#15_نصيحة_في_الكتابة 📝💛


صَباح الخِير🌼
لَي فترة عايزة أكتب عن الموضُوع دا بس كانت موقِفاني أسبَاب كتيرة ، مِنَّها إنو أنا ما شَايفة نفسي بالمقام البخليني أتكلم عن الحاجة دي ، بس أسئِلة الناس لي حولَ الموضوع دا كِترَت ، ودا الشَّجعنِي أكتِب عنو -على قدُر الخِبرة البسيطة العندي في المجَال دا- وأرجو إنِي أوَّفَق في توصِيل ما يُفيد
الكلَام كتيِر والحَصر صعب ، ودا المُختصَر المُفِيد

🌼1● أول حاجَه وقَبل أي شِئ لازِم نعرِف إنو الكتابة ما بتَجي من فرَاغ ؛ ما الواحِد بصحَى من الصّباح وبلقَى نفسو بقى كاتِب
عشان تكُون كاتب على الأقل مفروض يكُون عندَك المَوهبة والذائِقة اللغوية
بس دا ما بينفِي إنو الناس الما عندها موهِبة ما ممكن تكتِب .. بعرِف مشاهِير عندهُم كتب (بالرغم إنوا ما كان عندهُم أي إهتمام بالكتابَة ؛ وغالباً النوع دا بطلِّع كتاب واحد في حياتو بحكِي قصتو أو تجربَة عظيمَة غيرت فيه -زي ديمي لوفاتُو مثلاً ، وفي باراك أوبامَا وغيرهُم)
المُهم أعرف إنو الموهِبة لوحدها أبداً ما كِفاية مالم يتِم تنميتهَا وتطويرهَا

🌼2● القِراءة ثم القِراءة ثم القِراءة
السّبيل الأول لإنك تدخُل مِضمار الكِتابة هو القِراءة .. -ما كلُ قارئ كاتِب بس إتأكد إنو كل كاتِب قارئ-
• طيّب ليي القِراءة تحديداً؟
- أولاً : لأنها معارِف مُتراكمة .. على كلّ الأصعدَة
سواءً للماضي أو الحاضِر أو المُستقبل ، باختصار بتوسّع مداركَك وحيّز تفكيرك المحدُود
- تانياً : بتفِيدك من الناحية اللّغوية ، كلما تقرأ أكتر كلما حصِيلتك ومفرداتك اللغوية زادَت أكتر
- تالتاً : بعض الإقتباسَات من الكُتب بتكون بِذرة لمقالات ونصُوص أكبَر (مثلاً بتلقى كاتب بيتحدّث عن موضوع معين بناءً على مقولة لكاتِب آخر من كتاب مُعيّن ، قد يتحدّث عنها من وِجهة نظروا ، قد يعقِّب عليها ، قد ينتقدهَا وهكذا...) ؛ الأعمال الأدبية مبنيَة على بعض

🌼3● فتِّش عن الحاجات البتلهِمَك للكتابة وبتدُّر على عَقلك الأفكار والإبداع وركِزّ عليها
في ناس بتلهِمهُم الصُور ، وناس الموسِيقا ، أحياناً المُشاهدات اليوميَة أو المواقف ، أو التجارُب ، أو حتى نُصوص أشخاص آخرين -زي ما قلنَا فوق (بس طبعاً لازم نراعِي لحكاية إنو ما نسرق فكرة نص وجَوهرها .. وإنما الكاتِب الحقيقي بيكفيه أحياناً كلمة واحدة في جُملة كاتِب تاني لإنو يكتب نَص أو مقَال كامِل) ، فبالتالي أبعد من التِكرار والتقليِد وخلي عندَك إسلوبك البميزَك عن غيرَك

🌼4● خلي جمّبك دايماً مُدونة -ولو بتاعة الهاتِف-عشان تسجِّل أي خاطِرة أو فكرة تخطُر على بالك بحيثُ إنك تزيد عليها أوتطوِّرها لاحقاً -مالم تدوِّنها حتضِيع- ، أزبط النصوص الكتبتها في حياتِي جاتني فكرتها في وضعِيات غريبة (أكون قاعدة آكُل مثلاً ، أو عايزة أنوم ، أو بتونّس مع صاحباتِي،...إلخ وبنتهِي بي الأمر وأنا جاريَة على أقرب حاجة ممكن أكتب عليهَا أيّاً كانت)

