စဉ်ဆက်မပြတ်ဆရာအတတ်ပညာ
ဖွံ့ဖြိုးတိုးတက်ရေးလက်စွဲ (မော်ဂျူး ၁ မှ ၄ အထိ)
CPD_Module 1 to 4

#pdf_download_link

https://drive.google.com/file/d/1IB0THcz9n3ciz4XVeDnknIG3sc1IHVOp/view

ဆရာ/ဆရာမတိုင်း သိထားရမည့်အရာCPD
...................................................
၂၀၁၉ခုနှစ်မှစ၍အထက်တန်းနှင့်အလယ်တန်းအဆင့်သင်
ကျောင်းများမှကျောင်းအုပ်ကြီးများသည်စဉ်ဆက်မပြတ်ဆရာ့
အတတ်ပညာဖွံ့ဖြိုးတိုးတက်ရေးCPD(Continuous ProfessionalDevelopment)ကိုအကောင်
အထည်ဖော်ဆောင်ရွက်ရမှာဖြစ်ပါတယ်စတင်ပြုလုပ်ရမည့်
အတန်းမှာသင်ရိုးသစ်ဖြစ်သည့်ဆဌမတန်းဟုဆိုသော်လည်းနောက်နှစ်သင်ရိုးသစ်ပြောင်းမည့်အတန်းများ
CPDပြုလုပ်ပုံပြုလုပ်နည်းသိရှိသွားစေရန်၊မူပြများလည်းနောင်တချိန်တွင်အလယ်တန်းပြများဖြစ်လာမည့်
အတွက်CPDအကြောင်းမျက်ခြေမပြတ်စေရန်၊CPDအချိန်တွင်ဆွေးနွေးသောသင်နည်းများကိုစနစ်ဟောင်း
အတန်းများမှလည်းမိမိတို့၏သက်ဆိုင်ရာဘာသာရပ်များတွင်အသုံးပြုနိုင်စေရေးအတွက်ထက်/လယ်/မူဆရာ/မ
အားလုံးပါဝင်ဆွေးနွေးသင့်တယ်လို့ယူဆပါတယ်။

"CPD၏အဓိပ္ပါယ်"
-ထက်မြက်သည့်ဆရာမများသည်သင်ကြားသင်ယူမှုဆိုင်ရာအကြောင်အရာအသစ်များကိုစဉ်ဆက်မပြတ်လေ့လာကြသည်။တနည်းအားဖြင့်ထူးချွန်ထက်မြက်သောဆရာ
တစ်ယောက်ဖြစ်လာစေရန်အထောက်အကူပေးသောသင်ယူလေ့လာမှုတိုင်းကိုCPDဟုခေါ်သည်။ဥပမာ-ဆရာ
တစ်ယောက်ဟာသွားရင်းလာရင်းနဲ့ပတ်ဝန်းကျင်ကိုစူးစမ်းလေ့လာတယ်ဗဟုသုတရှာတယ်သိလာတာကိုစာသင်ခန်းထဲမှာသင်ကြားရင်းအသုံးချတယ်(သို့)ကျောင်းစာမဟုတ်ပဲအပြင်စာတွေဖတ်တယ်မှတ်သားတယ်စာသင်ခန်းမှာလက်တွေ့အသုံးချသင်ကြားပေးတယ်ဆိုရင်ဒါသည်လည်းဆရာတစ်ယောက်ကသူ့ကိုယ်သူCPD
လုပ်နေတာပါပဲ။ဒါကတော့တစ်ဦးချင်းCPDလုပ်နည်းလေးပေါ့။
ကျောင်းမှာတော့CPDကိုအဖွဲ့လိုက်စုပေါင်းဆောင်ရွက်ရပါမယ်။

"CPDဆောင်ရွက်မှုအစီအစဉ်"ဆိုတာ
-သက်ဆိုင်ရာဘာသာရပ်ခေါင်းဆောင်(သို့)အတန်းခေါင်းဆောင်ဆရာ/မများ၏ဦးဆောင်မှုဖြင့်ထက်/လယ်ဆရာ/မ
များတစ်လတစ်ကြိမ်တွေ့ရမည်(မူပြများပါထဲ့နိုင်ရင်ပိုကောင်း)
-CPDအချိန်တွင်မော်ဂျူးတစ်ခုကိုဖတ်ခြင်း၊ဆွေးနွေးခြင်း၊သင်ကြားရေးအတွက်အစီအစဉ်ရေးဆွဲခြင်းနှင့်
သုံးသပ်ခြင်းတို့ပါဝင်မည်။
-တစ်ချိန်လျှင်မိနစ်(၉၀)ဆောင်ရွက်ရမည်။
-ကျောင်းအုပ်ကြီးသည် သက်ဆိုင်ရာဘာသာရပ်ခေါင်းဆောင်များကို CPDတွင်ဦးဆောင်နိုင်အောင်လေ့ကျင့်ပေးခြင်း၊ပါဝင်သည့်ဆရာ/မများအားကြီးကြပ်အကဲဖြတ်ခြင်း၊တက်ရောက်
မှုနှင့်တက်ကြွမှုရှိမရှိတို့ကိုစောင့်ကြည့်လေ့လာရမည်တစ်လတစ်ကြိမ်ဆွေးနွေးနိုင်ရေးCPDအချိန်ဇယားရေးဆွဲပေးရမည်။
-CPDအစီအစဉ်တွင်ကျောင်းရှိဆရာ/မအားလုံးပါဝင်ရမည်။

"အချိန်သတ်မှတ်ခြင်း"
-ဘာသာရပ်အဖွဲ့အစည်းအဝေးချိန်တွင်လည်းCPD ကိုဆောင်ရွက်နိုင်သည်ဟုဆိုသည့်အတွက်ယခင်
ဘာသာရပ်မြှင့်တင်ဆွေးနွေးမှု(Board of study) အချိန်တွင်အစားသွင်းဆောင်ရွက်မည်CPDနှင့်Board
of study ၏လုပ်ငန်းသဘောမှာ အတူတူပင်ဖြစ်ပြီး ကွာခြားချက်မှာBoard of study တွင်ဆောင်ရွက်
မည့်လုပ်ငန်းကိုချပြမထားပါယခုCPDတွင်ဆောင်ရွက်ရမည့်လုပ်ငန်းစဉ်ကိုမော်ဂျူးတိုင်းအချိန်နှင့်တကွတိတိကျကျသတ်မှတ်ပေးထားသည်
-ဆောင်ရွက်ရမည့်ကြာချိန်မိနစ်(၉၀) ကျောင်းချိန်အတွင်း၌သာ ဖြစ်ရမည်
ကျောင်းချိန်ပြင်ပဖြစ်ပါကဆရာ/မများအားလုံးပါဝင်ရန်ခက်ခဲမည်။
(ကျောင်းချိန်ပြင်ပမလုပ်ရဟုမပါပါ)
-ကျောင်းအုပ်ကြီးသည်CPDချိန်တွင် ၄င်းနှင့်အတူတွဲဖက်ထမ်းဆောင်ရန်အားကိုးရမည့်ဘာသာပြ ခေါင်းဆောင်တစ်ဦးအာရွေးချယ်ထားရမည်ထိုသူသည်CPD အချိန်ဇယားရေးဆွဲခြင်း၊ကျောင်းအုပ်မအားလပ်ပါကCPD
လုပ်ဆောင်မှုကိုအကဲဖြတ်စောင့်ကြည့်ခြင်း၊လိုအပ်သည်များပံ့ပိုးကူညီခြင်းတို့ဆောင်ရွက်ရမည်။
-အချိန်ဇယားကိုမိမိကျောင်းအစီအစဉ်
ဖြင့်သင့်လျော်သည့်အချိန်ရေးဆွဲရန်
-CPDကိုအခြားကျောင်းများနှင့်ပူးပေါင်း ဆောင်ရွက်နိုင်လျှင်ပိုမိုကောင်းမွန်ပါသည်။ ဥပမာ-မိမိကျောင်းအုပ်စုတွင်းမှသင်္ချာဆရာ/မများအတူတွေ့ဆုံခြင်းသည် ကောင်းမွန်သောသင်ယူလေ့လာမှုများမျှဝေခြင်းဖြစ်လို့ သင်ကြားရေးတိုးတက်စေနိုင်ပါတယ်သို့သော်
အချိန်ပိုမိုလိုအပ်ပါမည်။

