بەرزترین هونەری جەنگ لای "کوڕانی کۆماندۆ" بریتییە لە ملکەچ کردنی دوژمن بە بێ رووبەڕووبوونەوە، بۆیە هەمان تاکتیک دووبارە ناکەینەوە، کە جارێک سەرکەوتنمان پێ بەدەستهێنا.

مەشق و راهێنانی تیمێکی تایبەتی کوڕانی کۆماندۆی کوردستان...

كۆماندۆی كوردستان لە ئۆپەڕاسیۆنێكی فراواندا ژمارەیەك حەشارگەی د١عشی لەناوبرد و چەندین بەڵگەنامەی تایبەت و دەستنوسی تیر*ۆر*ستان هەڵگیرایەوە و مۆڵگەكانیان خاپووركران.

هاوشێوەی زنجیرە ئۆپەڕاسیۆنەكانی پێشتر و لەسەر فەرمانی بەڕێز فەرماندەی هێزەكانی كۆماندۆی كوردستان کاتژمێر ٤:٠٠ ی بەرەبەیانی ئەمڕۆ پێجشەممە ٢٠ی تشرینی دووەمی ٢٠٢٥ "كوڕانی كۆماندۆ" بە پشت بەستن بە زانیاری هەواڵگری و بە هەماهەنگی لەگەڵ لیوای ٨٧ی مغاویری سەر بە ئۆپەراسیۆنەکانی رۆژهەڵاتی سەڵاحەددینی سوپای عیراق، ئۆپەڕاسیۆنێكی بەرفراوانیان بۆ (چەمی رۆخانە) لە سنوری قەزای داقوقی باشووری پارێزگای كەركوك ئەنجامدا.

"كوڕانی كۆماندۆ" لە بەرەبەیانێكی زووەوە كێوماڵی پانتاییەكی بەرفراوانی (چەمی رۆخانە) و دەورووبەریان كرد و شوێنی (٨) مۆڵگە و حەشارگەی تیرۆر*ستان دۆزرایەوە و سەرجەمیان لە ناوبران و دەست بەسەر ژمارەیەك بەڵگەنامەی گروپە تیر*ۆر*ستییەكان و ژمارەیەك كەل و پەلی پەیوەندیكردندا گیرا و شوێنی مانەوەی تیر*ۆر*ستانیش خاپووركرا، هاوکات ئامانجی ئۆپەراسیۆنەكەش وەك ئەوەی پێشتر پلانی بۆ دانرابوو وەك خۆی بەدەست هات.


راگەیاندنی فەرماندەیی هێزەكانی كۆماندۆی كوردستان

سبەی سێ ساڵ بەسەر ژیانئاوایی شەهیدی فەرماندە "ئاكام عومەر" تێپەڕ دەبێت...

فەرماندە و برا و هاوڕێ و هاوسەنگەرمان بووە ناوێكی دیار و درەوشاوەی مێژووی خەباتی گەلی كورد و پێشمەرگە و "كۆماندۆی كوردستان"، كە بە تەمەنێكی كەمەوە مێژوویەكی پڕ لە شانازی تۆماركرد، بۆیە نەبەردییەكانی ئەو جوامێرە بۆ هەمیشە لە یادەوەرییەكانی كۆمەڵانی خەڵكی كوردستاندا بە زیندوویی دەمێنێتەوە.

لەم یادەدا بە رێز و شكۆوە لە حزووری رۆحی پیرۆزییدا دەست لەسەر دڵ، بیر و یادی دەكەینەوە و بەردەوام ئیلهام لە ڕێگە و رێبازەكەی وەردەگرین، كە خۆشەویستی بۆ خاك و نیشتمان لە ترۆپكی ئاواتەكانی بوو، بۆیە هەر بەو خۆشەویستییەوە خوێنی كردە خەڵات و بەڵێنەكەی، كە بە خودا و خاك و گەلی كوردی دا جێ بەجێ‌ كرد.

