МУДДАОЛАРДАН ҲАЛИ

Дилда кўпдир муддаолардан ҳали,
Кўзда бор равшан зиёлардан ҳали.

Найда жон йўқдир, вале найчи тирик,
Унда чексиз хушнаволардан ҳали.

Хасталикдан қўрқмадим ёр ишқида,
Мен учун беҳад даволардан ҳали.

Кўрмадим умрим аро ҳаргиз зиён,
Меҳрибон ақли расолардан ҳали.

Лекин офтоб қанчалик нур сочмасин,
Топилур кўнгли қаролардан ҳали.

Шакли одамдир, илон янглиғ чақар,
Учрагай бундай балолардан ҳали.

Ҳожатинг айтсанг, қилур сендан тилак,
Дуч келур бундай гадолардан ҳали.

Гул узиб, санчар тикан боғбонга ҳам,
Борку шундай беҳаёлардан ҳали.

Чустий, бу сўзга амал қил, сенда ҳам,
Балки, бор шундай хатолардан ҳали.

КЎРГАЧ

Киролмай иккилангай уйида ҳар ким илон кўргач,
У йўлга юрмас оқил қайси бир йўлдан зиён кўргач.

Мени севмайди ёрим деб шикоят қилма оламга,
Нечук севсинки, сенда бевафоликни аён кўргач.

Ўзи хуш кўрмагандан юз ўгирмоқлик табиийдир,
Ўлиб ҳам яхши бўлмайсан, элу юртинг ёмон кўргач.

Қадам қўйдим бу йўлга, заррача жон хавфини қилмай,
Табассум мўъжизотидан лабида янги жон кўргач.

Нигорим икки шамшир ўйнатиб майдон аро кирди,
Дилим мулкини бердим беуруш соҳибқирон кўргач.

Агар қурбони бўлсам қайтадан дунёга келгайман,
Бир ўлган икки ўлмас дейди руҳимни жаҳон кўргач.

Ширинлик лофин урган ҳар ширинлик кечди даъводан,
Сўрарда ишқ элин ҳолин бу хил ширинзабон кўргач.

Ўқи тарихни, минг турли замон келди ниҳон бўлди,
Хижолат пардасига кирди бу янглиғ замон кўргач.

Эл ичра номинг ўчмасдан юриш Чустий насиб ўлсин,
Қалайсан деб қўярку, лоақал дилбар омон кўргач.

БУЮК ВА БЕНАЗИР ШОИР ШЕЪРИЯТДА ТУРКИЙНИ ЯКҚАЛАМ ЭТГАН МУТАФАККИР АЛЛОМА АЛИШЕР НАВОИЙНИНГ ТАВАЛЛУД АЙЁМЛАРИ БАРЧАМИЗГА МУБОРАК ВА ҚУТЛУҒ БЎЛСИН!!! 🌹🌹🌹

НАВОИЙ

Адаб мулкин гулистони Навоий,
Адиблар фахри достони Навоий.

Қаламга жон кирар мадҳин ёзарда,
Ғазаллар жисмининг жони Навоий.

Тафаккур оламида марду майдон,
Азиз ўзбек шараф-шони Навоий.

Қаламкашлар агар бўлганда минг саф,
Баҳодир, бош қўмондони Навоий.

Ҳисобсиз маънавий боғларга боқсам,
Аларнинг катта боғбони Навоий.

Жаҳонда қилди чексиз одамийлик,
Буюк инсонлар инсони Навоий.

Навоий қадрига етди замонам,
Бу даврон янги даврони Навоий.

Унинг шогирдларин шогирдиданмен,
Хазина менга девони Навоий.

Қўйиб кетди ҳисоби йўқ асарлар,
Эрур нодир асар кони Навоий.

Ҳақиқатга, адолатга чақирди,
Шаҳу бекларни ҳар они Навоий.

Менинг шеъримга ҳам андоза бўлди,
Етук мезон-ул-авзони Навоий.

Дедим, таъзим этиб, алқисса, Чустий,
Сухан шоҳию султони Навоий!

ХУРРАМДИР

Қадрдон ёру дўстлар бўлмаса, олам жаҳаннамдир,
Жаҳаннам ёру дўстлар бирла бўлса, жаннатоламдир,
Бу сўз мазмунидан ақл ила бўлган баҳраманд камдир,
Бу хил ғам, ғам эмас, донога нодонлик ғами ғамдир,
Биров қайғуси байрамдир, бировга тўй мотамдир.

