አሁን ያለውን ስናየው ግን ለማሰብ የሚከብድበት ደረጃም የደረሰ ይመስለኛል። ዛሬ አድማሱ ጀንበሬ የተቀበሉትን ስም ምን ዓይነት ሰዎች እንደሚጠሩበት ለመረዳት ፌስቡክን ማየት ብቻ ሊበቃ ይችላል። ስብከት የጀመረው ሁሉ የሚጠራበት ስም ነው። አሁንማ የስም እደላው ወደ ምእመናን ሁሉ ተሸጋግሮ፣ በኩረ ምእመናን፣ መጋቤ... የሚባለው ቁጥሩ በርካታ ሆኗል። ይህም አልበቃ ብሎ አንዳንድ ሰዎች የተጠና እና ማንም ያልተጠራበት አስፈጥረው እስከመቀበል ደርሰዋል። አንዳንዶች ደግሞ በሁለት ስም ሁሉ ይጠራሉ። ቢያንስ በንጉሡ ዘመን የሚቀበሉት ሰዎች የተመረጡ አይገባቸውም የማይባሉ፣ በብዙ ነገር የተመሰከረላቸው ነበሩ። ከሆነም እንኳ ያን መንገድ ባይለቅ አንድ ነገር ነበር። አሁን ግን ስም ማደሉ አስገራሚ ደረጃ ላይ ከመድረሱ የተነሣ ከበሽታነት ወደማይድን በሽታነት የተሸጋገረ ይመስለኛል። ኦ አኃውዬ ኢታፍቅርዎ ለዓለም ፣ ዓለሙኒ ሐላፊ፣ ንብረቱኒ ሐላፊ፣ እስመ ኩሉ ሓላፊ ውእቱ እያለች በቅዱስ ጳውሎስ ቃል ምእመናን ላይ በየቅዳሴው የምታውጅ ቤተ ክርስቲያን በዓለም እንኳ በሌለ በሽታ አገልጋዮቿን አስነድፋ መቀጠሏ የሚያስገርም ነው። ምንም እንኳ ጥናት የሚጠይቅ ቢሆንም ከላይ እንዳልኩት ይህ የመዓርግ ጣጣ ነገሥታትን ጥላ አድርጎ ከቤተ መንግሥት የገባ እንጂ ከቤተ ክርስቲያን አስተምህሮም ሆነ ትውፊት ምንም መነሻ የለውም። እንሰጠውም ከተባለ ከእናንተ ማንም መምህር ሊቅ ተብሎ አይጠራ የሚለው የጌታ ትምህርት ነው የሚመለከተው። እርሱም የሚቃወመው እንጂ የሚያጸድቀው እንዳልሆነ እናውቃለን። ታዲያ ጨርሶ አይጥፋ እንኳ ከተባለ ሁሉ በአግባብ እና በሥርዓት ይሁን በሚለው ቃለ ሐዋርያ መመራት ሲገባው እዚህ ደረጃ መድረሱ አሳዛኝ ነው። ምንአልባት አንዳንድ ሰዎች እንደሚሉት እንደ መጠሪያ ስም ወይም እንደ ክርስትና ስም ለሁሉም ከተዳረሰ በኋላ በዚያ በኩል ይጥፋ ተብሎ ካልሆነ በቀር አሁን ያለበት ደረጃ አሳፋሪነትን ያለፈ በእጅጉ አስቀያሚ የሆነ ይመስለኛል።

እንደ እኔ እንደ እኔ ቤታችን ቢያንስ በጉዳዩ ላይ ውይይት አድርጎ ቢያንስ በመመሪያ እና በሕግ መገደብ እና ትንሽ እንኳ ድንበር ያለው ነገር እንዲሆን ሊታሰብበት አይገባም ትላላችሁ? ቤተ ክርስቲያኒቱ ንጽሕት ክብርት የመሆኗን ያህል በዚህ ዘመን ያለን ልጆቿ ደግሞ ያላራከስነው ነገር ያለ አይመስልም። ለሁሉም መዳኛውን ይስጠን።

✅መምህር ብርሃኑ አድማስ