السلام عليكم ورحمه الله وبركاته 🤚
هل تحاليل الدهون تطلب صيااااااام ؟؟؟
هنا اخر التوصيات قالت فعلا ان مش ضروري الصيام لعمل تحاليل الدهون ….ونفس التوصيات قالت بردوا
ان اي نتيجه طالعه معاك غير طبيعيه لازم تعيد تاني التحاليل بصيام من 12 - 14 ساعه طيب
مهو كدا لو عملت تحاليل دهون لمريض فاطر وطلعت عاليه وطلبت انه يجي صايم كدا هتعب المريض وهقعد كل شويه اسحب منه وهتسمع بقي المريض كل شويه يقولك صفيتوا دمي وحوارات كتير ….
يبقي كدا واقعيا والافضل ان التحاليل تتعمل بصيام وخلاص ودا هيقيم الحاله بشكل افضل واحسن
وخاصه كمان لو حاله بتاخد علاج
طيب نقطه ثانيه
معظم المعامل بطلع نتيجه ال ldl بالمعادله ودي بيدخل فيها التراي جليسرايد فتخيل كدا لو التراي اتعمل بعد الاكل مباشره اكيد قيمته بتكون اعلي فبالتالي نتيجه ال ldl مش هتكون حقيقيه
اخيرا الابحاث كلها لما اتعملت اتعملت في اوروبا وطبعا اوروبا بتختلف تماما عننا في ثقافه الاكل والشرب
اذا الاستنتاج ان تحاليل الدهون تتعمل صائم لتقيم المريض بشكل افضل واحسن وظهور نتائج حقيقيه 🤚
كمان مهم جدا الاتي 👇👇👇👇👇
من الاسئله المهمه بخصوص شغل ال hdl و ال ldl
للاسف تحليل ال hdl دا من التحاليل الرخمه شويه وللاسف في معامل كتيره بتضربه ومش بتعمله الله المستعان
س👈اشتغل ال hdl دايركت ولا اندايركت ؟؟؟
وعيوب كل واحده فيهم ؟؟؟
الاجابه 👇
طبعا شغل ال hdl دايركت افضل بكتير جدا من حيث دقة النتيجه بس يعيبه انه غالي الثمن والاستاندر بتاعة بمجرد انك تحله الاستابيلتي بتاعته بتقل
اذا لو عندك ريت شغل عالي هيفيدك جدا جدا
اما بالنسبه لل hdl الاندايركت هو بالفعل ارخص لكن دقة نتائجه بتكون بالطبع اقل
اذا في كلا الحالات للامانه الدايركت يتفوق علي الاندايركت
احيانا في الدايركت بنحل الاستاندر ونحفظه في الفريزر في ابندورفات بس بمجرد خروج الابندورف واستخدامه لا يتجمد ثانيه 🤚
س👈شغل ال ldl كيمياء
هو الافضل بالمعادله ولا شغله بالكيمياء ؟ ولماذا ؟؟ وليه بنوصي دائما بشغله كيمياء ؟؟وامتي اجباري اشتغله بالكيمياء ؟؟
الاجابه 👇
👈 شغل ال ldl بالكيمياء افضل بكثير للحصول علي نتيجه دقيقه وصحيحه
طيب هو ايه خطورة تطبيق معادله ال ldl وخاصه لو التراي اعلي من 400؟؟
المعادله خطورتها انها بطلع نتائج اقل من الحقيقه ف ممكن المريض يكون عنده Risk لاحد امراض القلب وانت مطلع النتيجه طبيعي
👈طيب ليه بيوصي بشغل ال ldl بالكت الخاص بيه مباشرة بغض النظر عن نتيجه التراي ؟؟
لعده اسباب 👇
1-انت بتحصل علي قيمه ال ldl من معادله مكونه من الكوليستيرول والتراي وال hdl فلو في مشكله في شغل واحد منهم للاسف هتاثر علي نتيجه ال ldl
2-شغل ال ldl بالكيمياء فعلا لقينا اختلاف واضح في النتائج بينه وبين المعادله فتبين ان لو تخطي التراي حاجز ال 200 تحديدا وجد فرق في النتائج فكانت قيمه ال ldl باستخدام الكيمياء اعلي من قيمه ال ldl باستخدام المعادله
فكانت النتيجه حقيقيه بإستخدام الكت واقل من الحقيقه بتطبيق المعادله
3-اخيرا لو استخدمنا المعادله وخاصه لو التراي اعلي من 200 قولنا بتعطي نتائج اقل من الحقيقه ✋
لكن ممنوع استخدام المعادله او القسمه علي اي رقم لو التراي تخطي حاجز ال 400
🤏🏿لازم نعرف ان للحصول علي ال ldl بالمعادله لما تيجي تقسم التراي بتكون علي رقمين ملهمش ثالث اما
القسمه علي 5 او القسمه علي 6.5 والافضل القسمه علي 6.5 لانها اكثر دقه والقسمه هنا للحصول علي نتيجه بوحده ال mg/dl
👈مافيش حاجه اسمها القسمه علي 2.2 لو التراي عدي ال 400 الكلام غير صحيح وغير علمي
🤏🏿بعض الارقام المتداوله 👇
👈بيتداول القسمه علي رقم 38 دا فعلا موجود لكن الرقم دا لتحويل نتيجه ال hdl والكوليستيرول من الملي جرام علي الديسيليتر للملي مول علي اللتر
👈بيتداول رقم ايضا القسمه علي 88 ودا فعلا موجود لكن لتحويل نتيجه التراي جليسرايد من الملي جرام علي الديسيليتر للملي مول علي اللتر ✋
والله اعلم 🍀
#احمد الجابري

