Assalomu alaykum do‘stlar!

Tajribasi katta ustoz dasturchimiz meni mehmonga chaqirdilar. Juda xursand bo‘ldim.

Yoshlarimizda dasturlashga qiziqish katta. Hard-skill bo‘yicha juda kuchli bo‘lib ketishmoqda.

Endi Dinozavrlar ham uyg‘onib, yangilik yaratish vaqti kelgan shekilli.

Shanba kuni ko‘raylik, yangi uslub qanday bo‘lar ekan?

Mehmonda ko‘rishguncha!

09.09.2025 London
@DrAlgorithm

“IT va Olam” kelajakka yoʻl

Texnologiya kelajakka oʻz ta’sirini oʻtkazishni boshlamoqda. Siz ham IT sohasiga qiziqsangiz, sizni qiziqarli va bilimlarga boy vebinarga taklif qilamiz!

🔈 Vebinarni Angliyaning @Moneff korxonasida IT Manajer Saidolim Djoʻrayev olib boradi.

Bunda siz:
🔹 IT sohasidagi eng so‘nggi yangiliklar;
🔹 Mutaxassis tajribasi;
🔹 Sizni qiziqtirgan savollarga javob olish imkoniga ega boʻlasiz.

🗓 13-sentabr, 20:00
📍 Format: Online

👉 IT va Olam - kanaliga a'zo bo'ling!

Professional "Yo‘q" deyish

Bilarmidingiz? Rahbaringiz aslida sizdan "Yo‘q" deyishingizni kutadi.

Har bir rahbar o‘z jamoasida "labbaychi", har bir topshiriqqa "xo‘p bo‘ladi" deydigan, savol bermasdan ishga kirishib ketadigan xodimlarni yoqtiradi, - deb o‘ylashadi. Yuzaki qaraganda shunday: kamroq muhokama, tezroq ishga kirishish. Lekin bu muvaffaqiyatsizlikka olib boradi.

Kitobda qiziq gap o‘qib qoldim. Erik ismli qahramon aytgan gapi bor, bu gap har bir rahbar ish stoliga yozib qo‘yishiga arziydi:

"Albatta, siz "Yo‘q" deyishingiz mumkin. Biz sizga fikrlashingiz uchun haq to‘laymiz, shunchaki ishni bajarish uchun emas."

"Of course you can say No. We pay you to think, not to do."


Nima uchun "Ha, xo‘p bo‘ladi"chi xodimlar xavfli?

Tasavvur qiling, men jamoaga yangi bir loyiha ustida ishlashni topshirdim. Dasturchi hech qanday savol bermasdan, darhol kod yozishni boshladi. Ikki haftadan so‘ng u ishni tugatdi. Ammo keyin ma’lum bo‘ladiki:

1. Bu ish boshqa bir modul bilan ziddiyat hosil qilgan.

2. Loyihani yaratishda qo‘llanilgan yondashuv kelajakda katta "texnik qarz" (technical debt) qoldirgan.

3. Aslida, bundan ancha samaraliroq va tezroq yechim mavjud edi, lekin hech kim bu haqda o‘ylab ko‘rmagan.

Natijada nima bo‘ldi?

Vaqt, pul va eng asosiysi - jamoaning ishtiyoqi behuda sarflandi. Agar o‘sha dasturchi yoki jamoa boshida "Yo‘q, bu yondashuv to‘g‘ri emas, chunki..." deb aytganida, biz bu isrofgarchilikning oldini olgan bo‘lardik.

Qanday qilib to‘g‘ri "Yo‘q" deyish mumkin?

"Yo‘q" deyish – bu qo‘pollik yoki bo‘ysunmaslik emas. Bu – professional mas’uliyat. Muhimi, buni to‘g‘ri yetkazib bera olish.

1. "Yo‘q, chunki..." formulasidan foydalaning.
Shunchaki "yo‘q, qilolmayman" demang. Sababini aniq va raqamlarga asoslanib tushuntiring.

Salbiy: "Yo‘q, bu vazifani bugun qila olmayman."

Ijobiy: "Yo‘q, bu vazifani bugun bajara olmayman, chunki hozirda men A loyihasining muhim qismi ustida ishlayapman. Agar chalg‘isam, ertangi reliz kechikishi mumkin. Bu esa korxonamiz uchun X miqdorida zarar keltirishi ehtimoli bor."

