सुर्याला आम्ही सुर्य म्हणालो
म्हणुनच तो सुर्य झाला .....
माणसाला माणूस म्हणून जगण्याला
तेव्हाच खरा अर्थ आला ...!!

सारीच समिकरणं मांडली आम्ही
आमचं मोठेपणा सिध्द करण्याला ...
माणसाची जात विसरला माणुस
जाती जातीत विभागून स्वतः ला .....!!

स्त्री पुरुष समानतेच्या गप्पा
त्याने खुप मोठमोठ्या केल्या...
सत्य मनाच्या आरशात पाहताना
सा-या घोषणा फोल गेल्या ....!!

जगणे एवढाच ध्यास का
माणसाच्या डायरीत लिहिला होता...
सैतानी वृत्ती बाळगताना
माणुसकी मात्र विसरला होता ....!!

नको माणसा तू आता
माणसा सारखा वागु ....
नामकरण सृष्टीचे करताना
स्वतः चे गुणधर्म नको सांगू ....!!

सुर्य म्हणून जन्माला यायला
युगे युगे वाट पाहावी लागेल ...
माणुस स्वतः म्हणून घेण्यासाठी
फक्त माणुसकीने वागावं लागेल .....!!

*सुभाष उमरकर सामनगांव नाशिक.*

*ती आणि... ती*

पृथ्वीच्या पोटाचा
प्रियसीच्या ओठांचा
कधीच अंदाज
लावु नये ....
कारण एकीने
उदरात अन्
दुसरीने अधरात
खुप गुपित
लपवले आहे ...!!

पृथ्वीच्या गतीचा
प्रेयसीच्या नितीचा
कधीच मागोवा
घेऊ नये
एकीचा व्यास
दुसरीचा ध्यास
एक दिवस
घेऊनच बुडतो ....!!

पृथ्वीचा आस
प्रेयसीची कास
कोणी कधीच
धरु नये
एकीच्या व्याप्तीला
दुसरीच्या युक्तीला
जगी तोड नाही ....!!

पृथ्वीवरील सृष्टी
अन्
प्रेयसीची दृष्टी
खुप दूरवर
पसरलेली आहे
एकीचे सौंदर्य
आणि
दुसरीचे गांभिर्य
कळता कळत नाही....!!

पृथ्वीच्या पाठीवर
प्रेयसीच्या गाठीवर
सारं आयुष्य
बांधलेलं आहे
एक शिरावर
दुसरी उरावर
सारी जिंदगानी
आम्हाला पोशित असते ....!!

पृथ्वीचे आयुष्यमान
प्रेयसीचे वयोमान
कधीच कोणाला
कळणार नाही
एकीचा अंत
दुसरीचा उगम
याचा परिणाम
कोणालाच माहीत
नाही .....!!

✒️✒️
*सुभाष उमरकर सामनगांव नाशिक.*

*रेघोट्या*

तारुण्यात गंध
वेडाच झालो मी ...
स्पर्शात तुझ्या त्या
स्वर्ग पाहिला मी ....!!

जावे विसावून तुझ्या
काळ्याभोर केशात गं ...
मिटून डोळे असा
वेडाच पाहतो मी ....!!

दिसता सामोरी
ओठी शब्द न येती ...
मग सारेच स्वतःशी
एकटाच सांगतो मी ....!!

हसतात लोक मजला
तुझ्या नादाने ...
तुझ्या आठवणीत
धुंद राहतो मी ....!!

शब्दात तुझ्या माझे
जीवन अडकले ...
एकाच शब्दात तुझ्या
घायाळ झालो मी ....!!

कवितेत शब्द गुंफण्यास
लेखणी केली पुढे ...
पांढ-या कागदावर
रेघोट्या ओढतो मी ....!!

*सुभाष उमरकर सामनगांव नाशिक.*

*पाऊलखुणा*

जपुन ठेविन मी उरी
तुझ्या पाऊलखुणा ....
गंध दरवळतो मनी
अजुन तुझ्या श्वासातला .....!!

जेव्हा मनातलं गुपित
तू माझ्या कानात बोलली ...
अर्थ नाही कळला त्यावेळी
आता भासवितो सहज गुणगुणली ....!!

माझेच चुकले त्यावेळी
अन् चुकते आहे यावेळी...
पण खेळात चुकांना
क्षमा नसते अशा वेळी ....!!

