تعرف ما معنى السحت🧐؟؟؟؟

🔴الطبيب اللي بيحول الحالات من المستشفى الحكومي لعيادته الخاصه بياكل سحت وبياكل اهله سحت

🔴الطبيب اللي بياخد وبيقبل قرش واحد من حالة هيعملها في المستشفي الحكومى مجانا بياكل سحت وبياكل اهله سحت

🔴الطبيب اللي بيكتب تحليل (حتى لو واحد بس ) زيادة او اشعة لمريض مش محتاج تحليل او اشعة مجامله لمركز تحاليل او اشعة بتاع واحد صاحبه..بياكل سحت وبياكل اهله سحت

🔴الطبيب اللي بيكتب لست ادوية مالهاش لازمه علشان نسبة الدواء والبيزنس..بياكل سحت وبياكل اهله سحت

🔴الفني اللي بيعطل جهاز او يتاخر عن تصليح جهاز في المستشفي الحكومى علشان يتحولوا مركز برة ..بياكل سحت وبياكل اهله سحت

🔴اى حد بيقفل علي الناس طريق الدواء والعلاج المجانى من اجل ان يكسب من ورائهم..بياكل سحت وبياكل اهله سحت

🙏🙏وذكر فإن الذكرى تنفع المؤمنين🙏🙏

استقيموا يرحمكم الله

د.هشام وجيه

أنا عارف إن ناس كتير بتسأل عن التخصص وإنهم محتارين ، بس الحقيقة إني أنا شخصيًا محتار جدًا ولسه مش محدد أنا عايز إيه.
قبل ما أبدأ الامتياز، كنت شبه مستقر على تخصص الأطفال، وكنت فعلاً حابه وخدت فيه كذا كورس، لدرجة إن أهلي بقوا مقتنعين إنى دكتور أطفال حاليا .
لكن بعد ما نزلت الامتياز، بدأت ميولي تتغير: حبيت الباطنة جدًا، وبعدها الطوارئ بشكل أكبر، وحاليًا مستمتع جدًا بالمخ والأعصاب. ومتوقع كمان إني ممكن أحب الـ ICU لما أدخله.
الشيء الوحيد الواضح بالنسبة لي إني مش حابب الجراحة ولا النسا خالص.
فأنا فعلاً محتاج نصيحة من حد مرّ بالتجربة دي: أركز على إيه في الفترة الجاية؟ وإزاي أقدر أحدد اختياري بشكل أوضح؟

من سنة وأكتر.. مريض 52 سنة، مدخن ومعندوش أي تاريخ مرضي لأي مرض مزمن

جاي بيشتكي من صعوبة في البلع وارتجاع متكرر للأكل، هو قادر يتعايش بس مجاش يكشف غير لما بقا وزنه يخس ويحصله نوبات ألم وترجيع متكرر

المريض معاه upper endoscopy report قديم كان فيه Esophageal stricture but scope succeeded to pass to stomach

طيب هل خدت عينة يا حج وقتها في المنظار؟ لأ
منعرفش السبب بس وارد الدكتور وقتها شَك في حاجة mechanical..

طب الدكتور قالك ايه؟ هو طلب مني اشعة على جسمي كله عملتها وهي دي نتيجتها

Pan CT with IV and oral contrast shows diffuse stricture of esophagus.. Otherwise free

مفيش أي عقد ليمفاوية أو أي حاجة تاني غير طبيعية

طبيعي مريض راجل سنة كبير مدخن وجاي بضيق في المريء نشك في حاجة خبيثة..

قررنا خلاص هنعمل للمريض منظار تاني ك حالة persistent vomiting and dysphagia وناخد عينة المرادي عشان نجيب من الآخر..

بدور في ورق المريض وتحاليله عشان أحضره للمنظار ولاحظت حاجة كانت بداية حَل ال case.. لقيت ال TLC count 13.000 بس mainly eosinophils ! .. قلت يمكن غلطة معمل

قعدت أفر في كل صور الدم بتاعته من ساعة م اتحجز، ودايما في زيادة واضحة وكبيرة في ال eosinophils..

