● فايروس كورونا :
يعتبرالحدث الأهم و الأبرز في هذا العام ، وقد غزا العالم و تسبب بإغلاق كافة دول العالم و تدهور الإقتصاد، أصاب ما يقرب من 85 مليون شخص وتسبب في وفاة أكثر من مليوني شخص 🦠



#2020

● حرائق الغابات في استراليا :
تم تصنيفها كأسوأ الكوارث في تاريخ استراليا، التهمت النيران 26 مليون فدان من الغابات وما يقرب من 6000 مبنى ونفقت مئات الآلاف من الحيوانات 🔥


#2020

● إغلاق الحرم المكي :
وذلك يوم 5 مارس بسبب انتشار جائحة كورونا في المملكة العربية السعودية 🕋


#2020

● الإنتخابات الأمريكية:
جو بايدن يطيح بدونالد ترامب و يصبح الرئيس السادس و الأربعين للولايات المتحدة الأمريكية 🇺🇸


#2020

● كوكب الزهرة :
أعلن فريق بحثي عن اكتشاف علامات كيميائية ترجح وجود حياة على كوكب الزهرة 🌘


#2020

● انفجار مرفأ بيروت :
و اطلق عليه أيضا بيروتشيما ، تشبيها بما حصل في هيروشيما في الحرب العالمية الثانية ، الإنفجار الضخم أودى بحياة 206 شخص و تشريد الآلاف و خسائر تقدر ب15 مليون دولار 🇱🇧


#2020

● خروج بريطانيا من الإتحاد الأوروبي:
و ذلك بعد 47 عام من عضويتها 🇦🇺


#2020

● التطبيع مع الكيان الصهيوني:
قامت أربع دول عربية بتطبيع العلاقات مع الكيان الصهيوني بشكل كامل وهي الأمارات والبحرين والسودان و المغرب 💔


#2020

● الإقتران العظيم :
هي ظاهرة اقتران كوكبي زحل و المشترى، ولن تحدث الظاهرة مرة أخرى قبل عام 2080م 🪐



#2020

● وداعا صانع سعادتنا في الطفولة:
وفاة مخرج ومنتج توم وجيري (Gene Deitch) رفيق الطفولة الذى اضحكنا من القلب. 💔


#2020

● الإساءة الفرنسية للرسول ﷺ:
قام أحد المعلمين برسم رسوم مسيئة لحبيبنا ﷺ و تم قتله على يد أحد الشبان ، قام الرئيس الفرنسي بالدفاع عن الجريدة و حقها في نشر ما تريد وقابل ذلك غضب عارم من المسلمين في كافة بقاع العالم و بدأت حملة لمقاطعة المنتجات الفرنسية 🚫


#2020

● اكتشافات أثرية جديدة:
اكتشاف 59 تابوتاً بمنطقة سقارة بمصر ووجدت ممياوات بداخلها محتفظة بحالتها كما هي ⚰


#2020

● وداعا براينت:
وفاة أسطورة كرة السلة الأمريكية NBA كوبي براينت في حادث تحطم مروحية 🏀


#2020

● وداعاً مارادونا :
وفاة أسطورة كرة القدم دييغو أرماندو مارادونا ⚽️


#2020

● حرائق الغابات في كاليفورنيا :
دمرت النيران ما يقارب 72 مليون فدان من الغابات ونفقت مئات الآلاف من الحيوانات، تسببت في مقتل 23 شخص وشردت الآلاف في المناطق المحيطة 🔥


#2020

● العنصرية في أمريكا:
وفاة المواطن الأمريكي جورج فلويد إثر ضغط الضابط على رقبتهِ لمدة سبع دقائق حتى وفاتهِ مما أدى إلى حصول فوضى عارمة في أمريكا من قبل الشعب 🇺🇸


#2020

● السودان 2020 :
- السودان خارج قائمة الدول الراعية للإرهاب.
- اتفاقية السلام.
- فيضان نهر النيل الذي تسبب بالكثير من الخسائر.
- وفاة الصادق المهدي رئيس الوزراء السوداني الأسبق و زعيم حزب الأمة القومي.
- وفاة الشيخ محمد أحمد الحسن إثر عِلة لم تمهلهُ طويلاً.
- وفاة القارئ السوداني الشيخ محمد صديق نورين إثر حادث مروري هو و 4 من القراء.