"နေရာသတ်မှတ်ခြင်း"
-ဆရာအင်အားများသောအထက်တန်း ကျောင်းများတွင် ဘာသာရပ်အလိုက်ခေါင်းဆောင်များထား၍ တစ်ဘာသာချင်း သက်ဆိုင်ရာဘာသာရပ်အလိုက်ဘာသာရပ်ခေါင်းဆောင်များမှ
ဦးဆောင်၍တစ်ပြိုင်တည်းကျင်းပရမည်။ကျောင်းအုပ်ကြီးသည်အဖွဲ့တိုင်း၏ဆောင်ရွက်မှုကိုစောင့်ကြည့်
လေ့လာကြပ်မတ်ရမည်။ဆောင်ရွက်မည့်နေရာအခက်ခဲရှိပါက (၂)ဘာသာစီတွဲပေးနိုင်သည်။ဥပမာ-လူမှုရေးဘာသာတွဲ၊သိပ္ပံတွဲ
(ဆရာအင်အားနည်းသောကျောင်းများတွင်ဘာသာစုံ ပါဝင်သောအုပ်စုတစ်စုဖွဲ့၍ဆောင်ရွက်နိုင်သလို
ကျောင်းအုပ်စုအတွင်းဘာသာပြများစုပေါင်း၍တွေ့ဆုံဆွေးနွေးနိုင်သည်)

CPDကိုဘယ်လိုဆောင်ရွက်မလဲ????
-CPDဆောင်ရွက်ရမည့်မော်ဂျူး(၁)မှ မော်ဂျူး(၈)ထိရှိပြီး ဇွန်လမှစ၍တစ်လမော်ဂျူးတစ်ခုမော်ဂျူးအစဉ်လိုက်ဆောင်ရွက်ရပါမည်။ဇွန်လတွင်ဆောင်ရွက်ရခြင်းမှာမော်ဂျူး(၁)သည်G-6သင်ရိုးသစ်
ပြဌာန်းစာအုပ်နှင့်ဆရာလမ်းညွှန်စာအုပ်သစ်များ၏ဖွဲ့စည်းပုံနှင့်

စနစ်ဟောင်းစနစ်သစ်ကွဲလွှဲမှု၊အားသာချက်၊အားနည်းချက်တွေကို
လေ့လာဆွေးနွေးကြရမှာဖြစ်ပါတယ်ပြီးမှဇူလိုင်လတွင်မိမိတို့
သင်ကြားမည့်သင်ခန်းစာခေါင်းစဉ်တစ်ခုကိုရွေးချယ်ပြီးသင်ခန်းစာ
အစီအစဉ်ရေးဆွဲရမှာဖြစ်ပါတယ်။ဒါမှသာနောက်ဆုံးပြုလုပ်မယ့်
မော်ဂျူး(၈)CPDသည်ဇန္နဝါရီတွင်ပြုလုပ်ပြီးဖေဖော်ဝါရီတွင်
သင်ကြားရမည့်သင်ခန်းစာခေါင်းစဉ်တစ်ခုကိုပြင်ဆင်လို့ရ
မှာဖြစ်ပါတယ်။ဇွန်လနောက်ဆုံးပတ်လောက်တွင်ပြုလုပ်ပါက
သင့်တော်ပါမည်။
(ဇူလိုင်လမှမော်ဂျူး(၁)လုပ်မည်ဆိုပါကနောက်ဆုံးဖေဖော်ဝါရီတွင်
ပြုလုပ်မည့်မော်ဂျူး(၈)CPDတွင်ရေးဆွဲခဲ့သောသင်ခန်းစာ
အစီအစဉ်ကိုမတ်လမှသွားသင်ရမည်ဖြစ်၍အဆင်မပြေနိုင်ပါ)

-CPDကိုဆောင်ရွက်ပုံအပိုင်း(၄)ပိုင်းဖြင့်ပြုလုပ်ရပါမယ်
ပထမဦးစွာဘာသာရပ်ခေါင်းဆောင်မှဤဆွေးနွေးချိန်မိနစ်(၉၀)ပြီးသွားပါကရရှိသွားမည့်ရလဒ်များကိုအဖွဲ့ဝင်များ
သိအောင်ပြောပြရမည်။

အပိုင်း(၁)အစပျိုးခြင်း
-အစပျိုးခြင်းတွင်ပေးထားသောမော်ဂျူးခေါင်းစဉ်နှင့်နိဒါန်းကိုဖတ်ပါ
ဖတ်ပြီးပါကဆွေးနွေးပါဟူသည့်ခေါင်းစဉ်အောက်တွင်ပါသောမေးခွန်းများကိုဘာသာရပ်ခေါင်းဆောင်မှမေး၍ပါဝင်သူဆရာ/မများ နှင့်အပြန်အလှန်ဆွေးနွေးကြမည်။

အပိုင်း(၂)ချိတ်ဆက်သင်ကြားခြင်း
-ချိတ်ဆက်သင်ကြားခြင်းခေါင်းစဉ်အောက်ရှိနိဒါန်းကိုဖတ်စေမည်
ဖတ်ပြီးလျှင်ဆွေးနွေးပါခေါင်းစဉ်အောက်ရှိမေးခွန်းများကို ဘာသာရပ်ခေါင်းဆောင်မှမေး၍အပြန်အလှန်ဆွေးနွေးကြမည်
ပေးထားသောဖတ်ပါ/ဆွေးနွေးပါအဆင့်တိုင်းကိုဘာသာရပ်ခေါင်း
ဆောင်မှဦးဆောင်ရမည်။

အပိုင်း(၃)စီစဉ်သင်ကြားခြင်း
-စီစဉ်သင်ကြားခြင်းတွင်နောက်လသင်မည့်သင်ခန်းစာများထဲမှ
ခေါင်းစဉ်တစ်ခုကိုရွေးချယ်ပြီးပေးထားသောမော်ဂျူးခေါင်းစဉ်နှင့်
သင်ကြားနည်းများထဲမှမိမိသင်ကြားမည့်သင်ခန်းစာ
အကြောင်းအရာနှင့်ကိုက်ညီမည့်သင်နည်းများ(သို့)လုပ်ငန်းပေး
သင်နည်းများကိုရွေးချယ်၍ထိထိရောက်ရောက်သင်ကြားနိုင်ရန်
မည်သည့်မေးခွန်းအမျိုးအစားများမေးမည်၊မည်သို့group work၊pair workလုပ်ငန်းပေးလုပ်ဆောင်
ခိုင်းမည်ဆိုသည့်5Csထဲမှတစ်ခုခုကိုရသွားစေမည့်မေးခွန်းများပြုစုခြင်း၊မည်ကဲ့သို့ရှင်းလင်းသင်ကြားမည် မည်သည့်သင်ထောက်ကူပစ္စည်းသုံးမည် စသဖြင့်ဘာသာပြဆရာ၏ကိုယ်ပိုင်ဗလာစာအုပ်တွင်စီစဉ်ရေးဆွဲ
ရမည်(ဘာသာပြဆရာစီစဉ်ရေးဆွဲရမည့်ဇယားပုံဖြင့်ပြထားသည်)
သင်ကြားနည်းနှင့်မေးခွန်းထုတ်ရာတွင်အဓိပ္ပါယ်ရှင်းလင်းမှုမရှိပါကဘာသာရပ်ခေါင်းဆောင်နှင့်အဖွဲ့ဝင်ဘာသာပြဆရာ/မများ အားတိုင်ပင်ဆွေးနွေးခြင်းအားဖြင့်ကိုယ့်အခက်အခဲကိုဖြေရှင်းနိုင်
ပြီးနည်းလမ်းသစ်များလည်းရသွားမည်။သင်ခန်းစာအစီအစဉ်ရေးဆွဲပြီးပါကဘာသာရပ်ခေါင်းဆောင်မှ
အဖွဲ့ဝင်များအားအောက်ပါအတိုင်းအသိပေးပြောကြားရမည်။
"ယခုပြင်ဆင်ထားသောသင်ခန်းစာသည်နောက်လတွင်သင်မည့်သင်ခန်းစာဖြစ်သဖြင့်နောက်လတွင်သင်ပြီးပါက
မိမိကိုယ်ကိုဆန်းစစ်ထားသောသင်ကြားခြင်းနှင့်ပတ်သက်သည့်
ဆန်းစစ်ချက်များကိုသင်ခန်းစာအစီအစဉ်ရေးဆွဲထားသည့်ဇယား
အောက်၌ရေးသားထားရမည်။သင်ကြားပြီးလျှင်မိမိကိုယ်ကိုယ်
ဆန်းစစ်ရမည့်မေးခွန်းများမှာ-
-ကျောင်းသား/သူများသည်ဘာတွေကိုသင်ယူခဲ့သနည်း။ 5CsထဲမှCဘယ်နှစ်လုံးပေးခဲ့နိုင်သနည်း ။ ထိုသို့သင်ယူ
ရရှိခဲ့သည်ကိုသင်မည်သို့သိသနည်း။
-သင်သည်ကြိုတင်ပြင်ဆင်ထားသော သင်ကြားမှုအစီအစဉ်အတိုင်း သင်ကြားနိုင်ခဲ့ပါသလား။ ပြောင်းလဲသင်ကြားခဲ့သည်ရှိသော်မည်သည်ကြောင့်
မပြောင်းလဲခဲ့လျှင်လည်းမည်သည်ကြောင့်ဆိုသည်ကို
ရှင်းပြပါ။
-ဤသင်ခန်းစာကိုပြန်လည်သင်ကြားရမည်ဆိုလျှင် မည်သို့သောအပြောင်းအလဲများပြုလုပ်လိုပါသလဲ။စသည့်
မေးခွန်းများဖြင့်မိမိကိုယ်ကိုဆန်းစစ်ပြီးရလဒ်များကို မှတ်တမ်းပြုစုရေးသားထားပြီးနောက်လCPDစချိန်တွင် လုပ်ဖော်ကိုင်ဖက်များနှင့်ဆွေးနွေးခြင်းဖြင့်နောက်လပြင်မည့်
သင်ခန်းစာအတွက်များစွာအကျိုးပြုနိုင်ပါမည်။"ဖြစ်ကြောင်း အသိပေးပြောကြားရမည်။
ဆရာ/မများသည်ယခင်လိုစာသင်ပြီးပြီးရောမဟုတ်ပါမိမိ
သင်ကြားခဲ့ပုံကိုအထက်ဖော်ပြခဲ့သောမေးခွန်းများဖြင့်ကိုယ့်ကိုယ်ကိုပြန်လည်ဆန်းစစ်ရမည်။နောက်လCPDအစတွင်ပြန်ဆွေးနွေးရမည်။