السلام عليكم 🤚

1-مهم جدا تعرف تعرف امتي الكاست تكون نورمال وامتي تكون اب نورمال بتكلم عن ال hyaline

اما باقي الكاست ظهورها بيكون اب نورمال

2- مهم جدا تعرف امتي ال EPI تكون نورمال وامتي تكون اب نورمال

3- مهم جدا تعرف ال Crystals بتعتبر نورمال وامتي بتكون اب نورمال

4- مهم جدا تعرف ال RBCs تكون نومال وامتي تكون اب نورمال

5- مهم جدا تعرف ال WBCs تكون نورمال وامتي تكون اب نورمال

6- مهم جدا تعرف ال Bacteria تكون نورمال وامتي تكون اب نورمال

طبعا المعرفه بتكون من العدد

والاهم انت بتعد ازاي وبتكتب عددهم بناءاً علي ايه في تقرير البول وخاصة ال EPI و ال Crystals و ال Bacteria و ال Casts

والله اعلم 🤚

#احمد الجابري

السلام عليكم

عينة السائل المنوي اخرها معايا ساعه ولو مفكتش اللزوجه بتصرف كالاتي 👇👇

الاول زي ما اتفقنا بتترك العينه بحد اقصي ساعه

اذا لم تفك

هنا عندك طريقين

1- mechanical ex

وهنا بنستخدم سرنجه مثلا 5 سم وبنسحب العينه وبنفرغها اكتر من مره

او بنقلب العينه جيدا طبعا من خلال رج الكب وبنجيب بايبته وبنسحب وبنفرغ اكتر من مره مع الضرب بطرف التبس في قاع الكب وهنا بنكسر اي كتل موجوده

ولكن استخدام السرنجه افضل طبعا

2- enzymatic digestion

دي طريقة طبعا بتكون في اجهزة الكازا والفل اتوميتيد

وهنا بنستخدم محلول ال bromelain ودا بيقوم بعمل proteolytic enzyme وبيكسر خيوط ال mucus

الاهم من دا كله علشان في عينات اللزوجه بيكون في خلل في الحركه والعدد لازم نكتب الكومنت دا للطبيب

Sperm count isn’t susceptible to accurate measurement due to incomplete liquefaction of semen

Sample

السلام عليكم ورحمة الله وبركاته 🤚

س 1 مامعني السكر التراكمي ؟

ج👈يعني نسبه الهيموجلوبين المرتبط بالجلوكوز في كرات الدم الحمراء

س2 بنستخدمه في ايه ؟

ج👈 اولا بنستخدمه كل 3 شهور علشان نشوف هل السكر منتظم او مش منتظم في الدم في فتره الثلاث شهور السابقه

س3 مدلول نتائجه ؟

ج👈 لو النتيجه من 4-5.6 فدا طبيعي

ومن 5.7 حتي 6.4 فدا معرض للسكر

ومن 6.5 فاعلي فدا كدا يشخص بالفعل سكر

كمان لمريض السكر لو النتيجه اعلي من 7 هنا بنقول ان المريض في حاجه مش مظبوطه اما النظام الغذائي او العلاج ولو النتيجه اقل من 7 هنا بنقول مظبط علاجه والنظام الغذائي 🤚

🤏🏿 تعالوا نعرف شويه حالات عن التراكمي بمناسبه السؤال ؟

1- السكر التراكمي العينه تسحب علي اي مانع تجلط او مباشره من الشعيرات الدمويه

2- تحفظ العينه لمده 3 ايام في درجه من 18-25 او 7 ايام في درجه من 2-8

وعند الحفظ في الثلاجه لما نخرجها نتركها ربع ساعه في الغرفه وتقلب جيدا قبل الشغل

3- العينات الدهنيه لاتؤثر علي قراءه السكر التراكمي

4- التكسير ايضا لا يؤثر علي النتيجه وخاصه لو من الدرجه الاولي والتانيه

5- النتيجه لو اقل من 4 تعاد مع عمل كونترول للجهاز

كذلك لو اعلي من 14

6- السكر التراكمي قبل 2009 كان استخدامه فقط في مرضي السكر يعني اللي اتشخصه سكر لكن بعد 2009 قالت ال ADA الجمعيه الامريكيه للسكر انه يستخدم في تشخيص مرضي السكر في البدايه