#2020

-

شكراً لكل الناس الشاركت في الفقرة 💚🍃
سنة ٢٠٢٠م كانت صعبة على العالم كله ، وإن شاء الله السنة الجديدة تكون سنة خير على الجميع ..

ياربّ رحابة دائمة، وسنة مُزهِرة، وسرور على سرور 🕊️💛 .


•

#عشرين_عشرين••🌸

🌸طبعاً حالياً موضُوع إنو 2020 حتخلِّص ، ونهاية السَنة وبِتاع تريند عالمِي ، وكل الناس يا إما بتودِّع يا إما بتستقبَل ، يا إما بتتفاءَل يا إما بتتشَاءم يا إما بتعمَل #تم لإنجازاتها ، يا إما حاسَّة باليأس لأنها ما عمَلت شئ ، يا إما ما فارقَة معاها أصلاً
حيتملِي التايم لاين بالنكَات والميمز ، وحيتملي بعذراً نحن لا نحتفل بأعياد الكُفار ، وحتدُور النقاشات زي بداية كل سنة بين الناس الحابيِن يطلَعوا ويفرفشُوا ويحتفلوا برأس السنة واليُوم الوطنِي وبين الناس الرافضين الفكرَة تماماً..
وزي كل سنة برضُو حتكُون في بوستات لناس سَوداوية تحسِّسك إنها ما شافَت ولا ذرة خِير للعام دا ، وناس تانية تحسِّسك إنها كانت عايشة في الجَنة من كتر امتنانها للنِعَم
بغضَّ النظر عن الطقُوس البتتكرَّر كل عام دِي عايزَة أقول إنو المُشكلة عمرها ما كانَت في 2020 ولا حتكُون 2021 هي الحَل ولا حتى 2050
الزمَن سواءً أنجزنا أو ما أنجزنا بمُر ، والسنين سواءً إتغيرنا أو بقينا زي ما نحن ما بتقِيف
والمشكلة كانت دايماً -وأبداً حتظَل- فِينا نحن!
أيوه عارفة خطرت ببالك أبيات الإمام الشافعي :
نعيبُ زماننا والعيبُ فينا
ومالِ زماننا عيبٌ سِوانا
ونهجُو ذا الزمانُ بغير ذنبٍ
ولو نطقَ الزمانُ لنا هجانَا

🌸كل مخرجات 2020 حتمشِي معانا زي ما هي بالنقطة والشولة لو نحن ما إتغيرنا ، لأنو نفسَ المعطيات حتدِّي نفس النتايِج ، السَّنة مافي يدَّها تعمل لينا أي شئ!
ليه؟
لأنها تحِت تصرُّف ربنا
كل أزِمات العيش والوقود والكورونا والقُوى المضادة والفساد والجنِيه الحالف ما ينزِل حيبارُونا زي ضلنَا مالم نتغيَّر ، ما لم نتحرّك ، مالم نحِس بغيرنا ، مالم نطلع من دائِرة الأنانية العايشين فيها ، مالم ومالم..!
إمكِن واحدة من الحاجات الخلَّت السنة دي شبه سيئة على الأغلب إنو الناس كانت رافعة سقف توقعاتها جداً للعام مش لربَّ العام!

🌸الفاصِل بين السَّنة والسُّنة يُوم..
يوم واحِد زي كل الأيام ، حتطلع شمسُو وحتغرُب زي كل مرّة ، وحيكون نِهارو عادي ، زحمة في المواصلات ، ناس ماشة جايَة ، زول بهناك بيجدَع كريستالة من شُباك العربية ، وواحد تاني عايز يعقِد لبتو العمرها 13 سنة علي صاحبو العمرو 50 سنة ، وزول بهناك سايِق الشاحنة بتاعتو المليانة جاز مهرِّبو عبر الحدود ، وجارتين لسه متشاكلات من إسبوع ، وكمَّامات حايمَة كبرستِيج بدون تطبيق فعلي للإرشادات ،
كل شئ حيمشِي زي ما هو
ما حيتغيَّر غير التَاريخ