2. Muqobil yechim taklif qiling.
Siz muammoning bir qismi emas, yechimning bir qismi ekanligingizni ko‘rsating.

Salbiy: "Bu funksiyani ikki kunda qo‘shib bo‘lmaydi."

Ijobiy: "Bu funksiyani to‘liq hajmda ikki kunda qo‘shishning imkoni yo‘q. Lekin, biz eng muhim qismini (MVP) ertaga tayyor qilib berishimiz mumkin. Yoki, agar bizga to‘rt kun vaqt berilsa, uni barcha testlardan o‘tkazib, barqaror versiyasini taqdim etamiz. Qaysi biri biz uchun hozir muhimroq?"

3. Ustuvorliklarni (prioritetlarni) aniqlashtiring.

Ba’zida rahbariyat (yoki buyurtmachi) barcha vazifalar birdek muhim deb o‘ylaydi. Sizning vazifangiz - ularga haqiqiy vaziyatni ko‘rsatish.

Savol bering: "Tushundim, bu juda muhim. Hozir men ishlayotgan A va B vazifalar bilan solishtirganda, bu yangi topshiriqning ustuvorligi qanday? Agar buni boshlasam, qaysi birini kechiktirsam bo‘ladi?"


Xulosa

Sizning ishingiz – shunchaki kod yozish, dizayn chizish yoki jadval to‘ldirish emas. Sizning ishingiz - korxonaning umumiy maqsadiga erishish uchun o‘z tajribangiz va aqlingizni ishlatishdir.

Buning ichiga xavflarni oldindan ko‘ra bilish, noto‘g‘ri qarorlarni shubha ostiga olish va yaxshiroq yo‘llarni taklif qilish ham kiradi.

Agar sizga biror vazifa berilsa, bir zum to‘xtang. O‘zingizga savol bering:
* Bu vazifaning asl maqsadi nima?
* Nima uchun aynan shu yo‘l tanlandi?
* Bundan yaxshiroq, tezroq yoki arzonroq yechim yo‘qmi?
* Bu ish kelajakda qanday muammolarga olib kelishi mumkin?

Agar javoblaringiz sizni qoniqtirmasa, o‘z fikringizni aytishdan qo‘rqmang. Asosli dalillar bilan aytilgan "Yo‘q" — bu korxonaga qilingan eng katta yaxshilikdir.

Unutmang, siz shunchaki klaviaturani bosishingiz yoki qog‘ozlarni to‘ldirishingiz uchun oylik olmaysiz. Siz tajribangiz, bilimingiz va eng muhimi - fikrlash qobiliyatingiz uchun haq olasiz.

Shunday ekan, keyingi safar topshiriq olganingizda, o‘ylang.
Agar kerak bo‘lsa, o‘z professional lug‘atingizdagi eng qudratli so‘zni ishlating: "Yo‘q, chunki..."

10.09.2025 London
@DrAlgorithm

Assalomu alaykum do‘stlar!

Bugun nasib qilsa, yangi talqinda AT haqida suhbat quramiz.

Siz bilan XMS (Xohlagan Mavzuda Soʻrang) / AMA (Ask Me Anything) shaklida suhbat qurmagan ekanmiz. Shuni ham biror usul bilan yo‘lga qo‘yishni o‘ylab yurgan edim.

Bugun suhbatda sizning savollar uchun ham vaqt ajratganmiz. Shunday ekan izohlarda savolingizni qoldirsangiz, suhbatda javob berishga harakat qilaman.

Webinarga qo‘shiling. Siz uchun foydali bo‘ladi deb o‘ylayman.


🗓 13-sentabr, 20:00
📍 Shakli: Online

👉 IT va Olam - kanalida

Webinarni 10 daqiqada boshlaymiz 👇
https://www.youtube.com/watch?v=ZPglWdMPYtM

👉 IT va Olam - kanaliga a'zo bo'ling!

StartUp va yoshlar

O‘zbekistonda StartUp qilayotgan yoshlar ko‘paygan. Bu juda yaxshi holat. O‘zining shaxsiy tijorati (biznesi) bo‘lishi juda zo‘r.

Yoshlarimiz tirishqoq, qiyinchilikdan qo‘rqmaydi, ishini oxiriga yetkazishga harakat qiladi. Bu xislatlar hammada ham bor emas. Bersang yeyman, bermasang o‘laman - kayfiyatidan chiqib olganimiz quvonarli holat.

