تمن بتونة

نحتاج صحن تمن صغير مطبوخ (ممكن من الي زايد من الغده )
بطاوه نخلي زيت وبصل ناعم بعدين التمن وفلفل اسود وشويه ملح واذا تحبونه سبايسي خلو فلفل بعدين خلو تونه بدون مي وقلبو المكونات ثواني وخلو بصحن تقديم تكدرون تخلون بالنهاية رشه فلفل احمر مجفف (ما يكون طعمه حيل حار بس طيب) وشريحه ليمون وخيار

كفتا دجاج

نحتاج صدر دجاج مفروم جاهز لازم ويا لية حتى لا يصير يابس وقشر ليمون وكرفس ورشه ملح وشويه فلفل اسود نخلي ويا طحين ربع كوب ونعجنه تصير عجينه متماسكه نسوي على شكل دوائر ونقلي بزيت على نار هادئة حتى يستوي من الداخل

للصلصه نحتاج ٢ عصير طماطه بدون قشر ونص راس بصل مفروم ناعم وفص ثوم مهروس وكجب ودبس رمان ومكعب ماجي دجاج ورشه فلفل اسود ومعجون

بجدر أو طاوه شويه واسعه نحمس البصل والثوم ونخلي خاشوكه معجون بعدين نخلي عصير الطماطه ودبس رمان وكجب خاشوكه ومكعب ماجي ورشه ملح وفلفل اسود وكوبين مي اول ما يفور ننصي النار ونغلق الجدر ربع ساعه يصير القوام شويه ثكيل نخلي ببايركس ونخلي صدر الدجاج المقلي تكدرون تدخلونه فرن من فوك دقائق أو لا براحتكم اني ما دخلته فرن



وهاي هيه الف عافيه 🍓

مندي دجاج

اول شي الدجاجه نحضر التتبيلة مالتها ونبيتها بالثلاجه ليلة كاملة
التتبيلة / بطاحونه نخلي فلفل اسود , كركم ، عود دارسين , ملح , هيل ، ورق غار نطحنهم ونخليهم ع الدجاجه مع شويه زيت حتى تسهل عمليه الدهن نشبع الدجاجه بالتتبيلة ونغطيها ونخليها بالثلاجة ليلة كاملة
ثاني يوم نحضر التمن / نخلي زيت بالجدر ونخلي بصل ناعم ونفس التتبيلة الي خليناها ع الدجاجة ونخلي التمن بدون مي ونقلب زين حتى التمن كله يصير لونه اصفر ونخلي بكاسه مي دافئ ويا مكعب ماجي ونخلي ع التمن لحد ما يصير مستوى المي أعلى من التمن بأصبعين (معلومه اول ما خلينه التمن نطفي النار)
هنا نبدي بمرحله الشوي نغلف الجدر بسليفون شوي ونجك السليفون نسوي ثقوب هواي ناعمه ونخلي الدجاجه ع السليفون ونغلف مره ثانيه الدجاجه وندخلها فرن شوي نازل ع الأرض ونشغل الفرن من تحت ومن أعلى تأكدوا انو التمن نشف رفعوها فوك وهاي العمليه تستغرق تقريباً ساعتين نشيل السليفون ونكسب الدجاجه شوي من أعلى عشر دقائق كافيه

بعد ما خلصنه شوي نطلعه من الفرن نحمي فحمه ونخليها بكاسه صغيره ونخلي زيت ونغلق الجدر حتى تصير ريحه شوي ع الفحم

وهاي هيه الف عافيه

صلصه دقوس

بمحضره الطعام نخلي ٢ طماطه مكشره وفلفل وحده صغيره ونص خاشوكه معجون وشوي شطه وزيت زيتون وملح وفلفل اسود نخلط المكونات كلها بالمحضرة وبس صارت عدنه صلصه دقوس


وهاي هيه الف عافيه

دامبلينغ

للعجينة نحتاج فقط طحين ومي ورشه ملح نسوي العجينه متماسكه مو مايعه ولا كلش قاسيه نغطيها ونتركها نص ساعه ترتاح


للحشوه نحتاج صدر دجاج مفروم لو لحم مفروم براحتكم تكدرون تغيرون بالحشوه حسب رغبتكم اني خليت لحم مفروم وكرفس ناعم وبصل ناعم وفص ثوم ناعم وببريكا وملح وفلفل اسود وشوي كجب مفروض نخلي صوص الصويا بس ما عندي

بعد ما ترتاح العجينه نسوي دوائر صغيره بالطحين ونمدها على شكل دائره مسطحه نخلي الحشوه (ملاحظه الحشوه نيه بدون حمس ولا شي) ونغلق الدائره مثل ما موضح بالصوره

طريقه الطبخ اكو طريقتين اني سويتهم اثنينهم والنتيجه اثنينهم طيبين

تكدرون تقلونها بالزيت على نار هادئه من الجهتين

أو تخلونها تستوي بالبخار تطلع شبه مسلوقه

وهاي هيه الف عافيه

كيكه حليب محموس

نحتاج نخلط بيضتين أو ٣ وظرف فانيليا وكوب شكر ونص كوب زيت نخلطهم زين بالخفاقه

بطاوه نخلي كوب ونص طحين وكوب اله ربع حليب (بودره وليس سائل) نخلي الطاوه على نار متوسطه ونقلب الحليب والطحين سوه لحد ما يصير لونهم بني خفيف مو كلش يحترك

نجيب الحليب والطحين المحموس نخليهم فوك الخليط ونضيف كوب مي وظرف بيكنج باودر وجوز ونخلط المكونات إذا كان الخليط ثكيل نضيف مي ونخلط لحد ما يصير القوام شبه خفيف
نخلي الخليط بالقالب وندخله لفرن محمي سابقاً


وهاي هيه الف عافيه