🌸ربنَا بيقول في كتابه :
{ومَا أصَابكُم من مُصيبةٍ فبِمَا كَسبَت أيدِيكُم ويَعفُو عَن كثِير}
وفي موضعٍ آخر:
{ وما كانَ ربَّك ليُهلِكَ القُرى بِظُلمٍ وأهلهَا مُصلِحون}
وأيضاً :
{ ظهرَ الفسَادُ في البرِّ والبَحرِ بما كَسبَت أيدِي النَّاس ليُذيقهُم بعض الذِي عَمِلوا لعلَّهُم يرجِعُون}
البيتدبَر الأيات دي حيصَل لفهم إنو
لكلَ فعل ردّ فعل ، ولكل نتيجَة سبب ، ولكل تصرُّف عاقِبة..
وإنو كل الحاجات البتحصل خِلال أي سنة من السنين ما كانت عبثاً ولا جات من العدَم ، فهي يا إما إبتلاء ، يا إختبار ، يا عقُوبة ، يا تكفِير ذنوب ، يا إشارَة ، يا نذِير..يا.. يا
فنحنا أملنَا كلو في ربنَا وبس
سواءً كنا في 2020 ولّا كنا في 1999
أملنا في رحمتهُ وعفوه
أملنا في صفحَهُ ورِضاه
طمعانين في الخِير العندو وحدَه
متوكلِين عليو وواخدِين بالأسباب💗

🌸وعلى كلِّ حال..
2020 كانت عام فقدنَا فيه ناس عزيزة علينا جداً وكسِبنا برضو ناس ما هينة والله
حصلت معانا مواقِف وأحداث سيئة وبالمقابل حدثت معانا حاجات حلوة وظابطة جداً
أنجزنا بعض الأهداف الكُنا مخطِطين ليها وبعضها فضِل في مكانو زي ما هو
إكتسَبنا عادات كويسة ما كانت فينا وخلينا عادات تانية سيئة
كل واحد فِينا بكون إرتقَى في سُلم النضج خطوة وناس خطوتين وناس قطعوا فيهو مشوار طويل ، وبالمقابل ناس كتير إنتكست ورجعَت لوراء
بس ما في حد بقى في مكانه.

🌸٣٦٥ يوم ما حاجة هَينة أبداً..
بالنسبة لبعض الكائنات الحية دي دورة حياة كاملة ، وبالنسبة لكوكبنا رجوع لنقطة البداية عشان تبدأ الدورة من جديد ، وبالنسبة للكون نجوم إندثرت ونجوم إتولدت من جديد
كل يُوم نحن البخليهو مميَّز
وكل عام نِحن البنضِيف ليهو قِيمة
نحن البنقرِّر ياتو نُوع من الذِكريات الحنخلِيها جُزء منه وفيهو ، وياتو نوع من الأشخاص حيكمِّلوا معانا المشوار
ما بالضرورة نكون خارقِين ، ولا بالضرورة كمان نكون إتغيرنا تغيير توتلي من عام لعَام..
بس ضرُوري جداً ننتبِه لكميَة النعم البقت قاعدَة معانا
ليدينا ، لعينينا ، لعائلتنا ، لصحتنَا ، لأصحابنا
ضروري نقدِّر قيمة الحياة ولو كانت بسِيطة
ضروري نتعلَّم من أخطاءنا
ضروري نستوعِب الحكمة وراء كل مُصيبة
ضروري نصبُر ونتوكَّل ونخلِي ثِقتنا في ربنا بَوصلتنا الدائِمة
ضروري نراجِع ونحاسِب أنفسنا أول بأول
والأهم من دا كلو نحترِم تفاصيلنا البسيطة وإنجازاتنا الصَغيرة وعاديتنا ، وما نحتقر نفسنا أبداً ولا نندم على عدم الإنجاز ولا نقارِن نفسنَا بغيرنَا ، لأنو الندَم الوِحيد هُو إنو تكون السنةِ دي مخصُومة من عُمرك فعلياً بالنسبة لمِيزان ربنا ، والإنجاز الحقيقِي هو إنك تكُون قرَّبت منه شوية ، خلِيت عادَات ما كانت بترضِيه ، أضفتَ طاعَات ليومَك ما كانت موجُودة ، عدلتا رُوتينك بما يتلائم مع عباداتَك
فهنيئاً لك بعامٍ كسبتَ فيه رضا ربَّك حتى ولو كانت الخسارة هي العالم في حدّ ذاته.


#مريم_الشيخ💛🌸