مربوطة روحي بحضرتك
ترضى دخيلك ينولي؟
موش انا الك
موش انت الي؟
وديتلك صوغة العمر
طرزته ياقوت وحلي
ضميت سري بشيمتك
وتريد تسله ، وتنسلي
وانت السند
وانت لخيم شوگي وتد
ماين و ادوس بمشتلك
هم انت دوس بمشتلي؟

بَس بالليّل!
يلتم كِل عَتب روحي
وأغنيلَك
أغني و عَيني تبچيلك
أغني و شوگي ياخَذني
بجدم حَافي لمُواويلك .

شَتريد أعددلك بعد؟
كَم مرة شابع بچي
ولو أشوفك أضحكلك!
الحُراس تغفى ولك
وأنه أسهر أكتبلك
تحلفني وأني الچنت
بعيونك أحلفلك؟
ألمن أسولف حَرت
متعلم أنه چنت
بس أنتَ أسولفلك

اسف على إزعاجَك
زَعلان عَنك رِحت بَس لِسة مِحتاجَك
بكِل ذكرىٰ ألك أنسِجن وأتامَل أفراجَك
ما بَينت مِنكسر و مَثلت دور النَصر
بَس المَسارح إلك والمَشهد أخراجَك
كِلش عَليك العَتَب ..
چا غير مِن هَدمت بأحلامنة تشَيّد ؟
غير إنتَ غالي عَليّ !
ومِن چنت أكثر العَتب چي بس هالوحَيد!
ما تنعبر شارتَك، شارتك ما تِنخطي
غيرك شگد جَربت ..
بس مافِلحت بعِشگ
عِندك بَخت سَيد.

المهم هسه انا بعد
ماريد منك ترجع
جنت بغيابك أنعزل
بس هسة راجعلي الخلك
صاير أعاشر و أطلع
صح باقي ليهسه اختنك
بس بعد ما ينزل دمع
لمن اخبارك أسمع
وصاير شويه اتحمل
وكمت أقتنع ابقى بنقص
مو الا وياك اكمل

مگابل صَورتك والحَيرة تحچي اشكال

گبعت الشمس من گتلي أريد فياي
ونزلت العنب من گتلي ما ألوحة
بأفراحك أشر سنوني للدَفان
ولو ضاگ خلگك تلگاني مرجوحة
دَللتلك يِتيِم نريد ينسى الراح
بعزاي اضحكله حتى يقلل بنوحه
على عناد الخطر ماشي الحرب وياك
وي جرت السيوف الروح مذبوحة
خايب كاتلها الفضول مركزة بيه الناس
جثة شگد عليه عيون مشبوحة
ومن دون البشر تضحك وبستهزاء
وتهز ايدك وتدري بدمع مسبوحة.

كَصه بيه الوكت وتنطر تعود
انا اخرس والوكت يرادله صياح
الحزن ماعنده غيري توالف وياي
الفرح خطار مرني ومن وكَت راح
يخاين بس احبك من يجي الليل
استلذ من كون اخلصه بهمك نياح
براسي كليب طايح وادري بيه وين
وراسك ماعرفته بيا متن طاح
الكبل لاحت سما من نومت عليك
ابشرك صار حدها الكض الاصفاح
اذا يوم شتهيت محاضن وياي
تحاذر لاتخجل جفوفوك رماح
وحكَي من اكول هواي تعبان
هوه العنده مثلك وين يرتاح

أجيت تگضي وكتك ما أجيت تحب
وأعرفنك وصدگك بل حچي تچذب
لو وياي كلك لو بعض ما ريد
أنه برزق وادم غربه ما چلب
ماعفتك تنام وانته ما مرتاح
وتنيمني بسوالف نار بيه تشب
چنت ما أشتكيلك خاف اغثك يوم
حنين وما اهون دمعتك تسجب
تجازيني بهجر وحجايت المو خوش
تعال عله الجروح حساب خل نحسب
الاكيك بربيع وكل بلابل شوك
وتلاكيني بخريفك وألهوا ألمغضب
وأجيك بيا هله وبعتاب من تغيب
وأنه سنين أغيب وچلمه ما نعتب

‏لو يِهل وجهك حبيبي
‏إلا أوزع كُل بواچي
على المَحد بِچاله
‏إلا أصُوغ السَكته إلك
ساعي و رسالة
‏إلا أطفيلك أيامي
مُراد جيّتك
‏و إنتَ تدري كُحله البيبان
چفك ياحَبيبي .

بنصهم صيح أحبّك خلهم يسمعون
الجندي المو شجاع يفشل القادة
الله انطاني غيرة زيادة عن الناس
وٲنـتَ اللّٰـه بحلاتك حطلك زيادة
مغثات الوكت والعوز والحرمان
انساهن من اشمك حدر الگلادة
واريدك من نفوت بشارع الشمات
ياهو الي تشوفه احضني بعناده
تطغي عليه اريدك بالنشد والشوگ
مو تمشي ويه غيري عليه تتماده
أحبّك يا سمار الگاع وكت الگيض
شفت غيرك ذهب بس گلبي ماراده
بگراب الخناجر ماتصير سيوف
وانه سيف السمار وطولك غماده
اباتن بالقلق من مايجي المرسال
مثل عام وينام مشتم السادة
واذا نتلاگه صدفة وتبتسم وياي
ارد مثل اليزور وحصل مراده
تجيني واخاف اغثك ما اشم بيك
ترد لاهلك وارد اشتم بالوساده
موش انه اليحبك يوم لو يومين
انه المجروح گلبه ورادك ضماده

شفتك بالحلم مريت خطار
گعدت من الصبح رتبت بيتي

بنُص عاشور
كتلك ذنب غنيني
بحلگ الناس
سر هم عادي تحچيني
انه وياك
على كلشي اليأذيني
طيح بكِلشي
بس لطيح من عيني .

