{ رَبَّنا لا تُزِغ قُلوبَنا بَعدَ إِذ هَدَيتَنا وَهَب لَنا مِن لَدُنكَ رَحمَةً إِنَّكَ أَنتَ الوَهّابُ }

كنت بسمع دكتور ناجي ف استوقفني مقطع جميل خالص في الشرح واللي هو زي ما دكتور ناجي بيقول " كل هذا يثبت أنه وراء الخلق خالق"
بيقول إن الواحد لو عنده أحماض كتيره في جسمه "acidosis" ف المصلحة إن الجسم يتخلص من الأحماض دي وبما إن العضلات الإرادية في جسمنا هي أكبر منتج للأحماض "40% من ال skeletal muscles لما بتتحرك بتنتج Lactic acid" ف محتاجين نوقفها شوية عشان نتخلص من الأحماض دي ف من رحمة ربنا بينا إنه العيان بيدخل في غيبوبة "coma" عشان يحصل ريلاكساشن لكل عضلات جسمنا ف تبطل تنتج أحماض ويرجع الجسم بعد فترة لحالته الطبيعية.
علي العكس لو الجسم فيه قلويات كتيرة "alkalosis" ف في الحالة دي الجسم محتاج إنه ينتج أحماض كتير عشان تعادل القلويات ف العيان بيدخل في حالة تشنجات "convulsion" هنا بقا بتشتغل العضلات بقوة شديدة عشان تطلع كميات كبيرة من ال Lactic acid عشان يعادل ال alkalosis اللي حصلت دي.
ف سبحان الله فعلاً أعراض المرض تفيد في شفائِه.
الله يداوي والطبيب يأخذ الأجر. ⁦
سبحان الله العظيم ❤️

Cpd

كانَ أحدَهم كلَّما مرَّ ببلاءٍ يَقول:

مالكٌ يتصرَّفُ في أملاكهِ، حَكيمٌ لا يَفعلُ شيئََا عبثََا

الحمد لله وبعد..

ك طبيب مسلم ع وجه التحديد او طبيب ع وجه العموم ..

إذا اضطررت للكشف على النساء عليك بتقوى الله أولا..

-الكشف يكون بحضرة أحد محارمها فإن لم يوجد فممرضة، ولا تجوز الخلوة إطلاقا

- الطبيب المسلم لا يكشف إلا ما تدعو الحاجة إلى كشفه في عورات النساء والرجال

-الطبيب المسلم عند فحص مواضع الضرورة إن أمكن الفحص بالوصف فقط، فلا يجوز النظر ولا اللمس،

وإذا كان يكفي النظر فلا يجوز اللمس، وإذا كان لابد من اللمس فارتدي جلافز

- ولو فرضنا أنه لابد أن يكشف عن الموضع من غير حائل، فإنه لابد أن يقدر الضرورة بقدرها، فلا يتعدى المكان ولا الوقت اللازمَين للفحص

-لا يدعها تكشف أمامه حتى تصل إلى مكان المرض، بل تكشف من وراء الستارة حتى تصبح جاهزةً للكشف على موضع الضرورة

Dr Ahmed Elashmawy

مديحة الذئبة الحمراء
إبراهيم ورم في الكبد
فلان الإيدز
و علان مريض كذا و كذا
ده موضوع كنت عايز أتكلم فيه من زمان و رسالة للزملاء الأطباء، بعد انتشار تطبيقات معرفة رقم المتصل.

التطبيقات دي بتتعرف على الأرقام من خلال احنا مسميينهم إيه و بالتالي لو كتبت و سجلت اسم مريض عندك بالمرض بتاعه هيظهر في التطبيقات زي اللي فوق كده وهيبقى فيها أكتر من إشكالية.

الأولى هو كشف سر مؤتمن عليه من أسرار المرضي breaching confidentiality و ده قانونياً و أخلاقياً مجرم.

ثانياً ضرر نفسي بشع هيقع على عاتق المريض لما يلاقي نفسه متسمي باسم المرض بتاعه و ما أدراك إيه الجرح العميق اللي هتعمله له.

المرضى المزمنين بيبقى نفسيتهم زي الإزاز بالضبط و محتاجين اللي يطبطب عليهم، فما بال بقى نعمل اللي يكسر نفسيتهم.

رسالة للزملاء بلاش الموضوع ده و أنا عارف إنه ممكن يغيب عن ذهنكم بس خدوا بالكم

د. أحمد زناته

مفيش ادني علاقة بين انك شاطر وإنك متربي
الشطارة شيء مكتسب ( مجهودك يعني ) على توفيق من ربنا
إنما التربية صعب تثبت عليك لو مشفتهاش قبل كده
ممكن تكون شاطر اوي بس اهلك معرفوش يربّوك
وفي كل الحالات التربية أهم من الشطارة

Dr hazem abdeltawab

من اسبوعين دخل حالة فالطوارئ بنت 21 سنة..