အပိုင်း(၄)ပြန်လှန်သုံးသပ်စဉ်းစား
ဆင်ခြင်ခြင်း
ဤအပိုင်းသည်အဖွဲ့လိုက်ဆွေးနွေးရမည်ဖြစ်သည်။ယခုလအတွက်CPDအစီအစဉ်မှစိတ်ဝင်စားဖွယ်အကောင်း
ဆုံးအကြောင်းအရာ၊အသုံးဝင်ဆုံးအကြောင်းအရာကိုဆွေးနွေးခြင်း
ထပ်မံသိလိုသည်များကိုဆွေးနွေးခြင်းဖြင့်ဆောင်ရွက်ခဲ့သော CPDအစီအစဉ်များကိုပြန်လှန်သုံးသပ်မည်
ထို့နောက်ယခုလအတွက်သင်နည်းအသစ်(၃)မျိုးသင်ကြားရာတွင်
အသုံးပြုနိုင်စေရန်ပေးပါမည်။
မော်ဂျူးတစ်ခုဆွေးနွေးပြီးတိုင်းသင်နည်းအသစ်(၃)မျိုးပေးပြီး
ဘာသာရပ်ခေါင်းဆောင်မှအဖွဲ့ဝင်များအားကျေးဇူးတင်စကားပြော၍ဆွေးနွေးပွဲကိုအဆုံးသတ်ပါမည်။
CPDအစီအစဉ်ကိုအစအဆုံးဦးဆောင်သူမှာဘာသာရပ် ခေါင်းဆောင်ဖြစ်ပြီးကြီးကြပ်သူမှာကျောင်းအုပ်ကြီးဖြစ်သည်။

ဘာသာပြခေါင်းဆောင်များသေချာစွာ

လုပ်ဆောင်ရမည့်အချက်များ........
-CPDကိုအချိန်မှန်စတင်ပြီးအချိန်မှန်ပြီးစီးရမည်။
-ရှင်းရှင်းလင်းလင်းညွှန်ကြားပေးပြီးပါဝင်သည့်ဆရာ/မများ နားလည်မှုရှိမရှိစစ်ဆေးရမည်။
-လူတိုင်းပြောဆိုဆွေးနွေးခွင့်ပေးရမည် အထူးသဖြင့်နှုတ်ဆိတ်ငြိမ်သက်နေသူများပါဝင်ပါစေ။
-အဖွဲ့လိုက်လုပ်ဆောင်ခြင်းနှင့်ဆွေးနွေး
ခြင်းများအတွက်အချိန်လုံလောက်အောင်စီစဉ်ရမည်။
-မေးခွန်းပုံစံမျိုးစုံကိုအသုံးပြုရမည်။
-တစ်ဦးတစ်ယောက်စီ၏ကိုယ်ပိုင် လေ့လာမှု နည်းလမ်းများအားအသိအမှတ်ပြုပါ။
-လုပ်ငန်းစဉ်တစ်ခုပြီးတိုင်းတစ်ဖွဲ့လုံး၏ ဆွေးနွေးချက်များကိုစုစည်းတင်ပြပါ။
-ပါဝင်ပေးကြသောဆရာ/မအားလုံးကို
တက်ကြွစွာပါဝင်ပေးသည့်အတွက်ကျေးဇူးတင်ကြောင်းပြောရမည်စသည့်အချက်များကိုလုပ်ဆောင်ရမည်။
ကျောင်းအုပ်ကြီးမှ ဘာသာရပ်ခေါင်းဆောင်များကို ကူညီပေးရမည်ကျောင်းအုပ်ကြီး၏အားပေးကူညီမှုသည်
အလွန်အရေးကြီးပါသည်။

ကျောင်းအုပ်ကြီးလေ့လာစောင့်ကြည့်
ရမည့်အချက်များ.........
-CPDကိုအချိန်မှန်စနိုင်ခဲ့သလား
-ဆရာ/မများ CPDချိန်တွင် ဆွေးနွေးနိုင်ဖို့သင်ခန်းစာကြိုတင်ဖတ်ခဲ့ရဲ့လား
-အဖွဲ့လိုက်လုပ်ဆောင်မှုများတွင်ပါဝင်ပြုလုပ်ခဲ့ကြသလား
-မေးခွန်းများမေးပြီးအပြန်အလှန်ပြောဆိုခဲ့ကြပါသလား
-သင်ခန်းစာအစီအစဉ်ရေးဆွဲခြင်းကိုအတူလုပ်ဆောင်ခဲ့ပါသလား
-သင်ကြားသင်ယူနည်းအသစ်များထည့်သွင်းအသုံးပြုခဲ့ပါသလား
ယခင်လCPDအချိန်တွင်ပြင်ဆင်ခဲ့သောသင်ခန်းစာကိုသင်ကြားခဲ့ပါပြီလား
-CPD အစီအစဉ်ကိုပိုမိုကောင်းမွန်ရေး အကြံပြုလိုပါသလားစသည့်အချက်များဖြင့်စောင့်ကြည့်ပြီး
ကျောင်းအုပ်ကြီး၏မှတ်ချက်နှင့်အကြံပြုချက်ပါသောCPD မှတ်တမ်းထားရှိရမည်။(ထားရမည့်ဇယားကိုပုံနှင့်ပြထားသည်)

ပါဝင်ဆွေးနွေးသောဘာသာပြများ
လုပ်ဆောင်ရမည့်အချက်.......
-ရှေ့လတွင်မိမိသင်မည့်သင်ခန်းစာ အကြောင်းအရာများကို ကြိုတင်ဖတ်ခဲ့ရမည်သို့မှသာသင်ခန်းစာနှင့်ကိုက်ညီသော သင်နည်းရွေးချယ်တတ်မည်မိမိမရှင်းလင်းသည့်အကြောင်းအရာ
များကိုဘာသာရပ်ခေါင်းဆောင်အားမေးမြန်းနိုင်မည်။သင်ခန်းစာကြိုတင်မဖတ်ခဲ့ပါကဝင်ရောက်ဆွေးနွေးနိုင်
မည်မဟုတ်သလိုမရှင်းလင်းသည်များကိုလည်းမေးတတ်မည် မဟုတ်ပါ။
ဘာသာရပ်ခေါင်းဆောင်သည်အဖွဲ့ဝင်ဘာသာပြဆရာ/မများ မေးသည့်သင်ခန်းစာအကြောင်းအရာများကိုမဖြေကြားနိုင်သေးပါက နောက်တစ်ပတ်မော်ဂျူးတွင်ဖြေကြားပေး
မည့်အကြောင်းပြောပြရမည်။ဘာသာရပ်ခေါင်းဆောင်သည်လည်း
အလုံစုံသိမြင်နိုင်မည်မဟုတ်သည်ကိုအဖွဲ့ဝင်များကနားလည်ပေးရမည်။
ဘာသာရပ်ခေါင်းဆောင်သည်ဖြေကြားပေးနိုင်ရေးအတွက်လေ့လာသင်ယူနေရမည်ဖြစ်ပြီးဘာသာရပ်ခေါင်းဆောင်ကဲ့သို့ဘာသာပြဆရာ/မများကလည်းအမြဲလေ့လာသင်ယူနေကြရမည်။ ကျောင်းသားများလေ့လာသင်ယူရာတွင်ပိုမိုအောင်မြင်စေရေး
အတွက်မိမိတို့၏သင်ကြားရေးအလေ့အကျင့်များကိုပိုမိုကောင်းမွန်အောင်ပြုလုပ်ရမည်မှာဆရာ/မတိုင်း၏တာဝန်သာဖြစ်သည်။ သို့ဖြစ်ပါ၍စဉ်ဆက်မပြတ်ဆရာအတတ်ပညာ
ဖြင့်ကလေးများ၏အနာဂတ်ကိုတည်ဆောက်နိုင်ကြပါစေကြောင်း
ဆုမွန်ကောင်းတောင်းရင်း..........

