▌尋日，有個名為「AfterClass Vlog」嘅Youtube頻道上載咗條《五年前 Yumi 鍾柔美 為香港警察打氣的合唱歌 ! 》嘅MV，入面見到TVB藝人 #張彥博 拍住年僅10歲嘅 #鍾柔美，同埋 #小羞羞女團 喺八鄉少年警訊中心唱歌、模擬鑑證同射槍，之後仲播出連串學警受訓片段，包括步操、體能訓練同防暴訓練等。該段MV引起網民嘩然，目前正於網路上廣傳。

▌翻查資料，呢首歌叫做《少年行者》，係少年警訊嘅主題曲，大約於2017年拍攝，從歌詞「願某天跟你，成為領袖」、「滅惡的好友，從無退後」睇得出，呢首歌係鼓勵年輕人參加少年警訊、投考警察同埋讚頌警察。

▌雖說 #聲夢傳奇 嘅鍾柔美真係拍過幫警察打氣嘅MV，但重新上傳呢段片嘅「粉絲」用心亦係有啲險惡，聲夢粉絲向來高舉「唔好咩都政治化」、「人哋只係細路女」嘅大旗，但佢就偏偏反其道而行，將鍾柔美，甚至成個 #放學女團 強行拖入政治漩渦，原MV明明講少年警訊，佢就故意剪接警察訓練學院片段入去，明顯「靠害」，聲夢有啲咁嘅Fans，前途堪虞。

▌小編就認為，雖然2017年已經發生咗雨傘運動、旺角騷亂，但10歲𡃁妹確實未必有能力理解事件，就算佢真係有拍撐警MV，都係佢父母嘅決定。不過如果講到加入 #TVB 呢件事呢，14歲女應該識諗嘢，兜唔到。