والدة من اقل من 48 ساعة قيصري،
جاية ب غيبوبة
درجة وعي 7/15،
ضغط 70/40
اكسجين 33٪ ،
نبض 190

المريضة عاملة اشعة علي الصدر ظاهرة التهاب رئوي عنيف جدا
المريضة دخلت الرعاية مباشرة..
زميل لينا استقبلها
فور دخولها الرعاية اتوقفت عضلة القلب..
اشتغل عليها بسرعة جدا..
رجعت بعد حوالي دقيقة ونص
اتحطت علي جهاز تنفس صناعي،
ركب قسطرة وريدية عوضها محاليل وأدوية ترفع الضغط،

حالة البنت كانت سيئة جدا جدا

اول ما شكينا فيه كان جلطة رئوية بعد الولادة
حالتها مكتتش تسمح ابدا بانها تعمل اشعة مقطعية علي الصدر بالصبغة للتشخيص..

ودا يعتبر اهم عامل في تشخيص جلطات الاوردة الرئوية

اعتمدنا عالتحاليل االي طلعت

الD-dimer كان 15
الferritin كان 5 أضعاف معدلة الطبيعي

بدانا فورا ادوية سيولة ومضادات حيوية
لان كان في التهاب رئوي قوي لانها شرقت بافرازاتها،

كنا بنبات معاها فالاوضة
ومقعدين تمريض كل دوره انه قاعد جنبها عالاجهزة

مكنتش في درجة وعي تحتاج مخدر انها تنام
وهي علي جهاز التنفس الصناعي

كنا كلنا بنكلم بعض نتطمن عليها
ونسال هي عاملة ايه
ولو احتاجت حاجة نجيبهالها

جوزها وابوها وامها كانو هيتجننو عليها
بنتها اللي ولدتها مشافتهاش،
اهتمينا معاها بكل تفصيلة..
بكل نقطة بكل حركة..
مكناش بنسيب فرصة لاحتمالية واحد فالمية لحاجة لدرجة ان ابوها قالي فمرة
يادكتور بنتي لو ماتت حتي
انا هاجي اشكركو لاني معرفش انا عملت ايه ف حياتي يوقفلي ناس زيكو خصوصا د. عادل (اخصائي اليوم اللي استقبل الحالة)..

الجميل ان البنت دي روحت النهاردة بيتها
وهي شايلة بنتها علي دراعها

روحت بعد ما قلبها توقف دقيقة ونص
وكانت جاية بضغط شبه مش مسموع وجلطة فالرئة

روحت علشان تقعد مع بنتها لاول مرة ف بيتهم وتاخدها ف حضنها🩵

المنظر والموقف دا
مفيش حد فالدنيا
ممكن يقدر يجازي حد ماديا
بقدر الاحساس اللي حسيناه ساعتها.

Dr Omar_Elkassas

من باب التوفير
يطلب  بعض الاطباء تحليل ALT  AST
فقط
وذلك علي اعتباره وظايف كبد
مستوي الانزيمات  ليس هو وظيفة الكبد
تحليل  وظايف الكبد الكاملة
يشمل
نسبة الالبيومين وهو وظيفة الكبد التصنيعية
و نسبة البيليروبين ( الصفراء) وهي وظيفته  في التعامل مع السموم
الانزيمات قد تكون طبيعية مع فشل كامل للكبد

وقد تكون مرتفعة
ولا تقلق
ولا تدعو لتأجيل  الجراحة

د السيد المر

لو جاتلك حالة Severe anaphylaxis وأخدت IM adrenaline والحمد لله اتحسنت هل هتروحها؟؟

الجواب: لا.
حالات ال Severe anaphylaxis لو كان عندها Bronchospasm أو laryngeal spasm أو signs of shock وأخدت IM adrenaline سواءاً مرة أو أكتر من مرة يبقي لازم تعملها متابعة علي الأقل من ٦ ل ٨ ساعات وفي بعض الأحيان ٢٤ ساعة.

ال Anaphylaxis بيكون فيه مرحلتين. Early and late phase. ال Early phase دي بتحصل علي طول بعد التعرض لل Allergen وممكن تستمر لساعة وبيحصل release لل Histamine and tryptase علشان كده غالباً هتلاقي high tryptase level.