မိမိသင်ကြားရသော ကလေးတွေကိုကိုယ်ရည်ကိုယ်သွေးမြှင့်တင်ဖို့ 5Csနှင့်ချိတ်ကြစို့။

Collaboration
Communication
Critical thinking
Creativity
Citizenship တွေ ရှင်းပြရင်းပါ။

ပူးပေါင်းဆောင်ရွက်တတ်တဲ့ စိတ်ရှိခြင်း

လူမှုဆက်ဆံရေး အပြောအဆိုကောင်းခြင်း

ဘယ်အရာမဆို လေ့လာသိမြင်နိုင်စွမ်းရှိခြင်း

ဆန်းသစ်တီထွင် ဖန်တီးနိုင်ခြင်း

နိုင်ငံသားကောင်း လူကောင်းပီသစိတ်ရှိခြင်း

ဘာပဲသင်သင် ဒီအချက်ငါးချက်
အနည်းဆုံးတစ်ချက်ချက်
အမြဲသတိကပ် သင်ကြားပေးကြဖို့ပါ။

ထပ်ပြီးတိုက်တွန်းမိတာကတော့
ကလေးတွေကိုသင်ကြားလေ့ကျင့်ပေးမယ့်
ဆရာဆရာမများကိုယ်တိုင် အဲဒီအချက် ၅ ချက် ဦးစွာ ကြိုးစားကျင့်ကြံကြဖို့ပါ။

ကိုယ်ကိုယ်တိုင် မကွဲမပြား ညီညွတ်ပူးပေါင်းဆောင်ရွက်တတ်သော ဆရာဆရာမများဖြစ်ဖို့

ကိုယ်ကိုယ်တိုင် မိဘ ကျောင်းသား ရပ်ရွာ လုပ်ဖော်ကိုင်ဖက်များနဲ့ ပြောဆိုဆက်ဆံရေးကောင်းမွန်သော ဆရာဆရာမများဖြစ်ဖို့

ကိုယ်ကိုယ်တိုင် အရာရာမှာ လေ့လာဆည်းပူး ထိုးထွင်းနားလည် သိမြင်တတ်သော ဆရာဆရာမများဖြစ်ဖို့

ကိုယ်ကိုယ်တိုင် လမ်းဟောင်းမလိုက် လမ်းသစ်ထွင်ရင်း
သင်ကြားနည်းများ ဖန်တီးရင်း ကောင်းသော သင်ကြားနည်းများ ဖန်တီးနိုင်သော ဆရာဆရာမများဖြစ်ဖို့

ကိုယ်ကိုယ်တိုင် စိတ်ဓာတ် စည်းကမ်း ပညာကောင်းပြီး
ကိုယ်ကျင့်သီလ သိက္ခာထိန်းလို့
ဆရာကောင်း ဆရာမြတ် နိုင်ငံ့ဝန်ထမ်းကောင်းများဖြစ်ဖို့

တိုက်တွန်းနှိုးဆော်လိုက်ရပါတော့တယ်။

ပညာသင်ခြင်းဖြစ်စဉ်တစ်ခုမှာ ဆရာများက ပညာပေးသူများဖြစ်ပြီး ကလေးများက ပညာယူသူများဖြစ်ကြပါတယ်။ ဒီဖြစ်စဉ်အရ ဆရာများက ကလေးများကို အကြောင်းအရာတစ်ခုကို သင်ကြားပေးတဲ့အခါ
ကလေးများက လေ့လာသင်ယူမှုပြုကြတဲ့အခါ သင်ကြားသင်ယူမှု အဓိက ဦးတည်ချက်က အသိတစ်ခုခုရရှိသွားခြင်း ခံစားမှုတစ်ခုခုဖြစ်တည်သွားခြင်းနဲ့ ကျွမ်းကျင်မှုတစ်ခုခု ပိုင်ဆိုင်သွားခြင်း ဖြစ်ပါတယ်။
ဒါကို ပညာရှင်များက ပညာသင်ယူမှုအမျိုးအစား (၃) ခု လို့ သတ်မှတ်ကြသလို ပညာသင်ယူမှုနယ်ပယ် (၃) ရပ် အဖြစ် သတ်မှတ်ကြပါတယ်။

စနစ်သစ်သင်ရိုးမှာတော့ ပညာသင်ယူခြင်းသည် သိမှုနယ်ပယ် ခံစားမှုနယ်ပယ် နှင့် ကျွမ်းကျင်မှုနယ်ပယ်ဟူသော အသိဥာဏ်နယ်ပယ်သုံးရပ် ဖွံ့ဖြိုးတိုးတက်အောင် ဆောင်ရွက်ခြင်းဖြစ်သည် လို့
Bloom's Taxonomy ကို ကိုးကား ဖော်ပြထားပါတယ်။

Bloom's Taxonomy အရ

(1) Congnitive Domain
(2) Affective Domain
(3) Psychomotor Domain

လို့ ဖော်ပြပါတယ်။

ဒီ အသိဥာဏ်နယ်ပယ် သုံးရပ်ကို အသေးစိတ်ခွဲခြားကြည့်မယ်ဆိုရင် သင်ခန်းစာတစ်ခုသင်တိုင်း နယ်ပယ်သုံးခုထဲက တစ်ခုကိုပေးမှာလား နှစ်ခုပေးမှာလား သုံးခုလုံးပေးမှာလား ဆိုတာက အဓိကကျသွားပါတော့တယ်။ ဆရာဖြစ်သူက ကလေးများကို အနည်းဆုံး တစ်ခုခုတော့ ပေးကိုပေးရတော့မှာဖြစ်ပါတယ်။

နယ်ပယ်များအလိုက် အဆင့်ဆင့် တိုးတက် မြင့်တင်သင်ကြားသွားခြင်းလည်းဖြစ်ပါတယ်။
ဘယ်အဆင့်ထိပေးမယ် ဘယ်အဆင့်ထိရောက်စေမယ် ဆိုတာကို သင်ပြသူဆရာက သင်ကြားသင်ယူမှု ဦးတည်ချက်ထားရခြင်း ဖြစ်ပါတယ်။
အဆင့်ဆင့် တိုးတက်သွားတဲ့ Level ခြောက်ခုမှာ ဆရာဖြစ်သူရဲ့ ဖန်တီးသင်ကြားနိုင်မှု နဲ့ သင်ခန်းစာဦးတည်ချက်ကို ချိတ်ဆက်နေပါတယ်။

အကြောင်းအရာတစ်ခု သင်ခန်းစာတစ်ခုကို သင်ကြားတဲ့အခါ
ကလေးများရရှိစေတဲ့ Level အဆင့် သတ်မှတ်ချက်များက

မှတ်မိခြင်း (Remember)
နားလည်ခြင်း (Understand)
အသုံးချနိုင်ခြင်း (Apply)
ခွဲခြမ်းစိတ်ဖြာနိုင်ခြင်း (Analyze)
အကဲဖြတ်နိုင်ခြင်း (Evaluate)
ဖန်တီးနိုင်ခြင်း (Create) ဆိုတဲ့

သင်ခန်းစာကို ဘယ်အဆင့်ထိရောက်အောင် သင်မှာလဲ ကလေးများက ဘယ်အဆင့်ထိ ရောက်သွားလဲ ဆိုတာတွေက သင်ခန်းစာအလိုက် ဆရာဖြစ်သူရဲ့ ဖန်တီး ကြိုးစားသင်ပြနိုင်မှုအပေါ်မူတည်သွားပါလိမ့်မယ်။

ဒါကြောင့် သင်ခန်းစာတစ်ခုအတွက်
ကြိုတင်ပြင်ဆင်ခြင်းများ ပြုလုပ်ရန်လိုအပ်သလို သင်ခန်းစာဦးတည်ချက် သင်ယူမှုရလဒ်များ ပေါက်မြောက် အောင်မြင်ရေးမှာ အဓိက အခရာဖြစ်သော ကျွန်တော်တို့ရဲ့ အခန်းကဏ္ဍက သင်ရိုးသစ် စနစ်သစ်မှာ အရေးပါလာတော့မှာ ဖြစ်ပါတော့တယ်။

အဲဒီအပြင် ကိုယ်သင်ကြားမယ့် သင်ခန်းစာအရ
ဘာပေးမှာလဲ ဘယ်အဆင့်ထိပေးမှာလဲ
ဆိုတာကလည်း ဆရာဖြစ်သူရဲ့ သင်ကြားနည်း သင်ကြားမှုစွမ်းရည်ပင် ဖြစ်ပါတော့တယ်။

.
. #What_Is_New_Curriculum_How_And_Why?