Оёқ устида бир кун ё турармиз ё туролмасмиз,
Кўришмоқ боғидан гуллар терармиз ё теролмасмиз,
Бу сирдир, бир-биримизни кўрармиз ё кўролмасмиз,
Қалай ҳолинг дебон ҳатто сўрармиз ё сўролмасмиз,
Бу қисқа умр қадрин билмаганлар ҳайфи одамдир.

Ололсам бир кўнгилни, менга бир дунёдан ортиқроқ,
Киролсам эл дилига, жаннатул.-маъводан. ортиқроқ,
Сувин ҳар қатраси тўлқинли ҳар дарёдан ортиқроқ,
Эл ичра камтаринлар менга ҳар аълодан ортиқроқ,
Буларнинг ҳар сўзи, ҳар суҳбати дардимга малҳамдир.

Дуру гавҳар баҳоси бору, дўстликнинг баҳоси йўқ,
Буни фаҳм айлаганлар ичра ҳеч бахти қароси йўқ,
Деёлмасман сира заргар элининг заршуноси йўқ,
Бу хиллар ўтсалар ҳам, ўлмагай умрин адоси йўқ,
Қазоси кун тутилгандек бутун оламга мотамдир.

Омон бўлсин, омон бўлсин, омон бўлсин, омон бўлсин,
Жаҳонда тинч-омонлик бирла бирлик ҳукмрон бўлсин,
Иложин топса ёру дўст бирла доим ёнма-ён бўлсин,
Узоқда бўлса ҳам, Чустий, яқиндек меҳрибон бўлсин,
Кимики меҳрибонлар бирла бўлса, шоду хуррамдир.

АЗИЗ ВА ҚАДРЛИ МАВЛОНО ЧУСТИЙ ШЕЪРИЯТИ МУХЛИСЛАРИ БУГУН -
20- ФЕЕВРАЛЬ ОТАМИЗНИНГ ТАВАЛЛУД ТОПГАН КУНЛАРИ.
АЛЛОҲ ОТАМИЗНИ ҒАРИЙҚИ РАҲМАТ, ШОИСТАЙИ ЖАННАТ АЙЛАСИН, ҚАБРЛАРИНИ ҚУРЪОН НУРИ БИЛАН ЧАРОҒОН ҚИЛСИН. ТОНГЛА МАҲШАРДА ЎЗИНИНГ БЕПАРДА ЖАМОЛИГА МУШАРРАФ АЙЛАБ, ПАЙҒАМБАРИМИЗ САЛЛАЛЛОҲИ АЛАЙҲИ ВА ОЛИҲИ ВАСАЛЛАМ ШАФОАТЛАРИГА САЗОВОР АЙЛАСИН!

Йўқолмайсан

Элинг севса, агар дунёдан ўтсанг ҳам йўқолмайсан.
Севилмай кўзни юмсанг, балки роҳатда ётолмайсан.

Азиз дўстлар учун шеърим муаммо бўлмади ҳаргиз,
Самимий бўлмасанг, фикрим тилисмотин очолмайсан.

Кўмиб бўлмайди ҳатто сояниким, соя асли бор,
Кўтарма доманинг, ойни этак бирлан ёполмайсан.

Ярашмас майда сўзлик сенга асло, эй расо қомат,
Сенга сиғмайди, гўдаклар либосини киёлмайсан.

Ширин суҳбатни жоҳил бирла нодондан умид этма,
Қалампирдан шакар, ҳаргиз, шакардан бол ололмайсан.

Уялмасдан ҳамиша ҳар нечук хизматга бел боғла,
Уялмай ишласанг, дўстим, эл олдида уялмайсан.

Агар сен қанчалик сермева, серҳосил дарахт бўлма,
Қадалса илдизинг тош устига, унда ўсолмайсан.

Ватан бир боғ эрурким, бунда тошлоқдан асар йўқдир,
Шу боғда ўсмасанг, таърих боғида сен қололмайсан.

Назаргоҳингда, эй дўстим, кўринмай қолса гар Чустий,
Уни эл қалбидан изла, бўлак жойдан тополмайсан.

Чустий

@Chustiy_ijodi

Assalomu alaykum!

Salomatmisiz?

Namangan davlat pedagogika instituti matbuot kotibiman

Chustiy domlani xotirlab video tayyorlagandik bir ko'rasizmi deb yuboryapman