1️⃣《#食腦喪B》開播之後，唔少人都指責佢抄襲美劇《#iZombie》，因為兩者主角都係靠食解剖室嘅人腦充饑，而且食完可以繼承死者記憶。

2️⃣《食腦》首週收視低開18.2點，有望同《金宵大廈2》雙雙加入「TVB十大低收視劇集」，睇嚟「喪屍」被河蟹成溫情嘅「喪B」之後，仍然唔啱師奶同老人。

3️⃣《食腦》冇任何贊助商。該劇於2020年1月開始拍攝，雖然時值抵制TVB運動之高潮，但一個植入式廣告都冇，甚至到今日都冇人肯冠名贊助，情況實屬罕見。

4️⃣ 據《香港01》消息透露，TVB高層視男主角 #何廣沛，男配角 #郭子豪、#方紹聰 為「#TVB試當真」，想打本畀佢哋發展，但如今連番遭遇滑鐵盧，劇集收視唔掂兼冇贊助，綜藝被曾志偉認為「唔好笑」，恐怕冇運行。

【TVB劇集被指抄襲同類事件】

▌《談情說案》(2010)被指抄襲日劇《神探伽俐略》，兩者設定都係男物理教授幫女警查案，當時劇集監製表示，《談》有較多談情部份，而且其中一集有食環署洗街車，《神》並沒有。

▌《踩過界》(2017)被指抄襲美劇《夜魔俠》，兩者設定均為盲人大律師擁有超凡嘅聽覺、嗅覺，甚至可以透過聽人心跳得知對方有無講大話，當時男主角王浩信表示，《踩》有較多法庭戲，而《夜》則係英雄動作片。

首先，我知道《#食腦喪B》嘅主角造型係「參考」美劇《#iZombie》，所以我唔係評論主角啲妝有幾靚仔靚女，我係評論路人喪屍啲化妝、動作設定、世界觀有幾令人出戲。

【化妝】
路人喪屍嘅妝同主角差唔多，係再頹啲咁解，油白塊臉、畫個黑眼圈，但有部份喪屍條頸係肉色嘅，如果演員有地中海，咁頭頂都有機會係肉色，相信係「#奇行種」。

喪屍全身衣服完整，血都無一滴，亦唔覺有傷口，另外，就算你對喪屍棍毆槍射都唔會出血，同《毒魔2》一樣，歡迎收睇無血嘅「大屠殺」。

【動作設定】
點樣令觀眾區分人類同喪屍？啲喪屍會好似演舞台劇咁，動作幅度極大，但呢啲動作大部份都係無意義嘅，純粹係話畀你聽「佢係喪屍」，另外編劇亦同喪屍deal好咗，只會喺劇情有需要下先咬人。

大結局有一幕係講，喪屍化嘅蔣志光同何廣沛發現「喪屍唔會咬喪屍」，所以啲喪屍喺佢哋面前會企喺原地「痙攣」，不過當一班人類僱傭兵捉住蛋糕女 #朱智賢 出現嘅時候，班喪屍仍然唔識郁，企喺度咆哮同捉空氣，直至雙方完成對白，主角團隊打算逃走嘅時候，班喪屍先至解除「禁足」狀態，鳩到無倫。

【世界觀】
香港有喪屍咁大件事，但成套戲都無警察、解放軍，一個幫香港警察賣植入式廣告嘅大好機會，咁就冇咗。

一個被喪屍攻陷咗半年嘅香港，條街仲乾淨過除夕倒數之後人潮散band，但為咗製造凌亂嘅感覺，後期製作仍然加咗啲火種喺條街，例如係可能燒咗半年嘅的士同垃圾堆，以後人類唔洗開採石油，燒香港啲垃圾就得。

結語，雖然《食腦喪B》唔係一套真正嘅喪屍片，但都唔係咁離譜吖嘛？如果大家有時間嘅話，希望你哋可以用喺更有意義嘅事上。