شاعری دی وسه متی تُرِ کاری بگرم
ار بناره کتمه ، ویر ار هُماری بگرم

تا چَنی چو بِلبِل اَر سویک ِ قفس بِنالِنِم
مِه بچم هر چو قِلا،دُم قاره قاری بگرم

دارِ سیفی که خدا دامَسه بی دردِسره
مه بِچم بوشمیه بی ، پلپِ چناری بگرم

کس وَ سَرکیشی خَریوی چو مِنِ لیوه نمای
مه گَنِم گُم کَم و ری کورَه دیاری بگرم

ایسه که مردم ِ ایره مِنانه گِرَک نیه
مه بومه توز و بچم ،کهنه مِزاری بگرم

لانه شیطانی فلک بستیسه بخت ِ مِنا
کویچه ار کویچَمه موره تا گه ماری بگرم

بیستون،دنگ مه نمشتوی هنا رس هو نیه
مَر خَوَر مِردن ِ فرهاد ا ِ اناری بگرم

اِ گُلام ِ گیژِ دنیا ، سَرم آورده دِرِر
تا قَپالی نویر اَرا بی چئم و چاری بگرم

#غریب_دلفانی

ساقی نامه لکی

#غریب_دلفانی (استاد حسین نظریان)

@Golvani_lak

ساقی نامه لکی

هم خم عشقت هت و دامی هرس
ساقی سرمس تو و دادم برس

ساقی سرمس مه چمه دس بوری
دس بیه دسما و و سرمس بوری

درد و بلات ار لش بیمار مه
ار سر بی سای سر اوسار مه

آگر آگر پرس کافرم
هیزگر و چوپی بکه تا هیز گرم

جام پر اژ باده بن ار رو دست
هم و هشاره کل چ ءم مست

هیزگر و خر بار و بچرخ و بخن
خر بیه دامان و بلوری بژن

چرخ بیه دور کراست و ناز
سازنه و بازنه باره نماز

ساقی سرمس منه خر جام تو
نام علی, نام حق ار نام تو

چءم تونو آهو ا یه شیویه
کاس لس ترک مس لیویه

خم یخه مه گرتیه کاری بگه
چءمه ریم هم تو هاواری بکه

ولگ وهارم که و زمسان هتم
مانگ بلنگ بیم و اژ آسمان کتم

گل گلی ا یاد مه جامی بگر
غوطه بیر عشق و گلامی بگر

ریشی تاک ا دسه مه تاسیه
خون انگور ار مل مه ماسیه

هم مسم ار کشتن دنیا زلم
خون تون و خون انگور ا ملم

مه گنمم آو رو آدم برم
باخ موم کشتیه تاسو کرم

هم لولت بار و لوم تر بکه
اور کرم بار و توم سر بکه

بوری و ا اور شرر باره بار
عین وهار ار لچ حشکم بوار

مه کر شاه بیم و ا شایی کتم
ار در مالت و گدایی هتم

وخت گل و سوزه چنینه وری
کوه و در و دشت رنگینه وری

آگر اژ ای عالم نامرده بن
پور دل ای سر پر درده بن

جام شراو تو ریا مشکنه
زور خدایه که پیا مشکنه

نورحق از جام تونه منجلی
ناد علیا علیا یا علی

سر مگو راز خدایه بپوش
جام میه معدن اسراره نوش

هم تو وره مردنم اژ نفخ سور
چرکنم اه جام شراوم بشور

لرزش پال تو منه مرمنه
عشق و خرورم و یکا مشکنه

جام شراو تو می وحدته
ار پره از حالیه از کثرته

جام تو اژ آیه وحدت پره
چءم مه اژ نور جمالت زره

کثرت و وحدت چیه اصل تونی
داریه زءمه که و دسته منی

تینی یه قطره شراو تونم
چءمه ریه لطف و ثواو تونم

