صباح الخير..

الطلبة اللي قاعدين لهم مواد من الانترو..يسحبوا كشف درجات ويرفعوه لأستاذ ماجد..

موفقين.

السلام عليكم..

أكيد كلكم سمعتوا بإعتصام أعضاء هيئة التدريس !!

هذا مايعنيش أن الكلية حتسكر أو أن الموظفين مش حيكونوا موجودين !!

الكلية حتكون فاتحة والموظفين حيكونوا متواجدين زي أي يوم طبيعي..وأعضاء هيئة التدريس حيكونوا متواجدين في مكاتبهم حسب كلامهم..بس مش حيعطوا محاضرات..

ولكن فيه منهم حيعطي محاضرات زي السيم اللي فات..مدابيكم ماتفوتوش المحاضرات لأن المحاضرة اللي تنعطى خلاص معاش حتتعاود..

وفق الله الجميع.

بيان إتحاد طلبة كلية الطب البشري
بخصوص إعتصام أعضاء هيئة التدريس بالكلية

بسم الله الرحمن الرحيم

تابع إتحاد طلبة كلية الطب البشري عن قُرب ما آلت إليه الأمور عقب إعتصام أعضاء هيئة التدريس والذي لا يزال مستمرًا منذ ما يزيد عن الشهر، وإذ أننا نتفهم مشروعية مطالبتهم بمستحقاتهم المالية المتأخرة ولكن الأمور بدأت تسير إلى منعرج خطير جدًّا خصوصًا بعدما اتضح عدم اكتراث العديد من أعضاء هيئة التدريس لاحتمالية ضياع الفصل الدراسي والذي لن يتحمل عواقبه إلا الطلاب.

وإذ نُذكّر أعضاء هيئة التدريس بقول نبيّنا ﷺ (لا ضَرَرَ ولا ضِرَار)، فإنّنا من هذا المنبر نُحمّلكم المسؤولية تِجاه ما حصل من تأخير، وأنّنا لن نقِف موقف المتفرج فيما يعاني الطالب وحده عواقب هذا الإعتصام في ظل هذه الظروف القاسية ووسط عدم وجود ردود أفعال جدية من إدارة الكلية أو الجامعة على حدٍّ سواء.

وإذ أنّنا نصدر هذا البيان لنبيّن للجميع أنّنا لن نقف مكتوفي الأيدي تجاه ما يحصل، نوجّه الدعوة لكل طلبة كلية الطب بجامعة طرابلس للالتفاف حول الاتحاد والوقوف وقفة جادّة مع بعضهم البعض في قادم الأيام أمام مايجري ويهدّد مسيرتهم التعليمية.

وفق الله الجميع لما يُحبّ ويرضى...

#انقاذ_الفصل_الدراسي
#إتحاد_طلبة_كلية_الطب_البشري
#المكتب_الإعلامي_بالاتحاد

بيان اتحاد طلبة كلية الطب البشري (2)
بخصوص اعتصام أعضاء هيئة التدريس بالكلية

بسم الله الرحمن الرحيم

تابعنا عن قُرب ردود الأفعال بخصوص بياننا الأول، ونحن نشد على أيدي أعضاء هيئة التدريس الذين غلّبوا مصلحة أبناءهم الطلبة وأبدو استعدادهم لاستئناف العملية التعليمية بالكلية، ولأن الوقت يمضي مما يحتّم علينا سرعة اتخاذ الاجراءات اللازمة لانقاذ الفصل الدراسي من الضياع، فإنّنا اتحاد طلبة كلية الطب البشري نُعلن الدخول في اعتصام ابتداءً من يوم الاحد حتّى يتم استئناف الدراسة بجميع الأقسام العلمية دون قيد أو شرط، ونؤكد على أن سير العملية التعليمية ومستقبل الطلبة خط أحمر ولن نسمح باتخاذ الطلبة وسيلة ضغط على الحكومات أبدًا، كما ندعوا مجلس الكلية ومجلس الجامعة الموقرين لاتخاذ أقصى الاجراءات لتفادي حصول هذا مستقبلًا، كما ندعوا مجلس الكلية لاتخاذ حزمة من الاجراءات السريعة لتعويض الطلبة عن الوقت الضائع خلال هذا العام والأعوام الماضية.

#اتحاد_طلبة_كلية_الطب_البشري
#المكتب_الإعلامي_بالاتحاد

طبعا الآلية وكم بنقروا سيمستر وكيف آلية التعويض..مزال ماتحددش شي..
أعتقد الأسبوع الجاي يوضح كل شي باذن الله..