7- المنجليه والثلاثيميا تؤثر علي التراكمي ف بالتالي المرضي المصابون لايتم عمل التراكمي لهم لان التراكمي عباره عن ارتباط هيموجلوبين A بالسكر ومرضي المنجليه عندهم هيموجلوبين S والثلاثيميا عندهم هيموجلوبين F فبالتالي النتيجه هتطلع قليله ف ممكن نستبدل التراكمي بالفراكتورزامين

8-مرضي انيميا نقص الحديد التراكمي ايضا يتاثر بالزياده

فلو مريض الهيموجلوبين فوق ال 9 مافيش مشكله

ولو من 9 حتي 7 هنا ممكن نعمل التراكمي بس نعرف انه هيتاثر بالزياده

اما لو الهيموجلوبين اقل من 7 لايتم عمل التراكمي ليه 👇👇

سبب ارتفاع HBA1C عند مرضى انيميا الحديد (IDA)

مفيش تفسير علمي ثابت لهذا السبب

لكن في بعض الفرضيات و النظريات اللي اتكلمت عنها :-

1-بتقول أن نقص الحديد يسبب انخفاض للهيموجلوبين فيبدأ ال bone marrow يزود تصنيع ال RBCs فيزداد عددها ويترتب عليه زيادة قيمة السكر التراكمي

2-بتقول ان السبب هو ان نقص الحديد بيسبب تغيير في شكل و تركيب الهيموجلوبين ويترتب عليه سهولة ارتباط الجلوكوز من الهيموجلوبين وبالتالي يترتب عليه زيادة قيمة السكر التراكمي

3-بتقول ان نقص الحديد بيسبب زيادة في نواتج اكسدة الاحماض الدهنية ويترتب عليه زيادة قيمة السكر التراكمي

4-بتقول ان نقص الحديد بيخلي عمر كريات الدم الحمراء RBCs

أطول بسبب خلل الخليق الحيوي لها

9- بنحاولش نربط بين نتيجه السكر التراكمي والصايم مثلا

لان ممكن صايم يبقي 400 وتراكمي 5 وممكن تراكمي 12 وصايم 60

🤏🏿وبيجي هنا السؤال الاشهر عندي حاله السكر الصايم 250 والتراكمي مثلا 5 ازاي او ايه الاسباب ؟

ج👈 في احتمال لعده اسباب

منها

1-باختصار التراكمي بيقيس السكر عند فتره زمنيه سابقه 3 شهور صح

ف ممكن مريض يكون حديث جدا جدا سكر

فملحقش التراكمي يتاثر

علشان كدا الدكتور لما بيكون شايف نتيجه زي كدا بيروح طالب فراكتوزامين

الثاني

2-المريض ضبط علاجه ونظامه الغذائي كويس جدا فتره طويله وبدا الحاله تتحسن والتراكمي يظبط خالص ومره واحده كدا اكل حلويات بكثره او اكل كارب كتير ف خبط السكر فهنا او نسي او غير العلاج لسا التراكمي متاثرش والسكر العادي طبعا بيتاثر بسرعه

3-مريض ثلاثيميا او منجليه

4- ممكن يكون اللي شغال خفف النتيجه ونسي يضرب في المعامل والتخفيف من اكبر كوارث التراكمي

5- خطأ في الشغل

10- ازاي اكتب نتيجه السكر التراكمي 👇👇

من الافضل والصح تكتب تقارير السكر التراكمي في المعمل عندك بالشكل دا 👇

Glycated Haemoglobin (HbA1c)

🤏🏿هتكتب نتيجه التراكمي

Hb A1c وتكتب قدامها النتيجه بالوحده

🤏🏿وتحتها هتكتب متوسط نتيجه السكر في اخر 3 شهور ودا بنجيبه من معادله

eAG(mg/dl) = 28.7*HbA1c- 46.7

وتكتب Mean of blood glucose (in the last 3 months )

وتكتب قدامها نتيجه السكر ب ال mg/dl

وتحت النتيجه بتكتب الكومنت دا 👇

Comments

* Diagnosing diabetes : According to American Diabetes Association : - Normal : less than 5.7%

- Prediabetes : 5.7% to 6.4%

- Diabetes : 6.5% or higher

* Therapeutic goals for glycemic control for diabetic patients : - Goal of therapy ( Controlled diabetic ) : < 7.0%

- Uncontrolled Diabetic : > = 7 %

- Action suggested : > 8.0%

Care must be taken when interpreting any HbA1c result from patients having any cause of shortened erythrocyte survival .

