خيارات علاج التهاب الاعصاب الطرفية السكري
تريبتيزول
تيجريتول
جابابنتين
بريجابالين
ميروجابالين
فينلافاكسين
دولوكسيتين
وليس منها الفا ليبويك اسيد ولا فيتامين ب ولا فيتامين د

المرجع ADA standards of care 2026

د.السيد المر

اليوم تمر الذكرى السادسة لوفاة أخي الغالي.
أسأل الله أن يرحمه رحمةً واسعة، ويغفر له، ويجعل قبره روضةً من رياض الجنة، وأن يرزقه الفردوس الأعلى بغير حساب ولا سابقة عذاب.
أرجو منكم الدعاء له بالرحمة والمغفرة، فدعوة صادقة من قلبٍ محب قد تكون سببًا في رفع درجاته.
اللهم اغفر له وارحمه، وعافه واعفُ عنه، وأكرم نزله، ووسع مدخله، واجمعنا به في جنات النعيم.

‏🚨 الكبد الدهني (Fatty liver)
‏المرتبط باضطراب التمثيل الغذائي (MASLD)

‏مهم لكل مصاب ب :
‏_ السكري ، ما قبل السكري و مقاومة انسولين
‏_ السمنة
‏_ اضطراب الدهون
‏_ ارتفاع ضغط الدم

‏الكبد الدهني المرتبط باضطراب التمثيل الغذائي
‏(MASLD) :

‏و هو عبارة عن وجود دهون بالكبد (>5% من خلايا الكبد ) مع عامل خطورة أيضي واحد على الأقل مثل:

‏_ السمنة
‏_ السكري
‏_ ما قبل السكري و مقاومة انسولين
‏_ اضطراب الدهون
‏_ ارتفاع ضغط الدم

‏مع عدم وجود سبب آخر للكبد الدهني واستهلاك قليل أو معدوم للكحول.

‏يُكتشف غالبًا بالصدفة أثناء التحاليل أو الأشعة.
في
‏🔺الأعراض : غالبًا بدون أعراض.

‏وقد يشتكي بعض المرضى من :
‏_ الإرهاق والتعب (Fatigue)
‏_ الشعور بالإعياء (Malaise)
‏_ ألم أو انزعاج مبهم بالربع العلوي الأيمن من البطن

‏▫️متى أشتبه بوجود الكبد الدهني المرتبط باضطراب التمثيل الغذائي ؟

‏✅ وجود دهون بالكبد بالأشعة
‏✅ ارتفاع غير مفسر بإنزيمات الكبد: ALT/AST
‏✅ وجود عاملين أو أكثر من عوامل الخطورة الأيضية: السمنة ، السكري أو ما قبل السكري
‏اوا ضطراب الدهون
‏✅ وجود قريب من الدرجة الأولى لديه تشمّع بسبب الكبد الدهني المرتبط باضطراب التمثيل الغذائي

‏⚠️ إذا أظهر التقييم وجود تليّف متقدم أو تشمّع:

‏يجب البدء بمتابعة مضاعفات التشمّع مثل:
‏• دوالي المريء
‏(Esophageal Varices)
‏• سرطان الكبد
‏(Hepatocellular Carcinoma)

‏▫️الفحوصات المخبرية :
‏• قد ترتفع إنزيمات الكبد ( ALT و AST ) بشكل بسيط أو متوسط.
‏⚠️ إنزيمات الكبد الطبيعية لا تستبعد المرض.

‏▫️الأشعة : السونار (Ultrasound)
‏غالبًا يُظهر : زيادة صدى الكبد (Hyperechoic liver)
‏الكبد اللامع (Bright liver)
‏وذلك بسبب تراكم الدهون داخل الكبد.

‏▫️التشخيص يعتمد على:

‏1️⃣ وجود عامل خطورة أيضي واحد على الأقل.
‏2️⃣ إثبات وجود دهون بالكبد بالأشعة.
‏3️⃣ استبعاد الأسباب الأخرى لأمراض الكبد.

