من فترة كنت ناشر بكروب "اقرأ وارتقِ" إنو أي حدا حابب يساهم، سواء بمبلغ مالي أو بمصاحف أو كتب دينية .. يتواصل معي.

والحمدلله ، أهل الخير ما قصّروا أبداً ، وتجمّع معنا مبلغ منيح نوعاً ما .. بس القصة الحقيقية بلّشت من هون ⬇

في شخص تواصل معي وقالّي .. أنا راح ابعثلك كرتونة فيها مصاحف وكتب دينية .. وفعلاً وصلت الكرتونة وكان فيها تقريباً ٤٠ مصحف ، ومعهم كتب توحيد وكتب مثل "حصن المسلم" وكتب خاصة بالأخوات.

بس اللي صار بعد هيك كان أعمق بكثير .. في رفيقي ، أخوه مستشهد من ٤ سنين تقريباً .. وحكالي إنه شافه بالمنام ، وطلب منه يوزّع قرآن عن روحه .. بس هو وضعه المادي ما بيسمح.

وقتها خبرته شو صار معي .. عن المصاحف اللي إجت بدون ترتيب .. بعدين قلّي "والله أنا شفت هيك بالمنام .. وكنت محتار شو أعمل."
بهاللحظة .. حسّيت إنه الموضوع مش صدفة أبداً والله .

سبحان الله .. كيف ربنا بيرتّب الأمور بطريقة ما بتخطر عبالنا .. شخص بده يعمل خير ومش قادر .. وشخص ثاني عم يبعث مصاحف بدون ما يعرف لمين راح توصل .. وبالنهاية .. الخير بيوصل لمكانه.

يمكن أنت بتفكّر إنه اللي عم تعمله صغير .. بس عند ربنا ممكن يكون هو السبب بشي كبير جداً .. آية ، مصحف ، كتاب .. يمكن يكون سبب بنور بقبر حدا .. أو هِداية إنسان.

فلا تستهين بأي عمل خير .. يمكن دعوة من قلب مكلوم أو حزين أو حائر تغيّر حياتك كلّيّاً .. ويمكن صدقة بسيطة تكون سبب نجاتك .
سبحانك يا رب .. كيف بتجمع القلوب عالخير .. وكيف بتوصل الأرزاق لمحلها ..

واللي تعلّمته من هالقصة .. إنه الخير إذا كان بنيّة صادقة ، ربنا بيكمّله على أكمل وجه ، فإذا إجتك فرصة تعمل خير ، لا تتردّد نهائياً .. يمكن تكون أنت السبب بشيء أعظم بكثير مما بتتخيّل .🤍

صلّوا على من لا عقيدة لنا إلا عقيدتهُ

ولا شريعة لنا إلا شريعتهُ 💛🌷.

بتعرف هالإحساس يلي بيخلّيك تقول: 🔖لسّا عم بغلط .. لما بوقّف ذنوب ببلّش أصلّي🔖؟

هالفكرة تحديدًا هي يلي عم تبعّدك .. وليس العكس .. ولا حدا فينا كامل ، وكلنا منغلط ، بس الفرق الحقيقي إنّك ما تترك الصلاة بسبب ذنبك.

بالعكس ، صلّي وأنت عم تغلط .. صلّي وأنت تايه .. صلّي حتى لو حاسس حالك ما بتستاهل الوقوف بين يدي الله ، الصلاة مش للكاملين .. الصلاة نجاة للمكسورين ، هي الباب يلي ربنا تاركه مفتوح ، مهما بعدت عنه.

وما تخلّي حالك ترتاح لفكرة 🔖قلبي نظيف🔖.. القلب بينضف فعلاً لما تقرّب من ربك ، لمّا اتوقّف بين يديه ، لمّا تحاول حتى لو عم توقع كل يوم.

وصدقني ..
يلي عم يصلّي وعم يجاهد حاله ، مش مثل يلي ترك الصّلاة واستسلم.

بلّش بالصّلاة .. حتى لو كل شيء فيك عم يقول إنّك مش جاهز .. ما حدا بيكون جاهز .. بس يلي بيبلّش هو يلي بيوصل .