In these cases even analytically correct results do not reflect the same level of glycemic control that

would be expected

والله اعلم

#احمد الجابري

السلام عليكم

👈بالنسبه لسرعة الترسيب قراءة ال 1/2 ساعه في انابيب ال fast

تعادل قراءة الساعه في انابيب وسترجرين

👈مافيش حاجه اسمها ساعة تانيه في سرعة الترسيب هي ساعة اولي فقط

👈لو جالي تحليل سرعة ترسيب ومش هقدر اشتغلها في وقتها ؟ او لو مافيش عندي مانع التجلط سترات الصوديوم ؟ ايه العمل

🤏🏿هتسحب تحليل سرعه الترسيب علي مانع تجلط ال ايدتا وهيكون التعامل كالاتي 👇

عندك حلين

1- هنسحب العينه علي ايدتا وتقلب جيدا ثم نأخذ منها لكل 400 ميكرو دم نضيف عليهم 100 ميكرو سترات يعني النسبه تكون 4-1

2- ممكن نستبدل السترات لو مش موجوده بمحلول ملحي

وهيكون ايضا التعامل كالاتي

لكل 400 ميكرو دم مضاف عليهم 100 ميكرو محلول ملح

👈نقطه تانيه 👇

ايه فائده ان اسحب صوره الدم علي ايدتا ؟؟؟

لسببين

1- لو انا مش متوفر عندي انابيب سرعة الترسيب

2- لو مش هشتغلها في نفس الوقت وهركن العينه لان ممكن اسحب العينه علي ايدتا واتركها بحد اقصي 24 ساعه في التلاجه ولما اجي اخرجها اتركها ربع ساعه في درجه حراره الغرفه واقلبها جيدا ثم اتعامل معها عادي جدا

👈هل الاديتا هتؤثر علي سرعه الترسيب ؟؟

بالطبع لاه لسببين 👇

1- لان لايحدث تداخل بين موانع التجلط الايدتا والسترات

2- الايدتا المضافه للعينه بتكون قليله جدا جدا يعني لكل 1 مل مضاف له 25 ميكرو ايدتا فهذا لا يؤدي لتخفيف العينه

👈ليه بنفضل لو مريض له تحاليل كثيره وفي منها صوره دم وسرعه ترسيب بنقول للزميل اسحب علي ايدتا وبعد كدا اشتغل منها سرعه ترسيب ؟؟؟

علشان منسحبش كميه دم كبيره من المريض وبعض المرضي بتوسوس من سحب الدم الزايد فكل لما خففت السحب وقللته بيكون افضل لك عند المريض اكيد

والله اعلم 🍀

#احمد الجابري

السلام عليكم

🤏🏿من غير ال SOP

Standard Operation Procedures

في المعمل هيكون شغلك كله عشوائي وهيحصل اخطاء فادحه

اهميته 👇

👈تتبع الطرق المعمليه الصحيحه في الشغل

👈بنقلل الاخطاء في العمل

👈بنحصل علي جودة عاليه في النتائج

👈سهولة في التدريب والتعليم

👈الجوده اكيد

👈السلامه

اذاً ال SOP معرفته وتطبيقه مش رفاهيه دا امر واجب في المعمل ودا اساس الشغل الصح للحصول علي ادق النتائج

السلام عليكم ورحمه الله وبركاته ✋

س👈لو درجه حراره التلاجه قلت عن صفر ايه الكيتس اللي هيتاثر وايه اللي مش هيتأثر ؟؟؟

الاجابه 👇

مبدايا لو الكت تلج ف هيخرب ويبوظ لان اكيد الاستابيلتي بتاعته هتقل

انا طبيعي لو حد سألني بقوله استخدم كونترول وشوف النتائج قاريه في التارجت او قريبه منه ولا لاه ولو قرات في التارجت او قريب منه ف ان شاء الله كمل شغل بيه وابقي شيك باستمرار عليه لان ممكن الاستابيلتي تقل مع الوقت

ولو مافيش كونترول ممكن ترسل عينات لمكان يكون شغال بكونترول وتقارن بيه نتيجتك ✋

كمان مهم تعرف ان درجه الحراره المثلي للثلاجه هي من 2-8 فلو قلت درجه الحراره عن 2 هيحصل خلل اكيد في الاستابيلتي بتاعت الكت عندي

بس لازم نكون فاهمين الاتي

لو قلت درجه الحراره بتاعت الثلاجه عن صفر في فصل الصيف وموصلتش لدرجه بدايه التجميد اللي هي -1.5 تقريبا ف مش هنلاقي تأثير علي الكت اما لو في فصل الشتاء في الوضع هيختلف اكيد لان في فصل الشتاء نظرا لبروده الجو ف ال -1.5 دي مع درجه حراره جو قليله ممكن الكت يتلج ف بالتالي ممكن يخرب حتي لو مخربش كله ف اكيد الاستابيلتي بتاعته هتقل مع الوقت