🌼5● ما تنشُر أي شئ ، وما تنشُر قبل ما تراجِع النَّص على الأقل تلاتة أربعة مرّات
الكلام الأوَلِي البتكتبو دا اسمو (مسُّودة) وهِي غالباً بتكون مليانَة بالأخطاء اللغوية والكتابِية
راجِع النص كتير حتلقى إنك في النهاية إستبدَلت مُفردات كتيرة عادِية لمُفردات ممتازة وجذّابة .. بكدا حتقلِّل من نِسبة الأخطاء و(من النَقد رُبما)

🌼6● ماف كاتِب بدُون جمهُور
بإختصار الكِتابة هي صناعَة الأفكار وتوصِيل صُوت ، رأي ، إحسَاس ، وِجهة نظر..إلخ
والتوصيل بطبيعتُو يستَلزم مُرسِل ومستقبِل عشان تتحقق المُعادلة ، لو إنتَ كاتِب وعندك متابعين كتار (فإنتَ عبرتا) .. أما لو كنتَ مُبتدئ فبادِر بإنّك تصنَع جمهُورَك الخاص -ودي ما حاجة بتتِم بين يُوم وليلة- والجمهُور ما بجيك لعِندك ..لازم إنت تمشِي ليهو ؛ أنشُر نصوصك في الصفحات وقروبات الكتُب الكبيرة المليئة بالقُراء .. ورِّي نفسك للعالم
لو إنت واثق من موهِبتك ومن قوة وجاذِبية كلماتَك ورِسالتَك ما حيقيف في وشك شِئ .. ولو هي بتستَحق إنها توصَل للعالَم صدِّقني حتوصَل

🌼7● مواكَبة الأحداث
دي طبعاً حاجة بديهِية جداً ؛ ما بالضرورة إلّا تكون كاتب سياسي عشان تتابع أخبار السِياسة ولا إلّا كاتب فنِي عشان تتابع أخبار الفن (الفن الرّفيع ما الغُناء والرقِيص الهايِف داك) تابع أي شئ تقدر عليه
(رياضة ، تكنولوجيَا ، فلَك ، علوم...إلخ) خليك موسُوعة بحيث إنو ما تدِّي أي ثغرة لأي زُول لإنو يطلعك إنسَان سطحي وما فاهم .. (بإختصار أغرِف من كل حلّه كُمشة كمشتين وشيل من كلُ بستان زهرَة)..
ما عشان تتفلسَف بيهُم وتجادِل دا وتناقِش داك .. لا .. بل عشان تطوّر شخصيتك إنتَ وما تكون في وادِي والعالم في وادِي
ودي حاجة أسهَل ما يكُون في عالمنا اليُوم .. عندك الكُتب ، عندك التلفزيون ، عندَك السوشال ميديا..إلخ
ودا ما بمنَع إنك تركّز على مجال مُعين وتبدِع فيه .. وإنما وازِن بين الاتنِين
إتذكّر : أصحاب الرُؤوس الفارِغة لن يكتبُون سِوى الفرَاغ

🌼8● احتِرام حقُوق الآخرين
أو خلينَا نقُول (أخلاقِيات المهنة) إن صحَّ التعبِير وده معناها تحترم الكُتَّاب التانيين -وإن خالفُوك في الرأي-
خلِّي علاقتك لطِيفة وكُويسة مع الكُل
وبتَاتاً بتَاتاً ما تسرِق نصُوص غيرك ، لو عارف صاحب النصّ أكتب اسمو ولو ما عارفو خليهُو ساي دا ما بدِّيك أحقيَة إنك تنسبُو لسيادتَك ، لأنو دا تضييِع للحقوق (كل زُول بكتِب عارف الشعور دا كوييس ) فااا مافي داعي تخُت نفسك في حِتات ضيقة لأنو زي ما بتسرِق نصوص غيرك حيجي يُوم وتتسرِق نصُوصك (معادلة موزونة)
زي ما قال الشاعِر :
وانسِبَ الحديثَ إلى أهلِه ** فإنّ الوثيقةَ في نصِّه