आजवर गोलकिपर म्हणून
ठोकर मारली मी ....
नेमक्या वेळी त्यावरुन
तोंडघशी पडलो मी ...!!

काही घडलेच नाही
मी इतरांना भासवितो ...
माझाच मी आता
स्वतः ला फसवितो ....!!

नाही मी अजुन हरलो नाही
पेनाल्टी माझ्या पक्षात आहे ..
देवच जाणे काय लिहिलेले
माझ्या भविष्यात आहे ....!!

जखम पायावर पण
घाव खोल मनात आहे ...
सध्या तरी मी तुझ्या
पाऊलखुणा जपीत आहे ...!!

*सुभाष उमरकर सामनगांव नाशिक.*

*कोडे*

कोण असे मनी
ध्यानी नुसताच ध्यास
चालते फिरते पुतळे
फक्त आणि फक्त आभास ...!!

जो तो हरवला
स्वत:च्या विश्वात रमला
आभासी जगात मध्ये
आपला मानुस च विसरला ...!!

नाती नाही नातलग नाही
खोट्या दुनियेत मित्राचा बाजार
चार दिशेला मुख सर्वांची
झाला संवादाचा व्यापार ...!!

बोलु कुणाशी मी
भिंतीचे कान बहिरे झाले
डोळस मनाचे बोलके डोळे
पाहताना आता आंधळे झाले ...!!

घरी जा दारी जा
जा आता कुठे मयतीला
हातात असतो अंबानी
अन् नेट असते सोबतीला ...!!

तुझा माझा सहवास ही
पुर्वी किती गोड होता
फाडलेल्या वहीच्या पानात ही
प्रेमाचा सुगंध होता ...!!

कुठे हरवले ते कबुतर
नाती जोडणारे पोस्टमन
पिंज-यातला बंदीस्त पोपटही
शीळ घालीत होतं मन....!!

पैसा देव की देव पैसा
कोण आता सांगणार आहे
तुझ्या माझ्या नात्याचे
कोडे कोडेच राहणार आहे ...!!

*सुभाष उमरकर सामनगांव नाशिक.*

*मित्रा*

बदल तू मित्रा ,मीही बदललो आहे
मैत्रीचा साचा ज्यांनी त्यांचा ठरवला आहे..!!

तुझ्या विजयात, आनंदी मी झालो
विजयाचा उन्माद तुझ्या चेहऱ्यावर दिसला आहे ...!!

ठेवली नाही मित्रा, भिड लाज लज्जेची
कमरेचे सोडून तू, बांधले डोक्याला आहे ..!!

माझे मुक्त जगणे होते तसेच आहे
तुझा भ्रमनिरास तुझ्या ,कृतीने झाला आहे.....!!

मैत्रीची परिभाषा कधी तुला कळलीच नाही
खोट्या वाह वाहत तू ,पुरता गुरफटला आहे ....!!

दर्दी मी मनाचा ,तू गर्दीला भुलला
निंदा तुझी होता वेदना मला आहे..!!

नको सोबत तुझी ,मी समर्थ झालो
माझ्या यशाचा अर्थ ,मला कळला आहे ...!!

*सुभाष उमरकर सामनगांव नाशिक*

*पान*

पिकून पडलेल्या पानांचं
जीर्ण होत जाणं ...
तरी त्यांच्या जाळीदार नक्षीनं
जीवनाचं रहस्य सांगणं .....
माझ्या अंगणात पडलेल्या पानाला
मी असाच न्याहाळीत असतो !
तू दिलेल्या पानानं
वहीच्या खोल काळजात
केलेली खोलवर जखम
त्यावर आठवणीची खपली
चढू नये म्हणून .....
मनाच्या खोल गाभा-यात
सतत ओली ठेवतो ,!
हलकेच तूच दिलेलं
मोरपीस फिरवित ....

*सुभाष उमरकर सामनगांव नाशिक.*

*तुझं प्रेम....*

काय लिहू म्हणतेस ?
सरस्वती च्या थाटात प्रश्न ...!
अर्थात तुझ्या कडून अनपेक्षित
माझ्या कडून अनुत्तरित ...
लिहिणारच असशील तर
मनातील ते लिही सर्व ...
तुझा विश्वास तुझं प्रेम
सर्व काही कुशल क्षेम ...
कधी काळी तुच लिहिलेलं
काही क्षणात तुच पुसलेलं ...!
लिहशील ते मला सारं ?
गिरवशील लेखणी माझ्या साठी !
लिहिलं तर वाचीन म्हणतो
मिळालं तर जपून ठेवीन म्हणतो
तुझं प्रेम .....