اذا المتحكم هنا درجه حراره الجو مع استخدام كونترول للكت دا

س👈ايه درجه حراره الثلاجه المناسبه عندي لحفظ الكتات سواء في فصل الصيف او فصل الشتاء ؟؟؟؟

الاجابه 👇

درجه حراره الثلاجه اتفقنا من 2-8

ف انت اظبط تلاجتك في الصيف علي درجه حراره 2 وفي الشتا ارفعها ل 7 او 8

طبعا بنعمل كدا لان اكيد الجو ودرجته بياثروا علي درجه حراره الثلاجه

س👈احافظ ازاي علي الكت حتي اخر قطره ؟؟

الاجابه 👇

لو الكت جيد وشركه كويسه حاجتين مهمين هتتجنبهم للحفاظ علي الكت

1- الحفاظ عليه من التلوث

2- الحفاظ عليه من التجميد

س👈هل في محاليل ممكن تحفظ في الفريزر ؟؟

اكيد 👇

المحاليل البودره اللي بتتحل ممكن نقسمها نحفظها في الفريزر عادي

واحيانا بعد الاستندرات بنقسمها ايضا ونحفظها في الفريزر

بس المحاليل اللي بتتحفظ في الفريزر لو خرجت منه مينفعش تتجمد تاني لان الاستابيلتي بتقل

س 👈هو ليه المعظم بيشتكي من الحفظ في الفريزر سواء من نتائج بعض العينات او حفظ بعض المحاليل ؟؟؟

الاجابه 👇

بإختصار لاننا لم نحافظ علي درجه التجميد او درجه حراره الفريزر زي ما البامفلت بيقول ف معظمنا بيستخدم الفريزر بدون ما يعلم كم درجه الحراره

ف الحفظ الامثل اما -18 او -19 او -20

او الحفظ لمده اطول -70

س👈طيب هل ممكن انسي الكت في درجه حراره الغرفه يوم واتنين وثلاثه مثلا ؟؟

الاجابه 👇

طبعا دا بيتحكم فيه عده عوامل

1- درجه حراره الجو

2- هل الكت دا مسموح بيه انه يقعد فتره في درجه حراره الغرفه ولا لاه

لان في بعض كتات تقولك ممكن تتركه في درجه حراره الغرفه مثلا اسبوعين بس بشرط تكون درجه حراره الغرفه من 18-25

اذا المتحكم هنا درجه حراره الجو لان طول المده او قصرها بتختلف من الصيف للشتاء

🤏🏿اخيرا الكت يحفظ في مكانه المظبوط ومنع تلوثه بناءا علي كلام البامفلت للحصول علي افضل وادق نتيجه

والله اعلم ✋

#احمد الجابري

استخدام التخفيف ومشاكل التخفيف

السلام عليكم
الله يكرمكوا شغلنا مبني علي اليقين والاثبات اكتر من الشك
ف بلاش التقارير اللي بنشوف فيها كلمة trace
الكلمة دي من اكتر الكلمات اللي فعلا بتحير الدكاتره وممكن تخلي الطبيب يشك في شغلك
ممكن اه نكتب الكلمه دي بس في فحوصات معينه وبتكون نورمال زي UB لكن في فحوصات بكتبها بعد ما نطبق شروط الجوده في شغل الفحص دا وبنكتب بعدها كومنت بتكمله فحوصات اخري
انما علي الفاضي والمليان كدا اوفر
يعني مثال بسيط
في تقرير البول
نلاقي الناس عمالة تكتب
بروتين وسكر واسيتون trace
الحاجات دي لو شاكك اعمل الاختبار التأكيديه
#احمد الجابري