🌱#သူတို့တွေက_မေးကြပြီ🌾

· အထက်တန်းသင်ရိုးသစ်ဆိုတာဘာလဲ။

· ကျောင်းတက်တဲ့အခါ ဘာသာတွဲဘယ်လိုရွေးရမလဲ။

· ဘယ်လိုတွေသင်ယူရပြီး၊ ဘာတွေဖြစ်မှာလဲ။

· ဘယ်လိုစစ်ဆေးမလဲ၊ စာမေးပွဲရှိသလား။

· စာတော်၊ စာညံ့နဲ့ခွဲမှာလား။ ပြန်ပြောင်းလို့ရသလား။

အခြေခံပညာ အထက်တန်းသင်ရိုးသစ်သင်တန်းကို တစ်နေ့ကပဲ တက်ရောက်ပြီးစီးခဲ့လို့ အဲဒီ ညနေခင်း.. လမ်းလျှောက်ရင်း စာရေးကိရိယာဆိုင်ကအထွက်မှာ.. စနစ်သစ်သင်ရိုး G 10 ကိုတက်ရမဲ့ တပည့်တသိုက်နဲ့တွေ့ ပါလေရော။ သူတို့တွေ ဝမ်းသာအားရနဲ့ အပေါ်မှာပါတဲ့ မေးခွန်းတွေကို တရစပ်မေးတော့တာပါပဲ။

ကျွန်တော် သိတ်သဘောကျသွားတယ်။ ဒါတွေကို ဖြေနိုင်ဖို့ ဒီသင်တန်းကို ကျွန်တော်တို့ သွားတက်ကြရတာ မဟုတ်လား။ ပြီးတော့ သင်တန်းပို့ချချက်ထဲမှာ အသေ အချာပါတယ်။ “#ပြည်သူလူထုသို့ အသိပညာနှင့်သတင်း အချက်အလက်ဖြန့်ဝေခြင်း” … တဲ့။

(KG သင်ရိုးသစ်တွေ စတင်ခဲ့တဲ့ ၂၀၁၆-၂၀၁၇ ပညာသင် နှစ်တုန်းကဆို ကျောင်းမှာ KG လေးတွေကို စာမသင်ပဲ.. ဆရာ၊ဆရာမတွေက ကလိုက်၊ ဆိုလိုက်၊ ကစားလိုက်တွေ ချည်းပဲလုပ်နေတယ်လို့ အကဲဖြတ်ဝေဖန်ခဲ့ကြတာကို မှတ်မိနေသေးတယ်လေ။ ပြည်သူသေချာမသိခဲ့ကြလို့။)

ဟုတ်ပါတယ်။ သိတ်ကိုမေးသင့်မေးထိုက်တဲ့မေးခွန်းတွေ။ သိခဲ့သမျှ၊ ထပ် လေ့လာခဲ့သမျှ သူတို့စိတ်ကျေနပ်တဲ့အထိ ဖြေပေးလိုက်ရတာ… မိုးကိုစုပ်စုပ်ချုပ်ပါလေရော… ။ တကယ်တော့ သင်ရိုးသစ်မှာဦးတည်ထားတဲ့ နိုင်ငံတကာ စံနှုန်းတွေဟာ ကျွန်တော်တို့ဆီက “ပုတ္တောဝါဒဆုံးမစာ” လို စာမျိုးတွေမှာ အများအားဖြင့်တော့ ပါပြီးသားပါ။

ကျွန်တော်တို့ မြန်မာတွေ ဘယ်ညံ့ခဲ့ပါ့မလဲ။ ဆရာကြီး ဦးအောင်သင်းရဲ့ “ကံ့ကူလက်လှည့်”လို စာအုပ်လေးမှာ တောင် ဆရာကိုဉာဏ်စိန် လိုဆရာမျိုးတွေ တကယ်ရှိခဲ့၊ ရှိနေဆဲပါပဲ။ ကျွန်တော်လည်း အားကျအတုယူဆဲပါပဲ။ (ကျွန်တော့်အဖို့တော့ သင်ရိုးသစ်မှာ စာဘယ်လိုသင်ရ မယ်ဆိုတဲ့ နိုင်ငံတကာကစံနှုန်းတွေမြင်ရ၊ သင်ရလေတိုင်း ဆရာလေးကိုဉာဏ်စိန်ကိုသာ မျက်လုံးထဲပြေးမြင်နေမိ တော့တာ အမှန်ပါ။ ဆရာကိုဉာဏ်စိန်ဟာ I T P R ဆိုတာကို သိချင်မှသိမယ်။ သူသင်သွားတဲ့နည်းဟာ ITPR ပါပဲ။ သူသင်တဲ့နည်းဟာ Bloom စံနှုန်းနဲ့ကိုက်နေတာပဲ။)

ပထမ အတိုဆုံးအဖြေက စနစ်သစ်သင်ရိုးဟာ ကျောင်းသားတွေအတွက် တော်တော်ကောင်းပါတယ်။ နိုင်ငံအနာဂတ်အတွက် တော်တော်ကောင်းပါတယ်။ ဒါပေမဲ့ ပါဝင်ပတ်သက်သူအားလုံး အသေအချာနားလည် မှုနဲ့ သစ္စာရှိရှိလုပ်ကြကိုင်ကြပြီး… အခြေခံပညာပြီးဆုံးလို့ ရလာမဲ့ သက်ဆိုင်ရာရလဒ်အသီးသီးကို လူငယ်တွေရဲ့ ဘဝ၊ အလုပ်အကိုင်အခွင့်အလမ်းတွေမှာ ထိုက်ထိုက် တန်တန်ပြင်ဆင်ပေးထားနိုင်ဖို့လည်း အသေအချာ အရေးကြီးပါတယ်။ ပန်းတိုင်းပွင့်ပါစေ ပေါ့လေ…။

#အထက်တန်းသင်ရိုးသစ်ဆိုတာဘာလဲ

ဒါကတော့ ဖြတ်ပြော၊ ဖြတ်ဖြေမှ နည်းနည်းတိုမယ်။
တကယ်တော့ Unfortunately လို့ပြောရမလိုတောင်ဖြစ် သွားတာပါ။ အထက်တန်းသင်ရိုးသစ် စမဲ့ နှစ်ကျမှ ကိုဗစ် ကပ်ကာလနဲ့ တည့်တည့်တိုးခဲ့တာကိုး။ အခြေခံပညာ သင်ရိုးသစ်ကို ၂၀၁၆-၂၀၁၇ ပညာသင်နှစ်ကနေ KG (သူငယ်တန်း)က စလို့အကောင်အထည်ဖော်ခဲ့တာ အခု က ပဉ္စမမြောက်နှစ်ဖြစ်ပါတယ်။ KG + 5 + 4 + 3 ခေါ်တဲ့ သူငယ်တန်း(၁)နှစ်၊ မူလတန်း(၅)နှစ်၊ အလယ်တန်း(၄) နှစ်၊ အထက်တန်း (၃)နှစ်ပုံစံပေါ့။ နို်ငငံတကာစံနှုန်းအရ အခြေခံပညာကို (၁၂) နှစ် သင်ယူကြရတဲ့သဘောပါ။ ၂၀၂၂-၂၀၂၃ ပညာသင်နှစ်ဆို G 12 ထိအတန်းအားလုံး ပြောင်းလဲပြီးစီးမှာဖြစ်ပါတယ်။

နောက် အသက်အရွယ်အားဖြင့် ၁၇ နှစ်မှာ အခြေခံပညာ ကို ပြီးဆုံးပြီး အဆင့်မြင့်(တက္ကသိုလ်)ပညာကို ဆက်သွား ဖို့ အသင့်ဖြစ်နေတဲ့ (ကိုယ့်ကိုယ်ကိုယ် တာဝန်ယူနိုင်၊ ရွေးကောက်ပွဲတောင် မဲပေးဖို့အသင့်ဖြစ်နေ့နိုင်တဲ့) အသက်အရွယ်လို့ သတ်မှတ်နိုင်ပြီဖြစ်ပါတယ်။

ဒီနှစ်မှာ G 4 - မူလတန်းအဆင့် ၄ (နောက်တစ်နှစ်ဆို မူလတန်းအဆင့် ၅ ပြီးရင်ပြည့်မယ်) G 7 - အလယ်တန်း အဆင့် ၇ (နောက် ၂ နှစ် ဆက်ပြောင်းပြီးမှ အလယ်တန်း ပြည့်မယ်) G 10 - အထက်တန်းအဆင့် ၁၀ စ ပြီပေါ့။ (အထက်တန်း အတွက် နောက်ထပ် G 11, G 12 နှစ်နှစ် ဆက်လက်သင်ယူကြရပါလိမ့်မယ်။ G 12 ပြီးဆုံးတဲ့အခါ အဆင့်မြင့်ပညာကို သွားဖို့ကတော့ ဘယ်လိုပုံစံနဲ့ ရွေးချယ်သတ်မှတ်မယ်ဆိုတာ နောက်မှ ထုတ်ပြန် အသိ ပေးမယ်လို့ ဆိုထားပါတယ်။)

