تفاعل قليل راح نأجل نشر باقي الدورات.

سلام عليكم اعضاء MEGA الاعزاء

بما انو صراو بزاف احداث خلات MEGA تتطور من ناحية الشعبية كان في بالي سؤال مهم وحبيت نطرحو عليكم بعيدا عن المسابقات

ما هي الاشياء اللي تشوفوها ناقصة في القناة او القروب وشنو السبب اللي يخلي النشاط والتفاعل ما يكونش اوسع

نحب نعرف واش هي الافكار او الاشياء اللي ممكن نديروها باش نخلو قروب MEGA يكون فيه نقاشات وتفاعل اكثر

بحكم اني كنت في قروبات كثيرة لاحظت حاجة غريبة شوية وهي انو كاين قروبات ما يفوتوش حتى 100 عضو ومع ذلك تلقى فيها نشاط وتفاعل اكثر من قناتنا او قروبنا

وحتى سبب طرد الاعضاء من Black Box كان من بين الاسباب اللي خلاتنا نفكرو في موضوع النشاط والتفاعل

من ناحية المحتوى والافكار احنا عن نفسنا ما ناقصنا والو تقريبا واللي ناقصنا فعلا هو تفاعلكم ونشاطكم

حتى تفاعل بسيط منكم يقدر يعطينا جرعة دوبامين ويخلينا نتحمسو اكثر باش ننشرو ونقدمو فوائد ومحتوى افضل

لذلك نحب كل واحد يقول رأيه بصراحة وما هي الاشياء اللي تشوفوها ناقصة او الاشياء اللي تحبو تشوفوها في MEGA

هدفنا في الاخير هو نخلو MEGA مكان فيه نشاط وتفاعل ونقاشات

شكرا على ردودكم ودعمكم لنا وعلى كل شخص اخذ من وقته وشاركنا رأيه بصراحة

قريت كامل التعليقات وكل رأي فيهم عطانا فكرة او نقطة نقدروا نخدموا عليها وفعلا بانلنا بلي المشكل ماشي في نقص المحتوى فقط وانما في طريقة تقديمه وتنظيمه وكيفاش نخلو العضو يحس بلي عندو سبب يرجع لميغا كل يوم

من بين النقاط اللي تكررت هي ضرورة تنويع المحتوى وما نبقاوش مركزين فقط على الكورسات او المسابقات لذلك راح نحاولو ندمجو الاخبار التقنية واخبار الذكاء الاصطناعي والامن السيبراني والاحداث المهمة مع المعلومات المفيدة والمحتوى التثقيفي وحتى بعض المحتوى الخفيف والفكاهي بشرط يبقى داخل في جو ميغا

كذلك راح نحاولو ننظمو الاقسام بشكل اوضح باش العضو يلقى واش يحتاج بسهولة سواء كان حاب يتعلم او يتابع الاخبار او يدخل في نقاش او يشارك في نشاط

وبالنسبة للكورسات راح نحاولو ما نكتفيوش بنشر رابط الكورس فقط بل نوضحولكم علاش هذا الكورس مفيد ولمن مناسب وشنو يقدر يتعلم منه باش العضو يعرف مباشرة واش راح يستفاد قبل ما يدخل له

اما بالنسبة للنقاشات فهذه نقطة مهمة جدا وراح نعطيوها اهتمام اكبر لان الهدف ماشي انكم تستهلكو المحتوى فقط بل نحتاجو منكم تجاربكم وارائكم وحتى الاختلاف بينكم لان النقاش هو اللي يخلي المجتمع حي

وبالنسبة للمسابقات فهمنا النقطة اللي قالها البعض ان المسابقات ممكن تجيب ناس هدفهم الوحيد هو الجائزة وبعدها يختفيو لذلك راح نحاولو نخلو المسابقات والجوائز جزء من ميغا فقط وماشي الشيء الاساسي اللي تعتمد عليه القناة

كذلك فكرة تبادل الخبرات بين الاعضاء عجبتنا بزاف لان كل واحد فيكم ممكن يكون عندو معرفة في مجال معين ويقدر يفيد شخص اخر لذلك نحتاجو نفتحوا مساحة اكبر للناس باش يشاركو تجاربهم ومعرفتهم

اما موضوع تصفية الاعضاء ففعلا العدد وحده ما يعني والو اذا كان عندك عدد كبير من الاعضاء لكن التفاعل الحقيقي ضعيف لذلك هدفنا مستقبلا يكون بناء مجتمع فعلي حتى لو كان بعدد اقل ولكن اعضاؤه مهتمين ويشاركو ويستفادو

وبخصوص فكرة البوت اللي يجمع الكورسات والاخبار فهي فكرة مليحة ونقدرو مستقبلا نفكرو فيها بشكل يخلي البوت وسيلة للوصول للمحتوى وتنظيمه بينما القروب يبقى مكان للنقاش والتفاعل

في الاخير حاب نشكركم كامل مرة اخرى على صراحتكم لان هذا بالضبط هو النوع من الردود اللي كنا نحتاجوه باش نعرفو وين لازم نطورو


ميغا ما راحش تكون مجرد قناة مسابقات ولا مجرد مكان لنشر الكورسات هدفنا نبنيو مجتمع فيه فائدة ونقاش وتفاعل وتبادل خبرات

والتغيير ما راحش يكون في يوم وليلة لكن راح نبداو خطوة بخطوة ونشوفو واش اللي يخدم فعلا وواش اللي يحتاج تعديل

شكرا لكل شخص كان جزء من MEGA ومازال يعطيها فرصة