وفق الله الجميع.

السلام عليكم..

زي ماتعرفوا أن الحضور في الكلية محدود جدا...
ودفعتي من قبل..اللي يحضروا مايفوتوش عشرة طلبة..
ولكن لازم نقسمكم مرات فيه حد يخطرله يحضر السيم هذا..

عالعموم..

اللي ناوي يحضر في أي مادة من موادنا الأربعة...يبعتلي اسمه ثلاثي ضرووري والمادة اللي بيحضرها
AN233,BC243,PS243,MB241
@NWFL_98

وبعدها حنزللكم تقسيمتكم بعون الله..

وطبعا كالعادة التسجيلات والشيتات بعون الله أول بأول راح تنزل في القناة..

موفقين.

قروب A محاضرتهم بكرة إن شاء الله... لحضور مقرر MB241..

السلام عليكم ورحمة الله وبركاته..

توضيح بسيط بخصوص المحاضرات..

أول شي جميع المحاضرات باذن الله سيتم تسجيلها وتنزيلها على القناة والبوت أول بأول هما والشيتات...ونحاولوا نصوروا فيديوهات إن أمكن..

ثاني شي موضوع الحضور..ضروري تلتزموا بقروباتكم ومايجي حد يحضر خارج القروب..لو تبوا القراية ماتوقفش🙂🙂

والحضور حيكون كالتالي :

مثلا الميكر.. القروب الأول محاضرته بكرة السبت..والقروب الثاني لو فيه حد سجل فيه حيكون يوم الأحد...ويستمروا هكذا الاول يوم السبت والثاني يوم الأحد..

وطبعا زي ماقلتلكم ماتخافوش من ناحية التسجيلات والشيتات..كالعادة التسجيل والشيت ينزلوا وقتي..ودسكة دكتور مانع التسجيل مافيش منها..

وبالله اللي عارف روحه مش حيحضر مايزاحمش غيره..

وباقي المواد حنزلهم شوية ثاني..

وفق الله الجميع.

قروب A محاضرتهم بكرة إن شاء الله... لحضور مقرر BC243.

قروب A محاضرتهم بكرة إن شاء الله... لحضور مقرر PS243.

مشوا بالتقسيمة هذه مبدئيا لين انديرهم وقت ثاني منظمات أكثر...

اللي اسمه مانزلش من المفترض مايمشيش..المحاضرة والشيت حينزلوت عالقناة 🙂
موفقين.😴

محاضرة مقرر MB241 في قسم الميكرو

قروب B يحضروا بكرة يوم الأحد..
المحاضرة من الساعة 1:00 إلى 2:00

السلام عليكم..

إن شاء الله بداية موفقة للجميع..

أولاً..القسم حيعطي محاضراته عادي..مش حيعاود ولا محاضرة..بس كل مرة يحضر قروب..
اليوم حضروا قروب A..بكرة بيحضروا قروب B والمحاضرة جديدة مش نفسها الأولى..وهكذا..

كل المحاضرات حتتسجل وتنزل..مافيش شي يفوتكم بعون الله..

حتكون فيه ساعات مكتبية للدكاترة لأي استفسار..وحنبلغكم بتفاصيل أكثر إن شاء الله...

بالله عليكم اللي مايبيش يحضر..ولا يبي يجي يشوف الجو بس..مافيش داعي تبعتلي اسمك وتاخذ مكان غيرك وادوخني معاك..

وحدة من الإثنين..يا بتحضر وتلتزم بالحضور..يا إما خلي المكان لغيرك..

طبعا اليوم خذينا محاضرة ميكرو وفسيو فقط..والتسجيلات والشيت نزلوا عالقناة..

وفق الله الجميع.

السلام عليكم..

#تم_تعديل_الأيام

بخصوص مقرر MB241..

جدول المحاضرات النظرية كالتالي :

يوم الأحد : من الساعة 9:00 إلى الساعة 11:00 صباحاً
يوم الإثنين : من الساعة 9:00 إلى الساعة 11:00 صباحاً

الأسبوع هذا حتكون فيه محاضرة عملي وحنبلغكم بتوقيتها..
والأسبوع القادم المعمل حيكون مفتوح طيلة أيام الأسبوع للطلبة..

المحاضرات النظرية حيعطوها في قسم الميكرو بحضور 16 طالب فقط..وحنعيد نقسمكم من جديد..

كل المحاضرات والشيتات تنزل على القناة فورا..

وحتكون فيه ساعات مكتبية للدكاترة لأي استفسار حنوافيكم بها لاحقاً..

وفق الله الجميع.