#ကျောင်းတက်တဲ့အခါ_ဘာသာတွဲဘယ်လိုရွေးရမလဲ

သိတ်အရေးကြီးတဲ့မေးခွန်းဖြစ်ပေမဲ့ … အခုအချိန်မှာ တိတိကျကျကြီးဖြေဖို့တော့ နည်းနည်းခက်ပါသေးတယ်။ (ဒီမေးခွန်းအတွက်အဖြေက အခု သင်ရိုးသစ်စစ်စစ်နဲ့ တက်လာနေတဲ့ အခုနှစ် G 4 ကိုရောက်လာတဲ့ မောင်မယ် တွေ ၂၀၂၅-၂၀၂၆ စာသင်နှစ်ရောက်တဲ့အခါကျမှ ကိုယ်တိုင် အလွယ်တကူဆုံးဖြတ်သွားနိုင်မဲ့သဘော) ဆိုတော့ အခုဒီနှစ် G 10 မောင်မယ်တွေအတွက်က အရေးအကြီးဆုံးမေးခွန်းလို့ ဆိုနိုင်ပေမဲ့ လမ်းညွှန်မှု အကြံဉာဏ်ကိုပဲ (ဆရာ၊ ဆရာမ၊ မိဘ၊ တတ်ကျွမ်းနား လည်သူတွေက) ပေးနိုင်မှာဖြစ်ပါတယ်။

အနီးစပ်ဆုံး အညွှန်းကိန်းတွေတော့ သက်ဆိုင်ရာ ကျောင်းအသီးသီးမှာရှိပါတယ်။ အဋ္ဌမတန်းကနေ အခု G 10 ကို ကူးပြောင်းဖို့အတွက် မနှစ်က ဖြေခဲ့တဲ့ ရလဒ်တွေ ပဲဖြစ်ပါတယ်။ အောင်စာရင်းမှာ Grade တွေ ထုတ်ဖော် မကြေညာခဲ့ပေမဲ့ Record တွေက ရှိပြီးသားပါ။ ဘာသာ တွဲရွေးချယ်မှုလုပ်ဖို့ အဲဒီအညွှန်းဘောင်နဲ့ပဲ စပြီးစဉ်းစား ပေးတာက လက်ရှိမှာအနီးစပ်ဆုံးပါပဲ။

ရွေးချယ်ရမဲ့ ဘာသာတွဲ (၄) မျိုးရှိပါတယ်။

STEAMS-1 (Science, Technology, Engineering, Art, Mathematics, Sports-1) (မြန်မာစာ၊ အင်္ဂလိပ်စာ၊ သင်္ချာ၊ ဓာတုဗေဒ၊ ရူပဗေဒ၊ ဇီဝဗေဒ၊ လူမှုရေးသိပ္ပံ ဘာသာ) လူမှုရေးသိပ္ပံဆိုတာ ဘောဂဗေဒ၊ ပထဝီဝင်နဲ့ သမိုင်း သုံးဘာသာကို တစ်တွဲတွဲထားတာပါ။

STEAMS-2 (Science, Technology, Engineering, Art, Mathematics, Sports-1) (မြန်မာစာ၊ အင်္ဂလိပ်စာ၊ သင်္ချာ၊ ဓာတုဗေဒ၊ ရူပဗေဒ၊ ဘောဂဗေဒ၊ ပထဝီဝင်နဲ့ သမိုင်း ပေါင်းစပ်ဘာသာ)

STAMS-1 (Social Science, Technology, Art, Mathematics, Sports-1) (မြန်မာစာ၊ အင်္ဂလိပ်စာ၊ သင်္ချာ၊ ပထဝီဝင်၊ သမိုင်း၊ ဘောဂဗေဒနဲ့ သိပ္ပံဘာသာ)

STAMS-2 (Social Science, Technology, Art, Mathematics, Sports-1) (မြန်မာစာ၊ အင်္ဂလိပ်စာ၊ သင်္ချာ၊ စိတ်ကြိုက်မြန်မာစာ၊ ဘောဂဗေဒ၊ ပထဝီဝင်နဲ့သမိုင်းပေါင်းစပ်ဘာသာ နဲ့ သိပ္ပံဘာသာရပ်)
----- ဆိုတဲ့ (၄)တွဲပါ။

(သိပ္ပံဘာသာရပ်ဆိုတာက ဓာတု၊ ရူပ၊ ဇီဝ သုံးဘာသာ ပေါင်း။ လူမှုရေးသိပ္ပံဆိုတာက ပထဝီဝင်၊ ဘောဂဗေဒနဲ့ သမိုင်း သုံးဘာသာပေါင်း၊ ဒီပုံစံနဲ့ ခပ်ဆင်ဆင် ဘာသာတွဲ စနစ် ဟိုတုန်းကရှိခဲ့ဖူးပါတယ်။ ဒါကဘာကို ဦးတည်လဲဆို သိပ္ပံဘာသာတွဲလို STEAMS 1 ရွေးလိုက်တဲ့ ကျောင်းသား ဟာလည်း လူမှုရေးသိပ္ပံဘာသာတွေကို လုံးလုံးကြီးမသိ တာမျိုး၊ STEAMS 2 ကိုရွေးတဲ့ကျောင်းသားကလည်း သိပံ္ပဘာသာရပ်တွေကို လုံးလုံးမသိတာမျိုးတွေ မဖြစ်စေ တော့တဲ့ သဘောပါ။ Minor ဘာသာတွဲတွေလိုပေါ့။)

STEAMS-1 အတွဲဟာ ဆရာဝန်၊ အင်ဂျင်နီယာ ဆိုင်ရာ တက္ကသိုလ်တွေလို အဆင့်မြင့်ပညာအတွက်ရည်ရွယ် ထားတဲ့ ဘာသာတွဲဖြစ်ပါတယ်။

STEAMS-2 အတွဲက အင်ဂျင်နီယာ၊ စီးပွားရေး၊ ဘူမိဗေဒ၊ ပညာရေး စတဲ့ အဆင့်မြင့်ပညာအတွက် ရည်ရွယ်ထားတဲ့ ဘာသာတွဲဖြစ်ပါတယ်။

STAMS-1 အတွဲကတော့ နိုင်ငံခြားဘာသာတက္ကသိုလ်လို အဆင့်မြင့်ပညာတွေဆက်လက်တက်လိုသူတွေအတွက် သင့်တော်ပါတယ်။

STAMS-2 အတွဲဆိုရင်တော့ အနုပညာဘက်ကို ဝါသနာပါ သူတွေ သင့်တော်တာပေါ့။ စာရေးဆရာ၊ သမိုင်းပညာရှင်၊ အယ်ဒီတာ၊ စာပေအနုပညာလောကနဲ့ အသက်မွေးလိုသူ တွေအတွက် ရွေးချယ်စရာပေါ့။

ဆိုတော့ ဘာသာတွဲရွေးချယ်မှုဟာ အဋ္ဌမတန်းက Grade နဲ့ဆိုင်တယ်လို့ ပြောလို့ရသလို.. မောင်မယ်တို့ရဲ့ သွားချင် တဲ့ အဆင့်မြင့်ပညာရေးမှာ ကိုယ့်အသက်မွေးဝမ်းကျောင်း ကိုဖြစ်စေမဲ့ ဝါသနာအရင်းခံလည်း လိုအပ်နေပါတယ်။

ကျွန်တော့်အမြင်အရဆိုရင် ကျောင်းသားကျောင်းသူတွေ ဘယ်ဘာသာတွဲမှ မရွေးချယ်ခင်မှာ ဘာသာတွဲမိတ်ဆက် ဆိုပြီး (၄) တွဲစလုံးမှာ သင်ယူရမဲ့ သင်ရိုးဝင်ဘာသာတွေ၊ အဲဒီလမ်းကြောင်းအလိုက် ဆက်သွားရမဲ့ အဆင့်မြင့်ပညာ (တက္ကသိုလ်) တွေ၊ အသက်မွေးဝမ်းကျောင်းအခွင့်အလမ်း တွေကို ကလေးတွေနဲ့ သူတို့ မိဘတွေဆီ ဆရာတွေ၊ ကျောင်းတွေကတစ်ဆင့် အသိပညာပေးစေချင်ပါတယ်။

အဲဒီလို Assessment ယူရမဲ့ ဘာသာတွဲကြီး(၄)ခုစလုံးမှာ ကာယ၊ ပန်းချီ၊ ဂီတ ရယ်၊ စာရိတ္တနဲ့ပြည်သူ့နီတိရယ်၊ ဘဝတွက်တာကျွမ်းကျင်စရာ(Life Skills) ဆိုတဲ့ သုံးဘာသာက Assessment မယူဘဲ သင်ကြားသင်ယူမှု အထောက်အကူပြုအဖြစ် ပါဝင်လာမှာဖြစ်ပါတယ်။