*सुभाष उमरकर सामनगांव नाशिक.*

*सहज मनातलं*

सोबत तुझी मिळाली
जणु पौर्णिमेची रात्र
चंद्र चांदण्यांच्या प्रकाशात
न्हाऊन निघाली गात्र ...!!

बेरंग होते जगणे
झाली रंगाची उधळण
अनेक रंगांची तू
कशी होईल धुळवड ...!!

साथ अशीच असावी
अंता पासुन अनंता पर्यंत
तुझ्या माझ्या संसाराची
राहावी शेवटच्या श्वासापर्यंत....!!

लाभला सहवास तुझा
ओळखीच्या दोन शब्दांचा
होतो मग आभास
आजन्म तुझ्या सहा-याचा ....!!

शब्द देतात आधार
ओळख आपली करतात
मी मनातले विचार तेव्हा
सहज कागदावर उमटतात ....!!

✒️✒️
*सुभाष उमरकर ,सामनगांव नाशिक.*

निष्ठा बदलते आहे

निष्ठा बदलण्यासाठी धारीष्ट्य
घ्यावे लागतात अपार कष्ट
जवळचेच होतात रूष्ट
वेडा झाला म्हणतात हा दुष्ट

विज्ञानाचा अंगीकार जिवनांत
सुर्य तारे चंद्र ग्रह अंतराळात
आकाश का बरे म्हणतात
उंच उडतो स्पर्शाच्या नादात

चंद्र देव म्हणून मान्यता पावला
माणसाने त्याच्याच छाताडावर पाय ठेवला
सुर्यदेव दृष्य तरी अस्पृश्य ठरला
आणि मग निष्ठेलाच तडा गेला

विद्देची देवता सरस्वती शारदा
सा-या जगातील मानव विद्यार्थी
दृष्टीभ्रम की बुध्दीला आली बबधिरता
फोटोत दिसल्या साऊ मुक्ता फातीमा

कशी काय निष्ठा ढळली असावी
अशी वेड्यांत गीणती का व्हावी
महिमा ही विज्ञानाची तर नसावी
आधात्म्याला ती कां बरे ती न दिसावी.

वसंत गवळी गोंदिया

*प्रीत तुझी माझी*


प्रीत तुझी माझी अशीच बहरत जावी,
साथ तुझी जन्मोजन्मी मिळावी,
तूच राहावी सतत ओठी,
अशाच राहोत रेशीमगाठी...


प्रीत तुझी माझी अशीच बहरत जावी,
आस वाटे मजला नेहमी,
मी आहे सतत सोबती,
जाणीव असू दे तुझ्या मनी...


प्रीत तुझी माझी अशीच बहरत जावी,
होतील स्वप्न पूर्ण पाहिले जे मिळूनी,
फुलेल घरटे सुखाचे या जीवनी,
जगू प्रेमाचे क्षण सतत हसूनी....

@✒️प्रा.योगेश त्रिंबकराव भोसले,
बीड.

*निवडूंग*

घराच्या कोपऱ्यात
वेगळं आकर्षक म्हणून
निवडूंगला मी नित्यनेमाने
पाणी देत राहिलो ....
कळलेच नाही स्पर्शातही
वेदनेचा आभास आहे ....!

तुझ्या वेणीत अलगतपणे
गुलाबाचे फुल मावळताना
तुझ्या लटक्या रागाने
झालेली जखम .....
आजही चिघळत आहे
रक्ताळलेल्या काळजातून ....!

म्हणुनच मी आता
नात्यांचे बंध बांधत नाही
हृदयात होणा-या जखमांची
भीती वाटते मला ....
बाभळीला हळदीचा आलेला बहर
किती काळ पिवळा असतो ....?

*सुभाष उमरकर सामनगांव नाशिक.*

*फुलपाखरू*

फुलपाखराचं जीणं माझे
चार दिवसांची धडपड आहे
घेतो कोणी चिमटीत मला
रंगवुन त्याला आनंद देणे आहे

या फुलांचे त्या फुलांन सोबत
सुख दुःख मी वाटत फिरतो
नको हेवा करु माणसा माझा
जगण्याचा खरा आनंद मी घेतो

कशास हवे ते राजे राजवाडे
मोकळे श्वास तिथे गुदमरले आहे
स्वच्छंदी जगण्यासाठी आजही
मोकळे आकाश खुले आहे

रंगबिरंगी दुनिया माझी
स्वप्नात ही स्वप्नावलीची सोबत आहे
स्वप्न आजचे जगुन घेतो
स्वप्न उद्याचे डोळ्यात आहे

मोह नाही मत्सर, द्वेष नाही
नाही मज गर्व कशाचा
जो आला तो मित्र जाहला
जगण्याचा काळ आहे किती क्षणाचा ..