جه في مخي على طول طب هل ده يا ترى allergy ولا Parasitic infection.. ولا يا ترى يا هل ترى Eosinophilic Esophagitis؟

فكرت في ال 3 بصراحة خاصةً إن ممكن يبقا في اتنين منهم مع بعض عادي وهما ال allergy و EOE

رجعت تاني آخد هيستوري :
- هل كان عندك اسهال مزمن أو سافرت برة؟ لأ
- بتاخد أدوية مزمنة مسكنات أو غيرها؟ لأ
- صعوبة البلع مع الأكل ولا الشرب أكتر؟ الأكل الصلب
- هل كان بيجيلك حساسية صدر أو أنف أو في جلدك حتى لو موسمية مع تغير فصول السنة؟ اه يا دكتور جلدي كان بيطلع فيه حساسية وهرش واحمرار بقالي سنين وكنت باخد علاج وبيخف..

دي classic skin symptoms of seasonal allergy

طلبنا Total IgE لتأكيد ال allergic pathology : طلع عالي.

طلبنا stool analysis and culture which were negative making parasitic infection less likely and not completely excluded..

وهنا كلمت أستاذنا في المناظير إنه معايا حالة كذا كذا وشاكك في كذا قالي نزله للدكتور الفلاني وقوله ياخد عينه من ال esophagus و ال stomach من كذا حتة فيهم وده لإن المرض ساعات بيكون له patchy pattern.

والمريض عمل المنظار وطلع فيه نفس ال picture، والعينة نتيجتها بعد كده طلعت التشخيص اللي شكينا فيه وهو
Marked Eosinophilic infiltration of mucosa : picture suggesting of Eosinophilic Esophagitis.

أول حاجة في العلاج هو تظبيط أكل المريض ومنع أي أكل قد يسبب حساسية خاصةً لو المريض لديه تاريخ مرضي بحساسية من أكل معين.

وبعد كده بيمشي على PPI Trial كمحاولة أولى للعلاج التحفظي، بس للأسف مرضى كتير مبتستجيبش، فساعتها بنبدأ topical swallowed steroids زي oral Budesonide ، ولو مش متاحة ممكن نبدأ مضطرين systemic steroid زي ال Prednisone..

ال FDA كذلك اعتمدت monoclonal antibody اسمه Dupilumab بس غير متاح في مصر

وأخيرًا لو لم يستجب المريض للعلاج الدوائي مع استمرار الترجيع والضيق في المريء أو مبقاش مناسبه الأعراض الجانبية للكورتيزون، بنلجأ للمنظار تاني بس عشان نعمل dilation لتحسين البلع والأعراض..

وده مرض مزمن يحتاج متابعة for life حتى لو مرة في السنة..

وبس يا عزيزي.. الدرس المستفاد هو إنك تبص كويس على ال
Differential count of WBCs

لأنها كانت بداية إسدال الستار على حالة كان من الممتع تشخيصها.

مساء العسل ❤️ ..

د.أسامة الدسوقي

لما يبقي عندك مريض محتاج high oxygen requirement و هاتوديه تعمله CT او MRI .. ابقي اختبر الاول و هو لسه في الرعاية اذا كان هايقدر ي Lie flat و للا لأ لمده ة 5 ل 10 دقايق من غير ما يحصله desaturation اكتر .

dr nabih mokhtar

"هل الاكتفاء بالكورسات بدون نزول المستشفى كافي؟

الحقيقة لأ. مهما كانت الكورسات قوية ومفيدة، عمرها ما تعوض الاحتكاك المباشر بالحالات في المستشفى. الشغل الحقيقي بيبدأ لما تشوف المريض بعينك، تاخد قرار، وتتعلم من أخطائك قبل صحّك.
نزولك المستشفى بيديك خبرة عملية، بيعلمك تتصرف تحت ضغط، ويخليك تربط بين المعلومات والنقطة الإكلينيكية بشكل حقيقي.
الكورسات دورها مهم طبعًا، لكنها عامل مساعد: بتنظم لك المعلومة، وبتقلل الفجوة، وبتخليك تستفيد من شغلك بشكل أكبر… لكن ماينفعش تكون بديل عن النزول.
ببساطة:
الكورسات تجهزك… لكن المستشفى هي اللي بتعلّمك

