السلام عليكم..

غدا د.نجوى عندها اجتماع...تلقوها متأخر شوية..

وفقكم الله.

السلام عليكم..

طبعا أمس تلاقيت مع د.خالد قدارة بخصوص مراسلة البايو (أسئلة النيوترشن)..وقالي أمس ردوا عليا القسم وقالولي أن الأسئلة مشروحة ومافيش شيء خارج الشيت..
عالعموم..
قالي مانقدر نجبر قسم أو دكتور أنهم يلتزموا بالشيت فقط...صح كان قرار في لجنة الأزمة ولكن يقترحوه على الأقسام..اللي يبي ياخذه باهي واللي مايبي حر..
وبالنسبة للأسئلة شرحهم النجار آخر محاضرة..
وفي الجديد بيننا وبينهم المرجع..
ولو شرحوا شيء برا الشيت احني ملزمين بيه..

ونأسف على التأخير..بس الإعتصام كان موقف كل شيء وهذا وين تحصلت على الرد..

وفق الله الجميع.

السلام عليكم ..

تم التنسيق للإعتصام وأعتقد كل شيء واضح.. المكان والزمان والمطالب..
لكن فيه نقطة غايبة على البعض إذا مش الكل..

أكيد فيه طلبة حيقولوا أمورنا طيبة وماعندناش مطالب وجدولنا كويس ومش مستحقين تجاوز و و و ..

الإعتصام هذا يعتبر نوعا ما "تحديد مصير"..وإذا ماقدرناش ناخذوا مطالبنا حاليا ..من الصعب ناخذوها القدام..وباش ناخذوا مطالبنا ضروري يكون العدد لا بأس بيه..

المطالب حيستفيد منها الجميع سوا توا ولا بعدين...التجاوزات إذا مافتحوهمش حاليا معاش تحلموا يفتحوهم..والجداول كذلك...وفوق من هذا العدوى حتنتقل إلى الأقسام ومعاش نقدروا ناخذوا أبسط حقوقنا منهم...لا المندوب ولا رئيس الإتحاد يقدر ياخذلك حقك بعدين..لذلك
خليكم كلمة واحدة واوقفوا مع بعض..لأن المطالب حيجي يوم وتستفيدوا منهم..
ودفعتي يمكن أكثر دفعة متضررة من قصة التجاوز والجداول والقدام حتضرروا من قصة الوحدات وتقعدوا في مشاكل ماليهاش حلول..

هذا كله وماتكلمناش على قصة إلغاء السيمستر...لأن لو تأخرنا في السيمستر هذا..اللي بعده شبه ملغي...
وأعتقد مش ناقصين (دفعة المفاضلة 6) سنة ضايعة علينا وزيدوها توا سيمستر على وشك إلغائه..ووضع البلاد مايطمنش..ديروا إحتياطاتكم من توا..

رجاءاً..خوذوا الأمر بجدية وتحملونا هالأسبوع...
الموضوع يبي إصرار وصبر..
وإن شاء الله نكونوا عند حسن ظنكم..

وفق الله الجميع.

إجتماع طارئ لمجلس إدارة كلية الطب

الثلاثاء 3/12/2019م

إنعقد اليوم الثُّلاثاء بقاعة الإجتماعات الرئيسية لكلية الطب الإجتماع الطارئ لمجلس الكلية بحضور السّيّد/ الوكيل المُساعد للكُليات الطّبية أ. د. عبدالرزاق العوزي، وقد أعرب المجلس في بداية الاجتماع عن أسفه الشّديد لما انحدر إليه إضراب نقابتي الموظفين وأعضاء هيئة التدريس، غير راضين بما يجري الآن من إضاعة لحق الطالب في التعليم، ومُعلنين انحيازهم لمصلحة الطالب، وأيضًا أشاد المجلس بالوقفة الاحتجاجية الحضارية لطلبة كلية الطب يوم الأحد الماضي، وفي هذا ننتظر مُجريات الإجتماع الذي سيجري غدًا بين السّيد/ رئيس المجلس الرئاسي م. فائز السراج وبين مُمثّلي النقابات، وان لم يأتِ الإجتماع بأي جديد فقد تم طرح مُبادرة من قِبل النقابتين بالكلية لاستئناف الدراسة خلال الأسبوع القادم مع وجود وقفات احتجاجية اسبوعية للموظفين وأعضاء هيئة التدريس؛ وفي هذا نتوجّه بالشكر الجزيل لكافة أعضاء مجلس الكلية على موقفهم المُشرّف ووقوفهم في صف الطالب وللسّيّدة/ نقيب أعضاء هيئة التدريس د. هناء أبوسعيدة والتي غلّبت مصلحة الطالب وقدّمت استقالتها من منصبها كنقيب لأعضاء هيئة التدريس.

