የልጅነት ሕልሟን መኖር የጀመረችው ረዳት ፓይለት ኬርማይ እሸቱ
**********

የተወለደችው እና ያደገችው አዲስ አበባ ውስጥ ነው። ለወላጆቿ 5ኛ ልጅ የሆነችው ኬርማይ ከልጅነቷ ጀምሮ አውሮፕላን አብራሪ በመሆን ሀገሯን የማገልገል ሕልም ነበራት።

ይህንን ሕልሟን ለማሳካት የአባቷን፣ የእናቷን እና የእህቶቿን ጠንክሮ የመሥራት ፈለግ በመከተል በከፍተኛ ውጤት ረዳት አብራሪ በመሆን ዘንድሮ የኢትዮጵያ አቪዬሽን ዩኒቨርሲቲ ካስመረቃቸው 974 ባለሙያዎች መካከል አንዷ ነች ረዳት ፓይለት ኬርማይ እሸቱ (ዶ/ር)።

የወላጆቿ ቤት ቦሌ ዓለም አቀፍ የአውሮፕላን ማረፊያ አካባቢ በመሆኑ የአውሮፕላኖችን ድምፅ አዘውትሮ መስማት እና ከሩቁ የማየት ዕድል ነበራት።

ወደ ሰማይ የሚምዘገዘገው አውሮፕላን ታዲያ አንሶ ስለሚታያት “ይህ ትንሽ ነገር” እንዴት ሰው ጭኖ ከሀገር ወደ ሀገር መብረር እንደቻለ ያስገርማት ነበር።

ሕፃን እያለች አባቷ በትምህርት ምክንያት ወደ ውጭ ሀገር ሄዶ ስለነበር የአውሮፕላን ድምፅ በሰማች ቁጥር ከቤት ወደ ውጭ እየወጣች “አባቴን ጣለው፤ አባቴን ጣለው” ብላ ትጮህ እንደነበር እናቷ ወ/ሮ ሳራ ስዩም ይናገራሉ።

የዛሬዋ ረዳት ፓይለት ኬርማይ እሸቱ (ዶ/ር) ከ1ኛ እስከ 12ኛ ክፍል ትምህርቷን በሊሴ ገብርማርያም ትምህርት ቤት በመከታተል የላቀ ውጤት አምጥታ ወደ አዲስ አበባ ዩኒቨርሲቲ ተቀላቀለች።

ዩኒቨርሲቲ ውስጥ በነበራት ቆይታ ብቃት ባላቸው አሠልጣኞች ያገኘችው ሥልጠና ሀገሯን በኃላፊነት ለማገልገል ብቁ እንዳደረጋት ለኢቢሲ ዶትስትሪም ትናገራለች።

“በተለይም የአየር በረራ ልምምዱን ከአዲስ አበባ ውጭ ከቤተሰብ ተለይቶ እንደ ወታደር ሌሊት 11:30 እየተነሡ፣ አልጋ እያነጠፉ፣ ጫማ እየጠረጉ መሥራቱ ሀገርን ዝቅ ብሎ በትህትና እንዳገለግል ቀርፆኛል” ትላለች።

ሀገርን የማገልገል ትምህርት የቀሰመችው እርሻ እያረሰ ተምሮ ትልቅ ደረጃ ከደረሰው አባቷ ነው።

ወደፊትም ትጋቷን በመቀጠል በሙያዋ፣ በኃላፊነት፣ በሐቀኝነት፣ በትህትና ሀገሯን ለማገልገል እንዲሁም ተፅዕኖ ፈጣሪ ሥራዎችን ለመሥራት ዝግጁ መሆኗን ተናግራለች።

ትልቅ ሕልምን ይዞ በመትጋት ስኬታማ መሆን እንደሚቻል ማሳያ የሆነው የረዳት ፓይለት ኬርማይ እሸቱ (ዶ/ር) የህይወት ጉዞ ለብዙ አዳጊዎች ማነቃቂያ እንደሚሆን ይጠበቃል።

በላሉ ኢታላ

እለታዊ የውጭ ምንዛሬ ተመን

ኢቢሲ የፌስቡክ ገፅ

ኢቢሲ ድረ ገፅ

ኢቢሲ ቴሌግራምን ይቀላቀሉ