▌今日講吓TVB同ViuTV以外嘅選擇，想介紹大家睇Netflix一套戲《慕尼黑交鋒》（Munich - The Edge of War），呢套係講述《#慕尼黑協定》嘅小說改編電影，歷史大體不變，只係滲入咗諜戰元素，亦令人重新反思張伯倫（時任英國首相）喺呢段歷史中嘅角色（編者覺得係幫佢洗底嘅）。

▌故事圍繞英德兩名外交官Hugh同Paul，佢哋係大學同學兼死黨，喺納粹黨崛起嘅時候因政見不同反目，之後各自為祖國政府效力。

▌1938年，納粹德國不斷擴軍同吞併鄰國土地，而家又要求捷克斯洛伐克（下稱捷克）割讓領土，唔割就開戰，但希特拉承諾，拎埋今次就唔會再搞事。張伯倫係和平主義者，佢想同納粹德國談判，最壞打算係犧牲捷克領土換取世界和平，佢嘅秘書Hugh雖然唔認同，但佢並無話語權。

▌喺大海另一端嘅Paul，佢曾經追隨過希特拉，更因此同Hugh反目，但後尾因為中咗「回力鏢」所以加入地下抵抗組織。機緣巧合之下，佢拎到份文件證明希特拉講大話，希特拉由此至終都係想征服世界，無諗住拎埋捷克就收手，佢必須聯絡舊友Hugh，託佢將文件交畀張伯倫，阻止佢簽署《慕尼黑協定》，之後就由德國國防軍策動政變，拘捕希特拉。就係因為咁，毫無間諜經驗嘅Hugh被軍情六處委派去慕尼黑同Paul接頭，究竟點解Paul會忽然間反納粹？呢份文件可以為歷史帶嚟咩改變？呢個等大家自己睇。

▌《慕尼黑交鋒》嘅道具、場景、CG都非常像真，雖然無乜動作場面，但諜戰嘅緊張感亦足以彌補，時代背景同今日有啲相似，同樣係東歐國家嘅烏克蘭如今正面對俄軍迫近，到底西方國家會唔會再一次犧牲佢嚟換取「和平」？地球之上，亦有另一個國家意欲征服星辰大海，大家又意唔意識到呢個危機？另外有一幕Hugh問Paul點解要以身犯險對抗希特拉編者都好深刻，Paul答佢，我哋無辦法選擇喺邊個時代出世，我哋唯一嘅選擇係點樣回應，我一定要站起反抗，呢個係我嘅責任(We don’t choose the times we live in, the only choice we have is how we respond.)。呢份豪氣壯志，令人聯想起某幅單車gif圖。

▌如果想知點解呢套戲係幫張伯倫洗底，以下含有劇透
https://www.facebook.com/sayno4tvb2.0/photos/a.112777623771951/487745906275119/