ال Late phase دي ممكن تحصل بعد ٤ ل٨ ساعات بعد ال early phase وممكن المريض يكون اتحسن تماماً وممكن تستمر ل ٢٤ ساعة وأعراضها ممكن تكون نفس أعراض ال Early phase أو كمان ممكن تكون more severe symptoms ونحتاج ندي IM adrenaline تآني وممكن أكتر من مرة. ال late phase بتكون نتيجة ال Release of prostaglandins, leukotrienes and cytokines.

علشان كده لازم المريض بتاع ال Anaphylaxis ميمشيش بعد ما يتحسن من ال Early phase ويفضل متابعة علي الأقل من ٦ ل ٨ ساعات.

د /وليد المرواني

لما ربنا يكرمك بشوية علم و مهارة وتمكن فى مجالك يا ريت متصعبهاش على اللى تحتك وإنتَ بتوصله ليه، يا ريت أصلًا توصله سهل حتى لو وصل لك صعب. يا ريت متوصلهوش برخامة وتناكة وبطريقة إستجواب، وصله بحب وإحترام و ودّ. سهّل عشان ربنا يسهل عليك.
‌‎مهما بلغ علمك فإنتَ ما زلت جاهل وهتلاقى اللى أعلم منك.
‌‎يا ريت متبقاش جاهل وتوكسيك.
‌‎دنيا وهتعدى والله وملعونةٌ ملعونٌ ما فيها سوى ذكرُ الله وما والاه أو عالمًا أو متعلمًا.

د. أحمد الخطيب

طول مانت مقتنع انها مش هتتحل هي فعلًا مش هتتحل !

سيدنا عبد الله بن مسعود بيقول : البلاء مُعلق بالنُطق به "

وافتكر ان " كُل مُتوَقَّع آتٍ "

ربنا سبحانه و تعالى بيقول ( فما ظنكم برب العالمين )

خلي ظنك بربنا خير مهما كانت الامور متعقدة وتأكد تمامًا ان ربنا هيراضيك فالوقت الصح بالحاجة الي نفسك فيها.

أغلب الأطباء - مع احترامي الشديد لهم- لا يفقهون في حالات الأمراض الجلدية والتناسلية أي شئ ، سواء كان بسيط أم معقد ، ده يرجع لأسباب كثيرة منها إننا مدرسناش الجلدية بتعمق في الكلية زيها زي النفسية والأشعة والانف والاذن وغيرهم ...
وكمان بعد التخرج نادرا لما حد بيروح يحضر جلدية في الامتياز إلا لو كان من الأوائل أو اللي مجموعهم عالي جدا  ..

علشان الأسباب دي وغيرها المفروض أي حالة جلدية تجيلك حولها لحد متختص  ، متقعدش تلعب فيها وتعطي مراهم تضر وتفاقم الحالة

لما تكون حالة tinea capitis "kerion" والعيان يروح لدكتور جراح ( واحنا عارفين علاقة الجراحين بالباطنة والطب )  ويقوم يتعامل على انها خراج ويفتح راس الطفل مرة واتنين وتلاتة ...والنتيجة
Cicatricial alopecia ( صلع دائم لن يعالج)

ولما حالة genital wart  تروح لدكتور جراحة ، ويتعامل على انها حالة زوائد جلدية او دهون ،  ويشيلها بالمشرط بكل أريحية، وكل ما تطلع يشيلها تاني وتالت ورابع بدون تشخيص ... لحد ما المرض بقا aggressive and extensive ووصل للشرج ..يقوله روح لدكتور جلدية !!

لما زميل اطفال يعالج طفل صغير عنده candida intertrigo على انها التهابات واكزيما ويعطي الأم topical steroid  ويا ريتها ستيرويد عادية ، إنما super potent steroid اللي هي اصلا contraindicated  في الكبار في أي مكان فيه ثنايات ، والطفل يحصله skin atrophy  يبقي دي جريمة مكتملة الأركان !

ولما زميل اخر يعالج حالة tinea cruris على انها التهابات ، ويعطيها systemic & topical steroid وتتحول resistant and persistant tinea لا تستجيب للعلاج التقليدي  وتبقي مشكلة عيلة كاملة يبقي أكيد فيه خلل عندنا

احنا كأطباء وظيفتنا نكمل بعض ، مش نتدخل في تخصصات بعض بسبب الكبر والغرور وكثيرا حب المال ، ويكون المريض المسكين هو الضحية بالنهاية

إحنا بشوف كل يوم في مستشفى الجامعة مصائب ومضاعفات تبكي وتخجل ،  والله سنسأل جميعا عن كل ضرر سببناه ، وكل قرش أخذناه من المريض بغير وجه حق ، يومها هذا المريض حتما سيقتص منك !

د. أحمد عبد الغني