🌼9● ما تكُون إمِّعه ..
يعني ما معنى إنو النّاس كلها بتتكلّم عن موضُوع معين لازم المفروض إنت كمان تتكلم عنُو -حتى ولو ما عارف الموضُوع شنو ولا عندَك خِبرة أو أيِّ قِراءات سابقَة عنُو- (دي مُشكلة حقيقية والله)
أكتُب الحق ولو كان كل الحواليك غلَط
(في مقولَه لمُصطفى محمود بقول فيها : الكاتِب الحقيقي ليسَ الذي يُشترى كلامهُ وإنما هو الكاتِب الذي يُشترى صمتهُ)
المهم ..ما كلُ هاشتاق شارد و وارِد إنت تحشر نفسَك فيه .. خلي إبداء رأيَك يتوقَّف على أهمِية الموضُوع ومدى تأثِيرو

🌼10● المُسَابقات الأدبِية
بعد تصل مرحَلة معتبرة لغوياً ورِضا تجاه كتاباتَك تقدّر بعد كدا تخطِي الخطوة دي لقدّام :
وهيَ إنك تشارِك في المُسابقات الأدبيَة ودي بتفيدك من عدة نواحِي:
- حتوسِّع دائرة علاقَاتك ومعارفَك الأدبية
- حتوصِّل صُوتك لفئة أكبر من حيِّز جمهُورك
- حتقدّر تقيِّم المُستوى الإنتَ موجود فيه
قد تفُوز وقد لا تفُوز ودا بيعتمِد أحياناً وبشكِل كبير على المشاركِين المعاك ومدَى مهارتهُم
شارِك وأخسر وشارِك تاني وتالت ورابِع
لغايَة ما تصل للمستوَى البخلِيك في الـ (Top winers)

🌼10● خلِّي المُحيط الحواليك إيجابِي ومُحفِّز
وده بيعنِي إحاطة نفسَك بأكبر عدد من الكُّتاب الماهرِين وطلب رأيهم ومشُورتهم بشكل متواصِل
(مع إنو الموضُوع دا حيكون مرهِق بالنسبة ليهم شديد لأنو عندهم مشاغِل زيهُم وزي أي بنِي آدم وبكون في عشرُومية زول مرسِّل ليهم غيرَك .. المُهم إنتَ ما تكتِّرها) ؛ في مرحلةٍ ما حتحتَاج لزول يقيِّيم نصوصك غير المُصحِّح اللغوي

🌼11●استفِيد من النقد وما تأخدو على منحَى شخصِي
كلنَا عارفِين في نقد بنّاء ونقد هدّام
- النقد البنّاء بورِيك أخطاءك وبنبِّهك عليها وقد يديك حلُول .. غالباً بكون موجّه للنَّص ما لشخصَك إنت
والنوع دا كويس جداً وبخليك تتحسّن وتتطوَّر وتتدَّارك أخطاءك
- أما النَقد الهدّام
فبِكون نقد سلبي وبتصيَّد العيُوب الفيك ، يتبعو تقلِيل من شخصَك أو إساءَة ليك .. والناس الزي كِدا ماليين السُوشال مِيديا ، ما عليك إلا تعمل ليهُم block أو un follow وترّيح رُوحك وتريحهُم

🌼12● ما تخلُّي كل طموحَك هو الشُهرة وبَس
لسَبب بسيط وهو إنها ما حتبرَاك من أول يُوم تغادر فيهو الدُنيا دي حتبقى شُهرتَك قاعدة هنا .. وآثارهَا هي الحتمشِي معاك (خيراً كانت أو شَرّاً)
خلي طمُوحك إنك تغيِّر ، تأثِر ، تسعَد ، تطبطِب ، تسلِّط الضوء على القضايا المسكُوت عنها ، توصِّل صُوت غيرك ، تقُول الحق ، تنشر السّلام والحُب والمفاهِيم الطيبة والأخلاَق الإنسانية الرفِيعة
الكتابة في الأول وفي الآخِر مسؤولية .. فخليك قدّها
خليك إضافَة جيِّدة للأدب ما خصماً عليه
ولطلما غيّرو الكُتاب أُمماً وحضارَات بأكلملها .. فقدامَك الخيار -بِناء أو هَدم-