Ammo bitta "Lekin"imiz bor.

StartUp qilish qoidalari va talablari bor. Buni ko‘pgina markazlar o‘rgatib kelmoqda. Masalan, StartUp Garage. Yangi boshlayotganlarga yo‘l xaritasi (Roadmap) berib, har bir bosqichni tushuntirib kelishmoqda. Bu fundamental bilim va busiz ish yurishi qiyin.

Hatto yaqinda StartUp Garage o‘zining yopiq eco-tizimini hamma uchun ochdi (Founders Community). Endi hamma tekinga a’zo bo‘lishi mumkin. StartUp asoslarini o‘rganishi, tanish-bilish orttirishi mumkin.

Meni o‘ylantirgan narsa esa, yoshlarning ish yuritishi.

O‘zini CEO deb bilgan StartUpchilar, g‘oyadan boshqa ish qilmagan. Menga ham ko‘p yozishadi. 2-3 asoschi bilan suhbat qilib koʻrdim, gaplari qiziq:

- Oka, manga CTO kerak-de.
- Nima uchun?
- Shu man o‘ylagan narsani yasab beradi. Hammasini o‘zi boshqaradi. TZ yozishdan bozorga kirishgacha qilib beradi.

Yoki:
- CTO misiz? Manga CTO kerak. Kompyuterga aloqador loyiha o‘ylaganman. Shuni qilib berish kerak.

G‘oya borligi yaxshi, g‘oya hammada bor.

Shu g‘oyani tushuntirib bera olish, uni amalga oshirish uchun qadamlarni yozib chiqish, shu qadamlarni bajarish uchun harakatni boshlash, har kuni g‘oyani loyihaga aylantirish ustida ishlash hammaning ham qo‘lidan kelmas ekan.

Hurmatli StartUp asoschilari:

- Agar StartUpʼingiz hali g‘oya shaklida bo‘lsa, iltimos, StartUp qurish asoslarini o‘rganing.

- IT mutaxassisi qilib beradi, men shuni ustida biznes qilaman, - degan fikrdan qayting.

- G‘oyamni yasayman, sarmoya (investitsiya) olaman va sotaman, - deb kichik fikrlamang.

G‘oya bormi? BIror muammoni hal qiladimi? Raqobat qila olasizmi? Ko‘lami katta emasmi? Tez bozorga kira olasizmi? O‘zi umuman bozorga kirish imkoni bormi?

kabi savollarga javob topib qo‘ying.

Nazariy asosini bilmasdan ish boshlasangiz 90/10 ning 90 tomonida bo‘lib qolasiz.

StartUp boshlaganingiz zo‘r, to‘xtamang. Parallel nazariy tomonini ham o‘rganing. Biz sizga yordam beramiz. Faqat savollar va taqdimot (pitch)ga yaxshi tayyorlaning. Vaqtni nazorat qiling.

Foydali va asosli StartUpʼlarimiz koʻpayvursin!

15.09.2025 London
@DrAlgorithm

Ta’limdagi o‘zgarishlar yaxshi-mi?

Bizning ta’lim tizimi haqida ko‘p gaplar bo‘lmoqda. Yangi o‘zgarishlar kiritilmoqda. Menga bu aysbergni eslatvordi.

So‘nggi 30 yilda ta’limda kamida 5 ta katta o‘zgarish bo‘ldi. Va "negadir" hammasi muvaffaqiyatli emas. Rejalashtirilgan demoqchi bo‘laman, lekin uyushtirilganga o‘xshaydi.

Kitob muqovasi sotuvchi oshiradi, lekin mag‘zi kabi ko‘p emas.

Ta’limda o‘qitish manbalari (darslik, qo‘llanma kabi) ustida ishlamas ekanmiz, yangi bino qursak ham, yillar sonini sanasak ham natija yaxshilashmaydi.

Bir vaqtlar ta’limda yurganim uchun hozir ham ko‘p kuzatib turaman. Yaxshi tavsiya berayotgan ustozlar bor. Negadir eshitgimiz kelmaydi. Ota-onalar ham eshitmaydi. Vaholanki....

Muammo ustozlarda emas. Muammo ularga qo‘yilgan talablarda.

