ለቅዱስ ጊዮርጊስ ስፖርት ክለብ የ100 ሚሊዮን ብር ድጋፍ አድርገናል - ከንቲባ አዳነች አቤቤ
*******************

አንጋፋውና የታሪክ ባለቤቱ የቅዱስ ጊዮርጊስ ስፖርት ክለብ የገጠመውን የመፍረስ አደጋ ለመታደግ፣ የአዲስ አበባ ከተማ አስተዳደር የተለያዩ አካላትን በማስተባበር የ100 ሚሊዮን ብር ድጋፍ ማድረጉን ከንቲባ አዳነች አቤቤ አስታወቁ።

ክለቡ ላለፉት ስድስት ወራት ደመወዝ መክፈል የማይችልበት ደረጃ ላይ ደርሶ የነበረ ቢሆንም፣ አስተዳደሩ ከከተማዋ በጀት ከወሰነው በተጨማሪ ለባለሀብቶች ባቀረበው ጥያቄ መሠረት የሚድሮክ ኢንቨስትመንት ግሩፕና ቢጂአይ ኢትዮጵያ በሰጡት ፈጣን ምላሽ የገንዘብ ድጋፉ ለተቋቋመው ጊዜያዊ ኮሚቴ ተበርክቷል።

ከንቲባዋ ባስተላለፉት መልዕክት፣ ቅዱስ ጊዮርጊስ የእግርኳስ ክለብ የተጫዋቾችና የማኅበሩ ብቻ ሳይሆን የሀገርና የከተማችን ኩራት በመሆኑ፣ ይህንን ታሪካዊ ክለብ ከውድቀት የመታደግ ኃላፊነት አለብን ብለዋል።

ድጋፍ ላደረጉት ተቋማትና ለስፖርቱ ቤተሰብ ምስጋናቸውን ያቀረቡት ከንቲባ አዳነች፣ ይህ እርምጃ አስተዳደሩ ለስፖርት ወዳዱ ሕዝብ የሰጠው ክብር ማሳያ መሆኑን ተናግረዋል።

ክለቡ ሁሉንም ባሳተፈና በግልጽነት አዲስ ቦርድ መርጦ፣ ከገጠመው ጊዜያዊ ችግር ተላቆ ወደ ቀድሞ ጥንካሬውና ዝናው እንዲመለስም መልካም ምኞታቸውን ገልጸዋል።

#Ethiopia #SaintGeorgeSA #AddisAbaba #KidusGiorgis #SportSupport #mayoradanechabiebie

የፌዴራል ቤቶች ኮርፖሬሽን የ50 ዓመት የወርቅ ኢዮቤልዩ በዓሉን በታላላቅ የምረቃና የዐውደ ርዕይ ኩነቶች አከበረ
**************************
ግማሽ ክፍለ ዘመን ያስቆጠረውን የስኬት ጉዞ በተለያዩ ተግባራት እያከበረ የሚገኘው የፌዴራል ቤቶች ኮርፖሬሽን፣ ዛሬ ሶስት አበይት ኩነቶችን በይፋ አከናውኗል፦
✅ ልዩ የፎቶግራፍ ዐውደ ርዕይ፦ የኮርፖሬሽኑን የ50 ዓመት የልማትና የዕድገት ታሪክ የሚያሳይ የፎቶግራፍ ዐውደ ርዕይ ተከፍቷል።
✅ ዘመናዊው "ጎልድ ሞል" ምረቃ፦ በፒያሳ መሀል ለወርቅ ንግድ ሱቆች አገልግሎት እንዲውል ተደርጎ የተገነባው ዘመናዊ የንግድ ሕንፃ ተመርቋል።
✅ የ27 ወለል ሁለገብ ሕንፃ ምረቃ፦ በሱማሊ ተራ አካባቢ ያስገነባው፣ 3 ቤዝመንት፣ ምድር ቤት እና 23 ወለሎች (3B+G+23) ያሉት እጅግ ዘመናዊ ሁለገብ ሕንፃ ተመርቆ ለአገልግሎት ክፍት ሆኗል።
እነዚህ ስኬቶች የኮርፖሬሽኑን ለሀገር ልማትና ለከተማ ውበት ያለውን ቁርጠኝነት በተግባር ያሳያሉ። እነዚህ ሁነቶች በምስል ይመልከቱ፦
#FHC50Years #GoldJubilee #Ethiopia #AddisAbaba #Inauguration

ኢራን የፓኪስታን ሰንደቅ ዓላማ የያዙ 20 ተጨማሪ መርከቦች በሆርሙዝ ሰርጥ እንዲያልፉ ፈቀደች
***************************

ኢራን በፓኪስታን ስም የተመዘገቡ 20 ተጨማሪ መርከቦች ለሳምንታት ተዘግቶ በቆየው የሆርሙዝ ሰርጥ በኩል እንዲያልፉ መስማማቷን ፓኪስታን አረጋገጠች።

የፓኪስታን የውጭ ጉዳይ ሚኒስትር ኢሻቅ ዳር ይህንኑ ውሳኔ በ‘ኤክስ’ የማኅበራዊ ሚዲያ ገጽ ላይ ባሰፈሩት መልዕክት ያረጋገጡ ሲሆን፣ “እርምጃው የሚደነቅ እና ገንቢ ነው” ብለዋል።

ሚኒስትሩ አክለውም "ይህ የኢራን እርምጃ የሰላም አብሳሪ እና በቀጣናው መረጋጋትን ለማምጣት የሚረዳ ነው፤ ውይይት፣ ዲፕሎማሲ እና መሰል መተማመንን የሚፈጥሩ እርምጃዎች ለጦርነት ብቸኛ መፍትሔዎች ናቸው" ብለዋል።

ፓኪስታን በመካከለኛው ምሥራቅ ግጭት ዙሪያ ዛሬ (እሑድ) የሚካሄደውን የአራትዮሽ ስብሰባ ለማስተናግድ መርሐ-ግብር ይዛለች።

በአሜሪካ-እስራኤል እና በኢራን መካከል እየተካሄደ ያለው ጦርነት አንድ ወር በደፈነበት በዚህ ወቅት፣ የቱርክ፣ የፓኪስታን፣ የግብፅ እና የሳዑዲ ዓረቢያ ከፍተኛ ዲፕሎማቶች በኢስላማባድ በመገኘት፣ ውጥረቱን ለማርገብ በሚቻልባቸው መንገዶች ላይ ይመክራሉ።

የሆርሙዝ ሰርጥ የዛሬ ወር ገደማ በተቀሰቀሰው የአሜሪካ-እስራኤል እና ኢራን ጦርነት ምክንያት ከፈረንጆቹ መጋቢት ወር መጀመሪያ አንሥቶ በተግባር ተዘግቶ ቆይቷል።

ግጭቱ ከመከሰቱ በፊት በቀን በአማካይ 138 መርከቦች በወሽመጡ በኩል ያልፉ እንደነበር መረጃዎች ያሳያሉ።

በዮናስ በድሉ

#EBC #MiddleEast #Iran #USA #Israel #worldaffairs