رسالة من الحسين وللحسن ترسل
اما بعد موضوع البقيع انحل

_____

من بعد السلام وفيضة دموعي
راح احجيلك شويه عله موضوعي
صح عندي ضريح وكبه مبنيات
بس انا لهسه مهدمه ضلوعي

مع ذلك بهذا الحال ما اقبل
اما بعد موضوع البقيع انحل
____

اوديلك ضريح من الذهب كله
واسويلك صحن أكبر من القبله
واوديلك عدد مشايه ما مسبوق
واسوي الأربعين بكبتك احله

واسويلك زيارة ومجلس ومقتل
اما بعد موضوع البقيع انحل

_____

لان ضحيتلي بالطف بخمس اولاد
لذلك أنا يمك دافن السجاد
وكون انت عدل ويانه بالطف غاد
انا و ولدي نوكفلك بالاستعداد

واخليلك حراسه من الخيم للتل
اما بعد موضوع البقيع انحل

____

اخوي انت الجبير الينهي واليامر
اخذ من كربله شتريد الك حاضر
ولأن ماكو شريف بدولة الكافر
اخذ شباج الاكبر حصة الباقر

الباقر جان عد الاكبر مدلل
اما بعد موضوع البقيع انحل

____

اما عن لسان المذهب الناطق
الشيعي الجعفري وآل بالعلم سابق
من در النجف نصعنلك الشباج
ونزوره علي ويستاهل الصادق

هديه من الخليفة الحيدر الأول
اما بعد موضوع البقيع انحل

______

وبشر ام البنين الرافعتلي الراس
ما ناسيج يالكلج وفه ونوماس
لاسويلج ضريح أشده عقول الناس
واعلك فوك كبتج راية العباس

وابنيلج مناير للسمه توصل
اما بعد موضوع البقيع انحل

____

باجر يظهر المهدي ويشد ازره
وكل مرقد تهدم باجر يعمره
ويسوي المدينة ملاصف مرايات
واكبر كبه بيهن فاطمة الزهره

وبس الشيعي يدخل غيره ما اقبل
اما بعد موضوع البقيع انحل


محمد الموسوي