‏🩺 خزعة الكبد (Liver Biopsy)
‏ليست روتينية وتُستخدم فقط عند عدم وضوح التشخيص.

‏▫️من التصنيفات الحديثة :

‏🔹 التهاب الكبد الدهني المرتبط باضطراب التمثيل الغذائي (MASH) وجود :
‏_ دهون بالكبد
‏_ التهاب وإصابة بخلايا الكبد
‏_ مع او بدون تليّف (Fibrosis)

‏🔹 تشمّع الكبد الناتج عن التهاب الكبد الدهني المرتبط باضطراب التمثيل الغذائي
‏(MASH Cirrhosis)
‏وجود تشمّع مع دليل حالي أو سابق على MASH/MASLD.

‏🔹 مرض الكبد المرتبط باضطراب التمثيل الغذائي والكحول (MetALD)
‏دهون بالكبد + عامل خطورة أيضي + استهلاك كحول متوسط.

‏♦️المصدر UpToDate

د.السيد المر

دايما ماتنساش كلمة " ليه" و انت بتراجع المريض بتاعك ..
- ليه المريض جاي ب DKA.
- ليه المريض حصله pulmonary oedema .
- ليه المريض ال chronic liver disease قرر ييجي ب decompansation النهاردة .
- ليه و ليه و ليه
و الامثلة كتير .. بس المهم انك دايما تسألها مش مجرد تعالج الشئ الظاهري ..
كل كلمة " ليه" معناها investigations هاتتعمل و management هايزيد ..
بالتوفيق للجميع

dr nabih mokhtar

حبايبنا واخواتنا الأطباء حديثي التخرج

لو هقول نصيحة واحدة لأي دكتور حديث التخرج، فهتبقى: متبطلش تتعلم.

التخرج مش نهاية الرحلة، ده أول يوم فيها بجد. والطب من المهن القليلة اللي لو وقفت فيها عن التعلم، بتتأخر حتى لو كنت شاطر.

أول حاجة: حدد أنت رايح فين.
قبل ما تفكر في عيادة أو فلوس أو شهرة، لازم تحدد التخصص اللي هتكمل فيه. ومتختارش عشان فلان قال ده أحسن أو عشان دخله أكبر، اختار الحاجة اللي شايف نفسك تقدر تكمل فيها سنين طويلة وتحب تتعلمها كل يوم.

وفي الغالب هتبقى قدام طريقين كبار:

التخصصات الباطنية (الطب كله من الآخر) علشان تخصصي 😂 أمثال اي
زي الباطنة، الأطفال، الجلدية، النفسية، القلب، الصدر، الكلى واهمم الغدد الصماء والسكري (تحيز عارف 😂) بس بجد التخصص ده حيخليك تفكر كتير وتسرح وحرفيا سحر
في برضه العنايه من التخصصات المحببه إلى قلبي برضه بسبب النتيجه اللي بتوصلها لما تلاقيك انقذت عيان حرفيا من الموت بفضل الله .

لو اخترت طريق باطني، لازم تعرف إن سلاحك الأساسي هو العلم والتفكير الإكلينيكي. يعني:

* تقرأ باستمرار.
* تتابع الـ Guidelines الحديثة.
* تحضر مناقشات الحالات.
* تتعلم إزاي توصل للتشخيص الصح، مش تحفظ التشخيصات.
* تتابع المرضى وتتعلم من تطور الحالات واستجابتهم للعلاج.

الدكتور الباطني المتميز هو اللي بيعرف يفكر صح قبل ما يكتب العلاج.
بس دايما خليك مميز الطب العام دلوقتي (بتاع كله) بطل دور على subspeciality تحس انك متميز فيها او برضه مش عيب تحس ان السوق محتاج التخصص ده( مع تحفظي على كلمة سوق)
او تخصص شايف انه حيفيدك لو سافرت بره
⸻

التخصصات الجراحية
زي الجراحة العامة، العظام، النساء والتوليد، المسالك، الأنف والأذن، الرمد وغيرها.