الزملاء الشباب
إزاي تختار تخصصك ؟!
.
هقولك على أفكار سريعة ممكن تساعدك:
بتحب المذاكرة = باطنات + ICU + طوارىء
ملكش بال عليها = جراحات
.
المذاكرة أصل في كل الطب لكن الجراحات شغل أكتر بعكس الباطنات لازم تقرأ كل لحظة
.
بتحب الشغل والبهدلة يبقى طوارىء وعناية
.
بتحب الهدوء والبعد عن التوتر يبقى روماتيزم وأشعة وجلدية وكلينيكال باثولوجي
.
كل خاصات الباطنة قريبة من بعضها وإن كان أعلاهم الكارديولجي ثم الجهاز الهضمي
لكن الاتنين بدون مناظير وقسطرة ملهومش تلاتين لازمة
.
خد أي تخصص براحتك في الباطنة لكن لازم تعمل حسابك تخصص فيه تخصص فرعي كمان يعني هتاخد نيورو يبقى تركز مثلا على النيورو فسيولوجي ! عايز صدرية يبقى تركز على المناظير ! عايز جلدية يبقى التجميل ! وهكذا
.
انسى حوار التخصص العام ده
المستقبل لخاصات الخاصات
يعني هتاخد إندوكراين يبقى تخصص داخلي سكر
هتاخد سكر كمان يبقى سكر أطفال !!
يعني لازم تعمل حسابك تتعمق داخل التخصص الفرعي !
دا ليه ؟
علشان لما تقول السوق مليان !
هقولك التخصصات الفرعية فاضية خالص
٩٠٪؜ عام و٩٪؜ خاص و ١٪؜ فرعي في التخصص
واللي عايش تمام هو ال ١٪؜
السوق عايز تميز مش مجرد تخصص
لو مش فاهم دي يبقى هتركن على جنب زي اللي قبلك
.
عايز تسافر:
دي أرزاق !
كل التخصصات في طريقها للسعودة في الحكومي ولكن الخاص لسه بدري شوي عليه
معظم خاصات الباطنة بقت مطلوبة تقريباً استشاري ! يعني زمالة مصرية ومعاها ٣ سنوات خبرة بعدها أو دكتوراة نفس القصة
.
الباطنة العامة ما زالت مطلوبة في الخاص وكمان المستوصفات الخاصة
لكن معظمهم بيدوروا من الداخل يعني نقل كفالة
.
لكن نصيبك هيجي لك لوحدك مهما طلعت من قوانين
فاشتغل كويس واجتهد وذاكر وادعي بالرزق الواسع من حلال
.
الطوارىء والعناية والجلدية تجميل مطلوبين بقوة إلى الآن
.
القلب ما زال مطلوب حكومي لكن الإعلانات بتلاقيها استشاري
ونفس الحوار مناظير الجهاز الهضمي
وغالبا بيكون طرفي مش مركزي
يعني مش هتروح الرياض ولكن هتروح مكان تبع الرياض بعيد عن المركز بمسافات
وبردو كلها أرزاق
لو مكتوب لك في أعلى حاجة هتروحها لكن لازم تكون كبير ولك تخصص فرعي في الفرعي
يعني حاجة تميزك
.
الجراحات
الجراحة العامة مش كتير مطلوبة برة
لكن في مصر هتشتغل في حاجات كتير
العظام نفس الحوار بس مطلوبة برة أخصائي أول ثم استشاري اكتر بس يكون له حاجة تميزه سواء مناظير سواء عمود فقري وهكذا
التجميل نفس الحوار بس غالبا استشاري
المسالك قليلة لكن لما يطلبوا نفس القصة غالبا استشاري
مخ وأعصاب استشاري
الرمد والأنف والأذن نفس الحوار
.
لكن اعمل حسابك أن المكتوب لك هيوصلك غصب عن التخين
وهتلاقي الدنيا بتتغير علشان خاطرك والفرص بتيجي تحت رجلك
بس اجتهد وذاكر علشان لما تيجي الفرصة تعرف أصلاً أنها فرصة
ولما تيجي الفرصة تلاقيك مستعد
.
الزمن ده محتاج تميّز
يعني مش تروح تاخد باطنة عامة وتقولي مفيش شغل ولا سفر !!!
خد باطنة عامة خد غدد او سكر
خد باطنة عامة واتعلم مناظير بأي شكل وطريقة
وهكذا
.
فيه تراك تاني وهو الإداري
زي الجودة
مكافحة العدوى
إدارة مستشفيات
وهكذا
دي حاجات مطلوبة جدا
لكن معنديش سفرها اعتقد مش أد كدة
.
دي مجرد أفكار سريعة
والفرق مش كبير
لكن اللي كبير هو أنك لازم تتميز في اللي هتاخده
.
بلاش تربط دماغك على تخصص معين لو فاتك يبقى أعلنت وفاتك والهبل ده
طبعا ما عدا الدكاترة الفيميل علشان مش كله ينفع لهم
زملاء كتير مكنش لهم في الجراحة وحاليا أساتذة فيها
زملاء كتير أخدوا حاجات عمرهم ما فكروا فيها ولا قبلوها ! وحاليا أبدعوا فيها
ومش ضروري كل حاجة تتمناها لازم تاخدها
وأحسن الظن بالله لأن بيدبر لك أمرك وأنت مش عارف مصلحتك في الأصل
والزم الدعاء
وبعد ما تقرر صلي استخارة وامشي في الطريق
لو قفلت يبقى خير
لو فتحت يبقى خير
.
هون على نفسك
أنت تنفع في كله على فكرة في الغالب
بس أنت واهم نفسك بحاجة ومش عارف تطلع من الوهم مش أكتر
.
لو لقيت همك فلوس بسرعة
سيب الطب وشوف غيره
ولو هتجيب فلوس بسرعة في أول طريقك
تأكد أنها حرام
اصبر واتعلم كويس واتميز وهتيجي الفلوس تحت رجلك
يا باشا دا رزق مفيش فيه تهريج
بس عليك الأخذ بالأسباب صح