🌼13● إذا كنت عندّك أي طموحات لقدام (طباعَة رِوايات أو كُتب) فيُفضَّل إنك تكتب باللُّغة العربية الفُصحَى عشان تتمرّن عليها أكتر وعشَان فُرصة إنها تصل لأكتر عدد مُمكن أو تترجَم لـ لغة تانية بتكون أكبَر ؛ أما لو لو عايِز تناقش مُشكلات وقضايَا محلّية وبس وعايزها تصل لأكبر عدد مُمكن -داخل إطار دولتَك- فااا لغتَك المحلية بتخدِم ليك الهدَف دا بصورَة أسرَع

🌼14● إتواضَع الله يهدِيك
بشُوف ناس كتيرَة بتفتري وبتنفُخ نفسها أكتر من اللازم لمُجرّد إنو الـfollowers بتاعنهُم كتير أو لمجرّد إنو الواحد طبع كتاب ولا رواية خلاص كدا ما تتكلموا معاي تانِي ..أنا مُهم ، أنا فخور بنفسِي و..إلخ
يااخِي في علماء عملُوا مجلّدات بالآلاف ولسه شايفين نفسهُم ما عملوا ولا حاجه!
التواضُع يا ناس ثم التواضُع ثم التواضُع
من تواضعَ لله رفعَه
وإتذكر ربنَا زي ما وصلَّك للقمّة يقدر يوصلّك للحضيض
أفرح في حدُود المعقُول وما تتكبّر
إتعامل مع متابعينك ومُعجبينك بلُطف وصبر وطُول بال .. واتفاعَل مع منشوراتهُم لأنو هم الوصلُّوك للمرحلة دِي

🌼15● حِساباتَك على السوشال ميديَا يا حتكُون ليك حسنات جارِية ليوم القيامة يا حتكون ليك سيئات جارِية ليُوم القيامة .. إتجنّب الصُور الفاضحَة والمُخِلَّة للأدب والخادِشة للحياء وإتجنب الألفاظ الإباحيَة.. إسمُو (أدب) ما (قلّة أدَب)
قبل ما تكتِب أو تنشُر أي شِئ إتذكّر إنو في ملَك على يمينَك قاعد يكتِب معَاك..
بعد كِدا إنتَ وإيمانَك وضمِيرَك
| وفي النهايَة بقول ليكُم أبقوا عشرة على أحلامكم



#مريم_الشيخ ✍🏼💛

- سيبويه :
قامَت زوجته بإحراق كتبه لأنه كان ينشغِل عنها بقراءتها ، فلّما علِم بذلك أغشي عليه ثم فاق وطلَّقها

- الليث بن المُظفر :
كان مُنشغلاً عن زوجته بحِفظ كتاب العين للفراهِيدي ، وحدثَ أن اشترَى جارِية حينها فغارَت زوجته غِيرة عظيمة وأرادت إغاظته فعمدَت إلى الكِتاب فاحرقَته

- الأمير محمود الدولة الآمري :
كان يقتني الكثِير من الكتب ، فلما مات كانت زوجته تندبهُ وترمي بالكُتب في بِركة ماء وسط الدار لأنه إنشغلَ عنها طوالَ عُمرِه بهذه الكتب

- إبراهيم العياشي :
قضَى ٢٠ سنة في تأليف كتاب (حُجرات النساء) فأغاظَ ذلك زوجته لأنشغاله عنها كثيراً ، فأحرقت الكِتاب
يُذكَر أنه أصيبَ بالشلل

- محمد بن شِهاب الزهري :
قالت له زوجته يَوماً
"والله لهذِه الكُتب أشدّ عليَّ من ثلاث ضرائِر"
#كتب_وزوجات💙


•

الثقَافة هِيَ ما يبقَى فِينا
بعدَ أن ننسَى ما قرأناه!
#مكسيم_غوركي💛

●

‏"أتمنى أن تحدث لنا جميعاً أشياء في غاية البهجة ، تسكن قلوبنا و تسير معنا حتى نهايته ، أن نكون مُطمئنين لا أكثر."💜✨

"نحن نجتاز الأيام برحمة الله ولطفه."💜

الآن مع فقرة #حياة_كاتب💙