في الجراحة، العلم مهم جدًا، لكن المهارة العملية هي اللي بتفرق. ودي بتتبني بالتدريج:

* احضر عمليات كتير.
* اتعلم الخطوات الأساسية لكل إجراء.
* ساعد بإيدك واتدرب تحت إشراف.
* اسأل عن سبب كل قرار بيتاخد جوه العمليات.
* اصبر على نفسك، لأن مفيش جراح اتولد بيعرف يشتغل.

شوف… ساعد… اعمل تحت إشراف… وبعدها اشتغل باستقلالية.

⸻

طب أتعلم فين؟

* اتعلم من الاستشاري اللي بيحب يعلم.
* اقرأ من مصادر موثوقة ومراجع محترمة.
* احضر المؤتمرات والكورسات اللي فعلاً هتضيف لك.
* ناقش الحالات مع زمايلك وأساتذتك.
* متعتمدش على السوشيال ميديا كمصدر أساسي للمعلومة.
* ومتتكسفش تقول: “أنا محتاج أتعلم.”

⸻

ومتستعجلش على العيادة.

ودي نصيحة مهمة جدًا:

متفتحش عيادة وإنت لسه بتتعلم الأساسيات.

مش عيب إنك تقول “لسه محتاج خبرة”، لكن العيب إنك تحط نفسك في مكان أكبر من إمكانياتك، ويكون العيان هو اللي يدفع الثمن.

ومتفتحش عيادة خارج تخصصك نهائي.

كونك دكتور لا يعني إنك تمارس كل فروع الطب. كل تخصص له علمه وخبرته وتفاصيله الدقيقة.

خليك أمين مع نفسك قبل ما تكون أمين مع المريض.

لو الحالة خارج تخصصك أو خبرتك:

* حولها لزميل متخصص.
* اطلب رأي حد أكبر منك.
* متعتبرش التحويل ضعف أو تقليل منك.

بالعكس… الدكتور الشاطر هو اللي يعرف إمتى يتدخل، وإمتى يطلب مساعدة.

⸻

افتكر دايمًا:

بلاش تاخد فلوس على حاجة إنت عارف إنك مش مؤهل تعملها بالشكل الصحيح.

الفلوس ممكن تيجي في أي وقت، لكن سمعتك المهنية لو اتأذت بسبب قرار غلط، صعب ترجع زي الأول.

والأهم من السمعة… إن فيه عيان وثق فيك، وجالك وهو مستني منك الأمان قبل العلاج.

⸻

طب أحمي نفسي إزاي من المساءلة القانونية؟

* اشتغل في حدود تخصصك وخبرتك.
* وثق كل حاجة كويس في الملف الطبي.
* اشرح للمريض حالته وخطة العلاج والمضاعفات المتوقعة.
* متوعدش بنتائج مضمونة.
* خد الموافقات المطلوبة للإجراءات الطبية.
* حافظ على سرية بيانات المرضى.
* ولو الحالة أكبر من إمكانياتك، حولها في الوقت المناسب.

⸻

طب إزاي أبقى متميز؟

التميز مش إنك تحفظ أكتر، ولا إن عدد المتابعين عندك أكبر.

التميز إنك:

* تسمع للعيان كويس.
* تحترم خوفه وأسئلته.
* تعترف إنك محتاج تتعلم أكتر.
* متكسفش تسأل حد أكبر منك.
* تراجع أخطاءك وتتعلم منها.
* تحترم زمايلك والتمريض وكل أفراد الفريق الطبي.
* تحافظ على ضميرك المهني حتى في أصعب الظروف.

⸻

وفي الآخر…

الطب مش بيزنس سريع، ومش سباق مين يفتح عيادة الأول.

الطب أمانة.

اتعلم كويس… اتمكن من تخصصك… اعرف حدودك… ولما تيجي تشتغل لوحدك، اشتغل وإنت متأكد إنك هتفيد العيان فعلًا.

ممكن تتأخر سنة أو اتنين في فتح عيادتك، لكن متستعجلش وتخسر ضميرك أو تؤذي مريض كان كل ذنبه إنه وثق فيك.

