جيت نسجل في دورات اونلين و حبيت نقراوهم انا و اختي مع بعض
قاتلي صاحبتهم انو كل وحدة تسجل وحدها و تخلص وحدها

هدي منطقية ؟ يعني انا نكون نتفرج فالبيسي نغطي على اختي نقولها اخرجي متشوفيش و متسمعيش؟

اوكي تبارطاجي مع ناس دورة مكاش لي يقبلها بصح مريحين كيف كيف تاني منقراوش مع بعض ؟

اني ساهرة نقرا للصباح و دايرين تحدي بيناتنا نقراو فالمييت
لي يحب ينظم يا مرحبا
http://meet.google.com/ruy-wroe-goj

🌸To-Do List : Day 14
🌍 جغرافيا :
▫️ حفظ درس : حفظ درس اشكالية التقدم و التخلف (الجزء1)
▫️حفظ 10 مصطلحات
⚗️ الفيزياء :
▫️حل 3 تمارين حول دراسة حركة الكواكب والأقمار
▫️مراجعة الملخص
📉 الرياضيات
▫️حل 2 دوال أسية و 2 دوال لوغاريتمية
▫️التدرب على التكاملات
▫️مراجعة الملخصات

اكملوا المهام كامل قبل منتصف الليل … وقولولي في التعليقات شكون كملهم 🔥
نختارو نجم اليوم لي يقدر يكمل كلش، بشرط يحط قائمة مهامو بلي كملها😎🤝🏻
بالتوفيق جميعا، دعواتكم 🤍

متابعة للصفحة ليصلكم كل جديد، درك نحط الملخصات ادخلو شوفوهم 💕

https://www.facebook.com/share/1CtyohH975/

https://www.instagram.com/dr_smileena?igsh=ZGVyNnVwMXAweHps

سلاااام جيت اليوم نعطيكم معلومة ف احتمالات مهمة جدا و ركزوا عليها :
الفرق بين مختلفة و مختلفة مثنى مثنى
نفترض صندوقًا فيه:
3 كريات حمراء 🔴
2 كريات زرقاء 🔵
1 كرة خضراء 🟢
ونسحب 3 كريات.
1️⃣ سحب كريات مختلفة
المعنى: ليست كلها من نفس اللون.
أي يجب أن يوجد على الأقل لونان مختلفان.
✔ التكرار مسموح.
أمثلة مقبولة✅
🔴🔴🔵
🔵🔵🔴
🔴🔴🟢
🔴🔵🔵
🔵🔵🟢
كل هذه مختلفة لأن الألوان ليست كلها نفسها.
غير مقبول❌
🔴🔴🔴
🔵🔵🔵
لأن كل الكريات من نفس اللون.
إذن:
مختلفة = على الأقل لونان
2️⃣ سحب كريات مختلفة مثنى مثنى
المعنى: كل كرة بلون مختلف عن الأخرى.
✔ لا يسمح بأي تكرار.
مثال صحيح
🔴🔵🟢
أمثلة مرفوضة
🔴🔴🔵
🔵🔵🔴
🔴🔴🔴
لأن هناك تكرار لون.
إذن:
مختلفة مثنى مثنى = كل الألوان مختلفة
الفرق
مختلفة =يمنع فقط أن تكون كلها نفس اللون
مختلفة مثنى مثنى =يمنع أي تكرار
مثال بالأرقام
بدل الألوان نضع أرقامًا:
مختلفة
(2 ، 2 ، 5) ✔ مقبولة
لأن الأعداد ليست كلها نفسها.
مختلفة مثنى مثنى
(2 ، 2 ، 5) ❌ مرفوضة
لأن 2 تكررت.
✔ المثال الصحيح: (2 ، 4 ، 5)
الخلاصة السريعة
مختلفة → يوجد على الأقل عنصران مختلفان
مختلفة مثنى مثنى → كل العناصر مختلفة

علاه مكاش تحدي حفظ جيولوجي 😔💔

هاني جيت لاتقولو ماجات

كيراكم مع الباك

ماما قاتلي بالسيف اجي معايا للدار مانك راح تتوحدي كاين طريقة باش مانروحش 🤓

من قلب الحدث
قريب تكمل العطلة وماقريت والو

نحاول النجاة 😞🤌🏻
اجو قولولي كاش مخططات لهذي السمانة؟

شلقمتني السعادة كي عرفت اليوم الاحد، كنت حاسبتها الاثنين 😍😍
يوم إضافي من حيث لا ادري 🥹🔥

رح نظم روحي و ندير برنامج مضبوط و تو دو ليست يومية معمرة شوية بزاف
تنظمو ليا؟ كل واحد يكتب واش لازم يكمل فالسمانة هدي

الليلة فيها سهرة مع الادمن حنين❤️🤌🏻لي يحب يشارك معانا في السهرة يبان هنا
منبعد نفتحلكم مييت و للامام😔💗
شحال توحشتكم و توحشت نقراو كيف كيف
نبداو بعد صلاة العشاء باذنه تعالىيعني جوايه
9:30

