شوي حجي قبل نصف السنة!

نصف السنة هي اختبار حقيقي، لمدى فهم الطالب ودراسته للمواد، وراح تعلمك شلون تدرس وتراجع فصلين وثلاثة وأربعة و ََتمتحن بيهم بيوم واحد (وزاري مصغر)

لكن..
نصف السنة مو قياس ابدا للوزاري، من هسة خلي هالشي ببالك، حتى لو مهما كانت درجاتك راح تكدر تجيب أعلى بالوزاري. وراح تعدلها مثل متريد خوش!

نصف السنة خلي كل طاقتك عليها اولا حتى تضمن دخولك للوزاري، وثانيا حتى تدرس المواد للوزاري وراح تمتحن بيهم وتضبطهم!

اما النقوصات، وغيرها من الأمور والتراكمات، هاي كلها راح تتتفرغلها بعد نصف السنة وراح تكملها على أتم وجه

خليك ريلاكس، وادرس شكد متكدر، اي حرف تقراه هسه وتمتحن بيه راح ينضبط، وراح يخفف عنك هواي بأيام المراجعة!

خلو تفكيركم هسة كله بنصف السنة، حتى تضبطون المواد وبنفس  تضمنون دخولكم للوزاري

اما موعد الوزاري، وشلون اخلص من التراكمات وغيرها هاي الأمور اتركها بعد نصف السنة إن شاء الله تنحل ❤️

بعد يوم و ٢١ ساعة للامتحانات نصف السنة.. الوزاري المصغر.. شدوا حيلكم ♥️

⠀

ابتعد عن ضوضاء العالم اجتهد وحافظ على مستقبلك مهما كانت القرارات صارمة ، حتماً ستنجح انت ، كن بطلاً ♥️

طريقُك الذي أعياكَ من التعب والإنهاك في السير به سَينتهي ذاتَ يَوم مڪللاً بنجاح يُنسيك ڪل دُموعك وألمك ولنْ تَتذڪر وقتها سوى إصرارك..

كيمياء التمهيدي

ماكو شي يجي بدون تعب، عبارة خلي تحتها الف خط تمام؟


تريد تنجح لازم تدرس وتتعب!
تريد تتفوق وتوصل لازم تدرس وتتعب!
تريد تكون فد شي مميز والك اسمك وثقلك لازم تدرس وتتعب!


وبالنهاية راح يروح تعب الدرس ويهون وتبقى النتيجة والإنجاز ❤️

الكورســــ الثانــــــــــــي

باجر إن شاء الله يبدي الدوام للفصل الثاني..


بداية جديدة، خلصتوا النصف الأول من مشووواركم ، وراح جزء كبير منه.. ووصلتوا للجزء الثاني.. كم نصيحة الكم مع بداية الفصل الثاني:

اولا، نصف السنة مو قياس ابدا للوزاري، ولا راح تكون قياس، خليها ببالك هالمعلومة دائما وامشي عليها، مجرد تاهلك تدخل وزاري خوش؟ فلا ينكسر واهسك ووو وتخلي درجاتها تأثر عليك .. ترا عادي ترسب بنصف السنة والنهائي تجيب ال٩٠ مثل الورد... وتاخذ ٥٠ وانت مضبط المادة افضل من ال١٠٠ وانت ما مضبطها، الوزاري اسهل واوضح والأمور تختلف جذريا فمن هسة ابد لا تضوج ولا تقهر نفسك على درجاتك.. اهم نقطة قريت المادة ودخلت الوزاري..

ثانيا ارجع بواهس قوي، وعزيمة أقوى، انت وصلت تقريبا للجزء الحساس، الجزء اللي ما يحتمل تسخيت ولا تضييع وقت ، ولا اي شي اخر، الدقيقة تفيدك كلش... لازم تنتبه اكثر واكثر لدراستك لان بوجهك للوزاري.

ثالثا لا تضيع اي امتحان بالفصل الثاني، مو تكول اني دخلت وزاري وخلص ليش امتحن، ترا المادة اللي تدرسها وتمتحن بيها من تجي بعدين تراجع راح تقلب رزق فقط... يعني لا تغيب عن أي امتحان امتحنها كللللها. بيها فائدة كبيره الك

رابعا ماكو طالب ما عنده تراكمات، خلي هالشي ببالك، الذكي اللي يدرسها ويخصص الها وقت وي دراسته واول بأول يخلص منها، اما غيره فيبقى يشكي ووو.. ويدمر نفسه.