حيل بينا
‏أحنا ضيعنا العمر من بين إيدينا
‏وأحنا تانينا القطار وما مشينا
‏وأنتظرنا .. وأنتظرنا
‏بلكي شي منكم يجينا
‏ردنه ننسى وما نسينا
‏ردنه نبچي وما بچينا
‏ونعتب ونحچي عليمن
‏وياهو يسمع لو حچينا
‏تاكل الحسرات بينا وما بچينا
‏كلها من قلوبنا العَمّت علينا

مو حي الله چَوية وباچر تطيّب
أنا خلاف وجهك صاير رماد !

دَمعتك بارده يكولون ما تشتاك
وانه خيال الحَنين يثكل بجدمه
والكاهُم فراغ منين ما حط شوك
الاحبهم مو نهار كلوبهم ظَلمه
اليضُم عندي هوى
ما اسولفه المخنوك
اليجي بوكته دمع
بعيوني ما اضُمه
واهس لليل جَرحي
شكد سوالف بي
عليه كُل ذكرى مرت تنحسب لچمه
هوت روحي وهوت
بس ما هوتها الناس
حچي عيوني سهل
بس جيب اليفهمه
الهوى يلتم عليه منين ما ذكروك
وادُك رجلي واضل بعازة الخنكه
واغُص بريحتك ماكمت اغُص بالزاد
المفارك النسمه العابره تغركه

تَرد مكسور وحَدك
مِحد ويَاك
وتُبقى لوحَدك تبچي بغرُفتك
تلگى الوَاگفتلك بَس حياطِين
وأنتَ المَا خطت واحَد وگفتَك
يخرَب واهسَك وجدامَك تبيِد
وگلبك يوجعَك وما تدري شيرِيد
يَابويه شثگلِها تصيَر الأيَام
ترى شَغلة الفرگه تريَد تعويِد
هوَ المَاله احد لمِن يَطيح
يَتمنى مِن الأول ضَال وحِيد

هذا الحزن شيريد مني
احد حچالك شغله عني
كالولك بعاشور اغني
معقوله تعشك صوت وني

تجاهَلني بَعَد وياي ثگل الدم
لاتنطي مجال إصعب وكابر هم
ضبط سوي روحك عود ما مِهتَم
والله تحبني حُب بس الله بي يِعلَم
تراقِب عَن بعُد گلبك علية يلوب
الجرأة اللي بالگلب لو تنتقِل للفَم
چا كلمة أحبَك جزت ذاك الصوب
والاطرش سمعها واجة گلك تم
من أگعُد گبالك تلفت ليغاد
مو يَم القضية وأنتَ رَب اليم
أسولف وية غيرَك أحس بيك تموت
فُص عينَك طلع ما أعرف شدَردَم
احچي بصوت عالي شدردمت لتخاف
من المنضغط متوَقِع أشبع ذَم
ولو مرات أدگ دگة خباثة وياك
أَشَوفَك روحي وأختِل وأگعد اتبَسَم
وتِضل عينَك تدور عَلَي بين الناس
والبيدَك يطيح ويغدي وِجهَك دَم
هنا يبدي الضعُف ويبَين المُبهَم
بهل لَحظَة المشاعِر صدگ تترجم
حَسبالك رحت؟ لا مارِحت موجود
وهذا الوگع من ايدَك دهاك الزَم
دايخ بية دايخ هسة شموازيك؟
فضها وگول أحبَك شلّك بهل هَم
يعجبَك شِكلي صوتي ووگفتي وممشاي
وحافظني حُفُظ تندلني وين أنشَم
متردد بطَبعَك حذِر مدري شبيك
تِرجَع ألف خطوة وخطوة تتقدَم
إذا حَتى السلام تردَه بالمثقال
ما أسلّم تگول شدعوة ما سلَم
لكِن هم أعذرك عقلك مأذيك
الله يساعده چم قسِم يتقَسَم
مابين المكابَر والخجل والشوگ والحب
والشرف والنسب وابن العَم
ترة الدنيا گصيرة والسنين خفاف
من تتبدة منك بعد ما تلتم .

بهت عُطر ألمحنة
بروحي مات الليل
وبقى عُطر المفارك
يمك يفوح ..

توادعنه ومشيت انته
وبقيت انه حريجة ابنص صريفه
وداويه بسكته
مشيت انته وبقيت انه مثل كتال
خايف مامأمن حتى من بنته
ارجف مثل رجفة سعف بالعته
قلق مانام چن محكوم باعدام
اوبطت مُدتّه
مشيت انته وبقيت آنه ابفشل روحي
مثل عريس ماتت أمة وي زفته
ومشيت انته بوجه فرحان
چنك عاشك وماخذ صويحبته
وانه ظليت لا كلبي عرفّ علتي
ولا انه اعرفت علته
وانه ظليت لا توبني كلبي ولا اني توبته
وبقينه بحول غركانين حد الراس
لا طلعني هو ولا اني طلعته
بقيت انه بطرك روحي