سيب سمعتك تتبني على العلم، والأمانة، واحترامك للمرضى… لأن دي الحاجات الوحيدة اللي بتعيش. ❤️

Dr mostafa aboelhassan

نصيحة للأطباء اللي بيشتغلو في الرعاية المركزة سواء كان ده تخصصهم الاساسي او بيشتغلو في الرعاية كجزء من تخصصهم الباطني او التخدير . حاول دايما انك تدرب في كافة افرع الرعاية المركزة .
متدرب الرعاية المركزة المفروض يتعامل مع كافة الحالات الحرجة من Cardio و ال chest و ال renal و ال neuro و ال GIT و يتعامل مع ال perioperative care و ال trauma و ال toxicology .
لو انت في مكان بيتعامل مع فرع واحد فقط . زي رعاية صدر او surgical ICU او رعاية كبد مثلا . فحاول توسع ال exposure بتاعك في اماكن رعاية اخري .. ده هايفرق معاك جدا .. و بالتوفيق للجميع
dr nabih mokhtar

ثلاثة من البشر… أوعى تخش معاهم في مشاكل حتى لو معاك الحق كله

خلّيني أقولك حاجة الناس الكبيرة اتعلمتها بعد خساير وتعب…
مش كل معــركة تستاهل تدخلها،
وفيه ناس مجرد دخولك معاهم في خلاف… خسارة ليك حتى لو إنت الصح.

أول واحد… الفاضي
اللي لا وراه شغل ولا مسؤولية ولا حياة يخاف عليها،
ده ما عندوش حاجة يخسرها أصلاً،
إنما إنت عندك بيت وشغل وسمعة وحياة كاملة ممكن تتأثر.
هو شغلته المشاكل، ووقته كله فاضي للخـراب،
فأوعى تنزل لمستواه حتى لو ليك حق.

التاني… قلــيل الأصـل
اللي لا ليه كبير يلمه ولا أصل يرجعه،
ده وقت الخلاف ما يعرفش حدود،
يلمّ الناس من كل ناحية ويعمل دوشة وخناقات علشان يثبت نفسه،
وفي الآخر إنت اللي تتعب وتخسر أعصابك ووقتك وكرامتك.

الثالث… السفــيه
وده أخطرهم،
اللي يدخل يحارب بالوكالة،
واحد مش قادر يواجهك يبعتهولك،
فيطلعلك القديم والجديد ويقلب أي موقف حـرب،
لأنه ببساطة ما عندوش عقل يوزن بيه الكلام.

وعلشان كده…
العاقل مش اللي يكسب كل خناقة،
العاقل هو اللي يعرف مين يستاهل يرد عليه ومين لا.

فيه ناس الرد عليهم إهانــة ليك،
وفيه ناس التجاهل معاهم أكبر انتصار.

ابعد عن الفاضي،
وابعد عن قلـيل الأصـل،
وابعد عن السفــيه…
علشان سلامك النفسي أهم من أي معــركة ملهاش لازمة.

معايا حالة دلوقتي
Female patient 28 y not DM, not HTN
History of abortion due to ambilical cord thrombosis
جايه تشتكى من :
Presented with
Headache
Sudden onset progressive from 16 hours
Association with nausea, blurred vision, photophobia
Monoparesis

عملت ليها CT brain طلع free
عملت fundus examination طلع free

طلبت منها تعمل MRI, MRV
ومستنيها تبعتلى الاشعه

انا شاكك فى cerebral venous thrombosis

لأن كان معانا حالة زيها من اسبوع و missed مننا وشخصنها متأخر

موضوع ال headache ده من أرخم ال complain اللى الواحد بيخاف منها

ليه لازم متبطلش مذاكرة و قراءة ؟ ليه الممارسة لوحدها مش كفاية ؟ ❌

لأن الإنسان يرى ما يعلم 👀
العيان اللي جاي بيشتكيلك من أي شكوى عامة صداع ولا إرتجاع ولا أي حاجة ممكن توصفله علاج للعرض اللي عنده وتمشيه
وممكن وانت بتاخد هيستوري تلاحظ علامة في عينيه تفتكر ال xanthelasma اللي انت قرأت عنها من فترة وإنها علامة للـ hypercholesterolemia فتطلبله lipid profile وتمشيه على statin وتحميه من ال MI أو ال Stroke اللي كانت ممكن تحصله لولا توفيق ربنا اللي هداك لمذاكرة الجزئية دي وملاحظة العلامة دي ثم وصف العلاج ده 🤚🏼