* Alifbo almashdi.
* Baholash tizimi 4 marta almashdi. (Ball, baho, ball+, Ball Pro Max)
* Maktab turi almashdi. (Bog‘cha, boshlang‘ich, katta sinf, kollej, litsey, gimnaziya)
* Universitetni aytmasa ham bo‘ladi. (Oliy ma’lumot, Tugallanmagan "chala" oliy, Oliy (magistr), Nomzod+Doktor -> PhD, keyin DSc, Akademiklar esa, rahmatli bo‘lib ketishdi)

Sizning ham asabingiz buzildimi?

- Muammoni hamma biladi, yechimdan gapir, yechimdan, - deysizmi?

20 yil avval chet davlatidagi ta’lim vazirligida bo‘lgan edim. Malaka oshirish maqsadida borgan edim. Biz uchun qo‘llash mumkin bo‘lgan juda ko‘p foydali ma’lumotlar olganman.

Ta’lim vazirligi ichida har bir fan bo‘yicha kafedralar bor. Matematika, fizika, tarix, Ingliz tili va boshqalar.

Har bir kafedra o‘zining faniga ixtisoslashgan. U yerda maktabda dars berib, natijaga erishgan ustozlar ishlaydi. Chekka hududdan bo‘lsa ham markazga ko‘chirib o‘tkazishadi. 3-4 yillik shartnoma tuziladi. Keyin yana maktabiga qaytib ketadi.

Vazirlikda yaqin yashaydigan odam emas, fanni yaxshi biladigan ustoz ishlashi kerak.

Har yili yangi kitob chiqadi. Har yili!

- Darslik kitobi, o‘quvchi uchun.
- Dars berish qo‘llanma kitobi, dars beruvchi ustoz uchun.
- Imtihon savollari, yil davomida olinadigan barcha katta va kichik imtihon, so‘rovnoma, olimpiadalar.
- Tarqatma materiallar, veb saytlar, multimedia va boshqalar.

Kitob yozish qiyin. Chiroyli kitob chiqarish yanada qiyin.

Shu sababli vazirlik ichida:
- Dizaynerlar ishlaydi. Ustozlar bergan kitobni dizayn qilishadi.
- Nashriyoti bor. Barcha kitoblar shu yerda chop etiladi.

Faraz qiling, fizika kafedrasi kitob tayyorladi. Dizaynerlar uni dizayn qiladi. Nashriyot 1-2 dona rosmana kitob chop etadi. Keyin fizika ustozlari kitobni tekshirib, xatolari ustida ishlashadi.

Masalan, "A nuqtadan, B nuqtaga obyekt 120km/soat tezligida yo‘lga chiqdi...."
Dizayner olmaxon chizib qo‘ydi. Fizika ustoz uni poyezdga almashtiradi.

Til kafedrasi yiliga o‘nlab kitoblarni o‘z tiliga tarjima qildiradi. Tashqi tarjimonlardan foydalanadi.

Bu tizimda kimga maza?

- Vazirlikdagi fan ustoziga. O‘zini fanidan maza qilib kitob yozadi.

- Maktab o‘qituvchisiga. Material tayyor, qanday dars o‘tish tayyor, imtihon savollari tayyor, tarqatma material va uy ishi ham tayyor. Dam olib dars o‘tadi. Charchab emas.

- Vazirlik va rahbarlarga ham yaxshi. Rostdan ham ta’lim sifati oshadi.

Xulosam

Bizga o‘qitish manbalarini yasab beradigan ustozlar kerak. Ularga yaxshi sharoit yasab berish kerak. 100 kishiga yaxshi sharoit tayyorlasak, ular 10,000 ta maktab, 100,000 o‘qituvchi uchun tayyor qo‘llanma beradi. Shunda biz ta’limni rivojlanishiga hissa qo‘lgan bo‘lamiz.

Xorij tajribasini o‘rganaylik, o‘zimizning fidoyi ustozlarimizni hamkorlikka chaqiraylik, ta’limni rivojlantirish osonroq bo‘ladi.

Nasib qilsa, aynan shu 100 ta ustoz 40-50 mln dan oylik oladi.

Kuningiz xayrli o‘tsin. Ta’limdagi o‘zgarish (reformalar) uning rostdan ham rivojlanishiga hissa qo‘shsin.