या मनातून त्या मनावर
अधिराज्य मी असेच करणार
चार दिवसांचं जगणं माझं
प्रत्येकाच्या स्मरणात ठेवणार ....

*सुभाष उमरकर सामनगांव नाशिक.*

*निर्जीव पुतळा*

तुझ्यावर असलेले प्रेम
व्यक्त करायला मला
बरीच वर्ष वाट पाहावी लागली.....!

आज भेटली अचानक
किती दिवसांनी
सहज बोलुन गेलीस...हसत हसत ...
तू बदलला च नाही अजुनही ....!

हो आहे तसाच आहेस मी.....
तीच्या कडे न पाहताच म्हणालो ...
"पण तू खुप बदलली ग...
फुललेलं फुल ,पानगळीच पान झालीस ....!

मी नाही बदलली
परिस्थीती बदलली आता ...
भुतकाळत किती दिवस जगणार होते मी ..‌‌.?

दोष कुणाचा मला माहित नाही पण ..
दोष मी कुणाला देऊ ..तरी कशाला ..!

मी म्हटलो जाऊ दे
सुखात आहेस ना तू ....?
भरलेल्या डोळ्यांनी पाहत होती ....!

ती किती सहज
घाव करून गेली काळजाला
वार करून गेलीस त्या क्षणाला ...!

" निर्जीव पुतळ्याची पुन्हा पुन्हा
रंगरंगोटी करण्याला जर
तू सुख म्हणत असशील तर ...?
हो मी खरंच सुखी आहे .माझ्या आयुष्यात ..."

जखमांची मोजदाद
करू शकलो नाही मी तेव्हा ...
मी कधी तीच्या कडे तर कधी चौकात ..
वर्षोन वर्ष उभ्या असलेल्या
पुतळ्याकडे पाहत होतो...!
रंगरंगोटी करून नविन केले होते त्याला
आताच समाज म्हणना-या लोकांनी .....
ती नजरे आड होई पर्यन्त.....!


✒️✒️
*सुभाष उमरकर , सामनगांव नाशिक.*

*🌹🌹ती🌹🌹*

ती म्हणजे कोण ..?
मनातील भावना ,केलेली कल्पना
असलेली इच्छा की
पुर्ण न होणारी आकांक्षा ...!
ती का असते शब्दा शब्दात
तीच्या पासून सुरुवात होते
तीच्यापाशी अंत ....
ती असते जगण्यात
तीच दिसते मरण्यात ....
ती असते ममता दुःखातली
ती असते माया सुखातली
ती मोह आहे तीच देह आहे ...
तीच असते पुजा निरंतर चालणारी
तीच असते आरती
आयुष्य उजळून टाकणारी ....
ती खुशी आहे मनमुराद जगणारी
ती चेतना आहे
जगायला चालना देणारी ....
ती निशा आहे काळोखात बहरणारी
ती उषा आहे
प्रत्येक दिवसाचे नविन स्वप्न सजवणारी ...
तीच आहे सुमन अन्
तीच आहे सुहास ...
तीच व्यास आहे
ती जगण्याचा ध्यास आहे
ती क्षणाची पत्नी परंतु
अनंत काळाची माता आहे
ती बंधन आहे राखीची
ती लळा आहे लेकीची ...
ती आहे म्हणुनच मी आहे
ती आहे म्हणुन हे सर्व आहे ...


✒️✒️
*सुभाष उमरकर सामनगांव नाशिक.*

📌
*अलक*

आज महिला दिनाच्या दिवसभराच्या व्यस्त कार्यक्रमातून ती थकुन भागुन घरी आली अन् घरभर पसरलेला पसारा आवरताना तीची नजर बेडरूममध्ये पडलेल्या नवरोबा कडे गेली .
*"अरे तुम्ही कधी आलात ? दमला असाल ना तुम्ही ,थांबा तुम्हाला गरम गरम चहा करून देते " दिवसभराचा सगळा थकवा विसरून ती तडक स्वयंपाकघराकडे वळली .*
✒️
*सुभाष उमरकर,सामनगांव नाशिक.*

*चौकट....*

असं काय आहे तुझ्या रुपात ?
ज्याने हरवितो मी स्वतःला ....

