ጠቅላይ ሚኒስትር ዐቢይ አሕመድ (ዶ/ር) የኢትዮጵያ ፌደራል ፖሊስ የዜጎች ተሳትፎ መተግበሪያን (EFPApp) ሥራ አስጀመሩ
************

ጠቅላይ ሚኒስትር ዐቢይ አሕመድ (ዶ/ር) የኢትዮጵያ ፌደራል ፖሊስ ያከናወናቸው የዲጂታል ሪፎርም ሥራዎች ከህብረተሰቡ ጋር በመቀናጀት ወንጀልን የመከላከል አቅሙን ከፍ የሚያደርጉ መሆናቸውን ገለጹ።

ጠቅላይ ሚኒስትር ዐቢይ (ዶ/ር) ዛሬ አመሻሹን የፌደራል ፖሊስ የዜጎች መረጃ መቀበያ ማዕከልን መርቀው ከፍተዋል።

ጠቅላይ ሚኒስትሩ በአርቲፊሻል ኢንተለጀንስ ኢንስቲትዩት የለማ እና ዜጎች ወንጀልን በቀላሉ ለማዕከሉ የሚጠቁሙበት EFPApp የተሰኘ መተግበሪያንም ስራ አስጀምረዋል።

ዲጅታል ኢትዮጵያን እውን ለማድረግ በርካታ ሥራዎች መከወናቸውን ጠቅላይ ሚኒስትሩ አውስተው፤ በመንግሥታዊ ተቋማት ከ500 በላይ አገልግሎቶች ዲጂታላይዝ መደረጋቸውን ጠቅሰዋል።

ፌደራል ፖሊስም በማሻሻያው የዲጂታላይዜሽን አሠራርን በመተግበር ህብረተሰቡ በየትኛውም አካባቢ ሆኖ የወንጀል ድርጊትን መጠቆም የሚችልበትን ቴክኖሎጂ ተግባራዊ ማድረጉ ትልቅ አቅም እንደሚፈጥርለት ተናግረዋል።

ሁሉም ዜጋ መተግበሪያውን በመጠቀም ወንጀልን በጋራ የመከላከል ኃላፊነቱን እንዲወጣም ጠቅላይ ሚኒስትር ዐቢይ አሕመድ (ዶ/ር) መልዕክት አስተላልፈዋል።

በሮዛ መኮንን

የዩናይትድ ስቴትስ ፕሬዚዳንት የወባ መርሃ ግብር የወባ መድሃኒትን በኢትዮጵያ ለማምረት የሚደረገውን ጥረት እንዲደግፍ ጥሪ ቀረበ
*****************

የጤና ሚኒስትር ዶ/ር መቅደስ ዳባ፣ የጤና ሚኒስትር ዴኤታ ዶ/ር ደረጃ ዱጉማ እና ሌሎች የጤና ሚኒስቴር የስራ ኃላፊዎች ከዩናይትድ ስቴትስ ፕሬዚዳንት የወባ በሽታ መርሃ ግብር ፒኤምአይ (PMI) ተወካዮች ጋር ተወያይተዋል።

ውይይቱ በቀጣይ ዓመት የወባ ቁጥጥርና ማጥፋት ስራ ወቅት ቅድሚያ የሚሰጣቸው ተግባራትን በጋራ ለይቶ ለመተግበር ያለመ መሆኑን ከሚኒስቴሩ የተገኘው መረጃ ያመለክታል።

ዶ/ር መቅደስ፥ በኢትዮጵያ የወባ በሸታን በመቆጣጠር እና በበሽታው ምክንያት የሚከሰተውን ሞት በመቀነስ ረገድ የሚያበረታታ ውጤት ቢመዘገብም፤ ከአየር ንብረት ለውጥ፣ የዝናብ መቆራረጥ፣ ድርቅና የሙቀት መጨመር ጋር ተያይዞ ባለፉት ዓመታት ለትንኝ መራቢያ ምቹ አጋጣሚዎች በመፈጠራቸው የወባ በሸታ ታማሚዎች ቁጥር ጭማሪ አሳይቷል ብለዋል።

ይህን ተከትሎም ሰው ሰራሸና ተፈጥሮዊ ተግዳሮቶችን ከግምት ያስገባ ፈጣን የወባ መመርመሪያ ኪት እና የወባ ትንኝ መከላከያ የመኝታ አጎበርን ያካተተ አዲስ ስትራቴጂያዊ ዕቅድ በማዘጋጀት ወደ ስራ ተገብቷል ነው ያሉት።

ሚኒስትሯ አያይዘውም፥ ፒኤምአይ የወባ መድሃኒትን በሀገር ውስጥ ለማምረት የሚደረገውን ጥረት እንዲደግፍ ጥሪ አቅርበዋል።

የጤና ሚኒስትር ዴኤታ ዶ/ር ደረጀ ዱጉማ በበኩላቸው፥ መንግሥት የወባ ስርጭትን ለመግታት በትኩረት እየሰራ መሆኑን ገለጸው፤ በዚህ ረገድ ፒኤምአይ እያደረገው ስላለው ድጋፍ አመስግነዋል።

መርሃ ግብሩ የወባ ስርጭትን ለመግታት በሚደረጉ ጥረቶች እንዲሁም በመረጃ አያያዝ ላይ የሚያደርገውን ድጋፍ አጠናክሮ እንዲቀጥል ጠይቀዋል።