لو أنت مكنتش بذلت مجهود في المذاكرة والقراءة واعتمدت على ممارستك فقط كان زمانك فاكر دي حباية بيضا في وش العيان عادي يعني، أو مكنتش هتلاحظها أصلاً لأن عقلك مش مترجم إن دي مشكلة هو فاكرها جزء من الخلفية بتاعة الوش مش أكتر، لأن الإنسان يرى ما يعلم 🤝

د. محمد حسني

لينفق ذو سعة من سعته ..

فإن كانت سعتك في مالك فأطعم .. وإن كانت في علمك فلا تحبسه .. وإن كانت في لين قلبك فإن الكلمة الطيبة صدقة .. وإن كانت في بدنك فإن قضاء حوائج الخلق وإعانة الضعفاء وإماطة الأذى عن الطريق كل ذلك صدقة ..

فانظر أين وسع الله عليك وتصدق ..

بخصوص السؤال عن موضوع الهيستوري انا كنت جاوبت علي السؤال دا علي صراحة لكن تأكيداً علي أهمية الهيستوري خلينا اقولكم عن موقف غير تشخيص مريضه وبالتالي غير خطة العلاج كليا وأنقذ المريضه فعلاً من مصير مجهول لا يعمله إلا الله

من فتره كلموني علي مريضة في سن الأربعين عندها مرض السكر جايه الطوارئ في غيبوية بسبب انخفاض مستوي السكر في الدم المسعفين لما وصلو بيتها قاسو سكرها كان ستين فادوها جلوكوز وريدي في البيت وجابوها المستشفى قاسو سكرها كان ستين برضو وادوها جلوكوز بس لسه مفاقتش وكده محتاجه رعاية

فنزلت أشوفها لقيتها فعلاً عندها اضطراب في درجة الوعي مبتردش علي حد مفتحه عينها بس مفيش اي تواصل مع اللي حواليها تبصلها مثلا تنادي عليها متبصش ليك
no eye contact
بس كان الغريب بالنسبالي إن لا دي مش أعراض غيبوية السكر متجيش كده غيبوية السكر تلاقي المريض ضربات القلب سريعه وعرق شديد ادرينالين بقي شغال ع اخره عشان ينقذ المريض

انما دي كانت جايه مفيش نقطة عرق ضربات القلب هاديه
أينعم ممكن غيبوية السكر تيجي والمريض يكون هادي ومفيش عرق ولا حاجه زي حالات ال
Autonomic Neuropathy
بس لا برضو مش مطمن أنها غيبوبة سكر وبعدين سكرها ستين مش اربعين ولا تلاتين مثلاً عشان يفسر كل دا