شەهید " ئاكام عومەر" فەرماندەیەكی گەنجی جوامێری خواناسی پیاوخاس بوو، ڕێبازێكی بۆ براكانی لە"كۆماندۆی كوردستان"جێ هێشت، كە ئێستاش ڕێگە ڕۆشن و كاروانەكەی بەردەوامە، لە ژیانیدا بەردەوام هانی هەمووانی دەدا خاك ویست و خۆنەویست بین، دڵسۆز و وەفاداربین بۆ گەل و نیشتمان، هەمیشە لە بەرەی خەڵك بین و دژی نەیار و دوژمنانی كورد و گەلەكەی بین.

پەردە لەسەر پەیكەری شەهیدی فەرماندە "ئاكام عومەر" لادرا.

لەسێهەمین ساڵڕۆژی شەهیدبوونی فەرماندە "ئاكام عومەر" لە باخچەی شەهید "ئاكام" لە گەڕەكی سەرچناری شاری سلێمانی پەردە لەسەر پەیكەری شەهیدی فەرماندە "ئاكام عومەر" لە ژێر ناوی هێمای فیداكاری شەهیدانی كوردستان لە دژی تیرۆرستان لادرا.

پێشنیوەڕۆی ئەمڕۆ هەینی 12ی 12ی 2025 بە ئامادەبوونی هەریەکە لە بەڕێزان فەرماندە دیار عومەر، فەرماندەی هێزەكانی كۆماندۆی كوردستان و دكتۆر هاوڕێ دارۆی شێخ نوری ، ئەندامی مەكتەبی سیاسی یەكێتی نیشتمانی كوردستان و وەهاب هەڵەبجەیی، بەڕێوەبەری گشتی دژەتیرۆری کوردستان (CTG) و ژمارەیەک لە بەرپرسانی حكومی و حزبی و سەربازی و خانەوادەی سەربەرزی شەهیدی فەرماندە "ئاكام عومەر" و هاوڕێ و هاوسەنگەرانی لە ڕێوڕەسمێكی تایبەت و شایستەدا لە لایەن پێشمەرگەی دێرین و تێكۆشەر عومەر عوسمان، باوكی شەهید "ئاكام" پەردە لەسەر پەیكەرەكەی لادرا.

پەیکەرەکە بە بەرزی 2 مەتر و 50 سانیتمەتر بە بڕۆنز و لەسەر ئەركی دكتۆر هاوڕێ دارۆی شێخ نوری دۆست و هاوڕێی شەهید ئاكام عومەر و كوڕانی كۆماندۆی كوردستان دروستكراوە.

راگەیاندنی فەرماندەیی هێزەکانی کۆماندۆی کوردستان

شەهید "ئاکۆ سابیر حەمە رەزا"
بە ئاکار و ڕەفتارە جوانەکانیەوە گەڕایەوە لای پەروەردگار و ڕۆحی بەخشیە ئارامی و ئاسایشی شارەکەی و خاكی پیرۆزی كوردستان.

ئەمڕۆ شەممە ١٣ی کانونی یەکەمی ٢٠٢٥ بەبیستنی هەواڵی شەهیدبوونی کاکە "ئاکۆ سابیر حەمە رەزا" کارمەندی بەڕێوەبەرایەتیی ئاسایشی رۆژئاوای سلێمانی هەمووانی خەمبار و دڵتەنگ کرد، کە دوێنێ لەکاتی راپەڕاندنی ئەرکێکی پیرۆزدا بۆ خزمەتکردنی لێقەوماوانی لافاوەکەی چەمچەماڵ برینداربوو و هەر بەو هۆیەوە بە ناحەق شەهیدکرا.

بۆ ئەم كۆستە گەورەیە پرسە و سەرەخۆشی خۆمان ئاڕاستەی خانەوادە و كەسوكاری سەربەرزی شەهید کاکە " ئاکۆ" و هاوڕێ و هاوسەنگەرانی دەكەین و لەخوای گەورە داواكارین رۆحی پاکی بە بەهەشت شاد بكات و سەبووری بە هەموو لایەك بدات.