د. أحمد العسكرى

السنة اللي قبل اللي فاتت كان الزملاء بيشتكوا من سوء معاملة النواب لهم !
.
السنة اللي فاتت الزملاء بيشتكوا من سوء معاملة النواب لهم اللي كانوا بيشتكوا من سوء معاملة النواب لهم 🥴
.
والسنة دي الزملاء قدموا استقالتهم من الجامعة علشان معاملة النواب لهم اللي كانوا بيشتكوا من سوء معاملة النواب لهم اللي كانوا بيشتكوا من سوء معاملة النواب لهم
.
والدنيا معجنة معاليك 🥴🥴🥴
.
كلنا فاسدون إلا من رحم الله وتربى في بيته على أصلٍ طيب
.
المشكلة فينا كلنا
محدش بيرحم حد
محدش عايز يريح حد
محدش عايز يساعد حد
بقينا عاملين زي السمك بناكل في بعض
المشكلة عمرها ما كانت في بلد
المشكلة في الأشكال اللي مش نضيفة اللي بنقابلها كل يوم في البلد
اتقي ربنا في اللي تحت إيدك
علشان دا كله هتشوفه في حياتك وحياة أولادك وفي الآخرة
وما كان ربك نسيًا

د. أحمد العسكرى

كلمة مرعبة الدكتور قالهالنا في الاستقبال
تخيل انت كل سنة موت عيان بسبب إهمال منك أو خطأ غير مبرر ...هتقابل ربنا بكام واحد ؟
فما بالك وأنت بيعدي عليك كل يوم ٢٠٠ عيان مثلا وشوف نسبة خطأك
لو غلطت مع عيان واديته علاج غلط وراح عند حد تاني وصحح الغلط ده حاجة مقدور عليها لكن لو موته كده ده مصيبة

فالخلاصة أي حد يتعامل بحذر شديد خصوصا في أماكن الحالات الحرجة وال انت متعرفوش متفتيش ، وتحاول تتعلم عشان هتتسئل عن كده

Copied

خليك فاكر دايما
ان ال------> Early ambulation
وال-----> Good hydration
بيقلل حدوث الجلطات ----> DVT
Post operative

ال----> Early ambulation
معناها ان العيان مثلا لو عمل عمليه الضهر
لازم يقوم يتمشي بالليل