#ဘယ်လိုတွေသင်ယူရပြီး_ဘာတွေဖြစ်မှာလဲ

ပုံမှန်စာသင်ခန်း လှုပ်ရှားသက်ဝင်မှုတွေနဲ့ ကွဲပြားနေပါ လိမ့်မယ်။ ရှင်းရှင်းပြောရရင် ပျော်စရာ၊ စိတ်ဝင်စားစရာ ကောင်းနေပါလိမ့်မယ်။ စိတ်ဖိစီးမှုမရှိဘဲ စာကိုသင်ယူ တတ်မြောက်ပြီးသားဖြစ်နေလိမ့်မယ်။ သင်ရိုးသစ်အရ မျှော်မှန်းထားတဲ့ 21st Century Skills- 5Cs ဖြစ်တဲ့ အတူတူပူးပေါင်းဆောင်ရွက်တတ်မှု၊ ပြောဆိုဆက်သွယ် တတ်မှု၊ ဆန်းစစ်ဝေဖန်ဖြေရှင်းတတ်မှု၊ တီထွင်ဖန်တီး တတ်မှု၊ နိုင်ငံသားကောင်းစိတ်ဓာတ်ဖွံ့ဖြိုးမှု တွေရရှိလာ မှာဖြစ်ပါတယ်။

ဒါကြောင့် ဒီသင်ရိုးသစ်နဲ့ ပညာသင်ယူခြင်းဖြစ်စဉ်ကို ဖြတ်သန်းလာတဲ့ လူငယ်တွေရဲ့အနာဂတ်မှာ အခု ကျွန်တော်တို့ မလိုချင်တဲ့ စစ်ပွဲတွေ၊ မုန်းတီးမှုတွေ၊ မသိနားမလည်ခြင်းတွေ၊ အမြင်ကျဉ်းမြောင်းမှုတွေ၊ ကမ္ဘာနဲ့ချီပြီး ဆိုးကျိုးပေးနိုင်တဲ့ လုပ်ရပ်တွေ ကွယ်ပျောက်လျော့နည်းသွားပြီး အတ္တ၊ ပရ မျှတတဲ့ လူသားဆန်တဲ့ ကောင်းကျိုးတွေကို ဖန်တီးနိုင်မဲ့ လူသားအရင်းအမြစ်တွေ ရရှိလာမှာဖြစ်ပါတယ်။

#ဘယ်လိုစစ်ဆေးမလဲ၊ စာမေးပွဲရှိသလား

တိုတိုပြောရရင် စာမေးပွဲဆိုတဲ့ စကားလုံး လုံးဝမရှိ တော့ပါဘူး။ ဒါပေမဲ့ တတ်၊မတတ် စစ်တော့ စစ်ဆေးပါ လိမ့်မယ်။ Assessment လို့သုံးပါတယ်။ စာသင်နေရင်း နေ့စဉ်၊ အချိန်တိုင်း နီးပါးလောက် အကဲဖြတ်သွားပါလိမ့် မယ်။ ဒါပေမဲ့ အရေးအကြီးဆုံး တစ်ချက်ရှိပါတယ်။ Content Based အချက်အလက်တွေ ကျက်မှတ်ခြင်း ထက် Thinking Based တွေးခေါ်စဉ်းစားနိုင်စွမ်းကို အခြေခံထားတာဖြစ်ပါတယ်။ ရမှတ်ကောင်းဖို့ လုံးဝ ဦးတည်ထားတာမျိုးမဟုတ်ဘဲ ရလဒ်ကောင်းဖို့ ဦးတည် ထားတာဖြစ်ပါတယ်။

Grade သတ်မှတ်ချက်မှတ်တမ်းတွေနဲ့ အတန်းကူး ပြောင်းသွားမှာဖြစ်ပြီး Grade 12 ရဲ့ ပညာသင်နှစ်အကုန် နဲ့ အဆင့်မြင့်ပညာကို ဘယ်လိုကူးပြောင်း တက်ရောက်ရ မယ်ဆိုတာကိုတော့ အပေါ်မှာ ပြောခဲ့သလို ပညာရေး Network အားလုံးနဲ့ အသက်မွေးဝမ်းကျောင်းအလုပ် အကိုင်အခွင့်အလမ်းအားလုံး အသင့်ဖြစ်တဲ့အချိန် နောက် ၂ နှစ်လောက်အတွင်းမှာ နိုင်ငံတော်ကနေ ပြည်သူကို ချပြ လိမ့်မယ်လို့ မျှော်လင့်ရပါတယ်။

#စာတော်_စာညံ့နဲ့ခွဲမှာလား_ပြန်ပြောင်းလို့ရသလား

G 10 ဟာ အရင်စနစ်ဟောင်း အဋ္ဌမတန်းအောင်မြင်သူ တွေ ကူးပြောင်းတက်ရောက်ရမဲ့အတန်းဖြစ်ပြီး၊ အခု စာသင်နှစ်ဟာ G 10 သင်ရိုးသစ် စပြောင်းတဲ့နှစ်လည်း ဖြစ်ပါတယ်။ အထက်မှာဆိုခဲ့သလို ဘာသာတွဲ (၄) ခုထဲ က ကိုက်ညီသင့်လျော်ရာအတွဲကို ရွေးချယ်တက်ရောက် ကြရမှာဖြစ်ပြီး အဲဒီဘာသာတွဲအတိုင်း G10, G 11, G 12 သုံးနှစ်တက်ရောက်ရပါလိမ့်မယ်။ ဆိုတော့ …

သင်ရိုးဝင်ဘာသာတွဲတွေကို သေချာလေ့လာစေချင်ပါ တယ်။ ဥပမာ၊ STEAMS 1 ဆိုရင် (၇) ဘာသာလို့ ဆိုပေမဲ့ ဘာသာအမျိုးအစားအရဆိုရင် (၉) ဘာသာရှိနေမှာပါ။

ပြန်ပြောင်းဖို့ဆိုတာ ကျောင်းသားအခြေအနေအရ ထည့်သွင်းစဉ်းစားသင့်ပေမဲ့ အစကတည်းက ကိုယ်နဲ့ အလိုက်ဖက်ဆုံး၊ အသင့်တော်ဆုံးကို ရွေးချယ်နိုင်ရင် ပိုကောင်းမယ်လို့ ယူဆပါတယ်။
…….
ဒါက အမေးအများဆုံး၊ အရေးအကြီးဆုံးလို့ယူဆလို့ရနိုင် တဲ့ မေးခွန်းတွေကို အတိုဆုံး၊ အနီးစပ်ဆုံး ကျွန်တော့် အနေနဲ့ ရှင်းပြတတ်သလောက် ရှင်းပြခဲ့တာတွေပါ။ အကျယ်တဝင့်လေ့လာလိုသူတွေအတွက် စာအုပ်တွေ၊ Link တွေကို ကျွန်တော် Photo Caption တွေနဲ့ Comment မှာ ပေးထားပါတယ်။

နောက်.. ဒီထက်ပိုပြီး စိတ်ဝင်စားတဲ့သူတွေ သိသင့်တဲ့ အချက်တချို့ရှိပါသေးတယ်။ ဒီပြောင်းလဲမှုဖြစ်စဉ်ရဲ့ အရေးပါတဲ့ နောက်ခံသမိုင်းပါ။ ဒီတစ်ခါ ပညာရေး ပြောင်းလဲတယ်ဆိုတာ နှစ်ရှည်စီမံကိန်းပါ။ လိုအပ်ချက် အချို့အနည်းငယ်ရှိကောင်းရှိနိုင်ပါလိမ့်မယ်။ ဒါက Running အချိန်မှာ Evaluation လုပ်ပြီး တစ်ခုချင်း ပြန်ပြင်သွားကြရမှာဖြစ်ပါတယ်။

#ဘာလို့ပြောင်းရသလဲ

ကျွန်တော်တို့ တော်တော်နောက်ကျကျန်ခဲ့လို့ပါ။ သိသာ တဲ့အချက်က ကျွန်တော်တို့ဆီက အခြေခံပညာအထက် တန်း ပြီးမြောက်ခြင်းကို တခြားနိုင်ငံတော်တော်များများ က အသိအမှတ်မပြုပါဘူး။ နောက်တစ်ချက်က ရမှတ် ကောင်းကို ဦးတည်ခဲ့တဲ့စနစ်ဟောင်းကြောင့် မလိုလား အပ်တဲ့ ဘေးထွက်ဆိုးကျိုးတွေ ရခဲ့ပါတယ်။ အဆိုးဆုံးက ၂၁ရာစုနဲ့ လိုက်ဖက်ညီမဲ့ လူ့စွမ်းအားအရင်းအမြစ်တွေ ဆုံးရှုံးခဲ့ရပါတယ်။ ဒါတွေကြောင့် ပြောင်းရခြင်းပေါ့။