17.09.2025 London
@DrAlgorithm

Dasturchiga kompyuter kerakmi?

Hayotiy voqea.

Bir vaqtlar o‘quv markazida ishlar edim. Talabalarga dasturlashni o‘rgatar edik. Darslarimiz 6 oylik bo‘lib, birinchi oy faqat algoritm mavzusi o‘rgatilar edi.

Algoritm turlari, nima uchun va qayerda ishlatiladi, - kabi mavzular bilan boshlanar edi.

Darslar 15-20 kishilik xonada bo‘lar edi. Sababi, bizning kompyuter xonalarida 8 tadan kompyuter bo‘lib, algoritmni tugatib, 2 ta guruhga bo‘linishligi kerak edi.

Nimani sezdingiz?

5 soniya o‘ylab ko‘ring....

Xonada 15 ta o‘quvchi, 1 oy Algoritm mavzusini o‘qiydi, kompyuterlar soni 8 ta.

G‘alati emasmi?

Aynan shunday. Dasturlash kursiga kelgan talabalar 1 oy davomida qog‘ozda o‘rganishar edi. Kompyutersiz.

Har safar yangi guruh ochganimizda: Qachon kompyuterga o‘tiramiz, - der edilar.

Bu usulni ataylab qilgan edik. Dasturlashni yangi o‘rganayotgan odam fikrlashni va diqqatini bitta joyga jamlashni bilishi kerak. Qog‘ozda esa aynan shu sodir bo‘ladi. Xonada hatto chalg‘ituvchi rasmlar ham yo‘q.

Qog‘oz, qalam, doska + masala.

Blok sxema yordamida dastur yozar edik. Debug uchun ham doskadan foydalanar edik. Katta tizimlar qurilmas edi. Chunki maqsad kichik tizimni qilishni o‘rgatish. Shu bilan birga tizimlarni bir biriga ulashni bilish ham kerak edi.

Agar siz ham dasturlashdan dars berayotgan bo‘lsangiz, shu usulni ishlatib ko‘ring. Boshida 1 hafta talabalar noliydi. 1 oy o‘tib imtihon qilasiz, faqat yaxshi tushungani o‘tadi. O‘ta olmagani qaytadan 1 oy Algoritm o‘qiydi. O‘tganlari esa kompyuterda dasturlash tilini tez va sifatli o‘rganadi.

Doim beriladigan "Qaysi dasturlash tilini o‘rgansam bo‘ladi?" - degan savol javobini topgan bo‘lsangiz kerak.

Albatta, avval Algoritmni o‘rganing.

Buni bilgan odam yangi til o‘rganishi uchun 1 oy yetarli bo‘ladi.

....

Kitob o‘qib turib, shu maqolani yozdim. Fikrlarim bilan bo‘lishgim keldi. Tajribani shunday ulashmasak, boshqa yaxshiroq usulni eplay olmayapmiz.

Kuningiz xayrli o‘tsin.

19.09.2025 London
@DrAlgorithm

~1,200 kun necha yil?

Ba’zida vaqt tez o‘tganini sezmay qolamiz.

Jira bilan WebStorm'ni ulaganimga 1234 kun bo‘libdi.

Bilmay qolibman. 3 yil o‘tib ketibdi-ya.

Vaqtni daqiqalarda o‘lchang.
- Azim Po‘lat

Shunga amal qilish kerak ekan. Bo‘lmasa kunlarda o‘lchab, vaqtimizni boy beramiz ekan.

Kim aytganini eslolmadim-u, lekin:

- Agar biror ishni qilishga 1 kun berilsa, 1 kunda qilaman.

- Agar o‘sha ishni qilishga 4 soat berilsa, 4 soatda qilaman.

- Agar shu ishga 1 soat berilsa, 1 soatda qilaman, - degan edi.

O‘ylab qarasam: O‘zimizga qancha ko‘p imkoniyat bersak, shuncha kam ishga ulguramiz. Qancha kam vaqt ajratilsa, vaqtimiz ortib qoladi.

Keling shu fikrlarga asoslanib bitta chaqiriq (challange) qilamiz:

Kunlarni soatlarda, soatni daqiqalarda o‘lchashni boshlaymiz.

Boshladik: Bu postni 43 daqiqada yozib bo‘ldim.

Vaqtingiz barakali bo‘lsin!