خامسا لا تباوع لغيرك ووين وصل، عليك بنفسك فقط ما عليك بفلان راح يراجع، وفلان كمل مراجعة، فقط نفسك، ادرس وكمل نقوصاتك وبعدين ابدي راجع... ولو بعد وقت للحجي عن المراجعة.. لكن حتى تكون بالك.

وقتكم ثمين، كلكم تكدرون تلحكون، حتى اللي ما دارس حرف يكدر يبدي من هسه ويحقق شي... فقط ادرس وأبدي، وتخلى عن كلمة ماكو واهس، وماكو خلك، وبعدين وباقي وقت ♥️

معدلك يتحدد بدرجات الوزاري ، درجات نصف السنة لا تقدم ولا تأخر مجرد تساعدك تدخل وزاري ، لو تاخذ ٥٠ بنصف السنة وانت مضبط المادة ، افضل مما تجيب ١٠٠ وانت ما مضبطها... مو قياس ابدا ، فلا تحكم على نفسك من خلالها!

اهم شي تكون درست المواد زين ، درجاتك بنصف السنة ما تمثل مستواك ابدا!

تنويه:
تود وزارة التربية أن تُشير إلى أن قرار هيأة الرأي الأخير بشأن مادة اللغة الإنكليزية للصف السادس الإعدادي تضمّن تحديد عدد الوحدات الداخلة ضمن المنهج على أن يكون الحذف للوحدة السابعة كون الوحدة الثامنة للمراجعة، وبذلك يكون عدد الوحدات الداخلة 6 وحدات، مع خالص أمنياتنا لطلبتنا الأعزّة بدوام التوفيق والنجاح.

كريم السيّد

المُتحدّث الرسمي لوزارة التربية

17 شباط 2026

كُل العجب على طالب في آخر سنة له بالمدرسة وهو مقبل على حياة جامعية أخرى والفترة إلي بيها الآن ختام كل سنينه السابقة كلها، تفوقه في بعض الدروس بالابتدائية، التعب والمصاريف بالمتوسطة، الكراوي بالاعدادية والشلة والاصدقاء، التنافس بين الطلاب.

كأن كل سنين حياته تتجلى بهذه الفترة القليلة الفاصلة قبل الامتحانات الوزارية وهو مخلص وقته بين الانترنت والتخاذل وما الي واهس !

هو شنو هذا #الواهس؟ ينصنع؟ ينطلب دلفري؟ هذه مرحلة مصيرية المفروض من ساعات بزوق الشمس لساعات منتصف الليل يكون تفكيرك وجهدك منصب للدراسة

#حتى_لو وضعك مو زين ، لنفرض إنك انسان مريض ودتاخذ علاجك راح تتعالج ورا يوم يومين ؟ اكيد بعد فترة الى ان ياخذ العلاج مفعولة ويتجاوب مع الجهاز المناعي نفس الشي دراستك يحتاج وقت يلا تلاحظ النتيجة اذا انت حاليا مريض (عندك نقوصات وتراكمات)
كل شي بالتداريج ♥️♥️

#وتذكر :- الدراسة الشيء الوحيد الي ما راح يضرك مهما كان قرارك، عوف الدردشات واللطم وشوكت الحك ،
رمم نفسك من الداخل وخلي ثقتك بالله ثم بنفسك عالية وادرس بس ادرس بس ادرسسس

#الدراسة الشي الوحيد الي ما راح يضرك مهما كان قرارك هسه أو مستقبلاً
بس ادرس..

اللهم نسألك التوفيق والنجاح للطلاب 🤍🙏

.

﴿ وَأَن لَّيْسَ لِلْإِنسَانِ إِلَّا مَا سَعَىٰ ﴾

.

كل عام وأنتم بخير وصحة وسلامة يارب، الله يحفظكم واهاليكم ومن تحبون وإن شاء الله العيد القادَم محققين أحلامكم وطموحاتكم وواصلين احلى الكليات ❤️

❕#عاجل , رسمياً

تقرر اعتماد الدوام الرسمي ليوم #السبت وذلك لغرض استثمار الوقت المتاح وتعويض النقص الحاصل في الخطة الدراسية

وعليه نهيب بجميع إدارات المدارس والهيئات التدريسية والتعليمية الالتزام بالدوام يوم السبت والعمل على تنظيم الجداول الدراسية بالشكل الذي يضمن اكمال المنهج بأفضل صورة ممكنة على ان يتم متابعة هذا التوجيه من قبل السادة المديرين العامين للتربية لضمان تحقيقه بنسب إنجاز واقعية..

#عاجل

التربية توضح بان الدوام ليوم السبت يُعدّ تقديرياً بحسب حاجة كل مدرسة؛ إذ لا يشمل المدارس التي أتمّت مناهجها الدراسية