နောက်တစ်ချက်က Child Centered Approach (or) Learner Centered Approach (or) Student Centered Centered Approach ခေါ်တဲ့ သင်ယူသူဗဟိုပြုစနစ်နဲ့ သွားဖို့ အသေအချာဦးတည်ထားတာဖြစ်ပါတယ်။ အရင်ကရှိခဲ့တဲ့ ဆရာက ဦးဆောင်တဲ့စနစ်ကို ဖယ်ရှား အစားထိုးပြီး ကျောင်းသားကို တတ်မြောက်စေမှာပါ။

အဲဒီနောက် ရလဒ်အဖြစ် လက်တွေ့ဘဝနဲ့ဆက်စပ်ပြီး လက်တွေ့ဘဝထဲမှာ ထိထိရောက်ရောက်အသုံးချနိုင်မဲ့ သင်ရိုးတွေနဲ့ လူ့စွမ်းအားအရင်းအမြစ်ကို မွေးထုတ် သွားမှာဖြစ်ပါတယ်။ ဘက်စုံမျှတ သိမြင်တတ်သူတွေပေါ့။

#ပြောင်းလဲမှုနောက်ခံသမိုင်း

အရင်က မရှိခဲ့ဖူးတဲ့ ပညာရေးအတွက် မိခင်ဥပဒေ Mother Law “အမျိုးသားပညာရေးဥပဒေ” ကို ၂၀၁၄ ခုနှစ်မှာ ပြဋ္ဌာန်းနိုင်ခဲ့ပါတယ်။ ၂၀၁၅ မှာ ပြင်ဆင်တဲ့ ဥပဒေ ဆက်လက်ပြဋ္ဌာန်းခဲ့ပါတယ်။

နောက် CESR (Comprehensive Education Sector Review) ဘက်စုံလွှမ်းခြုံသော ပညာရေးကဏ္ဍလေ့လာ သုံးသပ်ရေးလုပ်ငန်း ကို အကောင်အထည်ဖော်ပြီး ရရှိတဲ့ အချက်အလက်တွေကို အခြေခံလို့ Reform လုပ်ခဲ့တာ ဖြစ်ပါတယ်။ အခုဆောင်းပါးက အဲဒီ Reform ရဲ့ လုပ်ငန်း စဉ်တွေထဲက Curriculum အပိုင်းပေါ့။ အဲဒီလုပ်ငန်းတွေ အတွက် ပညာရေးဝန်းကြီးဌာနအပါအဝင် နိုင်ငံတော် အဆင့် ဌာနတွေနဲ့အတူ ADB, JICA, EYE Project (Equipping Youth for Employment) စတဲ့ အဖွဲ့ အစည်းတွေနဲ့ ချိတ်ဆက်ဆောင်ရွက်လျက်ရှိပါတယ်။

#ထိရောက်မှု

ဒီပြောင်းလဲမှု အလဟဿမဖြစ်ဘဲ ထိရောက်အကျိုးရှိဖို့ ထိန်းညှိထားတဲ့ဟန်ချက်တွေရှိပါတယ်။ 21st Century Skills (5 Cs), CPD, ITPR, Bloom’s Taxonomy နဲ့ အခြားသော အညွှန်းဘောင်တွေဖြစ်ပါတယ်။

ဆရာ့စွမ်းရည် ထက်မြက်နေစေဖို့ “စဉ်ဆက်မပြတ် ဆရာအတတ်ပညာ ဖွံ့ဖြိုးတိုးတက်ရေး” CPD (Continuing Professional Development) ကို ကျောင်းတွေမှာ လစဉ် Module ၈ခုနဲ့ လုပ်ဆောင်ပါ လိမ့်မယ်။ ဒါမှ ဆရာတွေ အစွမ်းထက်နေမှာပါ။

ဘာသာရပ်တိုင်း၊ သင်ခန်းစာတိုင်းကို 21st Century Skills တွေဖြစ်တဲ့ 5 Cs (Collaboration, Communication, Critical Thinking and Problem Solving, Creative and Innovation, Citizenship) နဲ့ ချိတ်ဆက်မိအောင် သင်ကြားပေးကြပါလိမ့်မယ်။

သင်ကြားမှုအဆင့်တိုင်းဟာ စောစောကပြောခဲ့သလို Student Centered Approach နဲ့သွားမှာဖြစ်ပြီး သင်ခန်းစာတိုင်းမှာ တတ်မြောက်မှုကို ဦးတည်ထားတဲ့ Introduction, Teaching and Practice, Review ဆိုတဲ့ (I T P R) ဆိုတဲ့ Process က တောက်လျှောက်ပါဝင်မှာ ဖြစ်ပါတယ်။

ဘာသာရပ်တိုင်းရဲ့ သင်ခန်းစာတိုင်းဟာ လက်ရှိကမ္ဘာ့ ပညာရေးလောကမှာ စံမီနေသေးတဲ့ Bloom’s Taxonomy သတ်မှတ်ချက်အတိုင်း Cognitive Domain, Affective Domain, Psychomotor Domain ဆိုတဲ့ (သုတအခြေပြု, စိတ်ခံစားမှုအခြေပြု, လှုပ်ရှားသက်ဝင်မှု အခြေပြု) စံနှုန်းတွေကို Lower Order ကနေ Higher Order အထိ အသုံးချ၊ ဖန်တီး နိုင်တဲ့အဆင့်အထိ ချိတ်ဆက်သင်ကြားပေးသွားမဲ့ စနစ်ဖြစ်ပါတယ်။

ကျွန်တော်လေ့လာရသလောက်.. ဆရာနဲ့ ကျောင်းသား တကယ်လိုက်ဖက်ညီသွားတဲ့ အချိန်ရောက်ပြီဆိုရင်တော့ One school, one product အဆင့်ထိ ရည်မှန်းထား တယ်လို့ဆိုပါတယ်။ ပညာရေးဟာ Economic Based ဖြစ်ရမယ်လို့ ဆိုထားပါတယ်။

အဲဒီအတွက် အရင်ကရှိခဲ့ဖူးတဲ့ ပညာရေးတြိဂံအစား ပညာရေးဆဋ္ဌဂံနဲ့ ပြောင်းလဲဆောင်ရွက်နေပြီဖြစ်ပါတယ်။ (နိုင်ငံတော်၊ ဆရာ၊ မိဘ၊ ကျောင်းသား၊ ပြည်တွင်း/ပြည်ပ အဖွဲ့အစည်းများ၊ အရပ်ဘက်အဖွဲ့အစည်းများ) ပါဝင်မှာ ဖြစ်ပါတယ်။ ပြိုင်တူတွန်းတဲ့သဘောပေါ့လေ။

ဒီစာကို ဖြေရှင်းချက်လေးတစ်ခုနဲ့ နိဂုံးချုပ်ပါရစေ။ တခြားတော့မဟုတ်ဘူး။ သင်ရိုးသစ်မှာ အင်္ဂလိပ်စာကို သင်ကြားတဲ့အခါ English to English နဲ့ပဲသင်ရမှာလား ဆိုတဲ့ အချက်ပါ။ ကျွန်တော်တို့က English ကို Second Language အနေနဲ့ သင်ကြရတာဖြစ်ပါတယ်။ ဒါကြောင့် E to E ပြောဆိုသင်ကြားလို့ သင်ကြား/သင်ယူသူနှစ်ဖက် အဆင်ပြေရင်တော့ ဆိုဖွယ်ရာမရှိပေါ့လေ။ သို့သော် သိတ် လိုအပ်ရင် #မိခင်ဘာသာနဲ့ ရှင်းလင်းသင်ကြားရမယ်လို့ ဆရာလက်စွဲမှာအတိအလင်းဖော်ပြထားပါတယ်။ တိုင်းရင်းသားဘာသာစကားကိုတောင် စာသင်ခန်းသုံး ဘာသာစကားအဖြစ် အသုံးပြုခွင့်ရှိတယ်လို့လည်း ဆိုထားပါသေးတယ်။ ဒီအတွက် ဘာသာစကား အတား အဆီးတစ်ခုအဖြစ် မြင်နေဖို့မလိုတာကို ရှင်းလင်းချင်တာ ဖြစ်ပါတယ်။

သင့် ဓား တိုနေလျှင် ဓားအရှည် မရှာပါနဲ့၊ ရှေ့တစ်လှမ်း တိုးခုတ်ပါ… ဆိုတာ မမေ့သင့်ဘူးပေါ့။

ပြောင်းလဲခဲ့သော ပညာရေးရည်မှန်းချက်ဖော်ဆောင်မှု များကို ပြိုင်တူတွန်းလျက် ၂၁ ရာစုမှာ နိုင်ငံတကာကို ရင်ပေါင်တန်းနိုင်ကြပါစေ။ ။
__
..ကေအို..
(Teacher Ko Oo)
၁၁၊ ဇူလိုင်လ၊ ၂၀၂၀။ ညနေ ၃:၁၀
ရှမ်းတောင်ကျေးလက်