خطورة تعديل النتائج

السلام عليكم ورحمه الله وبركاته 🌹
👈الفيدال ليه 3 طرق في الشغل 👇
1- التنصيص
2- التخفيف serial Dilution
3-طريقه الانابيب ودي بتاخد 24 ساعه
👈قبل الشرح لازم تعرف ان التحليل دا يعتبر ذو اهميه تشخيصيه ضعيفه بدون توافر اعراض حقيقيه للمريض
🤏🏿دا بالنسبه للتنصيص والتخفيف 👇
ابدا شغلك ب 20 سيرم علي نقطه من الرئيجنت اللي في الغالب النقطه بتكون 50 ميكرو ولو طلعت ايجابي هيبقي 1/80 لان بدايه من تتر 1/80 او اكتر بتعتبر Indicate infection
علشان كدا بنبدا من تتر 1/80 اللي هو 20 سيرم علي نقطه من الرئيجنت
ولو طلعت ايجابي النتيجه بتتبع طريقه التنصيص او التخفيف 👇
🤏🏿بالنسبه للتنصيص وهو غير مفضل لانك بتقف عند تتر معين ومش بتقدر تكمل بعد التخفيف
وطريقته التنصيص كالاتي
👈هتضع عدة نقاط الاول 10 ميكرو سيرم والتانيه 5 ميكرو سيرم والثالثه 2.5 ميكرو سيرم
ثم هتضع علي كل نقطه منه نقطه من الريئجنت وتقرا النتيجه
في التنصيص هتكون
1/160 - 1/320 - 1/640
واعتقد هذا هيكون حدك في التنصيص
🤏🏿بالنسبه للتخفيف 👇
هنضع عده نقاط كل منها تحتوي علي 20 ميكرو محلول ملح علي الشريحه ثم تاخد 20 ميكرو سيرم وتقلبهم في اول نقطه محلول ملح ثم تاخذ منهم 20 ميكرو وتقلبهم في تاني نقطه وهكذا ……
ثم تضع علي كل نقطه منهم نقطه من الرئيجنت وتقرا النتيجه ✋
نتيجه التخفيف في الفيدال
1/160 - 1/320 - 1/640 - 1/1280
ملحوظه لو حابب تشتغل في الفيدال 40/40 في الاول مافيش مشكله بس يعتبر سلبي ف مالوش لازمه تعمله توفيرا للرئيجنت ودا بيكون تتر 1/40
كمان لو حابب تشتغل 80 ميكرو سيرم علي نقطه من الريئجنت بردوا مافيش مشكله ودا بردوا يعتبر سلبي ف توفيرا للكت لايتم عمله ودا بيكون تتر 1/20
الفيدال السلبي بيكتب كالاتي
اما Negative 1/20
او Negative 1/40
او Negative < 1/80
طريقه الانابيب 👇
🤏🏿 هتجهز 7 انابيب
👈اول انبوبه هتضع فيها 1900 ميكرو سلاين
👈من الانبوبه رقم 2 للانبوبه رقم 7 هتضع فيهم 1000 ميكرو سالين
👈هنضع في الانبوبه رقم واحد 100 ميكرو سيرم وهنقلب كويس جدا
👈هسحب من اول انبوبه 1000 ميكرو منها واضعهم علي تاني انبوبه واقلب كويس جدا
👈اخد من تاني انبوبه 1000 ميكرو واضعهم علي تالت انبوبه واقلب كويس جدا
👈اخد من تالت انبوبه 1000 ميكرو واضعهم علي رابع انبوبه واقلب كويس جدا
👈اخد من رابع انبوبه 1000 ميكرو واضعهم علي خامس انبوبه واقلب كويس جدا
👈اخد من خامس انبوبه 1000 ميكرو واضعهم علي سادس انبوبه واقلب كويس جدا
👈اخد من سادس انبوبه 1000 ميكرو واضعهم علي سابع انبوبه واقلب كويس جدا
👈اخيرا اخد من الانبوبه السابعه 1000 ميكرو واتخلص منهم يعني ارميهم 🤚
بكدا وصلنا ان كل انبوبه فيها 1000 ميكرو بعدين هتضيف علي كل انبوبه 50 ميكرو من محلول السالمونيلا
طبعا هنعمل لكل واحد من انواع السالمونيلا نفس ال 7 انابيب
يعني ال O سبع انابيب وال H سبع انابيب و AH سبع انابيب و BH سبع انابيب
بعد كدا هنضع الانابيب في الحضانه لمده 24 ساعه وتضبط درجه الحراره علي 37
وبعد 24 ساعه وانت بتخرج الانابيب لازم تخرجها وحاول متترجش منك وهتكون قراءه النتيجه كالاتي 👇
لو لقيت ترسيب واضح في التيوب من تحت يبقي دا اجابي وتشوف التتر كام وتكتبه بناءا علي ارقام الانابيب
🤏🏿خلينا متفقين ان اول وتاني تيوب ليس لهم قيمه تشخيصيه لان تشخيص السالمونيلا يبدا من 3 انبوبه تتر 1/80 🤚
🤏🏿التتر بيكون كالاتي
اول انبوبه 1/20
تاني انبوبه 1/40
تالت انبوبه 1/80
رابع انبوبه 1/160
خامس انبوبه 1/320
سادس انبوبه 1/640
سابع انبوبه 1/1280
وبكدا يكفي جدا عايز تبقي تزود انابيب مش مشكله بس مش هيفرق اكتر من تتر 1/1280 🤚
والله اعلم ☘️
# احمد الجابري

