التسجيل لفصل خريف 2019
- يجب الضغط على ملخص الدرجات في حساب كل طالب حتى يم تحديث عدد الوحدات المنجزة تم ابلاغ ال
- توثيق و المعلومات في الجامعة لتعديل الحد الأعلى للوحدات على أن يصل ل 19 وحدة
- حسب قرار مجلس الكلية الالتزام بالمتطلبات الدراسية حسب اللائحة المعتمدة الخاصة بالدراسة و عدم السماح بالتجاوزات
- الحد الأعلى للفصل السابع (Preclinic) وحدة 21
تم تعديل درجات المراجعة الموضوعية للطلبة ماعدا درجات قسم علم الأمراض و قسم التشريح و سيتم التعديل فور استلام الدرجات
للفصل الأول سيتم الاعلان عن الامتحانات النصفية فور التأكد من توفر القاعات على أن تبدأ الامتحانات يوم 23/11

نسأل الله التوفيق للجميع

السلام عليكم..صباح الخير🙋‍♂️😂 ما شاء الله اليوم كلكم الفجر حاضر..وتلوموا فيا وقت قالوا بنفتحوا التنزيل😂
عالعموم..

- أولا :
التجاوز مافيش للسيمستر الحالي..وهذا قرار مجلس الكلية يعني كلام كل أعضاء المجلس...ما اتجيش تقعدوا تسبوا في صفحة الدراسة والإمتحانات وتطلع منكم ألفاظ غير لائقة...هو عبارة عن رسول..نقل الخبر عن مجلس الكلية..
وخليكم متفائلين مرات يفتحوه وتنزلوا يدوي..

- ثانيا :
الجداول أعتقد نزلوا وشفتوا موادكم وأمتى امتحاناتكم..
اللي عنده تضارب في جداول الإمتحانات ونزل مواده...هذا يعني أنه راضي بالتضارب..

- ثالثا :
قصة 19 وحدة وفيه اللي قالي مادام زادوا الوحدات معناها فيه تجاوز..
لا يا عزيزي...فيه اللي عنده مواد من غير تجاوز ويوصلوا ل 19 وأكثر..
توا أكيد اللي نزل مواده لقي حتى PS243 متاحه..يعني يقدر ينزلها...لو بينزلها حيوصلوا عدد وحداته ل 21 .. ولو أسقط ال EL123 حيولوا 19 وحدة..وهذه القصة.

وفق الله الجميع.

- تم تعديل المنظومة على أن يكون عدد الوحدات المسموح بها هذا الفصل 19 وحدة و 21 وحدة للفصل السابع و للطالب المتحصل على 75%معدل في الفصل السابق.

- تم الغاء متطلبات الفصل الأول للطلبة الذيت لم يدرسوا مواد الفصل الأول ( 120 و لغة عربية و فيزياء طبية )

- للطلبة المنقولين أو الاسنضافة الذين لم يدرسوا بعض متطلبات موادهم تعبئة التموذج المرفق بهذا الاعلان و تعبئته و تسليمه لدكتور طالرق جبريل يوم الخميس 14/11 و يوم الأحد 17/11

صباح الخير..

بالله لو فيه طلبة امشوا داروا طعن في الإنجليزي سوا 2 أو 3 يتواصلوا معي للضرورة.
@NWFL_98
وفق الله الجميع.

السلام عليكم..

النقطة هذه ماتخصناش خاااالص.

السلام عليكم ورحمة الله..
أسعد الله أوقاتكم..

- أولا :
الطلبة اللي قاعدتلهم مادة من الانترو وصفوا 1 مش حيقدروا ينزلوا 2 أو 3 إلا لما يصفوا الانترو..

مثلا..

لو حد قعدتله BC120..والسيم اللي فات دار تجاوز ونزل معاها BC141 ..وبرضو قعدتله BC120 وصفى BC141 ..مش حيقدر ينزل BC142 و BC243 إلا لما يصفي BC120..

وكذلك اللي قاعدتله BC120.. ومصفي BC141 و BC142 ..مش حيقدر ينزل BC243 إلا لما يصفي BC120..

لذلك BC120 تفتح BC141 ..و BC141 تفتح BC142 .. و BC142 تفتح BC243..(تم تغيير المتطلبات واعتماد اللائحة القديمة)..

- ثانيا :
بالنسبة للطلبة اللي نزلوا أقل من 12 وحدة 'وليس لديهم مواد متاحة'..سوف يتم إلغاء إنذار الوحدات..
أما إنذار المعدل سوف يحسب لهم..

- ثالثا :
الطلبة اللي خشوا اورال في الفسيو ودرجتهم ماتعدلتش على المنظومة..يمشوا بكرة يراجعوا قسم الدراسة والإمتحانات (د.نجوى)..

- رابعا :
أي طالب نزل مواده وراحوا أو ماتمكنش من تنزيل مواده ..يقدم طلب ويكتب فيه المواد اللي يبي ينزلهم ويرفعه للد.طارق (في قسم الميكرو) أو د.نجوى (في قسم الدراسة)..