هرکه و یاری تو تیری شنه
چوار نماز از لش دنیا خونه

سرمه خرت ذکر تو ذکر حقه
داریه زءم دلله شق شقه

هم حق وحوقه,شوه شوره وره
وخت خر آوردن و دوره وره

کهنه مسی چو مه گرفتارته
آذیتیه عشق شرربارته

بار و شراوی و نثارم بکه
راسی کاری تو و کارم بکه

یه گل سرون و انامم بکه
خرقه چیه ستره و نامم بکه

ژاره دل پیرم و مه ضامنه
ساز وژ ا نام تونه مشکنه

هم تو بوه چاره دل بی جواز
ساز دل و ساز من ا نو بساز


#غریب_دلفانی (استاد حسین نظریان)

@Golvani_lak

‍ #مثنوی_لکی

هم بیه ایواره و حالم گنه
هر تکه اژ زوخ دلم یه منه

قافله چی و منه تنیا منم
دی و هناسی گجریکا بنم

ا هنی ار عشق تو در آ منم
دل بیسه ءگری ار دامنم

زار و زمین گرتییه چاره شرم
گاله مکن ار دل بی هو کرم

ا دسِ دل دی شکتم مه بچم
بار خمت کو بیسر رو لچم

نامه من و دل بیسه قال و قی
جنگ گله و گله کو و  کیای کی

کس نیه تا طالع دلم آگری
بایژه دامان دلم آگری

کس نیه تا بای و مه آواره که
گال گلی ار من بیچاره که

ار سرِ دل اِ سرِ شو تا گه صو
بارِ  گرانیکه  خمِِ عشق  تو

مر و دمه عشق تو کی شوقیه
کئنی کهنیکه که هم توقیه

ار خم عشقت بن ار سر گروین
پشته می و صاف ماو ا رو زمین

سیر بکه بی دنگ و بی قرم و قال
عشق تو چوی کردمسه کو زخال

کاری نکه که دل بوه دشمنم
آگر اژ ا لیز و زنیه بنم

اور خمت ار سر مه واریه
اور نیه خم نیه یه داریه

وخته هناته بی خور مشتوم
هوم سفر بار گران تووم

بی خوری دی وسه آوارتم
چوی خط هول هورچی ا روچارتم

اسر تو یا خوین خدا جاریه
رفت گرانی که و مه واریه
...
#غریب_دلفانی.


کانال تلگرامی گلونی
🌹🌹🌹🌹


@Golvani_lak

شعری زیبا از استاد حسین نظریان (غریب دلفانی)

#شعر_لکی
#دکلمه_لکی
#غریب_دلفانی



کانال تلگرامی گلونی
🌹🌹🌹🌹


@Golvani_lak

دل وه  هوول و  بی قرارم ، بی قراری تا چنی؟
بی چنگ و چویل و شکت، ویر ار بناری تا چنی؟

چویی کموتر گیانه سر، ار مولقِ طاقِ فلک
دل هراسان اژ قوش و باز شکاری تا چنی؟

ولگ دریا، سینه سزیا، دل کاواو اژ داخِ عشق
چویی شقایق سر وه هوار و داخداری تا چنی؟

ار  گلوومِ  گیژِ  دنیا ، بی پلامار و شکت
شیت و ویت اژ دس قُلاو و مرگه داری تا چنی؟

هر مدام اژ زورِ دردِ بی کسی ، جور ار دنی
پیری و کوری و ژاری و نداری تا چنی؟

عربده کیش و خراو و در وه در اِ نام ولات
کوسِ بدنامی کتی و تیزه جاری تا چنی؟

هلگه هلگ ار دشتِ دنیا ،بی سرانجام و فقیر
شوونی و نانه لمی ، مِز نا دیاری تا چنی؟

#غزل_لکی
شاعر #غریب_دلفانی
#صوتانه_خیر


کانال تلگرامی گلونی
🌹🌹🌹🌹


@Golvani_lak