السلام عليكم

بسبب معظم المشاكل اللي بتقابلنا في نتائج الفيروسات

هنتكلم عن نقط بسيطة جدا فيها

👈معظم الاجهزه اللي شغالة بتقنية ال ELFA

زي الفيداس ….الخ

مبتكنش افضل حاجه في الفيروسات

بتعطي احيانا false positive

في فيروس B و فيروس C

👈كمان بعض الاجهزة اللي شغاله بتقنيه ال CLIA

زي مجلومي مثلا ……الخ

ضعيفة ايضا في الفيروسات وبتعطي false positive

في فيروس B وفيروس C و ال HIV

👈كمان في اجهزه ضعيفه تعمل بتقنية ال ELISA

زي ال كيموال جهاز تعبان وبيطلع نتائج false positive

كتير جدا ومشاكله لا تنتهي

الخلاصه 👇👇

علشان تشتغل الفيروسات لازم تكون فاهمها نظري كويس جدا وبعدين تشتغل علي اجهزه تكون محترمه

ومن افضل الاجهزه بتقنية ال CLIA

الكوبس e411

وافضل الاجهزه بتقنية الاليزا

DYNEX

اخيرا 👇👇

خبرتك مع قوة التقنية وقوة الجهاز هي اللي هتخليك تطلع افضل وادق نتيجة

والله علي ما اقول شهيد 🍀
#احمد الجابري

السلام عليكم
لو محتار في نتيجه فيروس سي ومش قادر تاخد فيها قرار يعني
عندك علي الكارت اعطت خط خفيف ولما ارسلتها معمل واتنين بتقنية اليزا واحد طلعها مثلا ايجابي 1.2 وواحد ايجابي ضعيف 1.09
هنا لازم تتعامل بالطرق الاتيه 👇👇
👈اما تأكد النتيجه في مكان اخر وتقوله اعملهابتقنيه CLIA او ELFA ودول بيكونوا ادق من اجهزة الاليزا الضعيفه
او
👈لو المريض مستعجل عليها ممكن تطلعها weak positive
بس هنا لازم تكتب كومنت تحت النتيجه بيقول
انك تعيد الاجسام المضاده بعد شهر او تعمل ال pcr
وانت كدا بتامن نفسك علشان بنكون خايفين من ال cross reactivity
ودي بتظهر في الكروت وبعض اجهزة الاليزا الضعيفه
وفي الحاله دي لو اتعاد التحليل بعد شهر وطلعت النتيجة سلبي او ايجابي عادي
طيب ليه في الحالات المحيرة لا نكتبها ايجابي صريح ؟؟
لان لو كتبنا النتيجه ايجابي هنا انت ثبت انها ايجابي ومفيهاش رجعه يعني مينفعش تكون ايجابي اجسام مضاده وبعد شهر او اتنين او بعد فتره تكون سلبي
الاستنتاج 👇👇
اذا ال weak positive فيها رجعه
اما ال positive صعب يكون فيها رجعه
والله اعلم 🤚
#احمد الجابري

السلام عليكم 🤚

لو في تحليل مش موجود عندك وبترسلة لاب تو لاب المفروض لما النتيجه تجيلك تسجلها عندك علي السيستم بتاعك بنفس القيم وبنفس الوحدات وممكن تعملها Scan

بس الاهم تكتب الجمله دي عندك في التقرير

Test performed by a 3rd party accredited laboratory

انت كدا بطبق سيستم الجودة صح

# احمد الجابري

السلام عليكم 🤚
السؤال المهم 👇
هل اجهزة البوكت ممكن نحطها في المعمل وناخد بيها شهادات اعتماد ؟؟؟؟
نعم ينفع
احنا اتفقنا ان اجهزة ال POC اجهزة تتميز بالسرعة وتفقد كثيرا من الدقه والمكان الاساسي لها الطوارئ والاستقبال والعمليات حتي حاليا بتوضع في بعض عربات الاسعاف لعمل التروبونين سريعا مثلا ……الخ
لكن لا مانع من وضعها في المعمل
بس الاهم سواء وضعتها في المعمل او غيره لازم تكون مجهز ملف كامل لها زي اي جهاز عندك في المعمل والملف دا يتضمن
كلا من
1- شهادة ال FDA
2- عقد الجهاز
3- maintenance
4-الكونترول
5- ال E.C
6-MSDS
7- SOPs
8- V&V
9- شهادات تدريب من الشركة
هنا تقدر تدخل بيه اعتماد اي شهادة جودة
# احمد الجابري

السلام عليكم 🤚
👈اخطر حاجه عندنا في ال Critical R تحليلين
1- التروبونين
2- البوتاسيوم
علشان كدا التحليلين دول مينفعش نعتمدهم بالتقنيات الضعيفه
كل تحليل بتقنيته الصحيحه
👈كمان مش كل نتيجه عندك قليله تروح رافعها للنورمال لان ممكن تكون Critical
ممكن تحاليل تنفع تطلع للطبيعي وللكونترول عادي زي مثلا ال PT
لكن علي النقيض ال PTT
اللي اي حد يطلع. معاه النتيجة قليله يروح كاتبها في الطبيعي

