多謝 #TVB 同 #曾志偉 先生近日嘅關注，令我哋啲Post又多咗人睇🙏🏻

我哋好多時候講嘅題材都係原創、網民報料、炒唔起、傳媒忽略或者唔想報導，例如謝東閔疑似危駕無人機、《智能愛人》疑似抄襲、偏頗新聞系列、東張西望誤人系列、藝人動向等，而呢啲Post嘅觸及率(Reach Rate)經常都有十萬、幾十萬，但我哋專頁仲係得56,500人讚好咋！🥺

我哋嚟緊打算寫個「#無綫欺凌事件簿」，講述無綫如何自恃「大台」，#欺凌 員工同其他機構嘅故事，如果你都想繼續睇到我哋寫嘅好文，不妨讚好我哋專頁，畀咗讚好嘅亦都唔爭在Follow埋我哋IG、TG吖好唔好🥺？

Facebook: https://www.facebook.com/sayno4tvb2.0
Instagram: https://www.instagram.com/sayno4tvb
後備專頁: https://www.facebook.com/sayno4cctvb

《#無綫欺凌事件簿 - 余詠珊曾封殺員工譴責暴力聯署？》

▌話說喺2014年10月（雨傘運動期間），親中派搞咗個「藍絲帶運動」集會，無綫記者日頭嘅時候仍然報導緊集會人士「希望香港恢復秩序同和平」，點知夜晚就同攝影師、港台記者一齊俾藍絲襲擊[1]，無綫記者 #冼志 被人扯呔、狀甚痛苦嗰張相，至今仍然廣為流傳[2]。

▌事後，無綫員工(綜藝科編審 #譚小龍)開咗個名為「TVB員工自發 譴責對記者施以暴力」嘅Facebook群組[3]，發起網上聯署譴責暴力，要求管理層保障前線員工安全、暫停採訪相關團體等，獲300多個現職及前員工簽名支持。無綫員工愛護同事心切，不過時任綜藝科總監嘅 #余詠珊 就手指拗出唔拗入，視聯署為「反公司」嘅舉動，下令旗下監製向有份聯署嘅員工「照肺」，以扣減本年花紅作懲罰，又要求即時刪除簽名，否則革職，嚇到有至少14個員工要刪除簽名[4]，當中包括藝人 #蔡康年 （#李綺雯 則係當時唯一企硬唔搣名嘅藝人[5]）。

▌其時，余詠珊亦喺Facebook以「同事及前輩」身份，指摘譚小龍對公司指指點點係「魯莽及無知」，又話收咗公司錢就應該「好好執行工作任務」，而唔係監察公司同對付公司管理層，如果譚小龍準備離開TVB，就唔好拖其他同事落水，鼓勵同事聯署督促公司乜乜乜。譚小龍則喺Facebook堅稱自己無做錯事，聯署嘅目只係希望保護前線同事及譴責暴力，並非要監察公司，佢又向受影響嘅同事道歉，雖然佢喺撰寫聲明之前已經遞咗辭職信，但如果同事想搣名仍然可以聯絡佢，佢會即做。

▌隨住傳媒同網民越嚟越關注事件，矛頭亦全部指向余詠珊，余似有縮沙之意，向傳媒表示只係以「個人名義」發表意見，強調無要求員工刪名，發花紅亦唔係佢職權範圍內，稱「以個人身分又怎會有能力懲罰同事呢？」。無綫電視同日亦發聲明稱余詠珊嘅言論只屬個人看法，但之後又稱「公司管理層立場與余總監一致」[6]，換言之，咪即係無綫認同余詠珊嘅言論囉。如果各位嘅老細畀完說話你哋聽，然之後又話只係「個人意見」，唔知大家又會唔會跟住做呢？

《#無綫欺凌事件簿 - 導演打人高層包庇？》Pt1

【是日任務】Like and Share呢個Post👍🏻❤️

▌TVB嘅職場欺凌唔只有顏色打壓、雪藏封殺，亦曾經發生過肢體暴力，仲受到高層包庇，今次故事主角係有「躁狂導演」之稱嘅前TVB導演 #張永豪，只要大家search佢個名就會見到一籮籮嘅負面新聞，例如打人、爆粗、無交通禮儀，同埋打人，除此之外，佢亦有發火鬧佘詩曼、蒙嘉慧、欣宜，打PA嘅傳聞。

▌故事由較早期開始講，2012年，張永豪喺拍攝劇集《心路GPS》時，因為藝人 #劉蔚萱 頻頻NG，所以張永豪用一個裝過田雞嘅膠袋笠佢個頭，再撼落牆度，令對方爆喊[1]，當時有傳張永豪之所以橫行無忌，係因為佢係 #曾勵珍（時任戲劇製作部總監）嘅表弟。事件發生後，有PA（助理編導）睇唔過眼將影片擺咗上網，無綫高層得悉事件後震怒，曾勵珍（珍姐）帶埋劇集監製開記者會力撐張永豪，話佢只係同對方試戲，又澄清自己唔係張嘅親戚。對於有人將片段擺上網，曾勵珍表示片段經過剪輯，質疑有人別有用心，由於片段係屬於TVB資產，佢會搵出涉事者再交畀公司決定係炒人定報警[2][3]。