وتم أيضًا مُناقشة عديد البنود التي تُهم الطالب ونذكر لكم منها:

■ السماح لطلبة الفصل الدراسي الأخير قبل المرحلة السريرية بالقيام بتجاوز واحد وهذا بعد ما يتم التواصل مع أقسام الأحياء الدقيقة والطفيليات وطب الأسرة والمجتمع بخصوص المقررات، وفي هذا ترقّبوا الإعلان عبر صفحة قسم الدراسة والامتحانات.

■ السماح بالتجاوز لمن لديه أقل من 12 وحدة دراسية وهذا بعد التواصل مع قسم الدراسة والامتحانات.

■ تمت الموافقة على تغيير متطلب الكيمياء الحيوية 3 بعد قرار مجلس القسم، وسيتم تعديله في المنظومة ابتداءًا من الفصل القادم نظرًا لأن جُلّ الطلبة تم تنزيلها لهم خلال الفترة الماضية عبر النماذج الورقية.

■ تم السماح بتنزيل مقرري المهارات السريرية 2 و 3 بالنسبة لطلاب الفصل الأخير قبل المرحلة السريرية.

■ الترحيل للمرحلة السريرية بمادة من المرحلة قبل السريرية، وبعد مراجعة اللائحة العامة للتعليم العالي "501" ولائحة كلية الطب تقرر عدم السماح بترحيل أي مقرر من المرحلة قبل السريرية إلى السريرية، وكل من دخل امتحان بالمرحلة السريرية الفصل الماضي وهو لديه مقرر من المرحلة قبل السريرية ستُلغى له المادة السريرية.

■ بداية الفصل الدراسي للمرحلة السريرية ستكون ابتداءًا من تاريخ 14/12/2019م بالنسبة لمقررات طب التوليد وأمراض النساء، طب الأسرة والمجتمع، طب العيون والطب الشرعي والسموم والتنزيل سيكوم عبر المنظومة خلال الأيام القادمة، أما بالنسبة لمقرر طب الأطفال ستكون بدايته بتاريخ 1/2/2020م.

■ بخصوص مشكلة مذكرة علم الأمراض 1 تم احتساب 3 أسئلة للطلبة وعليه سيتم تعديل الدرجات والطلبة الذين لم يدخلوا الامتحان النصفي ستُضرب لهم الدرجة في مُعامل.

■ تم الإتفاق على تجميد بند إنذار الوحدات لهذا الفصل أيضًا، أما بخصوص كون الفصل بدون انذارات ، في هذا ننتظر ق

#مكتب_الشؤون_الطلابية

السلام عليكم
دكتورة سعاد شُقمان ما جتش اليوم بسبب وعكة صحية و أعتذرت ..
حتستأنف محاضراتها ابتداء من السبت القادم إن شاء الله

السلام عليكم ..

- محاضرات العملي لمادة PS142 حتبدأ من الأحد القادم بعون الله ، وتقسيمة القروبات حيعلقوها في القسم ..
وبالنسبة للمنهج ..حيلتزم بكتاب القسم في الإمتحانات..

- أما بالنسبة لمادة HS142 :

دكتورة هناء اليوم أخدت الحضور و حـتقعد تاخذ فيه في المحاضرات الجاية ..

- وبالنسبة للطلبة اللي عندهم مشاكل في درجات EL122 و EL123 كونوا مطمئنين واصبروا غير تفوت زحمة تنزيل الكلينك ، لأن الموضوع يبي خدمة ومش ساهل..

وفق الله الجميع.

السلام عليكم..

بالنسبة لعملي قسم البايو (BC141,BC142,BC243)..حيكون في القسم الجهة اليمنى (جيهة مكتب د.عبد الله بشين) نهاية الممر..
وحتبدأ معانا د.فهيمة النجار.. وحياخذوا الحضور..وعليه درجات..

وفق الله الجميع.

السلام عليكم ورحمة الله..

