የክርስቶስ ደቀመዝሙር ✞

#_______"ጮሃችሁ አሜን በሉ፣______#
ባትፀልዩም እግዚአብሔር የሚያስፈልጋችሁን ያውቃል"
⛪️⛪️⛪️እለቱ እሁድ በመሆኑ አዳራሹ በሰው ሙልት ብሎ ይታያል። የእለቱ የዝማሬ መሪዎች ከስድስት የማያንሱ ዝማሬዎችን ቀጣጥለው ከዘመሩ በኋላ የእለቱ ሰባኪ መድረክ ላይ ቆመ። በዚያ ቤተክርስቲያን ለማምለክ ከዚያ በፊት ተገኝቼ የማውቅ አይመስለኝም። በዚያን ዕለት ግን 'እግዚአብሔር ዛሬ ምን ይናገረኝ ይሆን?' በሚል ጥማት ጉባኤው መሃል ተቀምጬ እንደነበር አስታውሳለሁ።

ሰባኪው ሕዝቡን ለማነቃቃትና አሜን ለማስባል ይጠቅማል ብሎ የሚያስበውን ሁሉ እያደረገ ነው። ከሰባኪው መወራጨት በላይ እኔን የገረመኝ ግን የህዝቡ ስሜታዊነትና ያለማስተዋል አሜን ባይነት ነበር። ሰባኪው በቅጡ ያነበበው የመፅሃፍ ቅዱስ ክፍል አልነበረም። ወጥ የሆነ ሃሳቡ ግልፅ ባይሆንም አልፎ አልፎ እግዚአብሔር መልካምና ፍቅር እንደሆነ እየተናገረ ቀጠለ። ከዚያም "እኔ እኮ አንዳንዶቻችን ለምን ፆም ፀሎት፣ ደጅ መጥናት ምናምን እያልን እንደምንጨናነቅ አይገባኝም። እየው ወንድሜ ፀለይክም አልፀለይክም በረከቱ ያገኝሃል። እስኪ ጮሃችሁ አሜን በሉ፣ ባትፀልዩም እግዚአብሔር የሚያስፈልጋችሁን ያውቃል...።" ገና ንግግሩን ሳይጨርስ አዳራሹ በአሜንታ፣ በእልልታና በጭብጨባ ተናጋ። ሰባኪው ቀጥሏል.. በህዝቡ ድጋፍ የተደሰተ ይመስላል። "አስቡት እስኪ እናንተ ልጆቻችሁ ተርበው ምግብ እስኪጠይቁ ትጠብቃላችሁ? እግዚአብሔርም ለልጆቹ እንዲሁ ነው፣ አጠገባችሁ ያለውን ሰው ጨበጥ አድርጋችሁ አይን አይኑን እያያችሁ "አታካብድ፣ ባትፀልይም የሚያስፈልግህን የሚያውቅ አባት አለህ በሉት" አለ። እየሆነ የነበረውን ሁሉ እጆቼን አጣምሬ መሃል ተቀምጬ ስለነበረ የማየው ሁኔታዬ ያላማራቸው ከጎኔ የተቀመጡት ከሌሎች ጋር ተጨባበጡ።
በውስጤ የነበረው የእግዚአብሔርን ቃል የማድመጥ ጉጉት በሃዘንና በቁጭት እንዲሁም በብስጭት ተተካ። የሰባኪው ሲገርመኝ የህዝቡ ደግሞ እጅግ አስደነገጠኝ። ፀሎትን የማይደግፍ ሰባኪና መፀለይ የማይፈልግ ትውልድ እጅግ እየበዛ ያለበት ጊዜ ላይ ደርሰናል። በእውነት እነዚህ ሰዎች ሌላው ሁሉ ቢቀር 'የፃዲቅ ሰው ፀሎት በስራዋ እጅግ ታላቅ ነገርን ታደርጋለች' የሚለውን እና ጌታችን ኢየሱስ 'ወደፈተና እንዳትገቡ ትጉና ፀልዩ' ያለውን ብቻ እንኳን ስለማያውቁ ነው ወይስ መፀለይ አያስፈልጋችሁም መባሉ ለስጋቸው ስለተመቻቸው?
ፍርዱን ለሚመለከተው፣ ልብና ኩላሊትን ለሚመረምረው ትቼ መልእክቴን ላስተላልፍ።

1⃣ፀሎት ጉዳይ ማስፈፀሚያ ሳይሆን ከእግዚአብሔር ጋር ጊዜ ማሳለፍ(ጌታን ማዳመጥና ለጌታ የውስጥን መንገር) ነው። ከእግዚአብሔር ጋር መሆን ጥያቄ ባይኖረን እንኳን ማንነቱን በመናፈቅ በፊቱ መደፋትንም ያካትታል። አሳ ከውሃ ውጪ እንደማይኖር እኛም ከህልውናውና ከድምፁ ርቀን መኖር ስለማንችል ፀሎት ለእውነተኛ የክርስቶስ ተከታዮች የመኖርና ያለመኖር ጉዳይ ነው።
2⃣ፀልዩ ብሎ ጌታ ካዘዘን ካልፀለይን ብዙ የምንጎዳበት ምክንያት ስላለ ነው። ያልተመለሱ ጥያቄዎች፣ ችግሮቻችን ከኛም አልፈን ለትውልድ፣ ለቤተክርስቲያን ለአለማችን ሁሉ የመፍትሔ ቁልፍ ያለው እግዚአብሔር እንዲሰራና ክንዱን እንዲገልጥ መፀለይ እጅግ ወሳኝ ነው። ባለመፀለያችን እኛ እንጂ እግዚአብሔር አይጎዳም ።
3⃣ፀሎት በእግዚአብሔር ላይ ያለንን እምነት በተግባር የምንገልፅበት መንገድ ነው። ወደ እግዚአብሔር ካልጮህን በሱ መታመናችን ምኑ ላይ ነው?
4⃣ፀሎት ሰይጣንን የምንዋጋበትና የምናሸንፍበት መሳሪያም ነው። በዚህ አጭር ፅሁፍ የፀሎትን ጥቅም መዘርዘር ባልችልም....ትውልዳችን አንዱ የተጎዳው የፀሎት መሰዊያው ስለፈረሰ ይመስለኛል።

🙏 እለት እለት በጌታ እግር ስር በመሆን ጌታ ይባርከን።
#ምንጭ_FB
👍👍👍
@christdisciples
#የክርስቶስ_ደቀመዝሙር

65 views21:41