▌當時有記者問過幾位藝人點睇呢件事，TVB藝人似乎都避談甚至袒護張永豪，例如 #麥包 就認為係小事一樁；#黎耀祥 話唔做錯嘢唔會俾人鬧，以前鬧你係代表教你嘢；陳展鵬稱自己唔在場；楊潮凱表示唔敢評論對錯；而當時太太為TVB藝人嘅杜汶澤，就為受虐藝人抱不平，佢表示喺張永豪喺亞視嗰陣對方已經「惡名昭彰，精神有問題」，呼籲無綫唔好包庇佢，又話對方應該及早求醫[4]。

▌劉蔚萱被虐事件，最後以「和解」告終，無綫向張永豪發咗警告信，又安排佢同劉蔚萱喺《東張西望》上握手言和，而揭發事件嘅PA，據傳被處以停職[5]。

《#無綫欺凌事件簿 - 導演打人高層包庇？》Pt2

▌張永豪上次執返身彩，但仍然未識收歛，佢喺2016年拍攝《愛回家》期間，因為藝人 #魏焌皓 走位不符預期，所以揸住劇本打佢後腦，仲爆粗鬧佢：「都話咗唔X係咁行咯，要我講幾多次呀？XX老X」[6]。

▌可能張永豪自知闖禍，特登搵咗個機會叫齊一班藝人話要影合照，影完之後同佢哋講：「我知有人想搵記者造我呀，我為咗呢件事好大壓力，但其實我都無打人，係咪呢？」當時龔嘉欣同兩位藝人回應：「無，你都無打過人」，張永豪就話「你哋有人話無就好喇！OK停機」，原來佢一早叫PA影低成個過程，作為自己「無打人」嘅證據，張永豪仲即刻捉住魏焌皓嚟鬧：「你呀！唔好畀我知你篤我呀，我祝你生仔無屎忽呀！」之後仲鬧埋其他人：「Camera Man盲嘅、道具跛嘅、PA廢嘅、演員X嘅！」[7]。

▌唔知張永豪係咪無乜安全感，所以無耐佢又趁拍嘢嗰陣「恐嚇」過百名演員，拎曾勵珍做擋箭牌話：「我知有人想隊我，但我話畀你哋聽，邊個隊我，就即係隊珍姐，TVB係唔可以無咗珍姐嘅！聽到未？」當時在場無人敢發聲，而當初幫張永豪拍片嘅PA之後就引咎辭職，喺Facebook拍片向演員say sorry。不過，唔知今次係事件鬧得太大，定係張永豪已經用盡免死金牌，最終都係被無綫勒令停職。

▌張永豪事件或者只係個別事件，不過從呢件事我哋睇得出TVB係幾咁黑暗，高層同老屎忽藝人見到同事俾人蝦嘅時候，竟然係選擇包庇施虐者、解決提出問題嘅人、blame the victim，最後仲要受害人同施虐者喺《東張西望》嚟個「世紀和解」，簡直係顛倒是非，莫非佢哋睇得獎門人太多，點都要打和？

▌事後各人發展
張永豪，無咩消息，只知道佢上年因為揸車抽頭唔打燈，仲要向人掟嘢爆粗，俾網民拍片公審。

曾勵珍，2016年升任助理總經理（戲劇製作），現年69歲嘅佢仍然同堂親戚曾志偉孖住上。

劉蔚萱、魏焌皓，分別於2014及2018年離開無綫電視。

黎耀祥，至今仍然立足於無綫，近年仲話批評TVB嘅人係無良心。

麥長青，游走於TVB與ViuTV，上年年尾先同TVB拍完嘢，唔夠一個月就上ViuTV《晚吹》話TVB唔尊重佢，最近又返返TVB拍嘢。

———————————
[1]《香港01》：https://www.hk01.com/即時娛樂/450632/前tvb躁狂導演被公審開車-抽頭不打燈-佘詩曼曾鬧爆質素太差
[2]《明報》：https://life.mingpao.com/general/article?issue=20120911&nodeid=1508224050257
[3]《蘋果日報》：https://www.youtube.com/watch?v=u9bYIazNmHQ
[4]《明報》：https://life.mingpao.com/general/article?issue=20120915&nodeid=1508224723788
[5]《東網》：http://the-sun.on.cc/cnt/entertainment/20121016/00470_020.html
[6]《壹傳媒》：https://hittt.blogspot.com/2016/03/face-458-mf_55.html
[7]《蘋果日報》：https://www.youtube.com/watch?v=xnCjtmlJ38k

#TVB #老人台 #東張西望 #欺凌 #職場欺凌