ही एक क्षण काळाची मोहीनी आहे
की तुझ्या न लाभलेल्या
सहवासाचा परिणाम ....

हा वयाचा वेडेपणा आहे की
एक अविफल अभिलाषा ....?

तुझ्या रुपाने की गुणाने घातलेला
प्रेमाचा विळखा तर नाही ना ...

की माझ्या प्रेमवृत्तीने तयार केलेला
स्वतः भोवतीचा सापळा ...!

वर्षोनुवर्षे वाट पाहतोय
वर्षोनुवर्षे तेच लिहितोय याच आशेवर...

तू केव्हा तरी पाहशील अन्
साफल्यतेने त्यावर गोड भाष्य करशील ...!

पण दुःख होतं मनाला
तू जेव्हा प्रतिक्रियेचा साधा
प्रतिसाद ही देत नाहीस ....

अन् पुन्हा नव्या उमेदीने
पुन्हा एकदा नविन काहीतरी
लिहिण्याचा प्रयत्न करतो ....

स्वतः ला कोंडून घेतो
चेकमेट झालेल्या राजा सारखा
सोंगट्यां सोबत स्वतः च आखलेल्या चौकटीत .....!!

✒️✒️
*सुभाष उमरकर सामनगांव नाशिक*

*आओ चलें*

अजीब कश्मकश है तेरे प्यार में
दील से चाहु दिल्लगी होती है ..!
कैसे समझाऊं दिल को
भुलाने की कोशीश मे हैरानगी होती है।

उम्र की बात करती हो क्यौ
तुम्हाते प्यार में परेशान रहते है
तुम चाहो ना चाहो हमे
हम तुम्हे ना भुल पाते है ...!

हम उम्र भी कभी साथ नहीं देते
जींदगी युही गुजर जाती है
साथ चलोगी जब तुम हमारे
साथ चलने का वादा करते है ...!

चलो जाने भी दो यार अब
क्या पडा है अब रुसवाई मे
आवो साथ मिलकर चलते है
तनहाइ भरी इस जिंदगी में ....!

✒️✒️

*सुभाष उमरकर सामनगांव नाशिक.*

*आधार*

आश्वस्त जीवनाचं सुनं रितेपण
अन् जगण्याची नवी उमेद ...
अंगणात पडलेला पारिजातकाचा सडा
आणि माझं दुभंगलेले माझं मन ....
पानाआड लपलेल्या दवबिंदूत
मातीसाठी ओलावा शोधतं ....
आजवर सोसलेले उन्हाचे चटके
अन् खडकाळ रानात भिरभिरणारं
फुलपाखरू ...
रानफुलांच्या शोधात चार दिवसाचं
आयुष्य मागतं ....
काळ्या पाषाणाच्या पृष्ठाभागावर पडलेली
तुझी नितळ छबी तेवढी
कायम स्थिर ठेव ....
आणि अस्तव्यस्त पडलेल्या दगडांवर
जपून पाय ठेव ...
कदाचित तू पुन्हा म्हणशील
मीच आधाराचा हात दिला नाही
म्हणुन ......


✒️✒️
*सुभाष उमरकर सामनगांव नाशिक.*

*व्याप्ती*

का कोणच्या , मनात आहे मी
असा कोणत्या ,संभ्रमात आहे मी !!

का होतो भास ,जिवंत असल्याचा
मुर्दाड मनाच्या , श्वासात आहे मी !!

केला नाही कधी विश्वासघात मी कुणाचा
अविश्वासाच्या, जंजाळात आहे मी!!

चालल्या जरी, कु-हाडी वृध्द झाडांवर
प्रगतीचा नवा , ध्यासात आहे मी !!

अतोनात छळले , जरी बागेत फुलांनी
बंदिस्त पाकळ्यांचा , तसा खास आहे मी !!

पायदळी तुडवून, धुळीचा कण झालो
अणु रेणूत तुझ्या , हमखास आहे मी ,!!

विशाल आहे माझे ,मन सागरा समान
व्यापुन जगाला ,सा-या विश्वात आहे मी !!

*सुभाष उमरकर ,सामनगांव नाशिक.*