بالنسبة لحضور المحاضرات المعملية لقسم البايو عليهم درجات .. ويفترض كل طالب يلتزم بمجموعته..أي حد مجموعته تكون مخالفه للمجموعة اللي حضر فيها..حيلتغاله الحضور ولا كأنه حضر..❗

الطلبة اللي عندهم تضارب مع مواد ثانية ويبي يغير مجموعته..أو الطلبة النازحين في أماكن بعيدة وتناسبهم مجموعة غير المجموعة اللي اختاروها..أو اللي اختار مجموعته وطلعت 0 في المنظومة...
* اكتبوا طلب أنكم تبوا تنتقلوا من مجموعة لأخرى..وضروري إرفاق صورة من مواد السيمستر الحالي من المنظومة..من دونها لا يقبل الطلب..❗

وطبعا الأولوية حتكون للطلبة النازحين..من بعدهم اللي عندهم تضارب..

الكلام يشمل BC141,BC142,BC243..

التسليم حيكون عندي في مقر الإتحاد..من بكرة حنستلم الطلبات.. وآخر يوم ..الخميس باذن الله..
#NAWFAL
وفق الله الجميع.

السلام عليكم..

بالنسبة لقسم البايو..الأسبوع هذا مش حياخذوا الحضور بسبب الإنتقالات...
من الأسبوع القادم ضروري الإلتزام بالمجموعة وحياخذوا الحضور..

أما الطلبة اللي مايتمكنوش من الحضور "نهائيا" بسبب الحرب...حنقوللكم على يوم تقدموا فيه طلبات مرفقة بما يثبت ذلك..
وباذن الله نلغولهم درجة العملي..وتتوزع على باقي الدرجات..

وفق الله الجميع.

السلام عليكم..

بالنسبة لمادة BC142 قروب 5 حيكون يوم الثلاثاء...من الساعة 2:30 إلى 4:30..(مكانش موجود في الجدول)
يرجى الإلتزام بالمجموعة..

بكرة مش حنقدر نمشي للكلية...آخر فرصة يوم الخميس..الساعة 12 يتسكر موضوع الإنتقالات...

وفق الله الجميع.

السلام عليكم ..

بالنسبة للطلبة اللي سلموا طلبات.. للإنتقال من مجموعة لأخرى في المحاضرات العملية لقسم ال biochemistry..
يبدوا يداوموا في القروب الجديد اللي اختاروه..

مثلا طالب ، طلب انتقاله من قروب 1 إلى قروب 2 ..يبدأ يداوم في قروب 2..

وفق الله الجميع.

السلام عليكم..

بخصوص طلبات الإنتقالة تم قبولهم بالكامل...وأي طالب قدم طلب ايجي ياخذه باش يخش بيه (الإثنين..الإربعاء..الخميس حيتم تسليمهم) برضو تلقوني في الإتحاد..

حيكون فيه زوز محاضرات تعويضية في مقرر BC142 يوم الإربعاء والخميس القادمين..
- الإربعاء : من 12:30 إلى 2:30 في مدرج الإدريسي
- الخميس : من 10 إلى 12 في مدرج ابن النفيس

والطلبة اللي ماتمكنوش من حضور المحاضرة الأولى للعملي..حتكون فيه محاضرة تعويضية الأسبوع القادم لكل المقررات..حنبلغكم عليها..

برضو اللي ماتمكنوش من الحضور اليوم بسبب الزحمة..تقدروا تحضروا المحاضرات العملية يوم الإربعاء والخميس لمقررين BC141.BC243..نفس المنهج..

وفق الله الجميع.

الأسبوع القادم لا توجد محاضرات عملية لقسم البايو في جميع المقررات ما عدا :
BC142 "G4"
BC142 "G5"
BC243 "G2"
BC243 "G3"
حيعوضولكم محاضرات يوم الثلاثاء..لأن الثلاثاء القادم عطلة رسمية..وباقي القروبات off

والأسبوع اللي بعده ترجع المحاضرات طبيعية..

❗بالنسبة للطلبة اللي مايتمكنوش من الحضور نهائيا في العملي ..جيبولي طلب فيه اسمكم ورقم قيدكم والسبب..ومعاه إثبات (نزوح أو حرب) من المجلس البلدي أو شيخ محله..
وجيبوهملي في الإتحاد يوم الإثنين والإربعاء والخميس حنستلمهم منكم..
الطلب مهم جدا...من غيره ماتقدروش تخشوا للإمتحان النهائي..

وفق الله الجميع.