▌#TVB 廣告近年愈趨單一，有觀眾就慨嘆無綫廣告客戶流失嚴重，以前單係啤酒廣告都有X力、X力士、「最好飲啤酒」、「神獸」等，化妝品又有日本、美國、法國跨國公司，明珠台嘅高消費品廣告又同翡翠台相映生輝，但如今比較深刻嘅得防騙易、360平安鐘、珠海五月花酒樓等。有網民亦和議，而家TVB廣告越嚟越多養生藥品廣告，越嚟越似「#廣東台」。

▌確實，自武漢疫情爆發後，TVB廣告就遠不如其他電視台，甚至戶外廣告板有趣，廣告唔係保健、借貸、家用品、長者產品，就係士多/鄰住買優惠、政府廣告或者朱凱婷著住晚裝講「植入式廣告宣傳，TVB營業部幫到你」。通關之後廣告範疇雖然多咗，不過多數係旅行社及中国旅遊廣告，例如珠海酒樓、深圳口腔、大灣區乜乜、乜乜水上樂園等，唔知呢啲廣告會加深定扭轉各位對「廣東台」、「#老人台」嘅印象？