فرجعت للأهل بدأت اسألهم هي بيجيبها النوبات دي كتير أو سكرها بيقل كتير ؟!قالولي لا دي اول مره
قولتلهم طاب اي ادويه السكر اللي ماشيه عليها طلعت أدوية مبتعملش hypoglycemia
مفيش فيهم
sulfonylurea زي اماريل او دياميكررون مثلا
قولتلهم طاب هل كان عندها ضغط نفسي الأيام اللي فاتت ؟قالو اه في شوية مشاكل الفتره دي
قولتلهم طاب هل بتاخد اي أدوية تانيه زي مهدئات مثلاً ؟!قالو اه من فتره كانت اخدت نايت كالم قبل النوم بس موقفاه من فتره مبتاخدوش
قولتلهم طاب في حد في البيت دلوقتي؟! قالوا اه ليه خير ؟! قولتلهم ممكن تتصلو بيهم خليهم يدورو لو اخدت منه النهارده
بالفعل كلمو بنتها راحت دورت في اوضة المريضه لقت فعلاً في علبة نايت كالم مفتوحه وواخده شريطين منها سالتها تركيز القرص كام قالت 3مجم والشريط فيه عشر اقرص يعني واخده عشرين قرص في تلاته بنتكلم في ستين مجم ودي جرعه عاليه جداً تعملها كل المشاكل دي اضطراب بدرجة الوعي توصل أنها تعملها فشل في التنفس كمان تؤدي للوفاه
وهنا تغير التشخيص تماما من غيبوية سكر قليل وهنعوض شوية جلوكوز وخلاص
لمريضة واخده جرعة سامه من علاج مهدئ ومحتاجه تاخد فحم
ويتعملها غسيل معده وحجز تحت إشراف قسم السموم وإجراءات تانيه خالص
وفعلاً تم عمل اللازم وتوجيه للمريضة للمكان الصح
واتمني أنها تكون عدت بسلام إن شاءالله

فشوف شوية تفاصيل صغيره في الهيستوري تفرق قد اي ؟! فنجاح اي طبيب وعلاج أي مريض صح يبدأ من اخذ التاريخ المرضي للمريض بشكل صحيح
فنهتم جداً جداً بالتاريخ المرضي

حفظكم الله بحفظه ❤️

د. محمد السيد

ونصيحتي لمن لا يعرف،، أن يستعين بمن يعرف...

- وقديما قالوا : "العاقل الذي يُقَدِّرُ نفسه، هو مَن لا يتعدَّى حدود ما يعرف، حتى لا يكون غرضًا للذمِّ، أو اللوم، أو الإثم"..

- وأبلغ ما قيل في "لا أدري" أنها نصف العلم...

"نصف العلم : لا أدري"..

تصبحون على كل خير..

د. إسلام شوقي

في حاجات بتتأخر مش علشان مش ليك…
بتتأخر علشان بتيجي ومعاها خير فوق اللي كنت مستنيه.

الرزق اللي اتأخر .. إتأخر على توقيتك انت مش التوقيت اللي ربنا كاتبه و لما بييجي .. بييجي وهو شايل تعويض كبير،
وبيعلمك الصبر، وبيجهزلك قلبك تستقبله صح.

ماتستعجلش…
اللي ربنا كاتبه ليك، هيوصلك في وقته،
ومش أي وقت… ده الوقت اللي فيه قلبك وعقلك ومستقبلك مستعدين للهدية.
...
د.ياسين مدحت🌹

كان في مريض انبارح في الطوارئ زميلي بيكشف عليه
أول ما شافني قالي يا دكتور مش فاكرني
أنت كشفت عليا هنا فى رمضان اللي فات ومن بعدها وأنا تعبان
قولتله خير يا حج ايه اللى حصل
قالي أنت قولتلي إني عندي مايه على الرئه وقولتلي روح مستشفى ... تتابع معاهم
ومن يومها وانا بيسحبوا مني تحاليل وعينات لحد ما تعبت
الدكاتره شاكيين إنه عنده tumor ولا TB
وبيطلبوا منه فحوصات

الراجل بدل ما يشكرنى إني وجهته صح كان فاضل شويه ويدعي عليا

موضوع كشف العورات في المستشفيات مش مجرد إجراء طبي .. ده اختبار حقيقي لأمانتك ومهنيتك كطبيب أو تمريض.

المريض لما بيدخل المستشفى بيبقى في أضعف حالاته .. وواجبنا نحفظ كرامته زي ما بنحفظ حياته.

القاعدة الفقهية والطبية بتقول: "الضرورات تبيح المحظورات، والضرورة تقدر بقدرها".
يعني إيه؟
يعني بنكشف اللي محتاجينه بس، وللوقت اللي محتاجينه بس، وللشخص اللي هيعمل الإجراء بس.
اكشف مكان الإجراء بس
خلصت الإجراء بتاعك تستر المريض فوراً
الموجود في الغرفة هما الأشخاص اللي بيعملوا الإجراء و بس .. و امنع دخول أي حد تاني.

