• أفكار رائعة لاستثمار وقت الفراغ 💙✨ ..

بتصحى من النوم بتصلي الصبح وتشوف الحاجات الاساسية المفروض تعملها في بداية الصباح وتخت في راسك انك الليلة عايز تنجز الحاجة الفلانية والحاجة الفلانية والحاجة الفلانية...... إلخ، لحدي مايجي وقت النوم وتلاقي نفسك ماعملتا ولاشي يُذكر في يومك 📅.

مرة من المرات وانا بتصفح في اليوتيوب عايزة فيديو ظابط اتفرجه لقيت فيديو Tedx لوحدة بتتكلم عن ضيق الوقت وانو الناس بيجو يستشيروها انو ماعندهم زمن كافي للانجاز، ال24 ساعة دي ماكفاية عايزين زيادة لساعات اليوم لما قعدت معاهم وسألتهم عن روتين يومهم لقت عندهم وقت فراغ لو جمعوهو حيلاقو زمن هائل ينجزو فيهو اكتر من task 👌..

ال24ساعة العندي وعندك هي نفسها الكانت عند كل الناجحين قبلنا بنفس العوارض العندنا لانو النجاح عمرو ماجا في طبق من ذهب، الكهرباء قاطعة صف العيش صف البنزين كلها حاجات ممكن تحبطنا وتنفسن بينا لكن تخيل وانتا منتظر في صف البنزين فتحتا كتاب Pdf وقعدتا تقرا او فتحتا تطبيق تفسير قرآن وقريت ليك تفسير كم آية وغيرو كتير من الحاجات الرهيبة الممكن تنسيك الوقت، تلعب انتا واخوانك العاب مفيدة تتونسو وتضحكو وتعيشو البهجة في الكهرباء القاطعة، تستغفر وتصلي ع النبي وتحوقل وانتا في صف العيش وتدعي ربنا انا يزيح الغمة عن بلدنا وتتصلح الاوضاع دي للافضل بإذن الله ❤️❤️❤️✨.

للاسف احيانا الناس بتحصر مفهوم الإنجاز في محور ضيق شديد، لازم يكون حاجة كبيرة شديد والشي دا بخلينا نقلل من قيمة انجازاتنا البسيطة الممكن يكون ليها اثر كبير وبنقلل من ذاتنا وقدراتنا الخارقة ونحنا طبيعتنا كبني آدمين الواحد بيكون مُنجز طبيعي لكن بتمر أيام بتهبط طاقتنا أو ممكن نكون محتاجين للراحه بس بدون إنجاز لكن الما كويس لما  النمط دا يستمر مع الشخص كـ أسلوب وروتين مستمر ✨..

الانجازات الصغيرة بنبداها لحدي ماتكبر وتبقى انجازات كبيرة، بنحس بفرحة اكتمالها وبنحس بالفرق الناتج 😍👌🏻

لو ختيت في بالك تقرا كتاب قسّم عدد الصفحات على اسبوع او  شهر حتلاقي نفسك في نهاية الشهر قريت مجموعة من الكتب ووصلتا لهدف رهيب في القراءة وحتلاحظ الفرق في شخصيتك او طريقة كلامك وبلاغتك وادراكك المعرفي ،لو ختيت في بالك تاخد كورس اونلاين قسمو ع حسب البناسب باقة الانترنت حقتك والبناسب وقتك وشوف افضل وقت الشبكة فيهو كويسة واستغلو وماتتحجج 👋 ، لو 3 ايام في الاسبوع اتمرنتا حتلقى اثر على صحتك على نفسياتك على بشرتك وحتعيش بصحة افضل ان شاء الله 😍💪، لو كل يوم قريت 20 صفحة من المصحف حتلقى نفسك في نهاية الشهر ختمتا المصحف كلو 👌🏻💗💗💗
طيب ماقادر اقرأ ال20 صفحة سوا؟ قسّم ال20 ع الخمسة صلوات وبنهاية اليوم حتلقى نفسك عملتا cheak ع الهدف دا😍✔️..

شوف الحاجة البتناسبك امسك ورقة وقلم وشوف الافكار الظابطة الممكن تقضي بيها وقتك جمع المصادر البتحتاجها وابدا وخلي املك في ربنا كبير اسعى للتغير وربنا حيكون معاك اكيد، ارسم خطتك وامشي عليها وكل فترة اقعد مع نفسك قوّم نفسك وشوف انتا ماشي صح ولا في حاجة غلط في شي محتاج تعديل ولا لا، انا بعمل شنو هل البعملو صح، الزمن البروح مني دا ربنا حيسألني منو هل انا بستغلو صح؟ لو انتا ياداب حسيت انك لازم تبدا ماتتحسر ع الفات ابدا، ان تأتي متأخرا خيرٌ من أن لاتأتي💙👌..

رتّب وقتك، اصحى مع اذان الفجر وادعي ربنا يبارك ليك في يومك اقرا ورد من القرآن واقرأ اذكارك حاول دخّل صلاة الضحى في يومك اجرها كبير، اقعد شوف مفروض تنجز شنو وكيف ومتين وارسم خطتك صح ✔️..

كسرة :
عندما يكون هدفك هو الارتقاء بنفسك وتكوين ذاتك المستقبلية فإن التضحيات تصبح حليفك في طريقك الشاق، ولكن في نهاية الأمر لا شيء من مُتع الحياة يضاهي شعور الإنجاز ورؤية نتائج سعيك أمامك؛ لذلك اجعل شعارك دومًا
‏ " لذة الوصول تستحق العناء💛💛
ما فاتَكَ لم يُخلق لكَ وما خُلِقَ لكَ لن يفوتكَ🌻.



محبات كتيرات 💙✨
#ولاء_صلاح

☜ روايات و كتب لـ :
محمد سعيد العريان 🍿✨ ..


↓↓↓

‏مقامك حيثُ أقمتَ نفسك؛ لا حيث أقامك الناس، فالناس لا تعدل ولا تزن.

- الرافعي 🧡

ويظنُّ أني قد أميلُ لغيرهِ
أنّى وقلبي بإسمِهِ مكتوبُ
أنا ما شربتُ الحبّ إلا مرّةً
والكلّ بعدكَ كأسهُ مسكوبُ
10/8 | 💜🌸

- صباح كهذا لكم جميعاً 💙🌊 ..