▌《#東張西望》係廣告雜誌就人所共知，加上佢旗下網購 #士多、#鄰住買 喺自己落咗1.3億廣告費（左手交右手），所以更加要頻頻宣傳，喺1月18號嗰集《東張》，佢哋為咗幫士多嘅KF94口罩促銷，就訪問咗港大化學系博士K. Kwong（#鄺士山），但K. Kwong喺訪問當中多番強調「真假KF94」呢樣嘢，令人感覺非常奇怪。

▌呢個廣告專題嘅第一節係強調Omicron嘅危機，可以skip，第二段係訪問兩個市民點揀口罩，其中一個係戴KF94，對方稱KF94「安全啲、舒服啲」，呢部份相信係為之後KF94廣告鋪路。第三節，吳幸美對住鏡頭講，外科口罩會漏氣、N95口罩太貴，並且留下設問句，有無其他口罩係戴落去安全又舒適？鏡頭一轉，見到K. Kwong「回答」KF94、中国KN95口罩同其他平面口罩，但其實佢係講緊「過濾率唔係好大分別」，最重要係個貼面程度，換言之，K. Kwong唔係回答緊頭先吳幸美嘅問題，呢一幕有少少tricky，不過唔係重點。

▌咁到底邊啲口罩係貼面又舒適？我唔知K. Kwong講咗幾多個答案，但下一個鏡頭K. Kwong唔係答邊款口罩貼面，而係答緊「如果係真嘅KF94，係咪真係貼面」，之後嘅鏡頭亦係反覆強調真假，到底主持 #吳幸美 問咗咩問題？我哋唔知，但你可以睇吓呢一節有幾奇怪：

「如果一般喺韓國出嘅，咁理論上如果佢印得KF94，真係韓國嘅呢，就應該做咗Fit Test(貼面測試)，大概漏氣率係11%之內。」
「如果真係KF94呢，Korean Filter，即係中文譯出嚟就韓國濾心，即係韓國嘅口罩嚟。」
「以我所知，無任何一間香港整嘅廠嘅呢一類口罩呢，係真係拎去韓國做過測試，咁即係話如果你喺香港打正招牌話香港產嘅KF94呢，就，一定唔係嚟㗎喇(一定不是真的)。」

之後，鏡頭轉咗去解釋KF94嘅結構，同埋主持喺士多購買KF94嘅過程，一個以社會專題包裝嘅植入式廣告又完美誕生。