كۆمەڵانی خەڵكی كوردستان دڵنیادەكەینەوە، كە شەهیدبوونمان لە پێناو خاكی پیرۆزی كوردستان و ئارامی و ئاسایشی هاووڵاتیان بۆ ئێمە لە "هێزەكانی  كۆماندۆی کوردستان" و هەروەها براكانمان لە ئاسایش ڕێبازێكە هەموو شانازی پێوە دەكەین و بەردەوام دەبین.

ڕۆحی شەهیدانمان شاد و یاد و یادەوەرییەكانیان هەمیشە زیندوو

ڕاگەیاندنی فەرماندەیی هێزەكانی كۆماندۆی كوردستان

﷽
(وَبَشِّرِ الصَّابِرِينَ الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ)
صدق الله العظيم

بەداخ و پەژارەیەکی زۆرەوە ھەواڵی مەرگی پێشمەرگەی فەرماندەییمان کاکە (ئەحمەد عیزەدین عەبدولکەریم) ڕادەگەیەنین، کە جوانە مەرگ درەنگانی شەوی دوو شەممە رێکەوتی ٢٢ لەسەر ٢٣ی کانونی یەکەمی ٢٠٢٥ بە کارەساتێکی دڵتەزێن گیانی سپارد.

بۆ ئەم کۆستە گەورەیە هەموو دڵتەنگ و خەمبارین و پرسە و ھاوخەمی خۆمان ئاڕاستەی خانەوادە و کەسوکار و بنەماڵە بەڕێزەکەی و هاوڕێ و هاوسەنگەرانی کاکە (ئەحمەد)ی جوانە مەرگ دەکەین، لەخوای گەورە داواکارین گیانی پاکی بە بەھەشتی بەرین شاد بکات و سەبووری هەموو لایەکمان بدات.

راگەیاندنی فەرماندەیی هێزەکانی کۆماندۆی کوردستان

ساڵی نوێتان پیرۆز بێت...

لەکاتێکدا جیهان و هەرێم خۆی ئامادە دەکات بۆ ئەوەی پێشوازی لە ساڵێکی نوێ بکات، کوڕانی کۆماندۆی کوردستان زمانی "وەستان و پشوو" نازانێ و وەک قەڵغانێکی چەسپاو دەبین بۆ پاراستنی خاک و نیشتمان.

کاتێک گڵۆپەکان لە ئاهەنگەکاندا داگیرسێنراون
ئێمە ئەو چاوانەین، کە لە تاریکیدا پاسەوانی ئەو ڕووناکیی و خۆشیەی خەڵکی دەکەین.

لەگەڵ دەستپێکی ساڵێکی نوێ بەڵێن دەدەین وەک هێزێکی نەبڕاوە، دەستێکی پۆڵایین بین بۆ پارێزگاری لە خاکی پیرۆزی کوردستان، کە ئەمە ڕێبازێکە تاک بە تاکی "کوڕانی کۆماندۆ"ی لەسەر جۆش و گۆشکراوە.

جارێکی دیکە هاتنەوەی ساڵی نوێ لە کوردستانیانی خۆشەویست پیرۆز دەکەین...

راگەیاندنی فەرماندەیی هێزەکانی کۆماندۆی کوردستان

کۆماندۆی کوردستان
ئەو کاتەی هیوایەک نامێنێت، کاری ئێمە دەست پێدەکات

#پارێزەری_خاک_و_نیشتمان

"کۆبانێ" بۆ جیهان دەدرەوشێتەوە...
١١ ساڵ پێش ئێستا دوای ئەوەی "شاری کۆبانێ" لەلایەن تیرۆریستانی د١١عشەوە گەمارۆ درا و بەشێکی بەرچاویشی داگیرکرا، پاش ١٣٣ رۆژ شەڕو بەرەنگاری لە رێکەوتی ٢٠١٥/١/٢٦ بە هاوکاریی و بەشداریی راستەوخۆی هێزەکانی پێشمەرگەی کوردستان، کە لە باشووری نیشتمانەوە بەهانای ڕۆژئاواوە رۆیشتن، بە تەواوی رزگارکرا و لە تیرۆریستان پاککرایەوە.