--------
Good hydration
معناها اننا ندي محاليل كتير
علشان الإنسان مننا لو دمه تقيل هيتجلط
لذالك العيان لو ----> Hydrated
هيبقي دمه خفيف
-----------
خليك فاكر ان العيان ال---->
High risk for DVT
اللي هو كان عنده --> DVT
قبل كدااا
او اللي هوا هيتعمله عمليه في الحوض
او اللي هو هيقعد في السرير فتره طويله
زي اللى عامل --->
Hip replacement
او اللي عنده ----> Viseral malignancy
Cancer Colon
Or
Cancer head pancreas
الأورام دي بتطلع حاجه اسمها--->
Tumer necrosis factor [ TNF ]

Dr Alaa Basha

حاله حقيقيه وارد تشوفها

كشف منزلي شاب جه مستعجل عايز دكتور يروح معاه البيت بسرعه

الشكوى : اخوه جاله زي هياج عصبي شتيمه بألفاظ خارجه قدام مراته والأطفال نزل تكسير في الحمام ويقول كلام كتير ومش بيسمع لحد

🔷 التفكير الاولى

1- أنه لو مريض كبد تكون بدايه غيبوبه كبديه وشوفتها كتير آخرهم حد قريبي رحمه الله اول ما كان بيشتم وعرفت روحنا بيه المستشفى وكانت بدايه hepatic encephalopathy

2- مريض سكر ويكون عنده hypoglycemia وهي احيانا تكون اعراضها أن المريض يكون irritable جدا ويساعد في التشخيص العرق والجسم المتلج وهكذا

3- يكون مريض بيتعاطى حاجه ودي تكون اعراض عنده أو حتى اعراض انسحابيه

4- اخر حاجه ممكن تكون local intracranial cause
مع قياس السكر كان بالفعل دخل في hypoglycemia كان صعب تركيب كانيولا العيان هدي شويه شرب عصير واكل شوكلاته وسكره رفع الحمد لله

التشخيص النهائي كان hypoglycemia

د. محمد مجدي

يا دكتور الإمتياز .. إوعى تفتكر إنك لوحدك كفاية في موقف طبّى طارئ، أو إنك بقيت جاهز تاخد قرارات مصيرية من غير ما ترجع لاستشاري أو أخصائي.
اللي بتعمله ده مش بس غلط قانونًا .. ده كمان حرام شرعًا.
أرواح الناس مش مجال للتمرين ولا للثقة الزايدة.
إنت لسه تحت التدريب، ولسه بتتعلم.
ولو حصل خطأ، مش هيبقى مجرد سهو .. ده ذنب، وساعتها لا "كنت فاكر" هتنفع، ولا "محدش علّمني" هتشفع.
اللي فوقك مش موجود عشان يتفرّج، ده موجود عشان يوجّهك وتحمي المريض وتحمي نفسك.
خلّي قلبك على المريض، وضميرك صاحي .. قبل ما يدك تكتب أو تنفّذ، اسأل نفسك: هل أنا أهل للقرار ده؟
وإن ما كنتش متأكد .. اسأل، حتى لو اتأخرت دقيقة.
الدقيقة اللي بتتأخرها في السؤال، أرحم من العمر اللي ممكن يضيع بسبب القرار الغلط

✍د احمد بنداري

إزاي تفرق ما بين ال EDH & SDH في مقطعية المخ
فى دقيقه واحده فقط 🧠

السلام عليكم

إحنا في المجال الطبي، ومعانا على القناة دكاترة من جنسيات مختلفة، فأسهل طريقة للتواصل هي اللغة الإنجليزية بسبب اختلاف اللهجات.

مش شرط أي حد بيفهم عربي يكون قادر يتكلم عربي بطلاقة، وكمان الإنجليزي مبقاش رفاهية، خصوصًا لو بتشتغل في مستشفى أو مكان سياحي، أو لو سافرت لأي دولة أجنبية، ساعتها هيكون وسيلة التواصل الأساسية.

وفي النهاية، النصيحة من الدين فعلًا، لكن ليها أسلوب وطريقة، لأن الهدف منها التوجيه مش الإحراج أو التقليل من أي شخص.

كلنا واحد، وكلنا بنتعلم من بعض، ومحدش من حقه ينظّر على حد أو يقلل منه.