ال PTT
اقل من 18 بيكون Critical
في امراض اكتشفت بنتائج غير متوقعه
👈كيفية التعامل بقي مع الحالات ال Critical 👇👇👇
1- بتشيك علي العينه من حيث رقم الملف واسم المريض واسم التحليل ودا طبعا بيكون مسجل علي الباركود
2- بتشيك علي العينه نفسها مفصولة كويس لو سيرم ومش متكسره ولا دهنية ولو صورة دم بتشيك ان مفهاش جلطة وغير متحلله ايضا
3- بتشيك علي الجهاز بعمل كونترول
4- بتعيد دخول العينه مره اخري ولو لقتها ب C يبقي التصرف هيكون كالاتي 👇👇👇👇👇
5- التبليغ في غضون 10 دقائق من التأكد من النتيجه
والتبليغ الصح بالاتصال الاول تليفونياً بالكلام مع الطبيب وتقوم بتعريف نفسك ثم تذكر نتيجة التحليل ثم يردد الطبيب النتيجه للتأكد
بالاضافة طبعا ان حضرتك بتطبع النتيجة للمريض للتوجه للطبيب المعالج
ولو الطبيب المعالج علي مسافه بعيده ممكن يروح لاقرب طبيب او لاقرب مستشفي
والله اعلم 🤚
# احمد الجابري

السلام عليكم ورحمه الله وبركاته ✋
🤏🏿 الاسئله دائما اللي المعظم بيتلغبط فيها
في شغل الانزيمات ال AST و ال ALT
1- اعرف ازاي ان العينه اللي شغال فيها محتاجه انها تتخفف ؟؟
2- اعرف ازاي ان الكيرف دا مظبوط ولا لاه ؟؟
3- اعرف ازاي ان الكت بتاعي خرب ؟؟؟
👈اولا قبل ما نجاوب علي الاسئله دي لازم نعرف ان الكيرف في ال AST و ALT بيكون Decrease
👈ثانيا الكيرف الافضل والممتاز بيكون ال Abs بتاع ال WR بتاعه 1.7 وفي بعض الكتات 1.8
فعلشان كدا بنطمن علي الكت كل فتره مثلا شهر بعمل WR بدن اضافه سيرم ونقراه ونشوف هيقرا كام كل لما كان اعلي من 1.3 كل لما كان افضل
يعني لما يكون ال Abs 1.8 افضل من 1.5 وهكذا ….
👈ثالثا الكيرف الصح بيكون نازل بشكل صحيح او علي شكل كيرف منحني زي الهضبه وبيبدا من رقم من 1.3 او اعلي
اما الكيرف اللي فيه مشكله بيبقي عامل 👈زي الزجزاج او زي رسم القلب في نصه او في اخره او بيبقي ماشي بلاتوه عادي ويجي في الاخر ويحصل انكسار او بيمشي مظبوط وفجأه بتلاقيه ماشي بلاتوووووه للنهايه وهنا هنقول الاسباب تحت لذلك ✋
🤏🏿تعالوا بقي نجاوب علي الاسئله
👈هنعرف ازاي ان العينه اللي معايا محتاجه انها تتخفف ولا لاه ؟
لو قل ال Abs او الكيرف ونزل عن 0.9 او 0.8 او في بعض الكتات عن ال 1.0 اثناء القياس
هنا العينه بتكون محتاجه انها تتخفف
وهنا الكيرف بيكون زي ماقولنا ال Abs من بدايه صحيحه وبادي من فوق 1.3 يعني بادي من 1.8 او 1.7 او 1.6 او 1.5 او 1.4 او 1.3 ويفضل لا يقل عن ذلك بدايه ال Abs
ثم اثناء القياس يقل عن ال 1.0
هنا محتاج العينه تتخفف والتخفيف ب نبدا واحده واحده
وشكل الكيرف هنا بيكون في الغالب نازل صحيح وبعد كدا ممكن يحصل له انكسار ويقل عن ال 1.0 او يمشي بلاتوووووه
👈ازاي اعرف ان الكيرف بتاعي مظبوط ؟؟؟
لو الكيرف طول فتره القياس للاختبار فوق الواحد ويكون نازل بشكل مظبوط
👈ازاي اعرف ان الكت بتاعي خرب ؟؟
اعرف انه خرب لو عملت ال WR بدون اضافه سيرم طبعا وجيت اقراه علي الجهاز لقيت ال Abs اقل من 1.0 او كان فوق الواحد بحاجه بسيطه ونزل بسرعه جدا تحت ال 1.0
هنا معناه الكت بتاعي خرب ✋
دا بإختصار شديد لمعرفه قراءه وشغل الانزيمات اللي المعظم بيتوه فيها
ان شاء الله هنزل مجموعه من الكيرفات لل ALT و ال AST وهنقول مين فيهم الصحيح ومين فيهم الخطأ
كمان هنشرح ازاي تعرف كيرف ال increase
مظبوط ولا لاه كما في شغل ال Alp مثلا
والله اعلم 🍀
#احمد الجابري