ممكن نوصف الكذب انو هو أڤيون، هو فعل سهل بدون ما نحسب عواقبه، يجنبنا التبرير ويترُك انطباع احنا نختاره ع المدى القصير، مُشكلته تبدأ ع المدى البعيد. هو شي يكسر روابطنا الاجتماعية و يقودنا لعُزلة وبُعد عن الاخرين.
اما ع المنظور الشخصي، حقيقة انو الكذب بعُمره ما راح يوصلنا لشي وانو احنا نعيش بِعبئ الصورة الخطأ الي نرسمها عن نفسنا، ويبعدنا اكثر عن الواقع وهذا يصعّب الحياة وما يساعدنا انو نتجاوز او نتأقلم تجاه الظروف الي نمُر بيها، هي فكرة لازم نفهمها ونخليها ببالنا.
انو الاشياء الخطأ الي نگولها تأثيرها واقِعي وحقيقي مو فقط فلسفي او اخلاقي، هي تحدد الطريقة الي الناس تشوفنا بيها، وتخلينا تحت ضغط توقُعاتهُم عنّا، واحيانا تحدد الطريقة الي نفكر بيها عن نفسنا، وكُلما كانت افكارنا ابعد عن واقعنا كُلما كلفنا هذا جُهد اكبر حتى نتأقلم ونتجاوزها.
بالنهاية، حتى نتجاوز جُزء كبير من مشاكلنا، لازم نتخلص من الاوهام الي نعتقدها عن نفسنا او نگولها، ونبدأ نتعامل وية حياتنا بدرجة من الواقعية والانضباط، نبتعد عن الخوف من افكار غيرنا او اثرهُم علينا، وما ننتظر حال جديد غير الي احنا نصنعه. ✨
كُل اسبوع امُر بمِزاجات مختلفة وافكار متنوعة تعتمد ع المُصادفات الي تحملها ايامي وبنهاية الاسبوع ونتيجة للي امُر بيه احاول اكتب جُزء من فهمي للحياة، جُزء ديتغيّر ويتطور كُل يوم وديستمر بكتابتي الكُم عنه.
دائماً اشوف الحياة إنعكاس لأفكارنا، كُلما نجحنا بالتعبير عنها واستكشفنا افكار اكثر كُلما توّلد عدنا الهام لافكار جديدة، توّسع منظورنا عن الحياة وقلّ خوفنا من الاختلاف.
التواصل هي وسيلة ضرورية للحماية من افكارنا المؤذية، لان دائماً حنتبادل فهم جديد وتكون عدنا القُدرة للتعبير وطرح افكارنا ومُلاحظة اثرها ع غيرنا.
اخيراً، بناءاً ع إهتماماتنا، رغباتنا، اهدافنا وافكارنا احنا دائماً ننتظر إلهام يقودنا للبحث اكثر، للتعبير و الانبهار، الحياة لمن تخلو مِن هالرغبة حتتحوّل لسجن، لازم نتجنب الوقوع بيه بتغذية اهتماماتنا اكثر. ✨
اليوم ماكو موضوع، حآخذ فترة راحة مؤقتاً.
شُكراً لوجودكُم كجُزء لطيف من الاسبوع 🫂
ونرجع ببداية الكورس الجديد بافكار اكثر ✨
شُكراً لوجودكُم كجُزء لطيف من الاسبوع 🫂
ونرجع ببداية الكورس الجديد بافكار اكثر ✨