ابعثو تو دو ليست تاعكم هنا 👇🏻😾📝

لينك الميتت تع السهرة🤌🏻💕اجتمعو فيه حتى تلحق 9:30نبداو قع مع بعض

https://meet.google.com/qic-qywn-frt

عندي قصة في تحدي البكالوريا زوج بكالوريات و لله الحمد وصلت وين حابة 👩🏻‍⚕️
و نهدرها هنا نحفز أكثر من الف واحد فالمجموعات هذي لانو انا تاني فات عليا هاد الوقت و انا حاصلة كيفكم

مع اجتهادي في المسار الجامعي و شغفي في التخصص اني وعدت نفسي نخليها لكاش نهار و نحكيها في حصة تلفزيونية باذن الله اذا كتب ربي. بعد مانكون وصلت وين حابة في مجالي، ترقبوا عدد تلفزيوني من حصة علمتني الحياة بإذن الله😁❣️

يا خاوتي الوقت هذا راه هو الكنز تع العام صدقوني. اياكم و اياكم و اياكم تقولو راح الحال بالعكس يكفيك و يوفيك
و اعرف بزاف بزاف شكون تصاحب، لانو المصاحبة تقدر تكتسب فيها الطاقة الايجابية تقدر تتعمر بالطاقة السلبية. حاوط نفسك بناس حابة تنجح و تسعى و ماتتعبش تلقى روحك وليت كيفهم
هاد الايام ركز على نفسيتك، ابقى متفائل، اتفرج فيديوهات تحفيزية و فيديوهات مليانة طاقة و شغف، اتفرج على ناس نجحو و ناس وصلت لاحلام راكم حابينها. حاب الطب ؟ شوف طلبة الطب و دكاترة كبار. حاب التعليم ؟ شوف الاساتذة و الدكاترة الجامعيين. حاب الاختراع و نازا و و ؟ شوف علماء جزائريين وصلو.
جامي تسمع لهدرة المجتمع على القراية و لي قرا ما عندو ما دار. القراية ديرلك العز
حاجة اساسية، الثقة في الله الثقة في الله الثقة في الله والله تحير كيفاه ربي يسهلك و يكتبلك واش تتمنى و يعوضك عوض ينسيك تعب و مشقة الطريق

خوتي اسعاو، و الله احلامكم تستحق و يهون التعب على جالها ❣️

نقطة هدي نسيت مهدرتهاش
" نقدر نلحق؟ زعما نوصل؟ زعما نكمل ؟ اني مكمل بروغرام، زعما ندي معدل ؟ نقدر نوصل تخصص هدا ؟ "

يعني لكان نقولك توصل تكمل تقرا و لكان نجي نقولك متقدرش تدبرس و تندب ؟ رأيي او رأي غيري في واش يهم ؟

نوض تقرا و لا نوضي تقراي و بركاو تمسخير هدا، وقت لي تسقسي فيه و تستنا لي يتكرم يجاوبك كان راك درت مخطط و بديت تقرا

تتعب و تتكل على ربي يوفقك و يسهلك و يكتبلك ما فيه الخير و الصلاح ليك
كيما ممكن الخير في انك توصل ممكن الخير في انك ماتوصلش
بصح في كلتا الحالتين مطالب بالسعي و فقط و النتائج بيد ربي

انا جبت باك لول 14، و قلت ظلموني فالتصحيح و معرف واش و غاضتني صحاباتي وصلو وين حابين و انا لالا نعاود فالباك
في وسط العام أدركت انو الخير كان في انني مانوصلش هداك العام
أدركت انو التأخير هذا فيه حكمة
في هداك العام تاع باك ليبر درت حجاب شرعي، وعيت و كبرت و رزنت. وليت نقول الحمدلله ماوصلتش العام الاول، الحمدلله فرحتي تأخرت باه جات اكبر
مديت طاقتي و عرفت قدراتي وين توصل و واش نقدر ندير . لدرجة درك كي نتعب نتفكر ااي حنين تشفاي شحال تعبتي باه تلحقي هنا؟ الباك ليبر مش كامل ناس توصل كي تفوته و هكك وصلتي و جبتي مليح و دخلتي تخصص لي حابة
درك علاه نزدم انا ديركت منخافش؟ نقدر و علبالي نقدر خاطر قدرت من قبل
نقرا دونثار، نقري طلبة، نعاونكم هنا، فتحت مشروع
مانسميش روحي ناجحة و واصلة بصح الحمدلله يا رب قاعدة نسعى برك مام منشوفش نتائج، خسرت بزاف دراهم و خسرت بزاف ناس و تعبت و مرضت و و و
بصح نورمال، ربي قالي نسعى باه يعطيني و انا راني نسعى و ربي رايح يسهلي ما فيه الخير ليا

اسعاااااو و الله راح تكتبو قصة نجاح تبقالكم فالذاكرة للأبد ❤️

كي تنوض ضرسة يتوبو 😌
خويا طبيب، حرب باردة بيناتنا شكون خير دونثار و لا ميدسين و يظل يقولي اا خدمة تاع بلومبي و و
نهار وجعتو ضرسة جا ليا : حنين تعيشي واش ندير، اي توجع و الله مقدرت، وش نديرلها، علاه اي توجع، وش بيها

انا بي لايك : نبغي ربي يخلص و عينيا تشوف و ها لالالااااا🤣

نوضو تقراو 🤌🏻💗
اخدمو ع المعدل ومنبعد التخصص ساهل وفقكم الله