طيب إيه هي أهم القواعد لحماية خصوصية المريض؟

قاعدة "الستر الجزئي" :
ممنوع المريض يتعرى تماماً عشان نركب قسطرة بولية أو ندي حقنة عضل أو هنغير علي جرح.
الصح اننا بنكشف المنطقة اللي هنشتغل فيها "فقط" ، وبمجرد ما نخلص بنغطيها فوراً
استخدم ملاية (Drape) أو فوطة لتغطية باقي الجسم.

الستاير والخصوصية (The Curtains) :
قبل ما تلمس هدوم المريض اتأكد إن الستارة مقفولة تماماً من كل الجوانب والباب مقفول .. ولو فيه مرافقين مش ضروري وجودهم، اطلب منهم الخروج بلطف.

الاستئذان (Permission) :
حتى لو المريض "غائب عن الوعي" استأذن منه
ده بيخلق هيبة للمريض ويخلي اللي واقفين معاك يحترموا خصوصيته.

الجنس المماثل (Same Gender) :
الأصل إن التمريض "الرجل" يتعامل مع "الرجال" .. والتمريض "السيدات" مع "السيدات"، إلا في حالات الطوارئ القصوى أو عدم توفر بديل.
لو مريضة محتاجة إجراء محرج، حاول تخلي زميلة هي اللي تعمله، أو تكون موجودة معاك .

أخطاء بنشوفها ولازم نتجنبها:

الهزار والضحك:
ممنوع تماماً الهزار أو الكلام الجانبي أثناء كشف عورة المريض، ده قمة قلة الأدب المهني.

التعود (Desensitization):
مع الوقت بنتعود على شكل الأجسام، فممكن ننسى نغطي المريض وهو رايح الأشعة أو وهو خارج من العمليات. خليك واعي دايماً! المريض بيحس بكل لحظة عري وبيحزن عليها.

دخول الغرفة فجأة:
دايماً خبط على الباب وانتظر ثواني قبل الدخول، ممكن يكون المريض بيغير هدومه أو في وضع مش حابب حد غريب يشوفه فيه.

أخطاء بنشوفها في "لبس المريض": ترك الظهر "مكشوف": من حق المريض وكرامته إن الجاون يكون مقفول كويس من الظهر ب جاون عكسي لو المريض هيتحرك أو هيقعد، عشان نحافظ على خصوصيته (Privacy).

فيه علم كامل اسمه Psychoneuroimmunology بيثبت إن الحالة النفسية (الشعور بالخجل، العجز، أو انتهاك الخصوصية) بتأثر مباشرة على سرعة التئام الجروح واستجابة الجسم للعلاج.

المريض اللي حاسس إنه "مكشوف" أو "مُهان" كرامته بيبقى في حالة قلق دائم، وده بيصعب مهمة الطاقم الطبي في استقرار علاماته الحيوية.

من أهم أسباب التوتر Stress والICU Psychosis هي إحساس المريض إنه مستباح وإنه مش في بيئة آمنة وما عندهوش أي خصوصية. وخاصة كبار السن

وخد بالك جدا إن ما فيش حد من العمال أو الأمن أو المرافقين أو مرافقين الحالات التانية أو المرضي اللي قصاد الحالة أو حد ماشي في الطرقة أو أي حد شغال في المستشفي. إنه يشوف جزء مكشوف بدون داعي من المريض أو المريضة اللي انت مسؤل عنها أو أي مريضة تانية في القسم. وخصوصا لو المريضة مش واعية لإن إنت اللي هتتسأل عنها يوم القيامة.

رسالتي لكل زميل:
"يا صديقي، جسد المريض أمانة في رقبتك. تخيل إن المريض ده هو أبوك أو أخوك، هل هترضى حد يشوف عورته بدون داعي؟ الستر بركة في الشغل وفي الحياة."

✍مستر احمد عاطف