دوای ١١ ساڵ هێشتا بەرخودان لەو بەشەی نیشتمان بەردەوامە، ئەمجارە لە بەرگێکی نوێدا و بە پشتیوانیەکی فراوانەوە، کە ئامانج لێی سڕینەوەی شوناسی گەلەکەمانە، بێ ئاگا لەوەی لە مێژوودا زۆربوون ئەوانەی هەوڵی سڕینەوەی شوناسی ئێمەیاندا و نەیاتوانی و بۆیان نەکرا " کورد" لەناوبەرن، لە کۆتاییدا سەریان دا لە تاشە بەردەکانی چیا سەرکەشەکانی کوردستان.

#بەرخودان_ژیانە

درود و سڵاو بۆ شەهیدانی ڕێگای رزگاری کوردستان و پارێزەرانی شوناسی کوردایەتی ...

راگەیاندنی فەرماندەیی
هێزەکانی کۆماندۆی کوردستان

شەهید "ئەحمەد هێمن عومەر کەرکوکی"
لە پێناو خاکی پیرۆزی کوردستان لە ڕۆژئاوا شەهید بوو، بەڵام بووە سمبولی یەکڕیزی و پارێزەری کەرامەتی 40 ملیۆن کورد و جارێکی دیکە لە کەرکوکی کوردانەوە وانەی کورداییەتی دووبارە کردەوە.

ئەمڕۆ هەموو ڕۆژی یەکدەنگی و شکۆی "ئەحمەد کەرکوکی" بەڕێدەکەین و کورد و کوردستانیان و کەرکوکییەکان بە شکۆ و شانازییەوە باوەش بۆ تەرمی شەهیدێکی گەنجی نیشتمان دەکەنەوە، کە جارێکی دیکە بانگی کوردایەتی و مەردایەتی بە گوێی جیهاندا دا، کە کورد نەتەوەیەکی زیندوو و تێکۆشەر و کۆڵنەدەرە، بۆ پارێزگاری لە خاکەکەی سنورە دەستکردەکان تێکدەشکێنێ و بۆ بەبەرزی مانەوەی شکۆی کورد خوێنی دەکاتە خەڵاتی گەلەکەی.
درود بۆ رۆحی پیرۆزی شەهیدانی ڕێگای رزگاری کوردستان...

بێ قوسوورە چەند جەسوورە سەد شوکر ئەولادەکەت
وا لە ڕێی تۆدا لە خوێنا سەیری چۆن ئەتلێتەوە
بەسیە تەعنەم لێ مەدە هەر ڕۆڵەکەی جارانتم
هێندە حیلمت بێ هەتاکو دەست و پێم ئەکرێتەوە
شەرتە شەرتی پیاوەتی بێ گەر خودا دەستم بدا
دوژمنت پەت کەم وەکو سەگ بیخەمە ژێر پێتەوە ....

كۆماندۆی كوردستان ڕێگری لە دروستكردنی حەشارگەی نوێی تیر*ۆرستانی د11عش لە ناوچەكانی سنوری گەرمیان كرد و سەرجەمیان خاپوور و تەقێنرانەوە.

بەرەبەیانی ئەمڕۆ سێ شەممە 10ی شوباتی 2026 فەرماندەیی هێزەكانی كۆماندۆی كوردستان بە هەماهەنگی فەوجی كەركوكی دژەتیرۆری عیراق و فڕۆكە و هێزەكانی هاوپەیمانان و بە هاوبەشی تیمێكی تایبەتی هێزەكانی فەرەنسا ئۆپەراسیۆنێكیان بۆ ناوچەكانی سنوری (پەڵكانە و دوراجی) و بەرزاییەكانی ئەو سنورە ئەنجامدا.

