فيصير مثل هذا المنظر.

هاي الصورة بالغلط انشمرت من الاستوديو مالتي

فيكول النابغة، انه الحيوان هذا وقرونه بداخل الجلب، صارت كأنّها "سفّود شَربٍ" والي هو الشيش الي يستخدموه ناس كاعدين يُشربون ويشوون ويتونسون. وهذا الشيش نسوه على المُتفأد مكان النار

فالحمدُ لله الذي يُرينا بيان الشعر في أحداث الحياة اليومية 🙃

كلمة المُفتأد تعني مكان الشوي، نسمّيها بالعامية المنقلة.

بس يعني لمّا تدور على جذر "فأد" تلكى منها كلمة فؤاد، الي تطلق على القلب.

يكولون لأنّ القلب سريع الاشتعال والتوقّد.

ولهذا تجد دائما آيات التثبيت بالقرآن تستعمل كلمة فؤاد

وَقَالَ الَّذِينَ كَفَرُوا لَوْلَا نُزِّلَ عَلَيْهِ الْقُرْآنُ جُمْلَةً وَاحِدَةً ۚ كَذَٰلِكَ لِنُثَبِّتَ بِهِ فُؤَادَكَ ۖ وَرَتَّلْنَاهُ تَرْتِيلًا


وَكُلًّا نَّقُصُّ عَلَيْكَ مِنْ أَنبَاءِ الرُّسُلِ مَا نُثَبِّتُ بِهِ فُؤَادَكَ ۚ وَجَاءَكَ فِي هَـٰذِهِ الْحَقُّ وَمَوْعِظَةٌ وَذِكْرَىٰ لِلْمُؤْمِنِينَ

مرات اتحسَّر مدرست العربية وصرت مدرّسها 😞

Continous partial participation

شرحتُ للطلاب خلال أحد المحاضرة الطبيِّة أمرًا، وحالما مهدَّتُ له، خدمةً لأمرٍ كنتُ أشرحه، سافر عقلي بعيدًا، واضطررت لايقاف التسجيل.

مختصر هذه البلوى التي خطرت على بالي، أنَّ العقلَ يُسيطر على اجزاءه، يهدِّئها ويشذِّبها، ويقلِّل من اندفاعها، فإذا أُصيبَ العقل، قلَّ هذا المفعول المهدِّئ، فزادت الأجزاء تهورًا وحِدِّة، وخرجت عن السيطرة، وصارت تنقبضُ من غير ما يهدِّئها، فلهذا تجدُ أطرافًا متصلِّبة عند من أُصيبَ بالجلطة الدماغية.


"The negative inhibition is the norm in the brain, when there’s a brain lesion, we lose the negative inhibition, we get more tight, more spasmic reflexes"

أصبحتُ أفكِّر بمعنى "عقل" أصلًا! العرب، إن شئتَ فتصدِّق، تبتكر المعاني من مشاق حياتها اليومية، فهم "يعقلون" البعير ويربطون أطرافه، حتّى لا يضيع منهم إذا انشغلوا عنه، وفي الحديث "اعقلها وتوكَّل"

العرب سمَّت العقل عقلًا، لأنَّه "يعقل" ويمنع صاحبه عن الخوض فيما يسوؤه، ويحجزه عن الهلكة، ويحبسه عن الخطأ!

وكذلك ترى في زيّ الخليجيين "العقال" ما يمنعُ هندامهم من الميلان!

واستعملوا "الحِجر" للعقل، لكنّها لم تشِع كصاحبتها، فالحِجر، هو النهي، تذكرون الحِجر الصحي فترة كورونا؟ كانوا ينهون الناس عن الخروج. وهو يحجر صاحبه عن ارتكاب الخطا، أما قرأت قوله تعالى: "هل في ذلك قسمٌ لذي حِجر" أي لذي عقل ولب.

ولعلَّ تلك الفتاة التي تُسمَّى بـ "نُهى" لا تدري أنّ اسمها كان محاولة من العرب لمدح الدماغ من الخارج، وما يصدق من وصفٍ له من الداخل! أتدري نُهى، أنَّ العقل "ينهى" صاحبه عن الزلل؟!

"إِنَّ فِي ذَلِكَ لَآيَاتٍ لِّأُوْلِي النُّهَى"

أحب أتعلَّم فنون التلميح، وأكثر بيت يضحكني تلميحه هو بيت أبي الطيب المتنبي.

دعاه عضد الدولة، ملك منطقة إلى زيارته ببلاد فارس، ويعني المتنبي ميفوِّت هاي الفرصة، ملك أكيد رح يكرمه.

فراحله ويبدو هو بمنطقة قريبة من شيراز وعجبته المناظر الطبيعية مالتها بالطريق فكتب قصيدة بديعة "مغاني الشعب"

المهم ديمدح طبيعة ايران، ويتشكَّى من الغربة أنّه عربي وغريب بالقصيدة مالته، ويوصف الاشجار الحلوة الي تنقّط ندى على حصانه ومنظر شاعري.

بس شلون رح يوظف هذا بشي يفيده؟ يكله للملك: تدري هاي الأشجار شكد حلوة؟ من فتت جواها، صارت تغطيني من أشعة الشمس، والشمس تنضرب بالأوراق مال الشجر، فينعكس عليَّ وعلى حصاني ظلّ هاي الاوراق، الي كأنّها دنانير مدورة، بس مشكلتها ما تنلزم بالأيد.