20.09.2025 London
@DrAlgorithm

Rostdan, Senior keyin kim bo‘ladi?

Farhodjon kam yozadi, lekin juda sifatli ma'lumot ulashadi.

Bu xabar (post)lari dasturchilarning "katta bo‘lish" yo‘li haqida ekan. O‘qib ko‘ring juda sodda va aniq yozilgan. Agar shu usulni qo‘llasangiz, siz ham keyingi darajaga o‘tishingiz oson bo`ladi.

Mavzu: Engineering Ladder (Narvon)

Ko‘tarilgan masalalar:
0. Super Dispatch tajribasi.
1. Ishga olishda darajani aniqlash qiyinligi.
2. Komandalarda har xil darajalar.
3. O’sish uchun aniq ko’rsatma yo’qligi.
4. Senior darajasidan keyingi daraja yo’qligi.

https://t.me/farhodjon/775

Kecha bu xabarni o‘qib, sizga ham ulashishni reja qilgan edim.
Dam olish kunlarini yaxshi xabar (post)lar bilan tugatish maroqli bo‘lsa kerak.

Ertangi haftani yaxshi boshlab oling.

21.09.2025 London
@DrAlgorithm

Qahva (kofe) - halolmi?

Qahva ajoyib narsa. Ishing tushmasa, maza qilib xotirjam yurasan. Lekin u bilan tanishsang va ayniqsa yaqin o‘rtoq bo‘lib qolsang, bo‘ldi, kunda bir necha bor hayoling u bilan band bo‘ladi.

Gemini bilan qahva haqida gaplashib qoldim. Qiziq narsalar bilib oldim.

O‘zimizcha "Coffee shop"ga chiqib kelaylik deymiz. Aslida Qahva chiqqan vaqtda "qahvaxona" atamasi chiqqan ekan (1500 yillar).

Ilk qahva 9 asrda Efiopiyada ixtiro qilingan ekan.

15 asrlarda Yamanda qahvani yetishtirish va sotishni boshlashgan. Bu esa Arablar diyorida qahvaning keng tarqalishiga sabab bo‘lgan. Ilk "Qahvaxona"lar ham o‘sha davrda ochilgan ekan. Bu davrlarda So‘fiylar tungi ibodatda qoim turish uchun, uhlab qolmaslik uchun iste’mol qilishgan ekan.

1511 yilda qahva Makkada harom qilinadi. 1524 yilga kelib, Usmonli sultoni Sulton Sulaymon I davrida, bosh Mufti Mehmed Ebüssuûd Efendi (al-İmadi) fatvosi bilan halol qilinadi.

16 asrda qahva Eron, Misr, Suriya va Turkiyaga tarqagan.

17 asrga kelib qahva Ovrupo davlatlarida ham keng tarqala boshlagan. Londonda 300 ta qahvaxona bo‘lgan ekan. Qiziq narsa aytaymi?

Hozirgi Co-working markazlarining vazifasini 17 asrda Qahvaxonalar bajargan ekan.

G‘oya egalari, san’at egalari, tadbirkorlar va boshqa turli soha odamlarini birlashtirish va yangi loyihalarni muhokama qilish uchun joy bo‘lgan ekan.

Ba’zi qiziq faktlar:

1. Qahva donalarini ko‘pchilik meva deb o‘ylasa kerak. Aslida esa u qahva daraxti mevasining danagi ekan.
2. "Mocha" qahvasi. Mocha so‘zi Yamandagi Moxa portning nomi bo‘lgan.
3. 1675 yilda Angliya qiroli Karl II qahvaxonalarni taqiqlagan.
4. Qahva so‘zi arabcha vino so‘zidan olingan, - deyiladi.
5. Qahvada 1,500 ta ta’m bor ekan. Vinoda esa 200 ta.

Coffee (en) <- kaffei (dk) <- kahve (tr) <- qahva (ar).

Qahvasiz o‘zingizni yaxshi his qilsangiz, ichmasdan yurganingiz ma’qul. Qahvaga o‘rgangan bo‘lsangiz, 18:00dan keyin ichmang.

Salomat bo‘ling

Rasm: Mahalladagi qahvaxonada rasmga oldim. Yozilgan yozuvi yoqdi.
- Yetarli qahva bilan dunyoni boshqarar edim.

22.09.2025 London
@DrAlgorithm