لەگەڵ گۆڕانكارییەكانی ئەم دواییەی سووریا و ڕۆژئاوای كوردستان، دوای دەستخستنی زانیاری ووردی هەواڵگری "كۆماندۆی كوردستان"، كە ژمارەیەك لە تیر*ۆرستانی د11عش لە سنوری ناوچەی پەڵكانە و دوراجی و دەوروبەری خەریكی جموجوڵ و دروستكردنی حەشارگەی نوێبوون تا ببنە مەترسی بۆ سەر خەڵكی ناوچەكە.

"كوڕانی كۆماندۆی كوردستان" هاوشانی هێزەكانی بەشدار لە ئۆپەڕاسیۆنەكە توانیان دەیان كیلۆمەتری چوارگۆشە لە سنورەكە كێوماڵ بكەن و شوێن پێ و ئاسەواری تیر*ۆرستان هەڵگیرایەوە و چەند حەشارگەیەك لە لایەن تیمی (E.O.D) كۆماندۆوە تەقێنرایەوە و سەرجەمیان خاپوركران.

هاوكات، بەڕێز فەرماندەی فەرماندەیی هێزەكانی كۆماندۆی كوردستان "كوڕانی كۆماندۆ"ی ڕاسپارد بەردەوام بن، لەسەر ئەم جۆرە ئۆپەراسیۆنانە بە مەبەستی كۆتایی هێنان بە پاشماوە و سەر هەڵدانەوەی تیر*ۆرستانی د11عش لەو ناوچانە.

راگەیاندنی فەرماندەیی هێزەكانی كۆماندۆی كوردستان

هاتنەوەی "مانگی پیرۆزی رەمەزان" مانگی فەڕ و بەرەكەت و عبادەت و خواپەرستی لە خۆمان و سەرجەم موسڵمانان پیرۆز دەكەین.

پەروەردگار ئەم مانگەمان بۆ بكاتە سەرەتای ئاشتی و سەقامگیری و مسۆگەركردنی ژیان و بژێوی و ئاسایشی كۆمەڵایەتی ... ببێتە مایەی خێر و خۆشی و دڵئاوایی.

دەخوازین... هاتنەوەی ئەم مانگە پیرۆزە ببێتە دەرفەت و هاندەری هەموو لایەكمان، بۆ برەودان بە گیانی تەبایی و لێبوردەیی لەپێناو خێر و چاكە و بەها باڵاكانی مرۆڤ و ئاشتی و ئاشتەوایی.

خوای گەورە كوردستان و گەلەكەمان بپارێزێت و ڕۆژوو و خواپەرستی هەمووان قبوڵ بكات.

راگەیاندنی فەرماندەیی هێزەكانی كۆماندۆی كوردستان

جەژنتان پیرۆز بێت...
بەبۆنەی هاتنەوەی جەژنی رەمەزانەوە پیرۆزباییەکی گەرم ئاراستەی سەرجەم موسڵمانان بەگشتی و گەلی کوردمان بەتایبەتی دەکەین.

لەخوای گەورە داواکارین رۆژو و تاعەت و خواپەرستی هەموو لایەک قبوڵ بێت و هاتنەوەی ئەم جەژنەش بکاتە مایەی خێر و خۆشی بۆ هەموو لایەکمان و ببێتە ئامرازی بەدیهاتنی ژیانێکی ئازاد و چارەسەرکردنی هەموو کێشەکان و کۆتایی هاتنی هەموو ناڕەحەتییەکان.

راگەیاندنی فەرماندەیی هێزەکانی کۆماندۆی کوردستان

بەهار و نەورۆز و راپەڕین
ساڵی نوێی ٢٧٢٦ی کوردان پیرۆز...

