《胃仙U專頁無人問津，要請水軍留言？》

▌#胃仙U 同佢姊妹 #雙飛人 啲廣告平時都好鍾意懶好笑，不過胃仙U嗰啲多數就極尷尬，大家平時睇電視廣告都知喇，員工問老闆讀咩U，老闆答佢「胃仙U」，Facebook嗰啲就更加不堪，將所有近期熱話人物加個「胃痛」環節就出Post，例如托住汽車零件嘅阿婆胃痛、天竺鼠車車胃痛、《今際之國》角色胃痛，全部食完胃仙U就無事喇！由於貼文過份尷尬，所以多數都無人問津，可謂廣告界毒L，懷疑因為咁，胃仙U近月請咗班水軍嚟留言遮醜。

▌以呢個阿婆擔住汽車零件嘅圖為例，留言嘅好多都係2020年10月6號註冊，Profile無人樣、無Post、唔顯示有幾多個朋友等等，除咗水軍之外我都諗唔到有咩可能。不過值得一讚嘅係，啲留言比較似人話，而且作嘅人名都比較有心思，相信呢批水軍價格應該較高，或者係公司員工嚟，如果你哋想知答案嘅話，歡迎去佢哋FB專頁問吓，如果因為肺炎疫情失業嘅話，都可以問吓佢哋請唔請打手。

【胃仙U】
https://www.facebook.com/weisenu
https://pili.app/pg/1wyMPCLDY

▌胃仙U總代理為 #全球藥業，同 #TVB (AKA #老人台) 廣告合作甚廣，包括贊助警匪劇集、聘用藝人代言等，姊妹品牌雙飛人、#攝達 鈣片、#呼佳 都有落電視廣告。