ташланадиганларни олдиндан огоҳлантирай:
ўзингизни кўп ҳам уринтирманглар. Мен ботилни танлаган хотинлар билан гап талашиш учун бу ишни бошламаганман. Рўпарангизда ади-бади айтишадиган хотин эмас, журналист ва илмий мутахассис турибди. Мен ўз касбим доирасида, қонуний ҳаракат қиляпман.
Сизлар яхшиси, нимага кўзингизни оча олмаётганингизнинг сабаблари устида бош қотиринг.
Агар мени сохта «шайх»ингиз билан шахсан гаплашишимга қўймай, гуруҳларингизда блокламаганингизда эди, бу гаплар Зуфар Шосалимовнинг ўз юзига айтилган бўларди. Блокладингиз, тамом – мен ҳам энди гапларимни сизлар блоклай олмайдиган жойда – омма олдида гапиришга мажбурман.

📱 Dilfuza Komil