Xodimlarning farzandlariga oliy ta’limga kirishda imtiyoz beruvchi tavsiyanomalar topshirildi

Ichki ishlar organlarida amalga oshirilayotgan islohotlar doirasida tizim xodimlarini ijtimoiy qo‘llab-quvvatlash, ularning oila a’zolari uchun munosib shart-sharoitlar yaratish borasida izchil ishlar olib borilmoqda.

Shu munosabat bilan Uchinchi mintaqaviy hudud 7-son tergov hibsxonasi hamda 30-son manzil-koloniyalarida xizmat olib borayotgan xodimlarning farzandlariga oliy ta’lim muassasalariga o‘qishga kirishda imtiyoz beruvchi tavsiyanomalar tantanali ravishda topshirildi.

Mazkur tavsiyanomalar O‘zbekiston Respublikasi Prezidenti, Vazirlar Mahkamasining tegishli qarorlari hamda Ichki ishlar vazirligining me’yoriy hujjatlariga muvofiq berildi.

Ushbu e’tibor va g‘amxo‘rlik tizim xodimlari hamda ularning oila a’zolarini har tomonlama qo‘llab-quvvatlash, yoshlarning sifatli ta’lim olishi va kelgusida Vatanga munosib xizmat qiladigan yetuk kadrlar bo‘lib voyaga yetishiga xizmat qiladi.

IIVJIED

Jazoni ijro etish tizimi xodimlari tomonidan bitiruvchi talabalar o‘rtasida targ‘ibot-tashviqot ishlari olib borilmoqda

Birinchi mintaqaviy hudud 44-son manzil-koloniyasida mavjud bo‘sh safdorlik lavozimlarini malakali kadrlar bilan jamlash maqsadida oliy ta’lim muassasalarida targ‘ibot-tashviqot ishlari davom ettirilmoqda.

Navbatdagi uchrashuv Islom Karimov nomidagi Olmaliq davlat texnika institutining mashinasozlik va muhandislik yo‘nalishlarida tahsil olayotgan bitiruvchi talabalar bilan tashkil etildi.

Tadbir davomida ishtirokchilarga ichki ishlar organlari xizmatiga qabul qilish tartibi, nomzodlarga qo‘yiladigan talablar, hujjatlarni rasmiylashtirish jarayonlari, tizimda yaratilgan xizmat va ijtimoiy sharoitlar, shuningdek, xodimlar uchun belgilangan imtiyozlar haqida batafsil ma’lumotlar berildi.

Shuningdek, talabalarni qiziqtirgan savollarga javob qaytarilib, xizmat faoliyatining o‘ziga xos jihatlari yuzasidan tegishli tushuntirishlar berildi.

IIVJIED

Bugun "Yoshlar oyligi" doirasida, “Yoshlar kuni” munosabati bilan, Guliston tumani “Chortoq” mahallasida joylashgan O‘zbekiston Respublikasi Ichki Ishlar vazirligi huzuridagi Jazoni ijro etish departamenti, Uchinchi mintaqaviy 40-sonli manzil koloniyasida jazo muddatini o‘tayotgan yosh mahkumlarni axloqan tarbiyalash, ularni ozodlikka tayyorlash va ijtimoiy moslashtirish maqsadida “Rahbar va yoshlar uchrashuvi” tashkil etildi.

Unda Sirdaryo viloyati Yoshlar ishlari boshqarmasi boshlig‘i Boburjon Akramov ishtirok etib, yosh mahkumlar bilan samimiy muloqot qildi.

Uchrashuvda yoshlarning tashabbus va g‘oyalarini qo‘llab-quvvatlash hamda kelajak rejalari haqida fikr almashildi. Shuningdek, yoshlar tomonidan berilgan savollarga batafsil javob berildi.

Yoshlar tomonidan kelib tushgan 20ga yaqin taklif va murojaatlar bo'yicha aniq chora-tadbirlar belgilab olindi.

Yakunda jazo muddatini o‘tayotgan yoshlar uchun badiiy kitoblar to'plamlari sovg'a qilindi.

IIVJIED

Giyohvandlikka qarshi kurash – sog‘lom jamiyat garovi

Birinchi mintaqaviy hudud 21-son Jazoni ijro etish koloniyasida mahkumalar o‘rtasida sog‘lom turmush tarzini targ‘ib qilish, giyohvandlik bilan bog‘liq jinoyatlarning oldini olish hamda huquqiy ong va madaniyatni yuksaltirish maqsadida “Giyohvandlik – millat genofondiga tahdid va unga yangi yechimlar” mavzusida profilaktik tadbir tashkil etildi.

Tadbirda O‘zbekiston Respublikasi Oliy sudi sudyasi A.A. Akramov, Jinoyat ishlari bo‘yicha Zangiota tumani sudi sudyalari B. Sultonov va A. Xamidov hamda sud raisi D. Tilavov ishtirok etdilar.

Uchrashuv davomida giyohvandlikning inson salomatligi va jamiyat taraqqiyotiga salbiy ta’siri, ushbu turdagi jinoyatlarning kelib chiqish sabablari hamda oqibatlari yuzasidan atroflicha ma’lumotlar berildi.

Mazkur tadbir mahkumalarning huquqiy bilimlarini oshirish, dunyoqarashini kengaytirish hamda kelgusida qayta jinoyat sodir etishning oldini olishga xizmat qilishi bilan ahamiyatli bo‘ldi.

IIVJIED