#تاوکاره_روز

ای روزی باهاره روزا
توم پِروما تاوْکارَه روزا

کوکوتی تی فیقون کَری
ناله ژَنی دارهَ سَرون

پیرو جْونو خـْرْدو کَلون
اسیری کـَشین بْجارهَ سَرون

خْرْدَنِن چْرْک و چْـلـْون
شیوَن کـَرین مـَرْزَه سَرون

کـَبـْلِه بْـرا لاکْ دَسیَه گَودَرَه تِنه
یواش یواش
اورام ژَنی چْـفـْـرَه کیلون

دور دیِسیم شْـناخـْـتـِه نِبین
هَمَه گـْـلـَه اینـْدی مونین

ایسَرِن خـْـلـْیک بـْدَسـْت
ایسَرِن وَرْزا رونین

رعیَتن اَربابون دست بیگاری کشین
شوَ سَرون پاویسانهَ اشتن کَه شین

کیلاغا پیشی دْراز آبین کـَرین ناره
شام چْه دارین چْمْپا پْلِه چاچَه تارَه

صْبانهَ سَرَه پْلِه تله چایی دوشاوینهَ
دَنی دَنیْن لوکی دَمونی چیلیک ژَنین

هَته چْیتَه خْشکَه مَرْزون
درازه روزی خْلیک ژَنین

چَپورَه خاشون تـْرا بیشمار
چونه خاشِن بَـوَشْتینا

تاوْکارَه کار ظلمَه کارا
ایسَرون نوآ دَوَشتَینا

وَرْزا کـْریَه گرونا
رعیت اِستا اَنـْشـْتا

قحْطیَه سالا خشْکی گِتا
ماری گوزْگا دَنـْشـْتا

ماله خراک نی ایوری پیدا نیا
کاریَه وَرْزا اْم لاک دَشا
اً لاکی کو بَوَشـْتا

چیکیره زمین کاوْل نِشی
وَرْزا نِپْری ویمونی

لپ آگِرین وَرین سْرا
خْشْکهَ کلشی چوفونی

چراغعلی مایی تِـلهَ روئه
باور بْکهَ خْشْکهَ نـَشی

صیب سحَری هَمَه ای پیشته
قوزقوزَکِه بْجاری دَشی

دْرازَه روزی چِمِن سیا ایسپی کَرین
شـَوَه سَری وَرْوَرَکِه
اْشـْتـَن کـَه شی

صفرعلی خَیلی وَخْـتا
دور بوبو دار بَلـَـکا

پائون ایما کـَرْدا
ویچیکونا کـَه دَلـَکا

کرمعلی بدهکارا
هیچ نِزونی کَتهَ را شی

طلبکارون وَختی وینی
مورَه آدَی اَتهَ را شی

رستمعلی پیشْکاوْلی دَستهَ گِری
ایوَری پْری و قوزکـَری

سَراوَه کیلهَ آو نِمونی
تون آوهَ کیلهَ جوقوز کـَری

رعْیَتِن باریکی ریسین
انهَ هَری نای نِدارین

اَربابون ظلمی کَشین
هوی بْدارین های نِدارین

سوکهَ خونی کاوْلی دَستهَ وَخْتی گِرین
دا شَوَه سَر وَرْزا دومْبـْلهَ پی بْپْرین

کاوْلی اَفن دارهَ ریشَه کو گیرکری

پیشکاوْله کار جونهَ آدمی پیرکَری

گَدْیهَ کَرِن نی ایوَری
مردمی کـْرا وْزْه کـَرین

تا فـْرْتی بی دَراین سْرا
سْفته بنی دْمْ دَکرین جْزْه کَرین

دْرازَه روزی مَرْزَه سَرون ویلینگ ژَنین
دا ته وینین الکینهَ
ایوری پْرین شیلینگ ژَنین

بیلاخره هم سَختی سوختی دیلهَ کا
بْجارهَ کیلن سبز آبینه هْمْ مینهَ کا

بعد از نـْشا چند روزی بعد
ویجین دْباره موقی یا

زَنانه اون را طاقت نیا
سَخته کارا مَگه شوخی یا

روکهَ تِه موندی آکـَرین
کار کاری سَر کولهَ بارا

واش ویوَری بْجاری تونی
واشهَ دَوا اَموقی کارا

باور بْکه ای هَفـْتهَ سَر و بـْن
از اْمْ جْمهَ تا اَ جْمهَ

کَفا بْجار خَجَک ژَنی
جیرَه بْجار سورخاچْمهَ

مادوسهَ زمین چْـفـْرَ بْجار
دریا واشی وی وَرْدا

بْرْزَه بنهَ ویندهِ نِبی
سْجاکه بْنهَ پِویَر دا

ویجینهَ کرِن ایی مْشتهَ پْلِه
ای لینگی سَر بوخور و نمیر

پا پینجهَ ین چلْ ویشو
دَسَه پینجهَ ین خون دَمیر

آخـْرَه سَری چْه تـْرا بوام
با چْه وَضْع و فلاکتینهَ

رعیت اْشتن اطفالینهَ
چْلی کو پـِرومهَ سَکراتینهَ

#بهار_1388_کرج
#رضا_نعمتی_کرفکوهی(#رادَویار)