رسالة لقلبك ❤️

"من المعاني المركزيّة التي أشعر أنّها تحدث فارقًا نفسيًا في الحياة اليوميّة: إدراك أن الألم والتعب وحتى الفقد مكوّن أساسي في الحياة. حقيقة مُرّة أدري، ولكنّها الطريقة الوحيدة لعيش تلك العبارة: الألم حتميّ ولكن المعاناة اختياريّة.. هذا الإدراك وكأنّه-على مرارته- سلاحًا ضدّ المعاناة والشكوى المُتكررة، وكأنّه -على ناره- يجعلك أهدأ، ببساطة؛ مثل هذه الفترات ومثل هذه التجارب تحتمل مثل هذا الألم أو التعب أو الفقد."

_ عمرو عودة.

@Fadfadah98

لاقاني فيديو في تيكتوك لي شابة سعودية بتسأل عن شنو الحاجات الكنتو شايفنها عظيمة شديد وانتو أطفال ومتخيلين انها ما عادية والاطفال العندهم الحاجة دي محظوظين..؟!

قريت الكومنتات كلها تقريبا

لفتني كومنت متكرر كتير عن ناس كانو شايفين البت البشيل ليها أبوها شنطتها محظوظة شديد وكان نفسهم يعيشو الحاجة دي

اها انا شابة على أعتاب ال ٣٠ وانا راجعة المسا من الاستديو بتاعي اللي هو جمب البيت شديد لكن ابوي بيجي يسوقني ويشيل لي شنطتي ما كنت مدركة عظمة ما أملُك لحدي ما لقيت اقراني في عمر ما كان دا حلمهم ولحدي الآن ما قادرين يتجاوزوه

كتير لما اتكلم مع صحباتي والناس البمرو بحياتي عن نظرتي لتكوين الأسرة والرغبة في الحياة المشتركة مع آخر اني بهتم اكتر بمقدار الدفا الفي البيت والسعادة الممكن يحسوها أطفالي من الحاجات البعملها ليهم وتخليهم حاسين بالرضا وبانهم عندهم كل البتمنوه بصورة العاطفية أكتر من المادية وفكرتي عن الغنى المشبع في النفس هو أساس الرضا والراحة والاستمتاع بنعيم الدنيا كله.

قبل فترة انجرفت او اتهزيت يمكن بسبب الحرب واتغيرت بالضرورة نظرتي لفكرة الاستقرار المادي والامان المالي وختيتهم في ترتيب أعلى شوية من الكنت مؤمنة بيهو ومصدقاه طول عمري

بس هسي إتأكدت انه الغِنى الحقيقي ما في إننا نملك أكتر، بل في إننا ننتبه لما نملك ونقدّره.
وعِلة ضيق النفس هي اعتياد النِعَم
لما نغفل عنها ولما تبقى عادية في عيوننا.


● عندي فضول أسأل نفس السؤال واعرف شنو الحاجات الكان غيابها مخليكم تحسو انكم أقل حظاً في طفولتكم؟

انا طبعا كنت بغير من الناس العندهم أخوان كبار، كبرت وهذّبت غيرتي دي لكن ما بنفي قدر شنو لسه شايفاهم محظوظين ❤️.

_ Ella Munim.