🧠 اكتر حاجة تقدر تفيد بيها عيان ال Ischemic stroke انك تسال نفسك سؤال ف غاية الأهمية
" العيان ده بيبلع ولا لا " ❕
علشان أكتر حاجة تموت العيان مش الجلطة نفسها ولا ال Weakness اللى ممكن يعيش به
ولكن ال
Aspiration Pneumonia 🫁
بسبب صعوبة البلع اللي بتحصل خاصة لو الجلطة أثرت على الـ brainstem أو الـ dominant hemisphere 🧠

بدليل لما يجو يتحجزو عناية لازم مع ال CT Brain يتعمل
🫁 CT Chest for Aspiration
🫀 ECG for AF

وعشان كده لازم تعمل له
🛏 Bedside Swallowing Assessment
أو لو مش بتعرف ف على الأقل ما حدش يشربه أو يأكله
⛔ NPO (Nil Per Os) 

وده ياخدنا لأهمية وضعية العيان في السرير
🛏  (Head elevation > 30°)

عشان تمنع حتى ريقه او اى حاجة ف ال GIT ترجع على ال Respiratory

مش تقوله ريح يا حاج ريح ومدد 🤣

الكلام ده فى غاية الأهمية لأن هتحتاج كمان تلود العيان ف هتلوده ازاى وهو مش بيبلع ساعتها هتلاقى النائب طلب منك تركب Ryle عشان يعرفو يلودوه بعد ما يطحنو البرشام ويحطوه ف ال Ryle

Dr Mohamed salah

فشلك في إختيار الناس مرة أو طيبتك الزيادة شويتين أو أحلامك اللّي لبست في مليون حيطة؛

مش حاجات تتكسف منها وتخليك تقفل الباب نهائي إنك تختار تاني أو تعلمك القسوة أو تبطل تحلم!

إتعلم من اللّي عدي وفات، اللّي يتغير في اللّي جاي هو (طريقتك) مش (شخصيتك)

في مقولة لـ غسان كنفاني، قال:
(الأشجار تغيِّرُ أوراقها لا جذورها).

بعد سنين كتير في دراسة الطب النفسي والحمد لله الحصول على شهادات فيه متنوعة
......
الواحد مننا كمتخصص
وهو بيكتب دوا اكتئاب
بيعصر دماغه
ويضرب كم حسبة في دماغه
هل المريض فعلا اكتئاب بس ولا ممكن اكتئاب ثنائي القطب
ولو اكتئاب
أنه دوا يناسب
وزن المريض وسنه
ووظيفته
محتاجة تركيز وحسابات ولا
الأداء الجنسي له
الشهية
تأثيرها عالنوم الكتير
ولا عنده أرق ومحتاج ينام
هل لو ست
في سن الحمل ولا
في مشاكل قلب كلى كبد
في مشاكل سيولة
السعر للدوا نفسه وحالة المريض ماديا
وبعد كده يفصل حاجة تناسب
كل حالة وظروفها
وغيره وغيره
محتاجة أنه علاج نفسي
وأي مدرسة علاجية
وهل أنا بشتغلها
ولا أحولها لحد متخصص في الحتة دي
بالذات
.......
فبستغرب جدا من طبيب في أي تخصص تاني
يسأل أنت متضايق طب خد بالحباية دي للاكتئاب
بكل سهولة وضمير مرتاح وكده هو وفر عالمريض كشف النفسية
وطبعا لازم الدم الخفيف يطلع
نبطل دلع دكاترة نفسية ايه بس
شكلك حابة تدلعي ع جوزك شوية
أو لو راجل ننشف شوية كده

.....
بيفكر في ايه ساعتها
هل جهل بالدوا
جهل بالمرض النفسي
استهتار بالمريض
ولا حب ف إظهار انه
متعدد المواهب

انت كده مش بتوفر على المريض انت كده بتضره

Dr Mahmoud Metwally

مفيش حاجه اسمها تشخص بالفهلوه
تذكر أن الحاله اللي هتفتي فيها هتشيل ذنبها ليوم الدين ودي نصيحه بالذات لأخواتنا الطلاب والإمتياز اللي بيستعجلوا أنهم يشتغلوا برايڤت
وتذكر الحديث الشريف

"مَن تَطَبَّبَ ولم يُعلَمْ منه طِبٌّ قَبلَ ذلك، فهو ضامِنٌ"