"وألقى الشرقُ منها في ثيابي
دنانيرًا تفرُّ من البنانِ"

فعضد الدولة أخذته الحميِّة وكالّه والله لأقرَّنها في يدك، يعني رح انطيك دنانير تثبت بأيدك هلمرَّة 😂😂😂

الشرق: الشمس
البنان: اصابع اليد.

أعتقد أنَّك إذا تريد تصير منتج لازم تتزوَّج.

واحدة من أيسر المنافع، هو أنّ منشوراتي بكل مكان بشبكات التواصل بعد الزواج قلَّت.

فمثلًا قبل لو أشوف شي يضحِّكني أو يضحِّك ناس يمّرون بنفس تجربتي، احطّه بستوري 24 ساعة، وأعتقد هذا الشي بمثابة ضربة للشغل المنتج الي تريد تسوِّيه خلال ذاك اليوم بفد نسبة 20%

أمّا هسه، تعليق ضحكني؟ ألتفت لزوجتي وأكللهيا، ميطوِّل ثواني، متحتاج تكتب تعليق منمّق عليه هم. مرات تضحِّك، وصح مرات تطلع الشغلة متضّحك، بس حتى بالانستا لما تنشر هلشي تكتشفه بعد ساعات!

وإذا عندي آراء حتنفهم غلط إذا انكالت بصوت عالي، عادي تفهم زوجتي السياق، مو مثل طلاب المرحلة الي يصعدوني ترند لما أسلّط عليهم لساني.

وصرت هذا الرجال الجبير الي ميحب يدز رسائل، ولولا طلابي جان هسه عندي بس واتساب، وادز بيه صور جمعة مباركة ومعايدات للكرايب وأعيش حياة كرايبكم الستيني الي يحجي بالطقس والشوارع، الي صدكوني طلعت أحلى شي!

أكو مقولات موجودة بحياتنا هواية، ومحد يكدر يكذّبها حتّى لو كانت خطأ.

أظلم ساعة هي الي تسبق الفجر، تُقال كثيرًا، هل هي صحيحة دائمًا؟ لا مو شرط، حرفيا ممكن أكو أوقات مظلمة أكثر من قبل ساعة الفجر. ومعناها المجازي ممكن يكون خطأ أيضًا، عادي يمكن الدنيا الي تعيش بيها، وأحوالك تبقى ظلام

كذلك مثلًا "العميل دائمًا على حق" لو كنت تشتغل بمكان بيه احتكاك مع العملاء والزبائن، رح تعرف أنّ كثير من الأحيان هاي العبارة خطأ.

الأمثلة السابقة رغم أنّها مو حقيقية بالكامل، بس مرّات تساعدنا نمشّي حياتنا، هواية ناس يبقون يتفائلون لمّا الواحد يذكّرهم بظلام الساعة الأخيرة قبل الفجر، وهواية موظّفين ومدراء عمل ممكن يتحمّلون سخافات عملاء بسبب هاي المقولة.

الفكرة الي نتأسّى بيها بحيث تخلّينا نتصرّف بشكل ينقذ الوضع مو شرط تكون صحيحة، بس هي تؤدّي الغرض المفيد منها.

لمّا قريت هاي الفكرة من كتاب سكوت آدامز " Reframe" صفنت شوية: لعد شلون لو كانت الفكرة الي تخلّيك تتأسّى هي فعلًا فكرة صحيحة 100%؟ شكد رح تكون قويّة وتخلّيك تتصرّف صح، وتتوقّع نتائج أحسن، وتبقى متفائل بكل الظروف؟

بس ابحث بكلمة "وعد الله" بالقرآن الكريم وشوف شكد أكو من هاي الأفكار، أو خذ وقت شوية لتدبّر سورة واحدة ورح تكدر تلكى مئات الأفكار الصحيحة إلّي لو تظل تتأسّى بيها تتغيّر طريقة تصرّفاتك للأحسن، ويمكن لو تبقى فكرة وحدة بس منها ببالك، هي تكون الي تغيّر حياتك.

تصَّفحتُ صدفة ملفًا كنتُ قد أعددته في الكسور، ويتداوله الطلاب فيما بينهم، فكان الفزع.

كان هناك طالبٌ أخذه حرصه أن يكتبُ بخطِّ اليد، ما أقوله في الفيديو على كلّ صفحة تقريبًا، فلا يبلغ مبلغه إلّا الرقيب العتيد في سورة قاف.

تذكرتُ كل كلمة قلتها في ذلك الفيديو بسبب ملاحظاته، أقرأ فأفزع: ماذا لو قلتُ شيئًا خاطئًا فتداولوه عنِّي!

بلغ بي الهوس أن ما تركتُ الملف إلّا وقد تصفَّحته بالكامل، وتأكَّدت أنَّ الصواب غالبه، وقد كان يبلغ بي الهوس مبلغًا فأتصفح اخوة هذا الملف، لولا أن هوَّنت أمر هذه الدنيا، وتذكرتُ ما هو أدعى للهوس، وحفظ اللسان وكفِّه في حديثه صلّى الله عليه وآله وسلم:

"إن الرجل ليتكلم بالكلمة من رضوان الله تعالى ما يظن أن تبلغ ما بلغت، يكتب الله له بها رضوانه إلى يوم يلقاه. وإن الرجل ليتكلم بالكلمة من سخط الله ما يظن أن تبلغ ما بلغت، يكتب الله عليه بها سخطه إلى يوم يلقاه"