- خامسا :
بالنسبة لمادتي EL122 و EL123 والمشاكل اللي صايرة فيهم..د.طارق قالي حاضر ..غير نفوت مشكلة التنزيل بس..كونوا هانيين..حاطكم في بالي

- سادسا :
الطلبة اللي قعدولهم مواد من الانترو ..أعتقد قبل الإعتصام فتحولكم تنزيل يدوي...اللي نزل يدوي خلاص اموركم طيبة..
أما اللي مانزلوش وقالولكم تمام..بروا للد.نجوى وقدمولها طلب تنزيل..القدام حتصيرلكم مشاكل للعلم..

وفق الله الجميع.

باختصار..هذا جدولنا

الإنذارات خلال الفصل الماضي

طبعا إدارة الكلية ماعندهاش الصلاحيات تلغي الإنذار منها ليها، يعني ماعندهم الAcess إنهم يحذفوا الإنذار
بالنسبة للسيمستر الماضي وحسب تعليمات رئيس الجامعة إنه بدون إنذارات، يعني اللي رسب وحصل إنذار السيمستر اللي فات حيتلغاله من المنظومة مباشرة لما المنظومة الرئيسية تعطي الأمر والشيء هذا مش معروف أمتى مادام الموظفين اللي في الجامعة مضربين

وبالنسبة للي صفوا حيلغوا تتابع الإنذارات زي ما طبيعي

#مكتب_الشؤون_الطلابية

السلام عليكم..

أي طالب قعدتله مادة من الانترو ضروري ينزلها على المنظومة أو يقدم طلب للد.نجوى..ضرووري..
لأن طلبات التنزيل اللي قدمتوهم قبل الاعتصام موجودات في مكتب ماجد..والسيد ماجد متضامن مع زملائه..لذلك مافيش كيف يوصلولهم..

#الخلاصة :
ماتنزلش المادة ماتخشش الإمتحان..

#ملاحظة :
د.نجوى يوم الإثنين حتتواجد في مكتبها..بكرة مش حتجي.

وفق الله الجميع.

صباح الخير..

الطلبة اللي مانزلوش BC120 (وأعتقد الأغلب) باذن الله فيه رأي..اقروا واستعدوا للإمتحان..

وبكرة ضروري تنزلوا باقي موادكم..

وفق الله الجميع.

السلام عليكم..

غدا د.نجوى عندها اجتماع...تلقوها متأخر شوية..

وفقكم الله.

السلام عليكم..

طبعا أمس تلاقيت مع د.خالد قدارة بخصوص مراسلة البايو (أسئلة النيوترشن)..وقالي أمس ردوا عليا القسم وقالولي أن الأسئلة مشروحة ومافيش شيء خارج الشيت..
عالعموم..
قالي مانقدر نجبر قسم أو دكتور أنهم يلتزموا بالشيت فقط...صح كان قرار في لجنة الأزمة ولكن يقترحوه على الأقسام..اللي يبي ياخذه باهي واللي مايبي حر..
وبالنسبة للأسئلة شرحهم النجار آخر محاضرة..
وفي الجديد بيننا وبينهم المرجع..
ولو شرحوا شيء برا الشيت احني ملزمين بيه..

ونأسف على التأخير..بس الإعتصام كان موقف كل شيء وهذا وين تحصلت على الرد..

وفق الله الجميع.

السلام عليكم ..

تم التنسيق للإعتصام وأعتقد كل شيء واضح.. المكان والزمان والمطالب..
لكن فيه نقطة غايبة على البعض إذا مش الكل..

أكيد فيه طلبة حيقولوا أمورنا طيبة وماعندناش مطالب وجدولنا كويس ومش مستحقين تجاوز و و و ..

الإعتصام هذا يعتبر نوعا ما "تحديد مصير"..وإذا ماقدرناش ناخذوا مطالبنا حاليا ..من الصعب ناخذوها القدام..وباش ناخذوا مطالبنا ضروري يكون العدد لا بأس بيه..

المطالب حيستفيد منها الجميع سوا توا ولا بعدين...التجاوزات إذا مافتحوهمش حاليا معاش تحلموا يفتحوهم..والجداول كذلك...وفوق من هذا العدوى حتنتقل إلى الأقسام ومعاش نقدروا ناخذوا أبسط حقوقنا منهم...لا المندوب ولا رئيس الإتحاد يقدر ياخذلك حقك بعدين..لذلك
خليكم كلمة واحدة واوقفوا مع بعض..لأن المطالب حيجي يوم وتستفيدوا منهم..
ودفعتي يمكن أكثر دفعة متضررة من قصة التجاوز والجداول والقدام حتضرروا من قصة الوحدات وتقعدوا في مشاكل ماليهاش حلول..

هذا كله وماتكلمناش على قصة إلغاء السيمستر...لأن لو تأخرنا في السيمستر هذا..اللي بعده شبه ملغي...
وأعتقد مش ناقصين (دفعة المفاضلة 6) سنة ضايعة علينا وزيدوها توا سيمستر على وشك إلغائه..ووضع البلاد مايطمنش..ديروا إحتياطاتكم من توا..

رجاءاً..خوذوا الأمر بجدية وتحملونا هالأسبوع...
الموضوع يبي إصرار وصبر..
وإن شاء الله نكونوا عند حسن ظنكم..

وفق الله الجميع.