هەموو ساڵێک رۆژی ٢١ی ئازار جگە لەوەی دەستپێکی ساڵێکی نوێی کوردیە، هاوکات یادەکانی سەرکەوتنی راپەڕین و جەژنی نەورۆز دەکەینەوە، کە ئەم یادانە بوونەتە هێما و سیمبولی ئازادی و خۆڕاگری نەتەوەکەمان، ئەم مێژووە یادی بەگژداچوونەوەی داگیرکەرانی خاک و ئەوانەشە کە کاریان لە سەر سڕینەوەی ناسنامەی گەلەکەمان کردووە و دەیکەن.

لای ئێمە نەورۆز و راپەڕین دوانەی خەبات و بەرخودانێکی دوور و درێژی گەلەکەمانە، کە بۆ ئازادی تەمەنێک شۆڕش و خوێنمان بەخشی، دواتر بەرهەمەکەی بووە مەشخەڵی ئازادی و نوسینەوەی وانەکانی سەرکەوتن بۆ نەوەکانی داهاتوو.

جارێکی دیکە پیرۆزبایی لە خەڵکی بەشەرەفی کوردستان بەگشتی و هاووڵاتیانی خۆشەویستی "کەرکوک" بەتایبەتی دەکەین بۆ ئازادکردنی شارەکە لەم مێژووە پیرۆزەدا، هەر لێرەشەوە پێویستە هەموو لایەک ئەم بۆنەیە بکەنە وێستگەی بەخۆداچوونەوە و هەوێنی ئاشتەوای نیشتیمانی.

ساڵی نوێی ٢٧٢٦ی کوردی و جەژنی نەورۆز و راپەڕین و ئازادی کەرکوک لە هەمووان پیرۆز ...

درود بۆ رۆحی پیرۆزی ئەو شەهیدانەی بەخوێنیان نەورۆز و راپەڕین و ئازادی کەرکوکیان پێشکەشی ئەم نیشتمانە کرد.

راگەیاندنی فەرماندەیی هێزەکانی کۆماندۆی کوردستان

بِسْمِ اللهِ الرَّحْمنِ الرَّحِيمِ
(وَبَشِّرِ الصَّابِرِينَ الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ)
صدق الله العظيم

پرسەو سەرەخۆشی خۆمان ئاڕاستەی بنەماڵەی ئەو شەهیدانە دەكەین، كە بەرەبەیانی ئەمرۆ سێشەممە بەهۆی هێرشی مووشەكی سەر بارەگاكانی هێزی پێشمەرگە لە سنووری قەزای خەلیفان شەهیدبوون.

ئاشكرایە هێزی پێشمەرگە دەستوری و یاساییە و هەر لەو چوارچێوەیەدا كاروبارەكانی ئەنجام دەدات و لە رابردووشدا بە بەرچاوی هەموو جیهانەوە، بووینە قەڵغانی پاراستنی جیهان لە دەست تیرۆرستان و هاوكات پێشمەرگە قارەمانەكانمان بوونە بەشێكی سەرەكی لە تێكشكاندنی ئەفسانەی داعش.

هێرشكردنە سەر هێزی پێشمەرگە لە هەر لایەكەوە بێت كارێكی ترسنۆكانە و تیرۆرستانەیە و نابێت ئەم تاوانە بێ لێپرسینەوە تێپەڕێت و پێویستە ئەنجامدەرانی ئەم جۆرە كردەوانە بەسزای یاسایی بگەن، هەروەها حكومەتی هەرێم و عیراق و كۆمەڵگەی نێودەوڵەتی هەوڵەكانیان بخەنەگەڕ بۆ رێگریكردن لە دووبارەبوونەوەی هەر جۆرە هێرشێكی هاوشێوە دژی هەرێمی كوردستان و هێزی پێشمەرگەی قارەمان.

جارێكی دیكە پرسە و سەرەخۆشی خۆمان ئاڕاستەی كەسوكار و بنەماڵە و هاوسەنگەرانی شەهیدەكان دەكەین، هیوای زوو چاكبوونەوەش بۆ بریندارەكان دەخوازین.

راگەیاندنی فەرماندەیی هێزەكانی كۆماندۆی كوردستان